Legohle le na le thulaganyo. Makasine wa Astronomy, o ngwadile gore “dihlopha tša dinaledi ga se tša gašana fela, di na le thulaganyo.” Seo se kgonega bjang? Borasaense ba dumela gore seo se a kgonega ka baka la selo seo re sa se bonego seo se bitšwago dark matter. Dark matter ke yona e dirago gore dihlopha tša dinaledi di dule maemong a tšona.

Go tlile bjang gore legohle le be le thulaganyo ka tsela ye? Na re ka re se se no direga fela ntle le Mmopi? Ekwa seo se boletšwego ke Allan Sandage. O balwa gare ga borathutamahlale ba hlahlwa bao ba ithutilego ka legohle ba mengwaga e 100 e fetilego, e bile o be a dumela go Modimo.

 O itše “Taba ya gore legohle le no ba le thulaganyo go se na selo seo se le rulagantšego, ga e kwagale. Go swanetše go ba go na le seo se le rulagantšego.”

Legohle le diretšwe gore go be le bophelo. Nagana ka taba ye, letšatši ga le fiše kudu e bile ga le fiše ga nnyane. Nkabe selo seo se dirago gore letšatši le fiše se be se dira gore le fiše ga nnyane, nkabe le se gona. Le gona, ge nkabe selo seo se dira gore letšatši le fiše kudu go na nkabe le ile la swa la felelela.

Go na le dilo tše dintši legohleng tšeo di lego ka tsela yeo di swanetšego go ba ka yona gore go be le bophelo mo lefaseng. Mongwadi wa tša thutamahlale e lego Anil Ananthaswamy o ngwadile gore: “ ge nkabe e nngwe ya dilo tšeo di lego legohleng e be e bopilwe ka tsela e fapanego, gona dinaledi, dihlopha tša dinaledi le dipolanete di be di ka se be gona, le bophelo bo be bo ka se be gona.”

Legohle le hlamilwe gabotse gore batho ba phele. Lefase le na le atmosphere, meetse ao a lekaneditšwego le ngwedi wo o lekanetšego gore go be le bophelo. Makasine wa National Geographic o bontšhitše gore borathutamahlale ba hweditše gore naga le dilo tšeo di phelago mo lefaseng, di dira gore lefase e be lona fela polanete yeo batho ba kgonago go phela go yona. a

Mongwadi o mongwe o ngwadile gore, lefase la rena le kgole le dinaledi tše dingwe. Eupša seo se dira gore go be le bophelo mo lefaseng. Ge nkabe lefase le le gare ga molalatladi wa dinaledi goba mafelelong a wona, gona bophelo bo be bo ka se be gona. Go e na le moo, lefase le kgauswi le molalatladi wa dinaledi wo o dirago gore go be le bophelo mo lefaseng.

Paul Davies yo a ithutilego ka legohle o ile a re: “Ga ke nagane gore bophelo bo no ba gona fela ka mohlolo, re diretšwe gore re kgone go phela mo lefaseng.” Davies ga a rute gore Modimo o bopile legohle le batho. Eupša wena o nagana’ng? Tsela yeo legohle le lefase di bopilwego ka yona e dira gore go be le bophelo. Na tsela yeo di lego ka yona e bontšha gore di bopilwe?