Mekgwa ke tsela yeo o ipotšago gore o nyaka go phela ka yona. Ka mohlala, na o leka go tshepagala dilong ka moka? Ge e ba go le bjalo, ga go pelaelo gore o nyaka go ruta bana ba gago gore le bona ba tshepagale.

Le gona mekgwa e akaretša seo o bonago se lokile. Ka mohlala, motho yo a nago le mekgwa e mebotse o šoma ka thata, o dira dilo ka tekatekano e bile o tshwenyega ka batho ba bangwe, e lego mekgwa yeo motho a swanetšego go ithuta go ba le yona e sa le yo monyenyane.

MOLAO WA MOTHEO WA BEIBELE: “Tlwaetša mošemane [goba ngwana] go ya ka tsela yeo a swanetšego go sepela ka yona; le ge a tšofetše, a ka se e lahle.”—Diema 22:6.

Nakong yeo re phelago go yona ya thekinolotši, go bohlokwa gore re be le mekgwa e mebotse. Mma yo a bitšwago Karyn o re: “Motho a ka ithuta mekgwa e mebe sedirišweng le ge e le sefe sa elektroniki. Bana ba rena ba ka bogela dilo tša go šišimiša didirišweng tšeo re dutše re na le bona eupša re sa lemoge.”

MOLAO WA MOTHEO WA BEIBELE: “Batho ba ba godilego moyeng, . . . ba [tlwaeditše] matla a bona a go hlatha ka go a diriša, e le gore ba kgethologanye se se nepagetšego le se se fošagetšego.”—Baheberu 5:14.

Mekgwa e mebotse e bohlokwa. Mekgwa yeo e akaretša mantšu a bonolo a mabotse (a go swana le gore “hle,” le “ke a leboga”) le go naganela batho ba bangwe, e lego mekgwa yeo batho ba bantši ba se sa nago le yona ka ge ba rata didirišwa tša elektroniki go feta batho.

MOLAO WA MOTHEO WA BEIBELE: “Ka mo le nyakago batho ba le dira ka gona, le lena le ba direng ka wona mokgwa woo.”—Luka 6:31.

Hlalosetša bana gabotse seo o se letetšego go bona. Ka mohlala, banyakišiši bontšha gore ge bana ba hlaloseditšwe gabotse gore thobalano pele ga lenyalo e fošagetše, ba ka se e dire.

TŠHIŠINYO: Ruta bana ba gago mekgwa e mebotse ka go bolela ka dilo tšeo di sa tšwago go diragala. Ka mohlala, ge e ba ditabeng go bolelwa ka bosenyi, o ka re: “Hei, tsela yeo batho ba swarago ba bangwe ka yona e a tšhoša o a tseba? Ngwanaka, o nagana gore go tla bjang gore batho ba itshware ka tsela ye?”

Brandon o re: “Ge bana ba sa tsebe se se nepagetšego le se se fošagetšego, ba ka se tsebe gore ba dire eng.”

Ruta bana ba gago mekgwa e mebotse. Bana ba banyenyane le bona ba ka ithuta gore “hle,” le “ke a leboga,” le go naganela batho ba bangwe. Puku ya Parenting Without Borders e re: “Ge bana ba ka tseba gore ga ba phele ba nnoši ka gae, sekolong le setšhabeng, ba tla dira dilo tšeo di thušago le batho ba bangwe, e sego tšeo di thušago bona feela.”

TŠHIŠINYO: Nea bana ba gago mešongwana ya ka gae gore ba ithute go thuša batho ba bangwe.

Tara o re: “Ge bana ba ithuta go dira mešongwana ya ka gae gona bjale, ba ka se tle ba tlabega ge ba thoma go dula ba nnoši. Ba tla be ba šetše ba tlwaetše go itirela dilo.”