Go lebalela ke go se boloke sekgopi le go se dule o galefile. Go lebalela ga go bolele gore o nyenyefatša phošo goba go dira tše ekego ga se gwa direga selo.

MOLAO WA MOTHEO WA BEIBELE: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe.”—Bakolose 3:13.

Aaron o re: “Ge o rata motho, ga o dule o lebeletše diphošo tša gagwe, go e na le moo, o lebelela botse bjo a lekago go bo dira.”

Ge o dula o kgopišegile, o ka lwala e bile o ka senya lenyalo la gago.

Julia o re: “Ka letšatši le lengwe, monna wa ka o ile a nkgopela tshwarelo ka selo seo se bego se nkgopišitše kudu. Go be go se bonolo gore ke mo lebalele. Mafelelong ke ile ka mo lebalela, eupša ke itsholela gore ga se ka dira seo ka pela. Ka ge ke ile ka tšea nako go mo lebalela, seo se ile sa nyaka se senya lenyalo la rena.”

ITLHAHLOBE

Ge molekane wa gago a ka go kgopiša, ipotšiše gore:

• ‘Na ke kgopišega ka pela?’

• ‘Na selo seo a nkgopišitšego ka sona ke se segolo moo ke nyakago gore a nkgopele tshwarelo, goba na nka fo lebala ka taba yeo?’

BOLEDIŠANA LE MOLEKANE WA GAGO KA DIPOTŠIŠO TŠE

• Gantši go re tšea nako e kaaka’ng gore re lebalelane?

• Re ka dira’ng gore re lebalelane ka pela?

DITŠHIŠINYO

• Ge molekane wa gago a go kgopišitše, o se ke wa nagana gore ga a na taba le wena.

• Ge molekane wa gago a go kgopišitše, leka go mo kwešiša, gomme o gopole gore “ka moka ga rena re kgopša gantši.”—Jakobo 3:2.

Kimberly o re: “Go bonolo go lebalelana ge re tseba gore re fošetšane, eupša go thata ge o bona gore phošo e dirilwe ke molekane wa gago. O swanetše go ba le boikokobetšo gore o kgone go lebalela molekane wa gago.”

MOLAO WA MOTHEO WA BEIBELE: “Lokiša ditaba ka go akgofa.”—Mateo 5:25.