Matla a Thapelo

Letšatši le sobela ka kua ga motse wa Nahoro ka Bohlabela bja Magareng. Monna wa mo-Siria yo a bitšwago Eliesere o ile a goroga ka molokeloke wa dikamela tše lesome sedibeng ka ntle ga motse. Le ge ka ntle le pelaelo a be a lapile e bile a nyorilwe, Eliesere o tshwenyegile kudu ka dinyakwa tša ba bangwe. O be a e-tšwa nageng e šele a tlile go nyakela morwa wa mong wa gagwe mosadi. Go feta moo, o be a swanetše go hwetša mosadi yo melokong ya mong wa gagwe. O be a tla phetha bjang mošomo wo o thata?

ELIESERE o dumela matleng a thapelo. Ka tumelo e makatšago e bjalo ka ya ngwana, o ile a dira kgopelo ye ya boikokobetšo: “Morêna Modimo wa Aborahama mong wa-ka, lehono a k’O ntirê wa mahlatse, e bê xo dira Aborahama mong wa-ka ka kxauxêlô. Nna byalo ke eme fá sedibeng, ’me barwedi ba batho ba motse wó ba tšwêla xo xa meetse. Byale mosetsana yo ke tl’o xo mo kxopêla ka re: A k’O sekamišê moêta wa xaxo ke nwê! yena a re: A k’O nwê; le dikamêla tša xaxo ke tlo di xêla! e bê yêna yo O mmeeleleditšexo Isaka mohlanka wa xaxo. Ké mo ke tl’o xo tseba xe O dirile mong wa-ka ka kxauxêlô.”​—Genesi 24:12-14.

Go ba le kholofelo ga Eliesere matleng a thapelo ga se ga lefeela. Mosadi wa mathomo yoo a ilego a tla sedibeng go ile gwa direga gore e be setlogolo sa ngwanabo Aborahama! Leina la gagwe ke Rebeka gomme ga se a nyalwa, o na le boitshwaro bjo bo hlwekilego gape ke yo mobotse. Ka mo go lemogegago, ga se a nea Eliesere feela gore a nwe, eupša ka botho o ile a ithapela le go tima lenyora la dikamela tša gagwe ka moka. Ka moragonyana, ka morago ga go boledišana le ba lapa, Rebeka ka go ithatela o ile a dumela go boela morago le Eliesere nageng ya kgole e le gore a yo ba mosadi wa morwa wa Aborahama, Isaka. A karabo e lego molaleng le e sa belaetšego gakaakang thapelong ya Eliesere morago kua nakong ya ge Modimo ka dinako tše dingwe a be a tsena ditaba gare ka tsela ya mohlolo!

Re ka ithuta mo gontši go tšwa thapelong ya Eliesere. E ile ya bontšha tumelo ya gagwe e kgethegilego, boikokobetšo le go kgomega mo go se nago boithati ka dinyakwa tša ba bangwe. Thapelo ya Eliesere gape e bontšhitše go ikokobeletša ga gagwe tsela ya Jehofa ya go dirišana le batho. Ga go na pelaelo gore o be a hlokometše go ba ga Modimo ka mo go kgethegilego kgaufsi le Aborahama gotee le kholofetšo ya Gagwe gore ditšhegofatšo tša nakong e tlago di tla tlela batho ka moka ka Aborahama. (Genesi 12:3) Ka baka leo, Eliesere o ile a thoma thapelo ya gagwe ka mantšu a rego: “Morêna Modimo wa Aborahama mong wa-ka.”

Jesu Kriste e be e le setlogolwana sa Aborahama seo e bego e tla ba mothopo wa go šegofatša batho ka moka bao ba kwago. (Genesi 22:18) Ge e ba re nyaka gore dithapelo tša rena di arabje gona bjale, re swanetše go bontšha go lemoga ka boikokobetšo tsela ya Modimo ya go dirišana le batho ka Morwa wa gagwe. Jesu Kriste o itše: “Xe Le dula Lè le xo Nna, le mantšu a-ka xe a dula à  le mo xo lena, xôna Le tlo kxopêla se Le se rataxo, la se hwetša.”​—Johane 15:7.

Molatedi wa Kriste yo a ilego a iponela therešo ya mantšu a a Jesu e bile moapostola Paulo. Tumelo ya gagwe matleng a thapelo e be e tloga e se ya lefeela. O ile a kgothaletša Bakriste-gotee le yena go iša dipelaelo tša bona ka moka go Modimo ka thapelo gomme a hlatsela ka gore: “Ke kxôna tšohle ka Eo a mphaxo matla.” (Ba-Filipi 4:6, 7, 13) Na se se bolela gore dikgopelo ka moka tša Paulo ka thapelo go Modimo di be di newa? Anke re bone.

Ga se Dikgopelo ka Moka Tšeo di Newago

Bodireding bja gagwe bjo e sego bja boithati, Paulo o ile a tlaišwa ke seo a ilego a se hlalosa e le “phatša nameng.” (2 Ba-Korinthe 12:7) Se e ka ba e be e le kgateletšego ya monagano le ya maikwelo yeo e bakwago ke baganetši le “bana bešo ba maaká.” (2 Ba-Korinthe 11:26; Ba-Galatia 2:4) Mohlomongwe e ka ba e bile go se ipshine ga mmele ga go tlaišwa ke leihlo. (Ba-Galatia 4:15) Go sa šetšwe boemo, ‘phatša ye ya nameng’ e ile ya ba le mafelelo a fokodišago go Paulo. O ngwadile gore: “Ke rapetše Modimo xa-raro, xore a ntloxêlê.” Lega go le bjalo, kgopelo ya Paulo ga se ya ka ya arabja. Paulo o ile a hlalosetšwa gore mehola ya moya yeo a bego a šetše a e amogetše go Modimo e bjalo ka matla a go kgotlelela diteko, e be e lekane. Go oketša moo, Modimo o itše: “Matla a-ka a iphêtha phokolong.”​—2 Ba-Korinthe 12:8, 9. 

Re ithuta eng mehlaleng ya Eliesere le Paulo? Jehofa Modimo e le ka kgonthe o theetša dithapelo tša bao ka boikokobetšo ba nyakago go mo hlankela. Eupša se ga se bolele gore ka mehla o tla ba nea dikgopelo tša bona ka gobane Modimo o na le pono e nabilego ka dilo. O tseba go feta ka mokgwa wo rena re tsebago seo se re holago. Sa bohlokwa kudu, ka mehla o dira dilo ka go dumelelana le merero ya gagwe e begilwego ka Beibeleng.

Nako ya Phodišo ya Moya

Modimo o holofetša go fodiša batho malwetši ka moka a mmele, a monagano le a maikwelo nakong ya Pušo ya Nywaga e Sekete ya Morwa wa gagwe lefaseng. (Kutollo 20:1-3; 21:3-5) Bakriste ba botegago ba letetše ka phišego bokamoso bjo bo holofeditšwego, ka tumelo e tletšego matleng a Modimo go bo dira gore e be bja kgonthe. Gaešita le ge ba se ba letela diphodišo tše bjalo tša mohlolo gona bjale, ba rapela Modimo gore a ba nee khomotšo ya gagwe gotee le matla bakeng sa go lebeletšana le diteko. (Psalme 55:22) Ge ba babja, ba ka rapelela le tlhahlo ya Modimo bakeng sa go hwetša kalafo ya dihlare e kaone e ka lekanwago ke dilo tša tša boiphedišo tšeo ba nago le tšona.

Madumedi a mangwe a kgothaletša bao ba babjago go rapelela gore ba fodišwe gona bjale, ba šupa diphodišong tša mohlolo tšeo Jesu le baapostola ba gagwe ba di dirilego. Eupša mehlolo e bjalo e be e direlwa morero o kgethegilego. E be e dira bakeng sa go hlatsela gore Jesu Kriste e be e le Mesia wa kgonthe le go bontšha gore kamogelo ya Modimo e be e fetišeditšwe go tloga setšhabeng sa ba-Juda go ya phuthegong e mpsha ya Bokriste. Morago kua, dimpho tša mohlolo di be di nyakega bakeng sa go matlafatša tumelo ya phuthego ya Bokriste yeo e bego e sa tšwa go hlongwa. Ge re bolela ka go swantšhetša, ge phuthego yeo e bego e sa le lesea e be e ikemela ka maoto gomme e thoma go butšwa, dimpho tša mehlolo di ile ‘tša fela.’​—1 Ba-Korinthe 13:8, 11.

Nakong ye ya makgaola-kgang, Jehofa Modimo o hlahla barapedi ba gagwe modirong o bohlokwa kudu wa phodišo ya moya. Ge ba sa dutše ba na le nako, go tloga go nyakega gore batho arabele kgopelong ye: “Nyakang Morêna è sa le lebaka la xo ka mmôna, Le mmitšeng à sa le kxaufsi. E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo Morêna, a mo xauxêlê; a boêlê xo Modimo wa rena, xobane ké wa tebalêlô e nntši.”​—Jesaya 55:6, 7. 

Phodišo ye ya moya ya badira-dibe bao ba itsholago e phethagatšwa ka go rutwa ga ditaba tše di lokilego tša Mmušo wa Modimo. (Mateo 24:14) Ka go nea bahlanka ba gagwe matla gore ba tšwele pele ka modiro wo wa go phološa bophelo, Jehofa Modimo o thuša batho ba dimilione ba tšwago ditšhabeng ka moka gore ba sokologe dibeng tša bona gomme ba tsene tswalanong e rategago le yena pele ga bofelo bja tshepedišo ye e kgopo. Bohle bao ba rapelago ka go tšwa pelong bakeng sa phodišo e bjalo ya moya le bohle bao ba rapelelago thušo bakeng sa go dira mediro ye ya phodišo ge e le gabotse dithapelo tša bona di a arabja.

[Mothopo wa Seswantšho go letlakala 3]

Eliezer and Rebekah/The Doré Bible Illustrations/Dover Publications