Dilo tšeo o nyakago go di fihlelela ga e fo ba toro, goba dilo tšeo o dumago eka di ka direga. E le gore o fihlelele dilo tšeo o di nyakago, o swanetše go ba le thulaganyo, o fetofetoge le maemo gomme o šome ka thata.

Dilo tšeo o nyakago go di fihlelela di ka tšea matšatši goba dibeke gore o di fihlelele, tše dingwe di ka tšea dikgwedi gomme tše dingwe tša tšea ngwaga goba go feta moo. Dilo tšeo di tšeago ngwaga goba go feta moo gore o di fihlelele, di ka nyaka gore o di dire ganyenyane-ganyenyane.

Lebaka ke gore ge o hwetša dilo tšeo o bego o di nyaka, o tlo ikwa o itshepa, wa ba le bagwera ba nnete gomme wa thaba kudu.

Go ikwa o itshepa: Ge o fihlelela dilo tše dinyenyane, o a tshepa gore o ka kgona go fihlelela le tše dikgolo. O tlo kgona le go swaragana le mathata a letšatši le letšatši, a bjalo ka go se dire dilo tše di fošagetšego tšeo ba bangwe ba ka go gapeletšago go di dira.

Segwera: Batho ba rata go gwerana le batho bao ba nyakago go fihlelela dilo tše itšego bophelong, ke gore, batho bao ba tsebago seo ba se nyakago bophelong gomme ba šoma ka thata gore ba hwetše selo seo. Go oketša moo, segwera se a tia ge batho ba šoma mmogo gore ba fihlelele selo se itšego.

Lethabo: Ge o ipotša gore o nyaka go fihlelela dilo tše itšego gomme mafelelong o di fihlelela, o thaba kudu.

Christopher o re: “Ke motho wa go rata go fihlelela dilo tše itšego bophelong. Seo se nthuša gore ke dule ke na le seo ke se dirago bophelong le go thabela bophelo. Ge o fihleletše selo seo o bego o se nyaka o a thaba, ke moka wa re: ‘Banna! Ka tla ka šoma.’”

MOLAO WA MOTHEO WA BEIBELE: “Yo a šeditšego phefo a ka se bjale peu; yo a lebeletšego maru a ka se bune.”—Mmoledi 11:4 Today’s English Version.

Ge o nyaka go fihlelela dilo tše itšego bophelong, dira dilo tše di latelago.

Tseba dilo tšeo o di nyakago. Ngwala dilo tšeo o nyakago go di fihlelela. Ge o di ngwala o thome ka yeo o nyakago go e fihlelela pele.

Tseba seo o swanetšego go se dira gore o di fihlelele. Bakeng sa selo se sengwe le se sengwe seo o nyakago go se fihlelela, dira dilo tše di latelago:

• Ipeele nako e lekanego yeo o tlago go fihlelela selo seo ka yona.

• Nagana ka dilo tšeo di nyakegago gore o fihlelele selo seo.

• Nagana ka mathata ao o ka kopanago le wona, o nagane le kamoo o tlago go a rarolla ka gona.

Thoma go šoma. Ge o nyaka go fihlelela selo se itšego, o se ke wa leta go fihlela o eba le dilo ka moka tše di nyakegago gore o se fihlelele. Ipotšiše gore: ‘Nka thoma ka eng pele gore ke fihlelele selo se?’ Ka morago ga moo, thoma. Ge o feditše go dira selo se itšego, fetela pele.

MOLAO WA MOTHEO WA BEIBELE: “Maano a motho yo mafolofolo a a mo hola.”—Diema 21:5.