Katlego ka go Phegelela

GO PHEGELELA go fetogile seka seo se hlokwago mehleng yeno. Batho ba bantši ba dumela gore katlego e ithekgile ka go ba lefelong leo le swanetšego ka nako e swanetšego go e na le go phegelela. Ke mang a ka ba beago molato? Mekero ya ditaba e tletše ka meano ya dipapatšo yeo e se nago tlhaologanyo yeo e romelago molaetša wa gore selo se sengwe le se sengwe seo o se nyakago se ka hwetšwa ka maiteko a itšego le tšhelete e nyenyane. Dikuranta ka mehla di tšweletša lelokelelo la dikanegelo mabapi le katlego e dirwago ka motsotswana le bagwebi bao ba humago e sa le ba bafsa bao ba dirago dimilione kapejana ka morago ga go aloga sekolong.

Mongwadi wa kuranta Leonard Pitts o lla ka gore: “Setšhabeng seo se swaregilego ka temogo, go bonagala go le bonolo kudu. . . . Go bonala eka ke selo se itšego seo yo mongwe le yo mongwe a ka se dirago ge e ba a kwešišitše mokgwa o bohlale wa go se dira, a na le bokgoni goba go thibela go betha ga legadima go tšwa go Modimo.”

Go Phegelela ke Eng?

Go phegelela go bolela go ‘swarelela ka go tia le ka boitseparelo morerong o itšego, boemong goba boikemišetšong go sa šetšwe mapheko goba ditšhitišo.’ Go bolela go tšwela pele ka boikemišetšo o lebeletšane le mathata, o phegelele gomme o sa langwe. Beibele e gatelela bohlokwa bja seka se. Ka mohlala, Lentšu la Modimo le re eletša gore: “Sa pele Le tsomê mmušô wa Modimo,” “ôpa-ôpang, ké mo Le tl’o xo bulêlwa,” “tiišang thapêlô” gomme “Le šalê Lè swere tše boló.”​—Mateo 6: 33; Luka 11:9; Ba-Roma 12:12; 1 Ba-Thesalonika 5:21.

Karolo e bohlokwa ya go phegelela ke go lebeletšana le ditšhitišo tšeo di sa phemegego. Diema 24:16 e re: “Xobane moloki, le xe a ka wa xa-šupa, ó tlo fêla a tsoxa.” (Mongwalo o sekamego ke wa rena.) Go e na le go ‘tlogela’ ge a lebeletšana le bothata goba go palelwa, motho yo a phegelelago o a ‘tsoga,’ ‘a tšwela pele,’ gomme a leka gape.

Lega go le bjalo, ba bantši ga se ba itokišetša bakeng sa mathata le go palelwa moo ba ka lebeletšanago le gona. Le ka mohla ga se ba ka ba hlagolela kganyogo ya go phegelela, ba langwa gabonolo. Mongwadi Morley Callaghan o lemoga gore: “Batho ba bantši kudu ba lebelela go palelwa ka mokgwa wa go ikgobatša. Ba ineela go go ikwela bohloko, ba sola motho yo mongwe le yo mongwe gomme ba a galefa le . . . go ngala.”

Se ke go hloka mahlatse. Pitts o ile a bontšha gore: “Re a lebala gore go na le lebaka la go lebeletšana le moleko, go na le mohola o hwetšwago mathateng.” Ke mohola ofe? O phetha ka gore: “[Motho] o ithuta gore go palelwa ga go bolaye, goba go fenywa ka mo go sa felego. Motho o hwetša tsebo. O ba yo a itokišeditšego.” Beibele e e bea gabonolo ka gore: “Dikudumêla tšohle di na le matšô a tšôna.”​—Diema 14:23.

Ka kgonthe, go tšwela pele gabotse ka morago ga tšhitišo ga se ka mehla go lego bonolo. Ka dinako tše dingwe re lebeletšana le ditlhohlo tšeo go ka bonagalago di nyatša maiteko a rena ka moka a go di fenya. Go e na le go fihlelela dipakane tša rena, go ka bonagala eka di boela morago kudu. Re ka ikwa re nolegile moko, re se na bokgoni gomme re ka nyama gaešita le go gateletšega. (Diema 24:10) Lega go le bjalo, Beibele e re kgothatša gore: “A re se kê ra lapa xo dira botse; xobane xe re sa lesetše, re tlo buna ka lebaka la xôna.” (Mongwalo o sekamego ke wa rena.)​—Ba-Galatia 6:9.

Ke Eng Seo se ka re Thušago go Phegelela?

Mogato wa pele wa go phegelela tseleng e kgethilwego ke go ipeela dipakane tše di holago le tšeo di fihlelelegago. Moapostola Paulo o ile a kwešiša se gabotse. O ile a botša ba-Korinthe gore: “Nna xomme xa ke kitime kè sa tsebe mo ke yaxo; xe ke itia, xa ke etše wa xo itia lefsifsi.” Paulo o be a tseba gore ge e ba a nyaka gore maiteko a gagwe a atlege, o be a tla nyaka dipakane tšeo di bonagalago, go swana le mokitimi yo monagano wa gagwe o tsepeletšego go fihla mothalong wa mafelelo. O ile a kgothatša phuthego ka gore: “A xa Le tsebe xore ba ba šianaxo dipapading ba kitima bohle; mphapahlôxô wa tla wa tšewa ke o tee. Kitimang ka mokxwa woo, xore Le tlê Le o tšeê.” (1 Ba-Korinthe 9:24, 26) Re ka dira se bjang?

Diema 14:15 e re “mohlale ó hlatha dikxatô.” Ke gabohlale go lekodišiša maano a rena bophelong nako le nako, re ipotšiša gore re lebile kae le ge e ba go nyakega gore go dirwe diphetogo. Ke gabohlokwa go nagana ka seo re nyakago go se fihlelela le gore ke ka baka la’ng. Re tla ba le tshekamelo e sego kae ya go langwa ge e ba re boloka pono ya pheletšo ya moo re yago e gatišitšwe ka go tia ka menaganong ya rena. Seema seo se buduletšwego se re: “A mahlô a xaxo e bê a teba-thwii,” e le gore “ditsela tša xaxo ka moka di lokê.”​—Diema 4:25, 26.

Ge o tsebile gore dipakane tša gago ke dife, mogato o latelago ke go seka-seka gore o ka di fihlelela bjang. Jesu o ile a botšiša gore: “Ké mang mo xo lena, yo e rexo xe a rata xo axa morakô o motelele, a se thôme a dula a bala thšêlêtê ya xaxwe”? (Luka 14:28) Ka go dumelelana le molao wo wa motheo, setsebi sa tša bophelo bjo bobotse bja monagano se ile sa lemoga gore: “Se sengwe sa dilo tšeo ke ilego ka di hlokomela ka batho bao ba atlegilego ke gore ba na le kwešišo e botse ya tswalano magareng ga sebaki le mafelelo maphelong a bona. Batho bao ba atlegilego ba kwešiša gore ge e ba ba nyaka selo se itšego, ba swanetše go dira dilo ka moka tše di nyakegago gore ba se hwetše.” Ka go ba le kwešišo e botse ya megato ka moka yeo re swanetšego go e gata bakeng sa go fihlelela seo re se nyakago go tla re thuša go dula re tsepamišitše kgopolo. Gape e tla re nolofaletša go boela sekeng ge e ba re lebana le mathata. Thlahlobo e bjalo e be e le motheo wa katlego ya Orville le Wilbur Wright.

Ka gona ge mathata a tšwelela, dira ka mo o ka kgonago ka gona go a lebelela ka pono e nepagetšego gape e le phihlelo ya go ithuta. Seka-seka boemo, lemoga moo o dirilego phošo gomme o lokiše phošo goba o alafe bofokodi. Go a thuša go bolela le ba bangwe ka ge “maanô a thêkxwa ka keletšô.” (Diema 20:18) Ka tlhago, ka maiteko a mangwe le a mangwe, o ba le bokgoni bjo bo  oketšegilego bjoo mafelelong bo tlaleletšago bakeng sa katlego ya gago.

Sebopego sa boraro sa bohlokwa sa go phegelela ke mogato o tsepamego. Moapostola Paulo o re kgothatša ka gore: “Mo xo tše re di fihletšexo, re išê pele ka yôna tsela e tee, rè le batee kxopolong.” (Ba-Filipi 3:16) Bjalo ka ge morutiši yo mongwe a e bea, “go lekanyetša le go tsepama ka nako e telele go tšweletša mafelelo a mabotse.” Se se bontšhwa gabotse ke nonwane yeo e tsebegago ya Aesop mabapi le khudu le mmutla. Khudu e ile ya thopa lebelo gaešita le ge e be e sepela ka go nanya kudu go feta mmutla. Ke ka baka la’ng? Ka gobane khudu e be e e-na le mokgwa o tsepamego le wa boitayo. Ga se ya ka ya kgaotša eupša e ile ya kgetha lebelo leo e ka le kgonago e le ka kgonthe, gomme e ile ya le kgomarela go fihla e fihla mothalading wa mafelelo. Ka ge motho yo a nago le thulaganyo le yo a tsepamego a dira tšwelopele e tsepamego, o dula a tutuetšega gomme ka go rialo ga se gantši a kgaotšago goba a fenywa lebelong. Ee, “kitima ka mokgwa woo” o tla fihlelelago pakane ya gago.

Go Kgetha Dipakane Tšeo di Holago

Ee, gore go phegelela go be le mohola le ge e le ofe, go nyakega gore re be le dipakane tšeo di nago le mohola. Batho ba bantši ba phegelela dilo tšeo di sa tlišego lethabo. Eupša Beibele e bontšha gore: “Fêla, e a boxêlaxo ruri a bôna se se lexo molaong o tletšexo wa khunoloxô ’me a tiišetša moo . . . ké yêna a tl’o xo dira è le wa lehlôxônôlô.” (Jakobo 1:25) Ee, go ithuta go kwešiša molao wa Modimo bjalo ka ge o ngwadilwe ka Beibeleng ke pakane e nago le mohola kudu. Ka baka la’ng? Kudu-kudu ke ka gobane molao wa Modimo o theilwe ditekanyetšong tša gagwe tše di phethagetšego le tše di lokilego. Bjalo ka Mmopi, o tseba seo se lego kaone bakeng sa dibopiwa tša gagwe. Ka gona, ge e ba re phegelela go ithuta ditaelo tša Modimo le go di diriša maphelong a rena, go phegelela mo go bjalo ka ntle le pelaelo go tla re tlišetša lethabo. Diema 3:5, 6 e holofetša ka gore: “Bô’ta Modimo ka pelo ka moka; . . . Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.”

Go oketša moo, Jesu o re go monya tsebo ka Modimo le ka yena go bolela “bophelô byo bo sa felexo.” (Johane 17:3) Boporofeta bja Beibele bo bontšha gore re phela “mehleng ya bofêlô” ya tshepedišo ye. (2 Timotheo 3:1-5; Mateo 24:3-13) Kgaufsinyane Mmušo wa Modimo, mmušo wa gagwe wa go loka, o tla hloma pušo ya wona godimo ga badudi ba lefaseng. (Daniele 2:44; Mateo 6:10) Mmušo wo o tla tšweletša mehla ya khutšo e sa kago ya bonwa, katlego le go phela gabotse ga batho ka moka bao ba kwago. (Psalme 37:10, 11; Kutollo 21:4) Ditiro 10:34 e re: “Modimo xa a bebe motho.” Ee, yo mongwe le yo mongwe o laletšwa go tlo thabela mehola!

Beibele ke puku ya kgale yeo e tletšego ka bohlale le morero. Go e kwešiša go nyaka nako le boiteko. Eupša ka thušo ya Modimo​—gape le ge e ba re phegelela go tsoma tsebo ya yona​—e tla ba puku e bulegilego go rena. (Diema 2:4, 5; Jakobo 1:5) Ee, go diriša seo re ithutago sona e ka ba tlhohlo. Go ka nyakega gore re dire diphetogo mekgweng goba dikgopolong tša rena. Bagwera bao ba nago le maikemišetšo a mabotse goba ditho tša lapa ka dinako tše dingwe ba ka ganetšana le thuto ya rena ya Beibele. Ka gona go phegelela ke gabohlokwa. Moapostola Paulo o re gopotša gore Modimo o tla nea bophelo bjo bo sa felego go bao “ba kxotleletšexo xo dira tše botse.” (Ba-Roma 2:7) Dihlatse tša Jehofa di tla thabela go go thuša go fihlelela pakane ye.

Kgonthišega gore o tla atlega ge e ba o phegelela go ithuta ka Modimo le ka thato ya gagwe gomme ka go se kgaotše o diriša seo o ithutago sona.​—Psalme 1:1-3.

[Seswantšho go letlakala 6]

O tla atlega ge e ba o phegelela go ithuta ka Modimo le ka thato ya gagwe

[Mothopo wa Seswantšho go letlakala 4]

Culver Pictures