Gantši go ba thata kudu go banyalani ge bana ba gotše gomme ba tšwile ka gae. Ge bana ba tšwile ka gae, seo se ka dira gore batswadi ba ikwe eka ga ba tsebane. Setsebi sa tša malapa e lego M. Gary Neuman, se ngwadile gore: “Ke thuša batho ba bantši bao ba sa tsebego gore ba ka boela bjang ba ba monwana le lenala le balekane ba bona. Ka ge ga bjale bana ba sepetše, [batswadi] ba felelwa ke dikgang.” *

Na se ke seo se diregago lenyalong la gago? Ge e ba go le bjalo, o ka lokiša dilo. Thoma ka go ela hloko dilo tšeo di dirilego gore wena le molekane wa gago le se sa ba monwana le lenala.

Go tšere mengwaga e mentši bana e le bona ba tlago pele. Batswadi ba bantši ga ba hlokomele manyalo a bona gomme ba etiša pele go hlokomela bana, le ge e le gore ba dira seo ka maikemišetšo a mabotse. Ka baka leo ba tlwaela kudu go phetha maikarabelo a go ba mma le tate. Ba lebala gore ke bona monna le mosadi, e lego seo se thomago go bonagala ka morago ga ge bana ba sepetše. Mosadi wa mengwaga e 59 o re: “Ge bana ba be ba sa le ka gae, re be re dira dilo mmogo.” O boletše gore ka morago ga gore bana ba sepele, “yo mongwe le yo mongwe o be a iphelela ka tsela ya gagwe.” Lebakeng le lengwe o ile a ba a botša monna wa gagwe gore: “Okare re a imelana.”

Banyalani ba bangwe ga se ba ikemišetša go fetoga le maemo a a mafsa. Puku ya Empty Nesting e re: “Go banyalani ba bantši, go bjalo ka ge eka ba sa tšwa go nyalana.” Ka ge ba bona ba sa swane ka dilo tše dintši, yo mongwe le yo mongwe o iphelela bophelo bja gagwe. Ka baka leo, ba ba bjalo ka ge eka ga se banyalani, eupša e no ba batho feela bao ba dulago gotee.

Se se kgahlišago ke gore o ka phema kotsi yeo, gomme wa thabela mehola ya maemo a a mafsa bophelong bja gago. Beibele e ka go thuša tabeng yeo. Anke re boneng gore e ka go thuša bjang.

Ikemišetše go amogela gore dilo di fetogile. Ge Beibele e bolela ka bana bao ba godilego, e re: “Monna o tlo tlogela tat’agwe le mm’agwe.” (Genesi 2:24, Phetolelo ya Kgale) Maikemišetšo a lena bjalo ka batswadi e be e le go tlwaetša bana ba lena bakeng sa nako yeo, e lego go ba ruta gore ba tle ba kgone go ba le maikarabelo ge ba šetše ba godile. Ge le lebelela taba ye ka tsela yeo, go tloga ga bana ba lena gae ke selo seo le ka ikgantšhago ka sona.—Molao wa motheo wa Beibele: Mareka 10:7.

Therešo ke gore o tla dula o le motswadi wa bana ba gago. Lega go le bjalo, ga bjale o a ba eletša ga o sa ba laola. Ka gona se se dira gore o dule o na le tswalano ya kgauswi le bana ba gago mola molekane wa gago e le yena a tlago pele. *—Molao wa motheo wa Beibele: Mateo 19:6.

Boledišanang ka dilo tšeo le tshwenyegilego ka tšona. Botša molekane wa gago gore o ikwa bjang ka maemo a a mafsa, gomme o theetše le gore molekane wa gago yena o ikwa bjang. Le se ke la felelana pelo gomme le kwešišane. Go ka tšea nako gore le matlafatše tswalano ya lena bjalo ka monna le mosadi, eupša go dira bjalo go tla le hola.—Molao wa motheo wa Beibele: 1 Bakorinthe 13:4.

Nyakang dilo tše difsa tšeo le ka di dirago mmogo. Boledišanang ka dilo tšeo le nyakago go di fihlelela goba tšeo di kgahlišago tšeo le nyakago go di dira le le mmogo. Ka ge le godišitše bana, le ithutile go ba bohlale. Ke ka baka la’ng le sa diriše seo go thuša ba bangwe?—Molao wa motheo wa Beibele: Jobo 12:12.

Tiišang lenyalo la lena. Naganang ka dika tšeo di ilego tša dira gore le kgahlegelane. Bjalo ka banyalani, naganang ka dilo tšeo le di dirilego gotee bophelong le mathata ao le fetilego go ona. Le ka feleletša le thabela maemo a a mafsa bophelong bja lena. Ge e le gabotse, ge le swarišana le ka kaonefatša lenyalo la lena le go tsošološa lerato leo le dirilego gore le nyalane.