Bagoeledi ba Mmušo ba a Bega

O ile a Hwetša Morero Bophelong bja Gagwe

JESU o bolela gore o tseba dinku tša gagwe. (Johane 10:14) Ge e ba motho a e-na le pelo e botse gomme a rata khutšo le toko, motho yoo o tla gogelwa go balatedi ba Jesu. Motho yo bjalo o tla hwetša morero bophelong, go etša ge go dirile mosadi o mongwe kua Belgium. Kanegelo ya gagwe še:

“Ge Dihlatse tša Jehofa di be di kokota mojakong wa-ka, ke be ke gateletšegile kudu ke bile ke nagana go ipolaya. Ke ile ka rata seo Dihlatse di se boletšego mabapi le tharollo ya mathata a lefase le leo le babjago, eupja ga se ka rata kgopolo ya gore Modimo o be a e-na le tema yeo a e kgathago. Ke be ke kgaoditše go ya kerekeng nywaga e seswai pele ga moo, ka ge ke be ke hloile boikaketši bjoo ke ilego ka bo bona moo. Lega go bjalo, go Dihlatse ke ile ka lemoga go kwala ga therešo go seo ba se boletšego gomme ka lemoga gore ka godimo ga tšohle, go thata go phela ka ntle le Modimo.

“Sa go nyamiša ke gore ka morago ga go etelwa makga a sego kae, kgokagano le Dihlatse e ile ya kgaotša. Ke ile ka ikwa ke nyamile kudu. Ke be ke kgoga mapokisana a mabedi a sekerete ka letšatši gomme ka ba ka thoma go diriša dihlare-tagi. Ka go rata go bolela le rakgolo yo a hwilego, ke ile ka thoma go leka go dirišana le meoya. Ke be ka tšhoga gakaakang ge ke be ke nnoši bošego, ke ikwa ke hlaselwa ke batemona ka baka lona leo! Se se ile sa tšea dikgwedi. Mantšiboeng a mangwe le a mangwe ke be ke tšhošwa ke taba ya go ba noši.

“Ke moka, ka letšatši le lengwe ke ile ka tšwa ke itshepelela, ke tšea tsela yeo e fapanego le yeo ke e tlwaetšwego, gomme ka fihla lefelong le legolo la moago. Ke ile ka makatšwa ke ge ke bona lešaba le legolo moo. Ge ke batamela, ke ile ka bona e le Dihlatse tša Jehofa di swaregile ka go aga Holo ya Mmušo. Ke ile ka gopola diketelo tša Dihlatse legaeng la-ka, gomme ka nagana gore go be go tla kgahliša gakaakang ge nkabe lefase ka moka le phela bjalo ka batho ba.

“Ruri ke ile ka kganyoga ge Dihlatse di be di ka boa gape legaeng la-ka, ka gona ke ile ka bolela le ba bangwe bao ba bego ba šoma holong. Ke ile ka rapela Modimo gomme matšatši a lesome ka morago monna yo a nketetšego la mathomo o be a le mojakong wa-ka. O ile a šišinya gore re tšwetše pele thuto ya Beibele, gomme ka amogela seo ka lethabo. Di sa tloga fase o ile a ntaleletša dibokeng Holong ya Mmušo. Ke ile ka dumela. Ga se ka ka ka bona selo se se bjalo le ka mohla! Ke be ke tsomile ka nako e telele batho bao ba ratanago le ba ba thabilego. Bjale ke be ke ba hweditše mafelelong!

“Ka morago ga moo ke ile ka ya dibokeng ka moka. Ka morago ga dibeke tše ka bago tše tharo ke ile ka kgaotša mokgwa o mobe wa go kgoga. Ke ile ka lahla dipuku tša-ka tša bolepi bja dinaledi le direkhoto tša-ka tša mmino wa bosathane, gomme ke ge ke ikwa gore batemona ba be ba lahlegelwa ke tlemo ya bona go nna. Ke ile ka lokiša bophelo bja-ka go ya ka ditekanyetšo tša Beibele tša Jehofa, gomme ka morago ga dikgwedi tše tharo ka thoma go bolela ditaba tše di lokilego. Ka morago ga dikgwedi tše tshelelago ke ile ka kolobetšwa. Matšatši a mabedi ka morago ga go kolobetšwa, ke ile ka thoma bobulamadibogo bja go thuša.

“Ke leboga Jehofa ka baka la dilo ka moka tše dibotse tšeo a ntiretšego tšona. Bophelo bja-ka bo na morero mafelelong. Ee, leina la Jehofa ke sebo se se thata seo ke hweditšego botšhabelo le tšhireletšo go sona. (Diema 18:10) Ruri ke ikwa ka tsela yeo mopsalme a bego a ikwa ka yona ge a be a ngwala go Psalme 84:10 gore: ‘Letšatši letee rè le malapeng a xaxo, ké lôna le le botse xo matšatši a sekete. Xo êma mojakô Ngwakong wa Modimo wa-ka xo phala xo dula ka ’ntlong tša bakxôpô.’”

Mosadi yo yo a ikokobeditšego o ile a hwetša morero bophelong. Go ka ba bjalo ka motho lege e le ofe yoo a tsomago Jehofa ka pelo e botse.