Mebele e Menyenyane, Dipelo tše Dikgolo

GO BE go tla ba bjang go bolela le batho ba o sa ba tsebego ka Mmušo wa Modimo ge e ba o be o le botelele bja disenthimithara tše 76 feela? Laura a ka go botša. A e-na le nywaga e 33, botelele bja gagwe ke bja disenthimithara tše 76 feela. Yena le ngwanabo María yo a nago le nywaga e 24 le botelele bja disenthimithara tše 86 ba dula Quito, Ecuador. Anke ba hlalose mapheko ao ba lebeletšanago le wona bodireding bja bona bja Bokriste.

“Bakeng sa go fihla tšhemong ya rena le dibokeng tša rena tša Bokriste, re sepela mo e ka bago seripa sa khilomithara bakeng sa go ya go namela pese. Go tloga moo e re fološago gona, re sepela seripa se sengwe gape sa khilomithara go ya go namela pese e nngwe. Ka manyami, gona moo tseleng yeo go dula dimpša tše hlano tše bogale kudu. Dimpša di re boifiša kudu ka gobane di ka bonagala di etša dipere ka bogolo. Ge e ba go nyakega gore re di rake, re sepela le phata yeo re e fihlago felwana-tsoko tseleng pele re ka namela pese e le gore re kgone go boa re e hwetša ge re e-ya gae.

“Go namela ka peseng e tloga e le mogato o mogolo kudu go rena. Re ema godimo ga mmoto wa ditlakala boema-peseng e le gore re kgone go namela gabonolo kudu. Baotledi ba bangwe ba batamela kgaufsi le mmoto eupša ba bangwe ga ba dire bjalo. Maemong a bjalo, yo moteletšana wa rena o thuša yo mokopana go namela. Go namela pese ya bobedi go nyaka gore re selaganye tsela ya lephefo yeo e dulago e šoma kudu​—boiteko bjo boima kudu ka maoto a rena a makopana. Ka baka la bokopana bja rena, mokotla wa dipuku wo o imelago ke tlhohlo e oketšegilego. Bakeng sa go dira gore mokotla o be bohwefo, re šomiša Beibele e lekanago ka potleng gomme re lekanyetše palo ya dipuku tšeo re di rwalago.

“Ga e sa le go tloga bjaneng re dutše re le badula-thoko. Baagišani ba rena ba a tseba gore go bolela le batho ba re sa ba tsebego e be e dula e le selo se se boifišago go rena. Ka baka leo, ba a makala le go kgahlega ge ba re bona re kokota mejakong ya bona e bile gantši ba a re theeletša. Eupša moo re sa tsebjego kudu, batho gantši ba bona feela re le bo-mpharanyana; ka gona, ga se ka mehla ba re elago hloko ka mokgwa woo molaetša wa rena o swanetšego go elwa hloko ka gona. Lega go le bjalo, go lemoga lerato la Jehofa go re nea sebete sa go tšwela pele modirong wa boebangedi. Go naganišiša ka Diema 3:5, 6 le gona go re nea sebete.”

Bjalo ka ge Laura le María ba bontšha, go phegelela go sa šetšwe ditšhitišo tša mmele go ka tumiša Modimo. Moapostola Paulo o ile a rapelela gore “phatša nameng” ya gagwe, yeo mohlomongwe e bego e le bolwetši bja mmele, e tlošwe go yena. Eupša Modimo o ile a mmotša gore: “Kxauxêlô  ya-ka a e Xo lekanê, xobane matla a-ka a iphêtha phokolong.” Ee, ga se gore bogole bja mmele bo swanetše go tlošwa go rena e le gore re kgone go hlankela Modimo. Go ithekga ka mo go feletšego ka Modimo go ka re thuša gore re amogele maemo a rena ka go itshegela. Ka ge Paulo a ile a lebelela “phatša nameng” ya gagwe ka mokgwa wo, o be a ka bolela gore: “Xe ke fôkôla ké mo ke naxo le matla.” (2 Ba-Korinthe 12:7, 9, 10) Nywaga e mmalwa ka morago Paulo o ile a ngwala gore: “Ke kxôna tšohle ka Eo a mphaxo matla.”​—Ba-Filipi 4:13.

Mehleng yeno Modimo o phetha mošomo o mogolo ka banna, basadi le bana bao ba ineetšego ka mo go feletšego go yena. Ba bantši ba bona ba golofetše ka tsela e itšego. Gaešita le ge ka moka ga bona ba e-na le kholofelo ya go fodišwa ke Modimo ka tlase ga Mmušo wa Modimo, ga se ba leta go fihla ge Modimo a ba imolla mathateng a bona pele ba ka leka go dira selo se sengwe tirelong ya gagwe.

Na o na le bofokodi bjo itšego mmeleng? Rapa sebete! Ka tumelo ya gago o ka ba gare ga bao ba swanago le Paulo, Laura le María. Go ka bolelwa ka bona bjalo ka ge go bile bjalo ka banna le basadi ba tumelo ba bogologolo gore: “Ba tia matla mefokolong.”​—Ba-Hebere 11:34, PK.

[Seswantšho go letlakala 8]

María

Laura

[Seswantšho go letlakala 9]

María o thuša Laura go namela pese

[Seswantšho go letlakala 9]

“Dimpša di re boifiša kudu ka gobane di ka bonagala di etša dipere ka bogolo”

Ka tlase: Laura le María le bao ba ithutilego Beibele le bona