Gantši kgethollo e bakwa ke go se tsebe ditaba ka botlalo. Nagana ka mehlala ye e latelago:

• Ka ge bengmešomo ba bangwe ba nyatša basadi, ba ile ba no phetha ka gore basadi ba ka se kgone go šoma ka dilo tša thekinolotši.

• Badudi ba nageng e itšego, ba ka latofatša batho ba bangwe bao ba tlago nageng ya gabo bona gore ba tlo ba tšeela mešomo.

• Batho ba bantši ge ba bona motho a golofetše, ba re o dula a kwatile e bile ga a rate batho.

Batho ba re boletšego ka bona mehlaleng ye, ba dula ba nyaka mehlala ya go thekga taba ya bona ya go kgetholla. E bile ba nagana gore batho bao ba sa dumelelanego le bona ga ba tšeele godimo seo ba se bolelago.

DIEMA 19:2 e re: “Ga go botse ge motho a hloka tsebo.”

Lengwalo le le ra gore’ng? Le ra gore ge e ba re sa tsebe nnete ya taba, re ka feleletša re bolela maaka. Ge e ba re no tshepa maaka ao batho ba a bolelago re ka feleletša re ahlola ba bangwe, e bile ra bona eka batho ba bangwe ga se ba loka.

Ge e ba re tseba nnete ka batho ba bangwe, re ka se dumele maaka ao batho ba bangwe  ba re botšago ona ka bona. Ka mohlala, ge re se no tseba gore dilo tše re di kwelego ka batho ba morafo o itšego ke maaka, re ka se kitimele go tshepa selo se sengwe le se sengwe seo batho ba bangwe ba re botšago sona ka morafo woo.

• Batho ba bangwe ba ka no bolela ka morafo o itšego gore ga o na mekgwa e mebotse, eupša o swanetše go gopola gore ga se gore batho ka moka ba morafo woo ba bjalo.

• Gopola gore ga se gore o tseba dilo ka moka ka morafo o itšego.

• Leka go hwetša nnete ya taba go batho bao ba tsebago ditaba ka botlalo.