Batswadi bao ba beelago bana mohlala o mobotse ke bao ba dirago seo ba se rutago. Ka mohlala, a re re go na le motho yo a kokotago mojako gomme o a go nyaka, ke moka, o botša motho yo a butšego mojako gore a mmotše gore ga o gona. Ge ngwana wa gago a ka go kwa o bolela maaka ao, na o ka letela gore ka moso a bolele nnete?

David o re: “Batho ba bantši ba tlwaetše gore: ‘Dira seo ke go botšago sona, o se ke wa ekiša nna.’ Bana ga ba bjalo. Ba ekiša selo le ge e le sefe seo re se bolelago goba re se dirago, e bile ge o sa dire seo o ba botšago sona, ba a go botša.”

MOLAO WA MOTHEO WA BEIBELE: “Wena yo a bolelago gore: ‘O se ke wa utswa,’ na o a utswa?”—Baroma 2:21.

Bana le bafsa ba rata go ekiša batswadi ba bona go feta go ekiša motho le ge e le ofe, go akaretša le dithaka tša bona. Seo se bontšha gore ke wena o lego boemong bjo bobotse bja go hlahla bana ba gago, eupša o tla atlega ge feela o dira seo o ba rutago sona.

Nicole o re: “Re ka botša ngwana selo se itšego gantšintši gomme ra ipotšiša ge e ba a re kwa, eupša mohlang rena re palelwago ke go dira seo re mmoditšego sona, o tlo re gopotša kapela. Bana ba lebeletše selo se sengwe le se sengwe seo re se dirago, le ge rena re nagana gore ga ba bone selo.”

MOLAO WA MOTHEO WA BEIBELE: “Bohlale bjo bo tšwago godimo . . . ga bo na boikaketši.”—Jakobo 3:17.

Itlhahlobe. O bogela dilo tša mohuta mang? O swara bjang molekane wa gago le bana ba gago? Bagwera ba gago ke ba mohuta mang? Na o rata batho ba bangwe? Ka mantšu a mangwe, na o nyaka gore bana ba gago ba swane le wena?

Christine o re: “Nna le monna wa ka ga re letele gore bana ba rena ba phele ka tsela yeo re sa phelego ka yona.”

Kgopela tshwarelo ge o dirile phošo. Bana ba gago ba a tseba gore le wena o dira diphošo. Eupša ge o ka kgopela tshwarelo ge o fošitše, seo se tlo thuša molekane wa gago le bana ba gago gore le bona ba kgone go kgopela tshwarelo ge ba fošitše.

Robin o re: “Bana ba rena ba swanetše go re kwa ge re dumela gore re dirile phošo gomme ba re kwe le ge re kgopela tshwarelo. Ge re ka se dire bjalo, le bona ba ka se amogele diphošo tša bona.”