BATHO ba na le dikgopolo tše dintši le tše di fapafapanego ka bophelo le lehu. Ba bangwe ba nagana gore ge ba hwile ba tla tšwela pele ba phela, mohlomongwe ba le ka sebopego se sengwe goba ba phela lefelong le lengwe. Ba bangwe ba nagana gore ba tla tswalwa gape gore ba phele bophelo bjo bongwe. Ba bangwe bona ba nagana gore lehu ke mafelelo a dilo ka moka.

Le wena o ka ba o na le seo o se dumelago ka taba ye, go ithekgile ka tsela yeo o godišitšwego ka yona goba setšo sa geno. Ka ge go na le dikgopolo tše di fapafapanego mabapi le seo se diregago ge motho a ehwa, na go na le motho yoo a ka re thušago goba moo re ka hwetšago dikarabo tšeo re ka di tshepago le tša therešo tša potšišo ye yeo e gakantšhago?

Baetapele ba bodumedi ba tšere mengwaga e makgolo ba ruta thuto ya gore moya wa motho ga o hwe. Balatedi ba mo e nyakilego go ba madumedi ka moka a magolo—Bakriste, Mahindu, Bajuda, Mamoseleme le ba bangwe—ba dumela gore go na le moya o sa hwego, woo go thwego o phologa lehu la mmele le go tšwela pele o phela lefelong la moya. Ka lehlakoreng le lengwe, Mabuddha a dumela gore ge matla a monagano ao a lego mothong a tswalwa gape ka makga a mantši, a fihla boemong bja lethabo bjo bo bitšwago Nirvana.

Ka baka la dithuto tše bjalo, batho ba bantši lefaseng ka bophara ba dumela gore lehu le bulela motho mojako wa go yo phela lefaseng le lengwe. Ka baka leo, ba bantši ba tšea lehu e le mogato o bohlokwa bophelong, e bile ba tšea lehu e le thato ya Modimo. Eupša Beibele e re’ng ka taba ye? Hle bala sehlogo se se latelago. Karabo ya gona e ka go makatša.