“Tsomang Jehofa le Matla a Gagwe”

“Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”​—2 KORONIKA 16:9.

1. Matla ke eng, gomme batho ba ile ba a diriša bjang?

MATLA a ka bolela dilo tše dintši, tše swanago le go ba le taolo, matla a taolo goba tutuetšo godimo ga ba bangwe; bokgoni bja go dira goba go tšweletša mafelelo; matla a mmele; matla a monagano goba a boitshwaro. Batho ga ba na pego e botse ge go tliwa tabeng ya go diriša matla. Morena Acton, yo e lego radihistori, ge a bolela ka matla ka diatleng tša bo-radipolitiki o itše: “Matla a tutueletša go senya gomme matla a feletšego a senya ka mo go feletšego.” Histori ya mehleng yeno e tletše ka mehlala yeo e bontšhago therešo e akaretšago ya mantšu a Morena Acton. Lekgolong la bo-20 la nywaga, ‘motho o bušitše motho gore a mo senye’ go feta le ge e le neng pele. (Mmoledi 8:9) Babuša-noši ba gobogilego ba dirišitše matla a bona gampe kudu-kudu gomme ba bolaile maphelo a ba dimilione. Matla ao a sa laolwego ke lerato, bohlale le toka a kotsi.

2. Hlalosa kamoo dika tše dingwe tša Modimo di kgomago tsela yeo Jehofa a dirišago matla a gagwe ka yona.

² Ka go se swane le batho ba bantši, Modimo ka mehla o diriša matla a gagwe bakeng sa tše botse. “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Jehofa o diriša matla a gagwe ka tsela e laolegago. Go se fele pelo go swareletše kahlolo ya Modimo ya go ahlola ba kgopo bakeng sa go ba nea sebaka sa go sokologa. Lerato le mo tutueletša go hlabišetša batho ba mehuta yohle letšatši​—ba lokilego le ba sa lokago. Toka e tla mo tutuetša gore mafelelong a diriše matla a gagwe a sa lekanywego go fediša motho yo a nago le mokgwa wa go baka lehu, e lego Sathane Diabolo.​—Mateo 5:44, 45; Ba-Hebere 2:14; 2 Petro 3:9.

3. Ke ka baka la’ng matla ohle a Modimo e le lebaka la go mmota?

³ Matla a boifišago a Tatago rena wa legodimong ke lebaka la go bota le go holofela​—bobedi dikholofetšong tša gagwe le tšhireletšong ya gagwe. Ngwana yo monyenyane o ikwa a šireletšegile ka gare ga batho bao a sa ba tsebego ge a kgomaretše seatla sa tatagwe, ka ge a tseba gore tatagwe a ka se dumele gore a welwe ke kotsi le ge e le efe. Ka mo go swanago, Tatago rena wa legodimong, yena “Yo matla xo phološa,” o tla re šireletša selong le ge e le sefe seo se ka re gobaletšago sa ruri ge e ba re sepela le yena. (Jesaya 63:1; Mika 6:8) Gape bjalo ka Tate yo a lokilego, Jehofa ka mehla o phethagatša dikholofetšo tša gagwe. Matla a gagwe a sa lekanywego a kgonthišetša gore ‘lentšu la gagwe le tlo phetha se a le rometšego sona.’​—Jesaya 55:11; Tito 1:2.

4, 5. (a) Ke’ng seo se ilego sa direga ge Kgoši Asa a be a botile Jehofa ka mo go feletšego? (b) Go ka direga’ng ge e ba re ithekga ka ditharollo tša batho mathateng a rena?

⁴ Ke ka baka la’ng e le gabohlokwa gakaakaa gore re ikemišetše gore re se ke ra lahlegelwa ke pono ka tšhireletšo ya Tatago rena wa legodimong? Ka gobane go a kgonega gore re metšwe ke maemo gomme re lebale moo polokego ya rena ya kgonthe e letšego gona. Se se bonwa mohlaleng wa Kgoši Asa, monna yo a bego a botile Jehofa ka gohle. Mehleng ya pušo ya Asa, madira a matla a milione a ba-Ethiopia a ile a hlasela Juda. Asa ge a lemoga gore phenyo e be e le ka lehlakoreng la manaba a gagwe, o ile a rapela ka gore: “Morêna, xa xo e a kaxo namolêla mmôtlana diatleng tša yo matla, xe e se Wêna. Re tlile ka Leina la xaxo xore re lwê le bontši byó. Morêna, Modimo wa rena ké Wêna. A xo se kê  xwa ba le motho e a kaxo êma a Iwa le Wêna.” (2 Koronika 14:11) Jehofa o ile a phetha kgopelo ya Asa gomme a mo nea phenyo ya makgaola-kgang.

⁵ Lega go le bjalo, ka morago ga nywaga e mentši ya tirelo ya potego, kholofelo ya Asa matleng a Jehofa a phološago e ile ya fokola. Bakeng sa go phema tšhošetšo ya bohlabani e tšwago mmušong wa ka leboa wa Isiraele, o ile a retologela go Siria bakeng sa thušo. (2 Koronika 16:1-3) Le ge pipa-molomo ya gagwe yeo a e neilego Kgoši ya Siria Ben-hadad e ile ya feleletša ka go tloša tšhošetšo yeo Isiraele e bego e e tšweleditše go Juda, go dira ga Asa kgwerano le Siria go ile gwa bontšha go se holofele Jehofa. Moporofeta Hanani o ile a mmotšiša ka go lebanya gore: “A xa ke re Ba-Kuše bala, le Ba-Libia bala e be e le madirá a matona? Ba bile ba na le makoloi a mantši le banamedi ba ba bantši. Bôná Morêna a na a ba xafêla seatleng sa xaxo ka xobane O be O botile Yêna.” (2 Koronika 16:7, 8) Lega go le bjalo, Asa o ile a gana kgalemelo ye. (2 Koronika 16:9-12) Ge re lebane le mathata, anke re se ke ra ithekga ka ditharollo tša batho. Go e na le moo, anke re bontšheng go bota Modimo, ka gobane go bota matla a batho go tla lebiša go nyamišweng mo go sa phemegego.​—Psalme 146:3-5.

Nyaka Matla ao Jehofa a a Neago

6. Ke ka baka la’ng re swanetše ‘go nyaka Morena le matla a gagwe’?

⁶ Jehofa a ka matlafatša bahlanka ba gagwe gotee le go ba šireletša. Beibele e re kgothaletša go ‘tsoma Jehofa le matla a gagwe.’ (Psalme 105:4, bapiša le PK.) Ka baka la’ng? Ka gobane ge re dira dilo ka matla a Modimo, matla a rena a tla dirišetšwa go hola ba bangwe go e na le go ba gobatša. Ga go na go gongwe moo re hwetšago mohlala o mokaone wa se go phala wa Jesu Kriste yo a ilego a dira mehlolo e mentši ka “matla a Modimo.” (Luka 5:17) Jesu a ka be a ile a ikgafela go beng yo a humilego, yo a tumilego goba gaešita le go beng kgoši e matla kudu. (Luka 4:5-7) Go e na le moo, o ile a diriša matla ao Modimo a bego a mo neile ona bakeng sa go tlwaetša le go ruta, go thuša le go fodiša. (Mareka 7:37; Johane 7:46) A mohlala o mobotse gakaakang bakeng sa rena!

7. Ke seka sefe sa bohlokwa seo re se hlagolelago ge re dira dilo ka matla a Modimo go e na le a rena?

⁷ Go feta moo, ge re dira dilo ka ‘matla ao Modimo a a neago,’ se se tla re thuša gore re dule re ikokobeditše. (1 Petro 4:11) Batho bao ba inyakelago matla e ba ba ba ikgogomošago. Motho yo e lego mohlala tabeng ye ke Kgoši ya Asiria Esar-haddon, yo a ilego a bolela ka boikgantšho gore: “Ke na le matla a magolo-golo, ke mogale, ke yo mogolo, ke yo mogolo-golo.” Ka mo go fapanego, Jehofa o “ikxethetše tše lefase le rexo ké tša phôkôlô, xore a nyatšišê tše matla.” Ka gona, ge e ba Mokriste wa therešo a ikgantšha, o ikgantšhetša go Jehofa ka gobane o a tseba gore seo a se dirilego ga se sa dirwa ka matla a gagwe. ‘Go ikokobetša ka tlase ga seatla se matla sa Modimo’ go tla tliša kgodišo ya kgonthe.​—1 Ba-Korinthe 1:26-31; 1 Petro 5:6.

8. Ke eng seo re swanetšego go se dira pele gore re amogele matla a Jehofa?

⁸ Re ithekga bjang ka matla a Modimo? Sa pele, re swanetše go a kgopela ka thapelo. Jesu o ile a kgonthišetša barutiwa ba gagwe gore Tatagwe o be a tla nea moya o mokgethwa go bao ba o kgopelago. (Luka 11:10-13) Ela hloko kamoo se se ilego sa nea barutiwa ba Kriste matla ge ba be ba kgetha go kwa Modimo go e na le go kwa baetapele ba bodumedi bao ba bego ba ba laetše  gore ba kgaotše go nea bohlatse ka Jesu. Ge ba be ba rapelela thušo ya Jehofa, thapelo ya bona e tšwago pelong e ile ya arabja, gomme moya o mokgethwa o ile wa ba nea matla a gore ba tšwele pele ba bolela ditaba tše di lokilego ka sebete.​—Ditiro 4:19, 20, 29-31, 33.

9. Bolela mothopo wa bobedi wa matla a moya gomme o nee mohlala wa Mangwalo wo o bontšhago go šoma ga wona.

⁹ Sa bobedi, re ka hwetša matla a moya ka Beibeleng. (Ba-Hebere 4:12) Matla a lentšu la Modimo a ile a bonagala mehleng ya Kgoši Josia. Le ge kgoši ye ya Juda e be e šetše e tlošitše medimo ya diswantšho ya boheitene nageng, go utolla mo go sa letelwago ga Molao wa Jehofa tempeleng go ile gwa mo tutueletša gore a tiiše lenaneo le la go hlwekiša. * Ka morago ga ge Josia a baletše setšhaba Molao ka boyena, setšhaba ka moka se ile sa dira kgwerano le Jehofa, ke moka gwa thongwa lesolo la bobedi le matla kudu malebana le borapedi bja medimo ya diswantšho. Mafelelo a mabotse a phetogo ya Josia e bile gore “mehleng ya xe Josia a sa phela, xa ba ka ba fapana le Morêna.”​—2 Koronika 34:33.

10. Tsela ya boraro ya go hwetša matla go Jehofa ke efe, gomme ke ka baka la’ng e le bohlokwa?

¹⁰ Sa boraro, re hwetša matla go Jehofa ka go kopanela le Bakriste. Paulo o ile a kgothaletša Bakriste gore ba kopanele diboka ka mehla e le gore ba “tutueletšane leratong le medirong e botse” le go kgothatšana. (Ba-Hebere 10:24, 25, NW) Nakong ya ge Petro a be a lokollwa kgolegong ka mohlolo, o be a nyaka go ba le bana babo, ka gona o ile a leba thwii ngwakong wa mmago Johane Mareka, moo “xo bexo xo phuthexetše ba bantši bà rapêla.” (Ditiro 12:12) Ee, ka moka ga bona ba ka ba ba ile ba dula magaeng a bona gomme ba rapela. Eupša ba ile ba kgetha go bokana gotee gore ba rapele le go kgothatšana nakong yeo e thata. Go ya bofelong bja leeto la Paulo le letelele le le kotsi la go ya Roma, o ile a kopana le bana babo ba bangwe kua Puteoli gomme ka morago a kopana le ba bangwe bao ba bego ba tšere leeto la go tlo mo gahlanetša. O ile a arabela bjang? “Paulo xe a ba bôna [ba morago], a leboxa Modimo, a tia kholofêlô.” (Ditiro 28:13-15) O ile a matlafatšwa ke go ba gotee gape le Bakriste-gotee. Le rena re hwetša matla ka go kopanela le Bakriste-gotee. Ge feela re lokologile e bile re kgona go ka kopana gotee, ga se ra swanela go leka go sepela re nnoši tseleng e pitlaganego e išago bophelong.​—Diema 18:1; Mateo 7:14.

11. Bolela maemo a mangwe ao go ona go nyakegago ka mo go kgethegilego “matla a fetišago a tlwaelegilego.”

¹¹ Ka go rapela ka mehla, go ithuta Lentšu la Modimo le go kopanela le badumedi-gotee, re ‘tia Moreneng le thateng ya matla a gagwe.’ (Ba-Efeso 6:10) Ga go na pelaelo gore ka moka ga rena re nyaka ‘go tia Moreneng.’ Ba bangwe ba swerwe ke malwetši a gwahlafatšago, ba bangwe ba tlaišwa ke tshenyo ya botšofadi goba go lahlegelwa ke molekane wa bophelo ka moka. (Psalme 41:3) Ba bangwe ba kgotleletše kganetšo ya molekane yo a sa dumelego. Batswadi, kudu-kudu batswadi bao ba se nago balekane, ba ka hwetša e le gore go šoma mošomo wa nako e tletšego mola ba godiša lapa ke boikarabelo bjo bo lapišago. Bakriste bao e sa lego bafsa ba nyaka matla bakeng sa go emeletšana le kgateletšo ya dithaka le go gana dihlare-tagi le boitshwaro bjo bo gobogilego. Ga go na yo a swanetšego go dika-dika go kgopela Jehofa “matla a fetišago a tlwaelegilego” bakeng sa go lebeletšana le ditlhohlo tše bjalo.​—2 Ba-Korinthe 4:7.

‘Go Nea yo a Lapilego Matla’

12. Jehofa o re matlafatša bjang bodireding bja Bokriste?

¹² Go feta moo, Jehofa o nea bahlanka ba gagwe matla ge ba dira bodiredi bja bona. Re bala boporofeteng bja Jesaya gore: “Ba ba lapilexo ó ba nea matla, ba ba fôkôlaxo ó ba kxoniša tše ntši. . . . Xe e le baholofedi ba Morêna bôná ba fiwa matla a mafsa, ba hlatloxa bo-ka nong; ba kxanyêla bà sa lape, ba sepela bà sa fêle matla.” (Jesaya 40:29-31) Moapostola Paulo ka boyena o ile a amogela matla a go dira bodiredi bja gagwe. Ka baka leo, bodiredi bja gagwe bo ile bja atlega. O ile a ngwalela Bakriste ba Thesalonika gore: “Ebangedi ya rena e sa ka ya Le tlêla ka polêlô fêla; e Le tletše ka matla le ka Môya-mokxêthwa.” (1 Ba-Thesalonika 1:5) Modiro wa gagwe wa go bolela  le wa go ruta o ile wa ba le matla a go dira diphetogo tše dikgolo maphelong a bao ba bego ba mo theetša.

13. Ke eng seo se ilego sa matlafatša Jeremia gore a phegelele go sa šetšwe kganetšo?

¹³ Re ka fela matla ge re gahlana le moya wa go se thabele tšhemong​—tšhemong yeo re ka bago re ile ra bolela leboelela go yona ka nywaga e mentši go se na karabelo. Jeremia ka mo go swanago o ile a ikwa a notšwe moko ke kganetšo, go kwerwa le go se thabele mo a bego a kopana le gona. O ile a ipotša gore: “Nka se ke ka hlwa ke mo gopola [Modimo], nka se ke ka hlwa ke bolela leina la gagwe.” Eupša o be a sa kgone go homola. Molaetša wa gagwe o ile wa “ba bjalo ka mollo o fišago, o tswaleletšwego ka mašapong [a gagwe].” (Jeremia 20:9, PK) Ke eng seo se ilego sa mo nea matla a mafsa ge a lebeletšane le bonaba bjo bokaakaa? Jeremia o itše: “Morêna ó na le nna, Yêna Moxale yo matla.” (Jeremia 20:11) Go lemoga ga Jeremia bohlokwa bja molaetša wa gagwe le bja kabelo ya gagwe yeo a e neilwego ke Modimo go ile gwa mo dira gore a arabele kgothatšong ya Jehofa.

Matla a go Kweša Bohloko le Matla a go Fodiša

14. (a) Leleme ke sedirišwa se matla gakaaka’ng? (b) Nea mehlala e bontšhago tshenyo yeo e ka bakwago ke leleme.

¹⁴ Ga se matla ka moka ao re nago le wona a tšwago ka go lebanya go Modimo. Ka mohlala, leleme ke le lenyenyane, eupša le na le matla a go kweša bohloko gotee le a go fodiša. Salomo o lemoša gore: “Lehu le bophelô di ’atleng tša leleme.” (Diema 18:21) Mafelelo a poledišano e kopana ya Sathane le Efa a bontšha kamoo tshenyo e kgolo kudu e ka bakwago ke mantšu. (Genesi 3:1-5; Jakobo 3:5) Le rena re ka baka tshenyo e kgolo ka leleme. Go bolela mantšu a hlabago ka bogolo bja mmele wa ngwanenyana wa mofsa go ka mo dira gore a tsene tseleng ya go swarwa ke anorexia. Go thomeletša mo go dirwago gantši go ka senya segwera sa bophelo ka moka. Ee, leleme le swanetše go laolwa.

15. Re ka diriša bjang leleme la rena bakeng sa go aga le go fodiša?

¹⁵ Lega go le bjalo, leleme le ka aga gotee le go šwalalanya. Seema sa Beibele se re: “Xo na le babolabodi ba ma-hlaba-wa-lerumô; xe e le leleme la mohlale ké moreku.” (Diema 12:18) Bakriste ba bohlale ba diriša matla a leleme bakeng sa go homotša ba nyamilego le ba kwelego bohloko. Mantšu a kwelobohloko a ka kgothatša bafsa bao ba lego mahlalagading bao ba lwantšhanago le kgateletšo ya dithaka yeo e gobatšago. Leleme le le naganelago le ka kgonthišetša banababo rena le dikgaetšedi bao ba godilego gore ba sa dutše ba nyakwa e bile ba a ratwa. Mantšu a botho a ka natefiša letšatši la bao ba babjago. Go feta tšohle, re ka diriša leleme la rena go abelana molaetša o  matla wa Mmušo le bohle bao ba re theetšago. Re ka kgona go bolela Lentšu la Modimo ge e ba pelo ya rena e le ka go lona. Beibele e re: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.”​—Diema 3:27.

Tirišo e Swanetšego ya Leleme

16, 17. Ge ba diriša matla a bona a taolo ao ba a neilwego ke Modimo, bagolo, batswadi, banna le basadi ba ka ekiša Jehofa bjang?

¹⁶ Le ge e le yo matla ohle, Jehofa o buša phuthego ka lerato. (1 Johane 4:8) Ka go mo ekiša, balebeledi ba Bakriste ba hlokomela mohlape wa Modimo ka lerato​—ba diriša matla a bona a taolo gabotse, e sego gampe. Ke therešo gore balebeledi ka dinako tše dingwe go nyakega gore ba ‘kgaleme, ba eletše le go kgothatša,’ eupša se se dirwa ka ‘go se fele pelo le ka go ruta.’ (2 Timotheo 4:2) Ka gona bagolo ba dula ba naganišiša ka mantšu ao moapostola Petro a a ngwaletšego bao ba nago le matla a taolo ka phuthegong: “Dišang mohlape wa Modimo o o go lena, le o lebelele e sego ka go gapeletšwa, eupša e be ka go ithapa, e sego ka baka la moruo o mobe, eupša e be ka pelo e ratago. Gomme e se be le ka buša diphuthego ka bogoši, eupša le beele mohlape mohlala.”​—1 Petro 5:2, 3, PK; 1 Ba-Thesalonika 2:7, 8.

¹⁷ Batswadi le banna le bona ba na le matla a taolo ao ba a filwego ke Jehofa, gomme matla a a swanetše go dirišetšwa go thuša, go fepa le go hlokomela. (Ba-Efeso 5:22, 28-30; 6:4) Mohlala wa Jesu o bontšha gore matla a taolo a ka dirišwa ka katlego ka tsela e lerato. Ge e ba tayo e le e leka-lekanego le yeo e tsepamego, bana ga ba nyame. (Ba-Kolose 3:21) Manyalo a a matlafatšwa ge banna ba Bakriste ka lerato ba diriša bohlogo bja bona gomme basadi ba hlompha ka mo go tseneletšego banna ba bona bao e lego dihlogo go e na le go fetela ka kua ga karolo yeo ba e abetšwego ke Modimo ya tutuetšo ya go laola goba go fenya.​—Ba-Efeso 5:28, 33; 1 Petro 3:7.

18. (a) Re swanetše go ekiša mohlala wa Jehofa bjang tabeng ya go laola kgalefo ya rena? (b) Ke eng seo bao ba nago le matla a taolo ba swanetšego go leka go se bjala go bao ba lego ka tlase ga tlhokomelo ya bona?

¹⁸ Bao ba nago le matla a taolo ka lapeng le ka phuthegong ba swanetše kudu-kudu ba ele hloko go laola kgalefo ya bona, ka ge kgalefo e bjala poifo go e na le lerato. Moporofeta Nahume o itše: “Morêna ké wa pelo e telele; fêla, matla a xaxwe ké a maxolo.” (Nahume 1:3; Ba-Kolose 3:19) Go laola kgalefo ya rena ke seka sa matla, mola e le gore go ineela go yona ke pontšho ya bofokodi. (Diema 16:32) Bobedi ka lapeng le ka phuthegong, pakane ke go bjala lerato​—lerato la go rata Jehofa, lerato la go ratana seng le lerato la go rata melao ya motheo ya go loka. Lerato ke tlamo e tiilego go di feta tšohle le tutuetšo e matla kudu bakeng sa go dira se se lokilego.​—1 Ba-Korinthe 13:8, 13; Ba-Kolose 3:14.

19. Ke kgonthišetšo efe e kgodišago yeo Jehofa a e neago, gomme re swanetše go arabela bjang?

¹⁹ Go tseba Jehofa ke go lemoga matla a gagwe. Jehofa o boletše ka Jesaya gore: “A ga o tsebe? A ga o ešo wa kwa? gobane Modimo Yo a sa felego, Jehofa Yo a hlodilego dipheletšo tša lefase, ga a lape, ga a felelwe ke matla.” (Jesaya 40:28, PK) Matla a Jehofa ga a fele. Ge e ba re ithekga ka yena gomme re sa ithekge ka rena ka noši, a ka se ke a re tlogela. O re kgonthišetša gore: “O se boifê xobane ke na le wene. O se kê wa thšoxa, xobane Modimo wa xaxo ké Nna. Ke a Xo tiiša; ke a Xo thuša; ke Xo hlêka ka letsôxô la-ka le letona le-ya-ka-tokô.” (Jesaya 41:10) Re swanetše go arabela bjang tlhokomelong ya gagwe e lerato? Ka go swana le Jesu, anke ka mehla re dirišeng matla le ge e le afe ao Jehofa a re neago ona bakeng sa go thuša le go aga. Anke re laoleng leleme la rena e le gore le fodiše go e na le go gobatša. Le gona anke ka mehla re duleng re phafogile moyeng, gomme re tie tumelong le go matlafala matleng a Mmopi wa rena yo Mogolo, Jehofa Modimo.​—1 Ba-Korinthe 16:13.

[Mongwalo wa ka tlase]

Na o ka Hlalosa?

• Jehofa o diriša matla a gagwe bjang?

• Re ka ithekga bjang ka matla a Jehofa?

• Matla a leleme a swanetše go dirišwa bjang?

• Matla a taolo ao a neilwego ke Modimo e ka ba tšhegofatšo bjang?

[Dipotšišo tša Thuto]

[Seswantšho go letlakala 15]

Jesu o be a diriša matla a Jehofa bakeng sa go thuša ba bangwe

[Diswantšho go letlakala 17]

Re ka kgona go bolela Lentšu la Modimo ge e ba pelo ya rena e le ka go lona