Na legohle le dilo ka moka tšeo di phelago di bopilwe ke Modimo goba di no ba gona? Mantšu ao re a tsopotšego mathomong a sehlogo se, a ditsebi tša go ithuta ka legohle le mantšu a Beibele ao a lego go Genesi 1:1 a re nea dikarabo tše fapanego tša potšišo ye. Go na le batho bao ba thekgago dikarabo tše ka bobedi le ge e le gore ga ba nape ba dumela seo. Batho ba bantši ba dula ba ngangišana ka taba ye mananeong a thelebišene le go ngwala ka yona ka dipukung tša bona tša go tuma.

Sekolong, barutiši ba ka ba go rutile gore ga gona Mmopi le gore legohle le dilo tšeo di phelago di no ba gona. Eupša na barutiši ba ka ba go file bohlatse bja gore ga go na Mmopi? Ka lehlakoreng le lengwe, o ka ba o kwele baruti ba bolela gore go na le Mmopi. Na le bona ba go file bohlatse bja gore go na le Mmopi goba ba no re o swanetše go no dumela ntle le gore ba go nee bohlatse?

Mohlomongwe o ka ba o ile wa ipotšiša dipotšišo tše, le gore ga gona motho yo a ka kgonthišetšago gore go na le Mmopi. O ka ba o na le dipotšišo tše dingwe. Eupša o ka ipotšiša gore na go bohlokwa gore o hwetše dikarabo?

Makasine wo wa Phafoga! o tlo bolela ka mabaka ao a dirago gore batho ba dumele gore go na le Mmopi. E bile o tlo hlalosa gore ke ka ba ka la eng go le bohlokwa go araba potšišo ya gore bophelo bo thomile kae.