“[A] a šome ka thata, a dire se sebotse ka diatla tša gagwe, gore a be le seo a ka se abelago yo mongwe yo a hlokago.”—BAEFESO 4:28.

Mmopi wa rena o nyaka gore re tšee mošomo o le bohlokwa. Ka baka la’ng? Motho yo a šomago ka thata o a thaba ka gobane o kgona go itlhokomela le go hlokomela lapa la gagwe. A ka kgona le go thuša motho yo a hlokago thušo. Mongmošomo wa gagwe le yena o tlo mo tšeela godimo. Ka gona motho yo a šomago ka thata, a ka se lahlegelwe ke mošomo wa gagwe ga bonolo. Ge Mangwalo a hlalosa bohlokwa bja go šoma ka thata a re “Ke mpho ya Modimo.”—Mmoledi 3:13.

“Re holofela gore re na le letswalo le botegago, ka ge re rata go itshwara ka go botega dilong tšohle.”—BAHEBERU 13:18.

Ge re botega, re ba le seriti, ra ba le khutšo ya monagano e bile re robala gabotse bošego. Le gona, batho ba bangwe ba tlo re tshepa le go re hlompha. Batho bao ba sa botegego ba itima dilo tše tše dibotse. Le gona, letswalo la bona le dula le ba tshwenya ka ge ba phela ba tšhogile gore ka letšatši le lengwe batho ba ka tla ba tseba seo ba se dirago.

“Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona.”—BAHEBERU 13:5.

Re hloka tšhelete gore re reke dijo le dilo tše dingwe tšeo re di hlokago. Le ge go le bjalo, go rata tšhelete go kotsi kudu. Ka baka la’ng? Ka gobane motho yo a ratago tšhelete a ka šomiša nako ya gagwe e ntši le matla go dira tšhelete. Ka ge a šoma ka thata gore a hwetše tšhelete e ntši, a ka dira gore lenyalo la gagwe le se sa ba bose, a se sa fetša nako le bana ba gagwe, mohlomongwe a ba a babja. (1 Timotheo 6:9, 10) Motho yo a ratago tšhelete a ka lekega gore a se botege. Monna yo bohlale o ile a re: “Motho yo a botegago ditirong tša gagwe o tla hwetša ditšhegofatšo tše dintši, eupša yo a akgofelago go hwetša mahumo o tla ba le molato.”—Diema 28:20.

“Lota bohlale le tlhaologanyo.”—DIEMA 3:21.

Thuto e botse e dira gore re botege e bile e thuša batswadi gore e be batswadi ba babotse. Eupša thuto yeo e nnoši ga e re kgonthišetše gore re tla dula re thabile le go ba le dilo tšeo re di hlokago. Go re dilo ka moka di re sepelele gabotse bophelong, re hloka thuto yeo Modimo a re neago yona. Ge Mangwalo a bolela ka motho yoo a theetšago Modimo a re: “Se sengwe le se sengwe seo a se dirago se tla atlega.”—Psalme 1:1-3.