Phihlelo

Go Boloka Bophelo bo le Bonolo Bakeng sa go Hlankela Jehofa

KA GE GO ANEGA CLARA GERBER MOYER

Ke na le nywaga e 92 gomme ga ke sa kgona go sepela, fela ke sa na le monagano o hlaphogetšwego le o swarago. Ke leboga gakaakang gore ke ile ka ba le tokelo ya go hlankela Jehofa go tloga bjaneng! Go phela bophelo bjo bonolo, bjo bo sa raraganago go tlaleleditše ka tekanyo e sa lekanywego lehumong leo.

KE BELEGWE ka August 18, 1907, kua Alliance, Ohio, U.S.A., ke le yo mogolo baneng ba bahlano. Ge ke e-na le nywaga e seswai, modiredi wa nako e tletšego wa Barutwana ba Beibele, bjalo ka ge Dihlatse tša Jehofa di be di bitšwa bjalo ka nako yeo, o ile a tla polaseng ya rena ya ditšweletšwa tša lebese a sepela ka paesekela. O ile a gahlana le mma, Laura Gerber mojako gomme a mmotšiša ge e ba a be a tseba lebaka leo ka lona bobe bo dumeletšwego go ba gona. Mma ka mehla o be a dutše a ipotšiša mabapi le taba yeo.

Ka morago ga go kgopela tate yoo a bego a le ka ntle ka leobong, mma o ile a otara sete ya dibolumo tše tshelelago tša Studies in the Scriptures. O ile a di bala ka phišego gomme o ile a kgongwa kudu ke ditherešo tša Beibele tšeo a bego a ithuta tšona. O ile a ithuta Bolumo 6 ya The New Creation, gomme a kwešiša gabotse go nyakega ga gore Mokriste a kolobetšwe ka go inwa. Ka ge a be a sa tsebe kamoo a bego a ka hwetša Barutwana ba Beibele ka gona, o ile a kgopela tate gore a mo kolobetše ka nokaneng mo polaseng, le ge e be e le kgwedi e tonyago ya March 1916.

Kapejana ka morago ga moo mma o ile a bona tsebišo ya papatšo ka kuranteng yeo e bego e tsebiša ka polelo yeo e bego e tla newa Holong ya Daughters of Veterans kua Alliance. Polelo e be e na le sehlogo se se rego, “Thulaganyo ya Modimo ya Mabaka.” O ile a arabela le semeetseng, ka ge Bolumo 1 ya Studies in the Scriptures e be e na le sehlogo se se swanago le sa polelo. Pere e ile ya panwa karikaneng, gomme re le lapa ka moka re ile ra ya sebokeng sa rena sa mathomo ka pere le karikana. Go tloga ka nako yeo go ya pele re ile ra ya dibokeng malapeng a banababo rena ka Sontaga le mantšiboeng a Laboraro. Kapejana ka morago ga moo, mma  o ile a kolobetšwa gape ke moemedi wa phuthego ya Bokriste. Tate yo a bego a phela a swaregile ka mošomo wa polaseng, mafelelong o ile a thabela thuto ya Beibele gomme o ile a kolobetšwa nywaga e sego kae ka morago.

Go Tsebana le Bao ba Etelelago Pele

Ka June 10, 1917, J. F. Rutherford, yo e bego e le mopresidente wa Mokgatlo wa Watch Tower ka nako yeo, o ile a etela Alliance go yo bolela ka sehlogo se se rego, “Ke ka Baka La’ng Ditšhaba di E-lwa?” Ke be ke e-na le nywaga e senyane gomme ke ile ka ya le batswadi ba-ka gotee le dikgaetšedi tša-ka tše pedi e lego Willie le Charles. Re bile le lešaba le lebotse la bao ba bego ba le gona ba bokanego ba ka godimo ga lekgolo. Ka morago ga polelo ya Ngwanabo rena Rutherford, bontši bja bao ba bego ba le gona bo ile bja ema bakeng sa go tšea seswantšho ka ntle ga Columbia Theater, moo polelo ya gagwe e ilego ya fiwa gona. Bekeng e latelago, gona lefelong le le swanago, A. H. Macmillan o ile a nea polelo ka sehlogo se se rego, “Mmušo wa Modimo o Tlago.” E be e le tokelo gore bana ba babo rena ba etele torotswana ya rena e nyenyane.

Dikopano tša Pele tše di sa Lebalegego

Kopano ya pele yeo ke bilego go yona e be e le ka 1918 kua Atwater, Ohio, dikhilomithara tše sego kae go tloga Alliance. Mma o ile a kgopela moemedi wa Mokgatlo moo mabapi le ge e ba ke be ke godile ka mo go lekanego go ka kolobetšwa. Ke ile ka ikwa gore ke dirile boineelo bjo bohlokwa go Modimo bja go dira thato ya gagwe, ka gona ke ile ka dumelelwa gore ke kolobetšwe lona letšatšing leo ka nokaneng kgaufsi le serapa sa diapola. Ke ile ka apola diaparo tša-ka ka tenteng yeo banababo rena ba bego ba e hlometše morero woo gomme ka kolobetšwa ke apere seaparo sa kgale sa bošego se boima.

Ka September 1919, nna le batswadi ba-ka re ile ra namela setimela se se yago Sandusky, Ohio, kua Lake Erie. Moo re ile ra namela sekepe, gomme ka lebaka le le sa fetšego pelo ke ge re fihlile Cedar Point moo kopano ya rena yeo e sa lebalegego e bego e tla swarelwa gona. Ge re fologa sekepeng, go be go na le tafola ya dijo tša mosegare boema-kepeng. Ke ile ka tšea hamburger yeo e bego e tloga e le letsaka go nna mehleng yeo. E be e le bose kudu! Tlhora ya batho bao ba bilego gona bakeng sa kopano ya rena ya matšatši a seswai e be e le 7 000. Go be go se na tshepedišo ya digodiša-mantšu, ka gona ke ile ka swanelwa ke gore ke theetše ka kelohloko kudu.

Kopanong ye, go ile gwa lokollwa makasine wo o sepedišanago le The Watch Tower, wo o bitšwago The Golden Age (wo ga bjale e lego Phafoga!). Gore ke be gona kopanong yeo, ke ile ka se be gona sekolong ka beke ya pele, eupša e be e tloga e le mo go swanetšego. Cedar Point e be e le lefelo la maikhutšo, gomme go be go na le baapei moo lebenkeleng la go rekiša dijo tše di apeilwego, bao ba bego ba apeela ba-tla-kopanong. Eupša ka baka la lebaka le itšego, baapei le bao ba tlišago dijo ba ile ba ngala mošomo, ka gona banababo rena ba Bakriste bao ba nago le tsebo ka go apea dijo ba ile ba tsenya letsogo gomme ba apeela ba-tla-kopanong. Ka nywaga-some e mentši ka morago ga moo, batho ba Jehofa ba ile ba ikapeela dijo tša bona dikopanong tše dinyenyane le tše dikgolo.

Gape re ile ra ba le tokelo ya go boela Cedar Point ka September ya 1922 bakeng sa kopano ya matšatši a senyane yeo e bilego le tlhora ya batho ba fetago 18 000 ba bilego gona. Ke moo Ngwanabo rena Rutherford a ilego a re kgothaletša gore “tsebatšang, tsebatšang, tsebatšang Kgoši le mmušo wa yona.” Lega go le bjalo, bodiredi bja-ka bo ile bja thoma ka go phatlalatšwa ga dipampišana le The Golden Age nywaga e mmalwa pejana ga moo.

Go Bontšha Tebogo Bakeng sa Bodiredi

Pejana ka 1918, ke ile ka tšea karolo go išeng pampišana ya The Fall of Babylon dipolaseng tša kgaufsi. Ka baka la boemo bja leratadima bjo bo tonyago, re be re fela re fiša lefsika le etšago sesepe setofong sa dikgong ka gae ke moka re sepele le lona ka karikaneng bakeng sa go ikomoša maoto. Re be re apara dijase tše boima le mengatse ka ge karikana e be e šireleditšwe ka godimo le ka mathoko, fela e se na seruthufatši. Eupša yeo e be e le mehla ya lethabo.

Ka 1920 kgatišo e kgethegilego ya The Finished Mystery, yeo e bitšwago ZG e ile ya gatišwa e le ka sebopego sa makasine. * Nna le batswadi ba-ka re ile ra ya Alliance re swere kgatišo ye. Mehleng yeo motho o be a kokota mejakong a nnoši, ka gona ke ile ka namelela mathuding ao go bego go dutše batho ba mmalwa ke tšhogile. Ka morago ga ge ke neile thero ya-ka, mosadi yo mongwe o ile a re: “O nea polelo e monate gakaakang e kopana,” ke moka a amogela puku. Letšatšing leo ke ile ka sepediša di-ZG tše 13, e lego lekga la mathomo leo ke ilego ka nea thero e teletšana le e lokišeditšwego gabotse modirong wa ntlo le ntlo.

Ge ke be ke le mphatong wa bošupa, mma o ile a swarwa ke pneumonia gomme a se sa kgona go tsoga malaong ka lebaka la ka godimo ga kgwedi. Ngwanešo Hazel e be e le lesea, ka gona ke ile ka tlogela sekolo gore ke thuše ka modiro wa polaseng le go hlokomela bana. Lega go le bjalo, lapa lešo le be le tšeela therešo ya Beibele godimo, gomme re be re e-ba gona dibokeng ka moka tša phuthego ka mehla.

Segopotšong sa Lehu la Kriste ka 1928, bohle bao ba bego ba le gona ba ile ba newa pampišana yeo e bego e na le sehlogo se se rego, “Where Are the Nine?” E be e ahla-ahla Luka 17:11-19, moo Beibele e bolelago gore ke yo tee feela wa balephera ba lesome ba fodišitšwego yo a ilego a leboga Jesu ka boikokobetšo bakeng sa phodišo ya mohlolo. Taba yeo e ile ya kgoma pelo ya-ka. Ke ile ka ipotšiša gore, ‘Ke na le tebogo gakaaka’ng?’

Ka ge bjale dilo di be di sepela gabotse ka gae gomme ke phetše gabotse mmeleng e bile ke se na seo se ka nthibelago go ka sepela, ke ile ka dira phetho ya go tloga gae gomme ka tsenela tirelo ya bobulamadibogo, bjalo ka ge bodiredi bja nako e tletšego bo bitšwa bjalo. Batswadi ba-ka ba ile ba nkgothaletša go dira bjalo. Ka go rialo, nna le modirišani wa-ka e lego Agnes Aleta re ile ra amogela kabelo ya rena, ka gona ka August 28, 1928, re ile ra namela setimela ka 9:00 p.m. Yo mongwe le yo mongwe wa rena o be a na le sutukheise e tee le mokotlana wa go athwa bakeng sa go rwala dipuku tša rena tša Beibele. Ge re le seteišeneng, bana bešo le batswadi ba-ka ba be ba lla, gomme le rena re be re lla. Ke ile ka nagana gore mo gongwe nka no se sa ba bona gape ka ge re be re dumela gore Haramagedone e be e le kgaufsi. Re ile ra fihla kabelong ya rena kua Brooksville, Kentucky mesong e latelago.

Re ile ra hira phapoši e nyenyane legaeng la go hiriša madulo gomme ra reka ditshitswana tša spaghetti gomme ra ba ra itirela disangwetši. Letšatšing le lengwe le le lengwe re be re e-ya mathokong a sa swanego, re šoma re nnoši e bile re nea beng ba dintlo dipuku tše hlano tše di tlemilwego ka moneelo wa R1,98. Ganyenyane-ganyenyane re ile ra aparetša toropo, re kopana le batho ba bantši bao ba bego ba kgahlegela Beibele e le ka kgonthe.

Mo e ka bago lebakeng la dikgwedi tše tharo, re be re šetše re etetše motho yo mongwe le yo mongwe Brooksville gotee le Augusta le metseng ya kgaufsi. Ka gona re ile ra thothela pele go yo šoma ditoropo tša Maysville, Paris le Richmond. Nywageng e meraro e latetšego, re ile ra aparetša dilete tše dintši tša Kentucky moo go bego go se na diphuthego. Re be re fela re thušwa ke bagwera le ditho tša lapa go tšwa Ohio bao ba bego ba e-tla moo ka dikoloi gomme ba re tlatša bodireding ka lebaka la beke goba go feta moo ka nako e tee.

Dikopano tše Dingwe tše di sa Lebalegego

Kopano yeo e bego e swaretšwe Columbus, Ohio, ka July 24-30, 1931, e be e tloga e sa lebalege. Ke moo go ilego gwa tsebišwa gore re be re tla bitšwa ka leina le le theilwego Beibeleng la Dihlatse tša Jehofa. (Jesaya 43:12) Pejana ga moo, ge batho ba be ba re botšiša gore re ba bodumedi bofe re be re re, “Barutwana ba Beibele ba Ditšhaba-tšhaba.” Eupša seo ruri se be se sa re hlaole gabotse ka ge go be go na le barutwana ba Beibele bao ba kopanelago le dihlopha tše dingwe tše di fapa-fapanego tša bodumedi.

Modirišani wa-ka e lego Agnes, o be a nyetšwe gomme ke šetše ke nnoši; ka gona ke ile ka thaba ge go be go tsebišwa gore bao ba nyakago modirišani wa mmulamadibogo ba swanetše go ipega lefelong le itšego. Moo ke ile ka kopana le Bertha le Elsie Garty le Bessie Ensminger. Ba be ba e-na le dikoloi tše pedi gomme ba nyaka kgaetšedi wa bone wa mmulamadibogo gore a yo šoma le bona. Re ile ra tloga kopanong re le gotee, le ge re be re se ra ka ra kopana pele.

Selemo re be re šoma nageng ka moka ya Pennsylvania. Ke moka ge marega a batamela, re be re kgopela dikabelo dinageng tše borutho tša ka borwa bja Carolina Leboa, Virginia le Maryland. Ka seruthwana re be re boela ka leboa. Woo e be e le mokgwa wa babulamadibogo ba nakong yeo. Ka 1934 John Booth le Rudolph Abbuhl, bao ba bego ba diriša mokgwa wo, ba ile ba tšea Ralph Moyer le morwarragwe Willard ba ya le bona Hazard, Kentucky.

Ke be nkile ka kopana le Ralph ka makga a mantši, gomme re ile ra tlwaelana gabotse kopanong e kgolo ya Washington, D.C., yeo e bego e swerwe ka May 30–June 3, 1935. Nna le Ralph re be re dutše gotee mathuding ge go be go newa polelo e lego mabapi le “lešaba le lexolo.” (Kutollo 7:9-14) Go fihlela ka nako yeo re be re dumela gore bao ba lešaba  le legolo e be e le ditho tša sehlopha sa legodimong tšeo di bego di botega ganyenyane go phalwa ke ba 144 000. (Kutollo 14:1-3) Ka gona ke be ke sa nyake go ba yo mongwe wa bona!

Ge Ngwanabo rena Rutherford a be a hlalosa gore bao ba lešaba le legolo e be e le sehlopha sa lefaseng sa baphologi ba botegago ba Haramagedone, ba bantši ba ile ba makala. Ke moka o ile a kgopela bohle ba lešaba le legolo gore ba emelele. Ee, ga se ka ka ka emelela, eupša Ralph o ile a emelela. Ka morago, dilo di ile tša hlaphoga monaganong wa-ka, ka gona 1935 e bile ngwaga wa mafelelo woo ke ile go ka ja senkgwa le go nwa beine tša seswantšhetšo Segopotšong sa lehu la Kriste. Lega go le bjalo, mma o ile a tšwela pele a e-ja le go nwa go fihlela lehung la gagwe ka November 1957.

Modirišani wa sa Ruri

Nna le Ralph re ile ra tšwela pele re ngwalelana. Ke be ke hlankela Lake Placid, New York gomme yena a le Pennsylvania. Ka 1936 o ile a aga koloyana e nyenyane yeo a bego a ka kgona go e goga ka koloi ya gagwe. O ile a e huduša Pottstown, Pennsylvania, a e iša Newark, New Jersey, bakeng sa kopano yeo e bego e swaretše moo ka October 16-18. Mantšiboeng a mangwe ka morago ga lenaneo, ba mmalwa ba rena babulamadibogo re ile ra ya go bona koloyana e mpsha ya Ralph. Nna le yena re be re eme ka gare ga koloyana kgaufsi le sinki e nyenyane e ageletšwego ge a be a mpotšiša gore: “Na o rata koloyana ye?”

Ge ke be ke dumela ka hlogo, o ile a botšiša gore, “Na o nyaka go dula ka gare ga yona?”

Ke ile ka araba ka “ee” gomme a nkatla ka tsela e bonolo yeo nka se tsogego ke e lebetše. Ka morago ga matšatši a mmalwa re ile ra hwetša lengwalo la tumelelo la lenyalo. Ka October 19, letšatšing la ka morago ga kopano, re ile ra ya Brooklyn gomme ra boga meago ya kgatišo ya Mokgatlo wa Watch Tower. Ka morago re ile ra kgopela kabelo ya tšhemo. Grant Suiter o be a ikarabela ka tšhemo, gomme a botšiša gore e be e tla šongwa ke mang. Ralph o ile a re: “Re tla e šoma ge e ba re ka nyalana.”

Ngwanabo rena Suiter o ile a araba ka gore: “Ge e ba le ka boa ka 5:00 p.m., re tla dira dithulaganyo bakeng sa seo.” Ka gona mantšiboeng ao re ile ra nyalana legaeng la Hlatse kua Brooklyn Heights. Re ile ra thabela dijo le bagwera lebenkeleng la lefelong leo la go rekiša dijo tše di apeilwego ke moka ra namela dinamelwa tša bohle ra ya koloyaneng ya Ralph kua Newark, New Jersey.

Kapejana ka morago ga moo, ke ge re le tseleng re lebile Heathsville, Virginia, kabelong ya rena ya pele ya bobulamadibogo re le gotee. Re ile ra šoma Selete sa Northumberland ke moka ra fetela pele dileteng tša Fulton le Franklin kua Pennsylvania. Ka 1939, Ralph o ile a kgopelwa gore a yo dira modiro wa ketelo, e lego modiro woo go wona re bego re tla etela diphuthego tše dintši leboelela. Re be re hlankela diphuthego nageng ya Tennessee. Ngwageng o latelago, morwa wa rena Allen o ile a belegwa, gomme ka 1941 modiro wa go etela o ile wa kgaotša. Ka nako yeo re ile ra abelwa Marion, Virginia, re le babulamadibogo ba kgethegilego. Mehleng yeo, seo se be se bolela go fetša diiri tše 200 ka kgwedi bodireding.

Go Dira Dipeakanyo

Ka 1943, ke ile ka hwetša go nyakega gore ke tlogele bodiredi bja bobulamadibogo bjo bo  kgethegilego. Ka ge re be re dula ka koloyaneng e nyenyane, ke hlokomela ngwana yo monyenyane, ke apea dijo, ke dira gore bohle re dule re apere diaparo tše di hlwekilego gomme ke fetša diiri tše 60 bodireding kgweding e nngwe le e nngwe e be e le sohle seo ke bego ke kgona go se dira. Eupša Ralph o ile a tšwela pele e le mmulamadibogo yo a kgethegilego.

Re ile ra boela Alliance, Ohio, ka 1945, ra rekiša koloyana yeo e bego e bile legae la rena ka nywaga e senyane, ke moka ra hudugela ka ntlong ya polaseng le batswadi ba-ka. Morwedi wa rena Rebekah o ile a belegelwa gona moo, mathuding a ka pele. Ralph o be a dira modiro wa nakwana toropong gomme a tšwela pele e le mmulamadibogo wa ka mehla. Ke be ke šoma polaseng gomme ke dira seo ke bego nka se kgona go mo thuša gore a tšwele pele a bula madibogo. Le ge lapa lešo le ile la re nea lefelo le ntlo ka ntle le tefo, Ralph o ile a gana. O be a nyaka go dula a se na seo se mo šitišago e le gore re kgone go phegelela dikgahlego tša Mmušo ka botlalo.

Ka 1950 re ile ra hudugela Pottstown, Pennsylvania, gomme ra hira ntlo ya R25 ka kgwedi. Lebakeng la nywaga e 30 e latetšego, rente e ile ya hlatlogela go R75 feela. Re be re lemoga gore Jehofa o re thuša gore re boloke bophelo bja rena bo le bonolo. (Mateo 6:31-33) Ralph o be a šoma matšatši a mararo e le mokoti wa meriri. Bekeng e nngwe le e nngwe re be re ithuta Beibele le bana ba rena ba babedi, re e-ya dibokeng tša phuthego gomme re bolela ditaba tše di lokilego tša Mmušo re le lapa. Ralph o be a hlankela bjalo ka molebeledi yo a okamelago wa phuthego ya lefelong leo. Ka go boloka bophelo bja rena bo le bonolo, re ile ra kgona go dira mo gontši tirelong ya Jehofa.

Go Lahlegelwa ke Molekane Wa-ka yo a Rategago

Ka May 17, 1981, re be re dutše Holong ya Mmušo, re theeditše polelo ya phatlalatša. Ralph o be a sa ikwe gabotse, a ya ka morago ga holo gomme a nea mohlokomedi lengwalwana leo le bego le mpotša gore o ya gae gore a mphe lona. Se se be se rona Ralph mo e lego gore ke ile ka kgopela motho yo mongwe gore a nkiše gae ka koloi ka yona nako yeo. Ralph o ile a bolawa ke go hwa lehlakore mo gogolo lebakeng la iri. Bofelong bja thuto ya Morokami mesong yeo, go ile gwa tsebišwa phuthegong gore o hlokofetše.

Kgweding yeo Ralph o be a šetše a feditše diiri tša ka godimo ga 50 bodireding. Modiro wa gagwe wa nako e tletšego e le mmulamadibogo o gogile lebaka la ka godimo ga nywaga e 46. O be a ile a swara dithuto tša Beibele le batho ba ka godimo ga lekgolo bao mafelelong ba ilego ba fetoga Dihlatse tša Jehofa tše kolobeditšwego. Ditšhegofatšo tša moya tšeo re di amogetšego di be di feta kgole boikgafo le ge e le bofe bjoo re bo dirilego go theoša le nywaga.

Go Leboga Ditokelo Tša-ka

Nywageng e 18 e fetilego, ke be ke itulela ke nnoši, ke e-ya dibokeng, ke boledišana le ba bangwe ge ke kgona gomme ke ithuta Lentšu la Modimo. Gona bjale ke dula foleteng ya bao ba rotšego modiro bakeng sa badudi ba naga ba ba godilego. Ke na le dithoto tše sego kae feela gomme ke kgetha gore ke se ke ka ba le thelebišene. Eupša bophelo bja-ka bo tletše ka tše ntši e bile ke bjo bo humilego moyeng. Batswadi ba-ka le dikgaetšedi tša-ka tše pedi ba ile ba botega go fihla lehung la bona, gomme bana bešo ba babedi ba tšwela pele ka potego tseleng ya therešo.

Ke thabela gore morwa wa-ka Allen o hlankela e le mogolo wa Mokriste. Ka nywaga e mentši o be a dutše a tsenya ditshepedišo tša tša medumo Diholong tša Mmušo le Diholong tša Kopano gomme o be a šoma go tsenya tshepedišo ya tša medumo dikopanong tša selemo. Mosadi wa gagwe ke mohlanka yo a botegago ka go se kwanantšhe wa Modimo, gomme barwa ba bona ba babedi ba hlankela e le bagolo. Morwedi wa-ka Rebekah Karres, o feditše nywaga e ka godimo ga 35 bodireding bja nako e tletšego, go akaretša le nywaga e mene a le ntlong-kgolo ya lefase ya Dihlatse tša Jehofa kua Brooklyn. Yena le monna wa gagwe ba feditše nywaga e 25 e fetilego modirong wa bosepedi dikarolong tše di fapa-fapanego tša United States.

Jesu o boletše gore Mmušo o swana le lehumo le le fihlilwego leo le ka hwetšwago. (Mateo 13:44) Ke leboga gore lapa lešo le hweditše lehumo leo nywageng e mentši kudu e fetilego. Ke tokelo e kgolo gakaakang go gadima morago nywageng e 80 ya tirelo e neetšwego go Modimo​—ke sa itshole! Ge ke be nka kgona go bušeletša bophelo bja-ka, ke be ke tla bo phela ka tsela e swanago ka gobane, ruri, ‘botho bja Modimo bo phala bophelo ka botse.’​—Psalme 63:3.

[Mongwalo wa ka tlase]

[Seswantšho go letlakala 23]

Re ile ra theetša polelo ya Ngwanabo rena Rutherford ka 1917 kua Alliance, Ohio

[Seswantšho go letlakala 23]

Ke e-na le Ralph ka pele ga koloyana yeo a e agilego

[Seswantšho go letlakala 24]

Ke e-na le bana ba-ka ba babedi lehono