BAKENG SA BAFSA
10: Go Tshepagala
SEO SE RA GO RE’NG?
Batswadi, bagwera le bengmešomo ba rata batho ba go tshepagala. Batho ba go tshepagala ba kwa melao, ba phetha seo ba se tshepišitšego e bile ba dula ba bolela nnete.
KE KA BAKA LA ENG GO TSHEPAGALA GO LE BOHLOKWA?
Gantši ge o tshepagala, batho ba a go tshepa, eupša ge o sa tshepagale, le bona ga ba go tshepe.
Sarahi o re: “Ge o nyaka gore batswadi ba gago ba go tshepe, o swanetše go ba bontšha gore o godile le gore o kgona go ikemela, e sego feela ge ba le gona eupša le ge ba se gona.”
MOLAO WA MOTHEO WA BEIBELE: “Dulang le itlhatsela seo lena ka noši le lego sona.”—2 Bakorinthe 13:5.
SEO O KA SE DIRAGO
Megato e latelago e ka go thuša ge e ba o nyaka gore batswadi ba gago ba go tshepe, goba gore ba boele ba go tshepe.
Dula o bolela nnete. Batho ba ka se sa go tshepa ge o bolela maaka. Eupša ge o bolela nnete, kudukudu ge o amogela diphošo tša gago, batho ba tlo go tshepa.
Caiman o re: “Go bonolo go tshepagala ge dilo di sepela gabotse. Eupša ge o tshepagala le dilong tšeo di dirago gore batho ba go tšeele fase, ba bangwe tlo go tshepa kudu.”
MOLAO WA MOTHEO WA BEIBELE: “Re rata go itshwara ka go botega dilong tšohle.”—Baheberu 13:18.
Tshepagala. Nyakišišo e nngwe yeo e dirilwego kua U.S., e bontšhitše gore se sengwe sa dilo tšeo dikhamphani tše dintši di se lebelelago ge di hira motho, ke go bona ge e ba a tshepagala goba go se bjalo. Ge o ka ithuta go tshepagala gona bjale, seo se tlo go thuša le ge o gotše.
Sarah o re: “Batswadi ba ka ba kgona go bona ge ke dira mešongwana ya ka gae ntle le gore ba ntšhale morago. Ge ke dula ke dira bjalo, ke moo ba ntshepago kudu.”
MOLAO WA MOTHEO WA BEIBELE: “Ke holofela gore o tla dumelelana le se, ke tseba gore o tla ba wa dira dilo tše di fetago tše ke di bolelago.”—Filemone 21.
O se ke wa fela pelo. Batho ba kgona go bona gore ngwana o a gola, eupša go tšea nako gore ba bone gore o gotše monaganong le gore o kgona go ikemela. Ke ka baka leo bafsa ba sa swanelago go fela pelo.
Brandon o re: “Ga se gore ge o kile wa tshepagala, batswadi ba gago le batho ba bangwe ba tla dula ba go tshepa. Eupša ba ka dula ba go tshepa ge e ba o dula o tshepegala e bile o bontšha gore o gotše.”
MOLAO WA MOTHEO WA BEIBELE: “Aparang . . . go se fele pelo.”—Bakolose 3:12.
You May Also Like
BAFSA BA A BOTŠIŠA
Ke ka Baka la Eng o Swanetše go Tshepagala?
Na batho ba go se tshepagale ba a holega?
GO HLALOSA TABA KA GO THALA DISWANTŠHO
Nka Boledišana Bjang le Batswadi ba ka?
O ka boledišana bjang le batswadi ba gago ge e ba o ikwa o sa nyake go bolela?
BAFSA BA A BOTŠIŠA
Na ke Tšeela Dilo Godimo?
Bafsa ba bangwe ba newa tokologo go feta ba bangwe. Seo se dirwa ke’ng?
