Bajuda ba bogologolo ba be ba tšhaba mohuta wa lephera wo o bego o atile mehleng ya ge go be go ngwalwa Beibele. Bolwetši bjoo bjo bo boifišago bo be bo hlasela megalatšhika ya motho yo bo mo swerego gomme bja e senyetša sa ruri le go dira gore motho yoo a se sa hlwa a bogega. Go be go se na kalafo yeo e tsebjago ya lephera. Ka gona, bao ba bego ba na le lona ba be ba dula kgole le batho gomme ba be ba swanetše go lemoša ba bangwe ka boemo bja bona.​—Lefitiko 13:45, 46.

Baetapele ba bodumedi bja Sejuda ba be ba ipeetše melao tabeng ya lephera yeo e bego e feteletša seo se bego se ngwadilwe ka Mangwalong, gomme seo se be se thatafaletša bao ba bego ba na le lephera bophelo go sa hlokagale. Ka mohlala, melao ya baetapele ba bodumedi bja Sejuda e be e re motho o swanetše go ba kgole le molephera ka dimithara tše pedi. Eupša ge moya o be o foka, molephera o be a swanetše go ba bokgole bja dimithara tše 45. Batho ba bangwe bao ba ithutetšego melao le metlwae ya Sejuda ba be ba hlalosa taba ya Mangwalo ya gore balephera ba phele “ka ntle ga kampa” e le yeo e bolelago gore ba swanetše go dula kantle ga merako ya motse. Ka gona, ge moruti yo mongwe a be a ka bona molephera a le motseng o be a mo foša ka maswika gomme a re: “Eya mo o swanetšego go dula gona, o se ke wa šilafatša batho ba bangwe.”

Jesu o be a swara balephera ka tsela e fapanego. Go e na le gore a rake balephera, o be a ba kgoma​—e bile a ba fodiša.​—Mateo 8:3.

Baetapele ba bodumedi ba lekgolong la pele la mengwaga C.E ba be ba ngangišana ka taba ya tlhalo. Ka gona, lebakeng le lengwe, Bafarisei ba bangwe ba ile ba leka Jesu ka go mmotšiša gore: “Na go dumelelwa ke molao gore monna a hlale mosadi wa gagwe ka lebaka le lengwe le le lengwe?”​—Mateo 19:3.

Molao wa Moshe o be o dumelela monna go hlala mosadi wa gagwe ge e ba a “hweditše selo se sengwe seo a se bonego se sa hlomphege go yena.” (Doiteronomio 24:1) Mehleng ya Jesu, go be go na le dikolo tše pedi tšeo di bego di ruta kgopolo ya baetapele ba bodumedi bja Sejuda, tšeo di bego di hlalosa ka go se swane seo se bego se bolelwa ke molao woo. Sekolo se thata sa Shammai, se be se hlalosa kgopolo yeo e le e bolelago gore lebaka le nnoši le legolo la tlhalo e be e le “go se hlweke,” ke gore bohlotlolo. Ka lehlakoreng le lengwe, Sekolo sa Hillel se be se re monna o dumeletšwe ke molao go hlala ka mabaka a ge go na le mathata le ge e le afe lenyalong, go sa šetšwe gore ke a manyenyane gakaakang. Go ya ka sekolo seo, monna o be a ka hlala mosadi wa gagwe ge e ba a mo hlafišeditše dijo tša mantšiboa goba ge e ba a hweditše mosadi yo a mmonago a phala wa gagwe.

Ka gona, Jesu o ile a araba bjang potšišo ya Bafarisei? O ile a re: “Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.”​—Mateo 19:6, 9.