KELETŠO YA BEIBELE: “Maano a motho yo mafolofolo a a mo hola, eupša mang le mang yo a akgofago o wela bohloking.”—Diema 21:5.

SEO KELETŠO YE E SE BOLELAGO: Eba le leano la go diriša tšhelete gomme o le diriše. Pele o diriša tšhelete, nagana gore o tlo e diriša bjang. Gopola gore o ka no se kgone go reka selo se sengwe le se sengwe seo o se nyakago. Ka baka leo, šomiša tšhelete gabotse.

SEO O KA SE DIRAGO:

• Ithute go šomiša tšhelete. Tseba dilo tšeo o tlo šomišago tšhelete go tšona gomme o di ngwale fase. Ka mohlala, dijo, diaparo le rente. Ka morago ga moo, ngwala gore o tlo šomiša bokae selong se sengwe le se sengwe. Ge e ba o šomišitše tšhelete e ntši selong se sengwe, tšea tšhelete ya ka mo go se sengwe. Ka mohlala, ge e ba o bona gore o šomišitše tšhelete e ntši go tšhela peterole, tšea tšhelete yeo o bego o e beetše ka thoko bakeng sa go reka dilo tšeo di sego bohlokwa gakaalo, go swana le tšhelete ya go reka dimonamonane.

• Phema dikoloto. Ge e ba go kgonega, leka go se be le dikoloto. Go e na le moo, boloka tšhelete gore o tle o kgone go reka dilo tše bohlokwa kudu. Ge e ba o diriša karata ya go kolotiša (credit card), leka go patela tšhelete ka moka yeo o dumetšego gore o tlo e patela kgwedi e nngwe le e nngwe e le gore e se ke ya tla ya tswala manamane. Ge e ba o šetše o na le sekoloto, loga leano la gore o tlo se patela bjang gomme o se patele.

  Nyakišišo e nngwe e bontšhitše gore batho bao ba rekago ka credit card, gantši ba diriša tšhelete e ntši ba sa lemoge. Ka gona, ge e ba o na le credit card, e diriše gabotse.

KELETŠO YA BEIBELE: “Sebodu se ka se leme ka baka la marega; se tla be se kgopela nakong ya puno, eupša se ka se hwetše selo.”—Diema 20:4.

SEO KELETŠO YE E SE BOLELAGO: Bobodu goba go tšwafa, go ka dira gore motho a feleletše a diila. Ka gona, šoma ka thata gomme o diriše tšhelete gabotse, e le gore o tle o kgone go reka dilo tšeo o di hlokago nakong e tlago.

SEO O KA SE DIRAGO:

• Šoma ka thata. Ge e ba o šoma ka thata e bile o tshepagala, mohiri wa gago o tlo go rata e bile a ka se go kobe mošong.

• Tshepagala. O se ke wa utswa. Ge e ba o utswa, batho ba bangwe ba tlo tseba ka seo e bile ba ka se nyake go go hira.

• O se ke wa rata tšhelete kudu. Ge e ba o dula o nyaka go ba le tšhelete e ntši, o tlo feleletša o babja e bile wa se sa ba le tswalano e botse le batho ba bangwe. Gopola gore mo bophelong go na le dilo tše bohlokwa go feta tšhelete.

O SE KE WA SENYA NAKO LE TŠHELETE DILONG TŠA GO HLOKA MOHOLA.

“Letagwa le sejagobe ba tla diila gomme go rata boroko go tla apeša motho mankgeretla.”—DIEMA 23:21.

O SE KE WA BELAELA KUDU KA TŠHELETE.

“Tlogelang go belaelela meoya ya lena ge e le ka seo le tlago go se ja goba seo le tlago go se nwa goba go belaelela mebele ya lena ge e le ka seo le tlago go se apara.”—MATEO 6:25.

O SE KE WA BA LE MEGABARU.

“Ramegabaru o potlakela go huma, a sa lemoge gore se se mo letetšego ke bodiidi.”—DIEMA 28:22, Bibele ya Taba ye Botse.