Ye ke tsela yeo mosetsana yo mongwe wa mengwaga e 13 a ilego a ikwa ka yona ge a be a newa mpšanyana. Mosadi yo a atlegilego go tša kgwebo o itše khomphutha yeo tatagwe a ilego a mo nea yona ge a be a sa le sekolong se se phagamego e bile mpho yeo e ilego ya fetoša bophelo bja gagwe. Monna yo a sa tšwago go nyala o re ka morago ga gore yena le mosadi wa gagwe ba fetše ngwaga ba nyalane, mosadi wa gagwe o ile a mo direla karata. Monna yoo o re o tšea karata yeo e le mpho e phalago tšohle tšeo a kilego a di hwetša.

Ngwaga o mongwe le mongwe nakong ya ditiragalo tše di kgethegilego, batho ba bantši ba fetša nako le go dira maiteko ba nyakana le seo se tšewago e le mpho e kaonekaone bakeng sa mogwera goba wa leloko. Ba bantši ba batho bao ba ka rata go kwa karabelo ya go swana le ya bao go boletšwego ka bona mathomong a sehlogo se. Go thwe’ng ka wena? Na o ka rata go nea goba go amogela mpho yeo e tšeelwago godimo?

Yeo e ka ba taba e kgahlišago, e sego feela go motho yo a newago mpho eupša le tabeng ya gore yo a e neago o ikwa bjang. Beibele e re: “Go na le lethabo le legolo go neeng go feta go amogeleng.” (Ditiro 20:35) Ke therešo gore lethabo la go nea le ka oketšega ge e ba mpho yeo e tšeelwa godimo.

Bjale, o ka dira eng gore wena le motho yo o mo neago mpho le thabe? Le gona, ge e ba o sa kgone go nea seo se tšewago e le mpho e kaonekaone, o ka dira eng gore mpho ya gago e tšeelwe godimo?