Phihlelo

Jehofa ke Setšhabelo sa-ka le Matla a-ka

KA GE GO ANEGA MARCEL FILTEAU

“Ge e ba o tla nyalana le yena, o tla tlamega go ya kgolegong.” Ke seo batho ba bego ba se botša mosadi yoo ke bego ke rera go mo nyala. Anke ke hlalose lebaka leo ka lona ba bego ba bolela bjalo.

GE KE be ke belegwa ka 1927, profense ya Canada ya Quebec e be e le sebo sa Bokatholika. Mo e ka bago nywaga e mene ka morago, Cécile Dufour, modiredi wa nako e tletšego wa Dihlatse tša Jehofa, o ile a thoma go etela legaeng la gešo motseng wa Montreal. Ke ka baka leo gantši a bego a tšhošetšwa ke baagišani ba rena. Ge e le gabotse, o ile a golegwa le go swarwa gampe ka makga a mantši ka baka la go bolela ka molaetša wa Beibele. Ka gona go se go ye kae re ile ra ithuta therešo ya mantšu a Jesu a rego: “Le tlo ba ba xo hloiwa ke dithšaba tšohle ka ’baka la Leina la-ka.”​—Mateo 24:9.

Ka nako yeo, ba bantši ba ile ba bona e le mo go ronago gore lapa la ma-Fora a ma-Canada le tlogele bodumedi bja lona bja Katholika. Gaešita le ge batswadi ba-ka ba se ba ka ba ba Dihlatse tše kolobeditšwego, ba ile ba akgofa ba phetha ka gore dithuto tša Kereke ya Katholika di be di sa dumelelane le Beibele. Ka gona ba ile ba kgothaletša bana ba bona ba seswai go bala dipuku tše di gatišitšwego ke Dihlatse, gomme ba ile ba thekga ba bangwe ba rena bao re ilego ra emela therešo ya Beibele.

Go Ema o Tiile Dinakong tše Thata

Ka 1942 ge ke be ke sa le sekolong, ke ile ka thoma go ba le kgahlego ya kgonthe thutong ya Beibele. Ka nako yeo mediro ya Dihlatse tša Jehofa e be e thibetšwe Canada ka baka la gore di latela mohlala wa Bakriste ba pele e bile di sa tšee karolo dintweng tša ditšhaba. (Jesaya 2:4; Mateo 26:52) Mogolo wa-ka, Roland o ile a išwa kampeng ya go šoma ka thata ka baka la go gana ga gagwe go  hlabana nakong ya ntwa ya lefase yeo e bego e kgatlampana.

Mo e ka bago ka yona nako yeo, Tate o ile a mpha puku ya Sefora yeo e bego e hlalosa ditlaišo tšeo Dihlatse tša Jeremane di ilego tša tlaišwa ka tšona ka baka la go gana ga tšona go thekga masolo a madira a Adolph Hitler. * Ke ile ka tutueletšega go itlhaola le mehlala e bjalo ya sebete ya potego, gomme ke ile ka thoma go ba gona dibokeng tša Dihlatse tša Jehofa tšeo di bego di swarelwa legaeng la motho. Go se go ye kae, ke ile ka laleletšwa go ba le karolo modirong wa boboledi. Ke ile ka amogela taletšo ke lemoga ka mo go feletšego gore nka swarwa gomme ka golegwa.

Ka morago ga go rapelela matla, ke ile ka kokota mojakong wa-ka wa mathomo. Mosadi yo botho o ile a araba gomme ka morago ga go itsebiša, ke ile ka mmalela mantšu a 2 Timotheo 3:16 a rego: “Mangwalô ka moka ké ma-hebetšwa-ke-Modimo, le xôna a hola.”

Ka mmotšiša gore: “Na o ka thabela go ithuta mo go oketšegilego ka Beibele?”

Mosadi o ile a araba ka gore: “Ee.”

Ka gona ke ile ka mmotša gore ke tla tliša mogwera yo a bego a tseba Beibele go mpheta, e lego seo ke ilego ka se dira bekeng e latelago. Ka morago ga phihlelo yeo ya mathomo, ke ile ka ikwa ke ikholofela kudu, gomme ka ithuta gore ga re dire bodiredi ka matla a rena. Bjalo ka ge moapostola Paulo a boletše, re dira bjalo ka thušo ya Jehofa. Ka kgonthe ke gabohlokwa gore re lemoge gore “matla a fetišago a tlhago ke a Modimo e sego ao a tšwago go rena.”​—2 Ba-Korinthe 4:7, NW.

Ka morago ga moo, modiro wa boboledi e bile karolo ya ka mehla ya bophelo bja-ka gomme go bile bjalo le ka go swarwa le go golegwa. Ga go makatše ge yo e bego e tla ba mosadi wa-ka a ile a botšwa gore: “Ge e ba o tla nyalana le yena, o tla tlamega go ya kgolegong!” Lega go le bjalo, diphihlelo tše bjalo e be e se tše thata kudu. Ka morago ga go fetša bošego kgolegong, Hlatse-gotee le rena e be e fela e re ntšha ka peile.

Diphetho tše Bohlokwa

Ka April 1943, ke ile ka ineela go Jehofa gomme ka bontšha se ka go kolobetšwa meetseng. Ke moka, ka August 1944 ke ile ka ba gona kopanong e kgolo la mathomo kua Buffalo, New York, U.S.A., ka mošola wa mollwane wa Canada. Go be go e-na le palo ya ba 25 000, gomme lenaneo le ile la tutuetša kganyogo ya-ka ya go ba mmulamadibogo, bjalo ka ge bahlanka ba nako e tletšego ba Dihlatse tša Jehofa ba bitšwa bjalo. Thibelo ya modiro wa Dihlatse tša Jehofa Canada e ile ya tlošwa ka May 1945, gomme ke ile ka thoma go bula madibogo kgweding e latelago.

Lega go le bjalo, ka ge go tšea ga-ka karolo bodireng go be go oketšega, go bile bjalo le ka go etela ga-ka kgolegong. Ka nako e nngwe ke ile ka tsenywa ka seleng le Mike Miller, mohlanka wa Jehofa yo a botegago wa kgale. Re ile ra dula lebatong la samente gomme ra bolela. Poledišano ya  rena e agago ya moya e ile ya mmatlafatša kudu. Lega go le bjalo, ka morago ga moo go ile gwa tla potšišo monaganong wa-ka, ‘Go thwe’ng ge e ba go be go ka ba le go se kwane gomme ra se ke ra hlwa re sa boledišana?’ Nako yeo ke e feditšego le ngwanabo rena yo yo a rategago kgolegong e nthutile e nngwe ya dithuto tše bohlokwa kudu bophelong bja-ka​—re nyaka banababo rena gomme ka go rialo re swanetše go ba bao ba lebalelanago le ba bontšhanago botho. Go sego bjalo, go etša ge moapostola Paulo a ngwadile: “Xe Le lomana, Lè jana, Le bônê xore Le se tlo fedišana.”​—Ba-Galatia 5:15.

Ka September 1945, ke ile ka laleletšwa go yo hlankela ofising ya lekala ya Mokgatlo wa Watch Tower kua Toronto, Canada, yeo re e bitšago Bethele. Lenaneo la moya moo ka kgonthe e be e le leo le agago le le matlafatšago tumelong. Ngwageng o latelago, ke ile ka abelwa go šoma polaseng ya Bethele yeo e ka bago bokgole bja dikhilomithara tše 40 ka leboa la ofisi ya lekala. Ge ke be ke fula di-strawberry ke e-na le Anne Wolynec yo mofsa, ga se ka lemoga feela botse bja gagwe bja mmele eupša ke ile ka lemoga le lerato la gagwe la go rata Jehofa gotee le phišego ya gagwe. Tswalano e ile ya gola gomme ra nyalana ka January 1947.

Ka nywaga e mebedi le seripa e latetšego, re ile ra bula madibogo kua London, Ontario gomme ka morago ga moo ra ya Sehlakahlakeng sa Cape Breton, moo re ilego ra thuša go hloma phuthego. Ke moka, ka 1949 re ile ra laleletšwa sehlopheng sa bo-14 sa Sekolo sa Beibele sa Watchtower sa Gilead, moo re ilego ra tlwaeletšwa go ba baromiwa.

Modiro wa Boromiwa Kua Quebec

Dialoga tša ma-Canada tša dihlopha tša nakong e fetilego tša Gilead di ile tša abelwa gore di yo bula modiro wa boboledi kua Quebec. Ka 1950, rena gotee le ba bangwe ba 25 ba sehlopha sa bo-14 re ile ra di tlatša. Modiro wo o katološitšwego wa boromiwa o ile wa tliša tlaišo e kgolo le bošoro bja sehlopha sa bahlola-mpherefere tšeo di bego di hlohleletšwa ke baetapele ba Kereke ya Roma Katholika.

Ka morago ga matšatši a mabedi re fihlile kabelong ya rena ya mathomo ya boromiwa motseng wa Rouyn, Anne o ile a swarwa gomme a nametšwa ka morago ga koloi ya maphodisa. Ye e be e le phihlelo e mpsha go yena, ka ge a be a e-tšwa motsaneng o monyenyane profenseng ya Manitoba, Canada moo a bego a bona lephodisa ka sewelo. Ka baka leo, o ile a ikwa a tšhogile gomme a gopola mantšu a rego, “Ge e ba o tla nyalana le yena, o tla tlamega go ya kgolegong.” Lega go le bjalo, pele le ka sepela, lephodisa le ile la nkhwetša gomme la nnametša ka koloing le Anne. O ile a goeletša ka gore: “Ke thabela go go bona!” Fela, a fodile ka tsela e makatšago, o ile a re, “Ee, selo se se swanago se ile sa diragalela baapostola ka baka la go bolela ka Jesu.” (Ditiro 4:1-3; 5:17, 18) Ka moragonyana letšatšing lona leo re ile ra ntšhwa ka peile.

Mo e ka bago lebaka la ngwaga ka morago ga tiragalo yeo, ge ke be ke le bodireng bja ntlo le ntlo kabelong ya rena e mpsha kua Montreal, ke ile ka kwa lešata kua setarateng gomme ka bona sehlopha seo se befetšwego sa bahlola-mpherefere se foša mafsika. Ge ke e-ya go thuša Anne le mogwera wa gagwe, maphodisa a ile a tšwelela. Go e na le gore a sware ditho tša sehlopha sa bahlola-mpherefere, maphodisa a ile a swara Anne le mogwera wa gagwe! Ge ba dutše ba le kgolegong, Anne o ile a gopotša Hlatse yeo e bego e sa tšwa go thoma go kopanela gore ba be ba latswa go ba ga kgonthe ga mantšu a Jesu a rego: “Le tlo ba ba ba hloilwexo ke bohle ka ’baka la leina laka.”​—Mateo 10:22.

Nakong e nngwe, melato e ka bago 1 700 malebana le Dihlatse tša Jehofa e be e fegilwe kua Quebec. Ka kakaretšo, re be re latofatšwa ka gore re aba dipuku tša bofetogedi goba re aba dipuku ka ntle le tumelelo. Ka baka leo, Kgoro ya tša Molao ya Mokgatlo wa Watch Tower e ile ya gata mogato malebana le mmušo wa Quebec. Ka morago ga nywaga e mentši ya ntwa ya molao, Jehofa o ile a re nea diphenyo tše pedi tše dikgolo ka pele ga Kgoro-kgolo ya Tsheko ya Canada. Ka December 1950, go latofatšwa ga rena ka gore dipuku tša rena ke tša bofetogedi go ile gwa phumolwa, gomme ka October 1953, tshwanelo ya rena ya go aba dipuku tša Beibele ka ntle le tumelelo e ile ya thekgwa. Ka gona, re ile ra bona gabotse gore ke bjang Jehofa ge e le gabotse e lego “sebô sa rena le matla a rena; ké Mohlakodiši, re mo lemoxile dikotsing tše ntši.”​—Psalme 46:1.

Ka mo go lemogegago, palo ya Dihlatse kua Quebec e ile ya oketšega go tloga go 356 ka 1945  ge ke be ke thoma go bula madibogo, go fihla go tše ka godimo ga 24 000 lehono! Go ile gwa ba feela bjalo ka ge boporofeta bja Beibele bo boletše e sa le pele gore: “Xobane marumô ka moka a rulêlwaxo xo lwa naxô’, a ka se kxône selo. Maleme ka moka a a Xo pharaxo O tlo a fenya thsekong.”​—Jesaya 54:17.

Modiro wa Rena Fora

Ka September 1959, nna le Anne re ile ra laleletšwa go hlankela Bethele ya Paris, Fora, moo ke ile ka abelwa go okamela tša kgatišo. Pele re fihla ka January 1960, kgatišo e be e dirwa ke feme ya tša kgwebo. Ka ge ka nako yeo Morokami o be o thibetšwe Fora, re be re gatiša makasine kgwedi e nngwe le e nngwe ka mokgwa wa pukwana ya matlakala a 64. Pukwana ye e be e bitšwa The Interior Bulletin of Jehovah’s Witnesses, gomme e be e e-na le dihlogo tšeo di bego di tla balwa diphuthegong bakeng sa kgwedi. Go tloga ka 1960 go ya go 1967 palo ya bao ba kopanelago modirong wa boboledi Fora e ile ya oketšega go tloga go 15 439 go ya go 26 250.

Mafelelong, baromiwa ba bantši ba ile ba abelwa gape mafelong a mangwe, ba bangwe ba ile ba abelwa dinageng tša Afrika tšeo go tšona go bolelwago se-Fora gomme ba bangwe ba boela morago Quebec. Ka ge Anne a be a fokola gomme go nyakega gore a buiwe, re ile ra boela Quebec. Ka morago ga nywaga e meraro ya go hwetša tlhokomelo ya tša kalafo, bophelo bja Anne bo ile bja boela sekeng. Ka gona ke ile ka abelwa modirong wa bosepedi, ke etela diphuthego tše fapa-fapanego beke e nngwe le e nngwe bakeng sa go di nea kgothatšo ya moya.

Modiro wa Boromiwa Afrika

Nywaga e mmalwa ka morago, ka 1981, re ile ra thabela go amogela kabelo e mpsha ya go ba baromiwa kua Zaire, yeo ga bjale e lego Democratic Republic of Congo. Batho ba be ba diila e bile ba welwa ke mathata a mantši. Ge re be re fihla go be go e-na le Dihlatse tše 25 753, eupša lehono palo yeo e oketšegile go fihla ka godimo ga 113 000, ba 446 362 ba ile ba ba gona Segopotšong sa lehu la Kriste ka 1999!

Ka 1984 re ile ra hwetša naga ya dihektara tše ka bago 200 go mmušo bakeng sa go aga ofisi e mpsha ya lekala. Ka gona, ka December 1985 kopano ya ditšhaba-tšhaba e ile ya swarelwa motse-mošate, Kinshasa, go e-na le baemedi ba 32 000 bao ba tlilego ba e-tšwa dikarolong tše dintši tša lefase. Ka morago ga moo, kganetšo yeo e hlohleleditšwego ke baruti e ile ya šitiša modiro wa rena kua Zaire. Ka March 12, 1986, banababo rena bao ba ikarabelago ba ile ba newa lengwalo leo le bego le tsebiša gore mokgatlo wa Dihlatse tša Jehofa wa Zaire ga se wa molao. Thibelo ye godimo ga mediro ka moka ya rena e be e saennwe ke yo e bego e le mopresidente wa naga ka nako yeo, mohu Mobutu Sese Seko.

Ka baka la ditiragalo tše tša tšhoganetšo, re ile ra swanelwa ke gore re šomiše keletšo ya Beibele e rego: “Mohlale ó bôna dikotsi di s’e-tla, a khuta.” (Diema 22:3) Re ile ra hwetša ditsela tša go hwetša pampiri, enke, filimi, dipoleiti tša go gatiša le dikhemikhale go tšwa dinageng tša ka ntle bakeng sa go gatiša dipuku tša rena kua Kinshasa. Re ile ra ba ra tšweletša le mokgwa wa rena ka noši wa go sepediša dipuku. Ge re šetše re rulagantše dilo, tshepedišo ya rena e ile ya šoma kaone kudu go phala tirelo ya poso ya mmušo!

Dihlatse tše dikete di ile tša golegwa gomme tše dintši di ile tša hlokofatšwa o šoro. Lega go le bjalo, ka ntle le tše sego kae, di ile tša emelana le tshwaro e bjalo gomme tša kgomarela go botega ga tšona. Le nna ke ile ka golegwa gomme ka bona maemo a boifišago ao banababo rena ba bego ba lebeletšane le wona dikgolegong. Ka dinako tše dintši re be re gatelelwa ka ditsela tšohle ke maphodisa a ka sephiring le babuši, eupša Jehofa ka mehla o be a re phološa.​—2 Ba-Korinthe 4:8.

Re be re utile mapokisi a ka bago 3 000 a dipuku bobolokelong bja rakgwebo. Lega go le bjalo, mafelelong yo mongwe wa bašomi ba gagwe o ile a tsebiša maphodisa a ka sephiring, gomme maphodisa a ile a golega rakgwebo. Ge a le tseleng ya go ya kgolegong, a ile a gahlana le nna ka kotsi ke sepela ka koloi ya-ka. Rakgwebo o ile a ba botša gore ke nna ke dirilego dithulaganyo le yena gore a boloke dipuku. Maphodisa a ile a ema gomme a mpotšiša ka seo, a mpea molato ka go bea dipuku tšeo di sego molaong ka bobolokelong bja monna yo.

Ke ile ka botšiša gore: “Na le na le e nngwe ya dipuku tšeo?”

Ba ile ba araba ka gore: “Ee, e gona.”

Ke ile ka botšiša gore: “Na nka e bona?”

A ile a ntlišetša kopi e tee gomme ka a bontšha letlakala la ka gare leo le rego: “E gatišitšwe United States of America ke Watch Tower Bible & Tract Society.”

Ke ile ka a gopotša gore: “Seo le se swerego ka matsogong a lena ke thoto ya Amerika gomme ga se ya Zaire. Mmušo wa lena o thibetše mokgatlo wa molao wa Dihlatse tša Jehofa wa Zaire e sego wa Watch Tower Bible & Tract Society of the United States. Ka gona le hlokomeleng kudu seo le se dirago ka dipuku tše.”

Ka gona ke ile ka dumelelwa gore ke sepele ka gobane a be a se na tumelelo ya kgoro ya tsheko ya gore ke swarwe. Bošegong bjoo, re ile ra tšea dilori tše pedi ra ya bobolokelong gomme ra tšea dipuku tšeo ka moka. Letšatšing le le latelago ge balaodi ba e-tla, ba ile ba befelwa kudu ge ba hwetša lefelo le se na selo. Ka nako yeo ba be ba nnyaka, ka ge bjale ba be ba e-na le tumelelo ya kgoro ya tsheko ya gore ke swarwe. Ba ile ba nkhwetša, gomme ka ge ba be ba se na koloi, ke ile ka ikiša kgolegong! Hlatse e nngwe e ile ya sepela le nna e le gore e kgone go tšea koloi ya-ka pele ba ka itšeela yona.

Ka morago ga diiri tše seswai tša go botšološišwa, ba ile ba phetha ka go nthaka nageng. Eupša ke ile ka ba bontšha kopi ya lengwalo le le swantšhitšwego le le tšwago mmušong leo le kgonthišetšago go ba ga-ka yo a kgethilwego gore ke fediše dithoto tša mokgatlo wa Dihlatse tša Jehofa wa Zaire wo bjale o bego o thibetšwe. Ka baka leo ke ile ka dumelelwa gore ke tšwetše pele modiro wa-ka Bethele.

Ka morago ga nywaga e mene ya go hlankela ka tlase ga dikgateletšo tša go thibelwa ga modiro Zaire, ke ile ka tšwa sešo se se tšwago madi sa ka maleng, seo se bego se beile bophelo bja-ka kotsing. Go ile gwa phethwa ka gore ke swanetše gore ke sepele bakeng sa go yo hwetša kalafo Afrika Borwa, moo lekala le ilego la ntlhokomela gabotse gomme ka ba ka fola. Ka morago ga go hlankela nywaga e seswai Zaire, yeo e bego e tloga e le phihlelo e gopolegago le e thabišago kudu, re ile ra hudugela lekaleng la Afrika Borwa ka 1989. Ka 1998 re ile ra boela nageng ya gabo rena gomme ga e sa le go tloga moo ke gare ke hlankela gape Bethele ya Canada.

Ke Leboga go Hlankela

Ge ke lebelela morago nywageng ya-ka e 54 ke le bodireding bja nako e tletšego, ke leboga kudu gore ke ile ka diriša matla a-ka a bofsa tirelong e bohlokwa ya Jehofa. Gaešita le ge Anne a ile a swanelwa ke gore a kgotlelele maemo mantši a lekago, ga se a ka a belaela eupša o be a dutše a nthekga medirong ya rena ka moka. Bobedi bja rena re bile le tokelo ya go thuša ba bantši gore ba tsebe Jehofa, bao bontši bja bona ga bjale ba lego bodireding bja nako e tletšego. Ke lethabo le legolo gakaakang go bona ba bangwe ba bana ba bona gotee le ditlogolo tša bona ba hlankela Modimo wa rena yo mogolo, Jehofa!

Ke kgodišegile gore ga go na selo seo lefase le le ka re neago sona seo se ka bapišwago le ditokelo le ditšhegofatšo tšeo Jehofa a re filego tšona. Ke therešo gore re ile ra kgotlelela diteko tše dintši, eupša ka moka di ile tša thuša bakeng sa go aga tumelo ya rena le go bota ga rena Jehofa. Ka kgonthe o ipontšhitše e le kokwane ya matla, lefelo la botšhabelo le thušo e hwetšagalago nakong ya ditlalelo.

[Mengwalo ya ka tlase]

[Seswantšho go letlakala 26]

Re bula madibogo gotee ka 1947; ke e-na le Anne lehono

 [Seswantšho go letlakala 29]

Batho bao re ilego ra gahlana le bona Zaire ba be ba rata therešo ya Beibele