Bagoeledi ba Mmušo ba a Bega

Tumelo ya Bona e Ile ya Putswa

MOAPOSTOLA Paulo e be e le monna wa tumelo e kgolo gomme ka mo go swanago o ile a kgothaletša badumedi-gotee le yena go hlagolela tumelo. O itše: “E a batamêlaxo Modimo ó swanetše xo dumêla xore Modimo ó xôna, le xore ba ba Mo nyakaxo ó a ba putsa.” (Ba-Hebere 11:6) Diphihlelo tše di latelago tša Mozambique di bontšha kamoo Jehofa a putsago tumelo e tiilego le go araba dithapelo tše tšwago pelong.

• Kgaetšedi yo e lego mohlologadi wa go tšwa profenseng ya leboa ya Niassa o be a tshwenyegile mabapi le mokgwa woo yena le bana ba gagwe ba tshelelago ba bego ba tla ya Kopanong ya Selete ya “Tsela ya Modimo ya Bophelo” ka wona. Mothopo o nnoši wa gagwe wa ditseno e be e le go rekiša dilo mmarakeng wa lefelong leo, eupša ge matšatši a kopano a batamela o be a na le tšhelete e lekanego leeto la setimela la go ya feela bakeng sa gagwe le lapa la gagwe. Lega go le bjalo, o ile a phetha ka go bea kholofelo ya gagwe ditokišetšong tša Jehofa gomme a tšwela pele ka ditokišetšo tša gagwe gore a be gona kopanong.

O ile a namela setimela le bana ba gagwe ba tshelelago. Nakong ya leeto mohlahli o ile a mmatamela bakeng sa go hlahloba thekethe ya gagwe. Ge a hlokomela petšhe ya gagwe, mohlahli o ile a botšiša gore ke boitsebišo bja mohuta mang bjoo a bego a bo hlometše. Kgaetšedi e ile ya mmotša gore e be e le ya go mo hlaola e le moemedi kopanong ya selete ya Dihlatse tša Jehofa. Mohlahli o ile a botšiša gore: “Kopano ye e tla be e swaretšwe kae?” Ka morago ga go kwa gore kopano e tla be e le profenseng ya kgaufsi ya Nampula, mo e ka bago bokgole bja dikhilomithara tše 300, o ile a mo lefiša seripa-gare sa tšhelete yeo go tlwaetšwego go lefišwa bakeng sa thekethe! Ke moka o ile a nea yena le lapa la gagwe dithekethe tša go boa ka seripa-gare se sengwe sa tšhelete ya gagwe ya leeto. O be a thabile gakaakang ka go bea kholofelo ya gagwe go Jehofa!​—Psalme 121:1, 2. 

Mo e ka bago lebaka la nywaga e 25, mosadi yo a sekametšego bodumeding kudu o ile a rapela Modimo gore a mo laetše tsela e nepagetšego ya go mo rapela. Kereke yeo a bego a e tsena e be e kopanya ditirelo tša bodumedi le ditirelo tša meetlo, gomme o be a belaela gore e be mohuta wo wa bodumedi e be e le o thabišago Modimo.

O laodiša ka gore: “Ka mehla ke be ke gopola mantšu a Jesu a begilwego go Mateo 7:7: ‘Kxopêlang; ké mo Le tl’o xo fiwa. Nyakang; ké mo Le tl’o xo bôna. Ôpaôpang; ké mo Le tl’o xo bulêlwa.’ Ka go dula ke nagana ka lengwalo le, ke ile ka rapela ka mehla gore Modimo a nkiše therešong. Ka letšatši le lengwe moruti wa kereke ya rena o ile a kgopela ka moka bao ba bego ba šoma mmarakeng wa lefelong leo gore ba tliše tšhelete e itšego gotee le tše dingwe tša dilo tša bona tšeo ba di rekišago e le gore a kgone go ba tšhollela ditšhegofatšo. Ke ile ka lebelela kgopelo ye e le yeo e sego ya mangwalo, ka gona ka se ke ka tliša selo. Ge moruti a bona gore ga se ka tliša ‘sehlabelo,’ o ile a thoma go nthogaka ka pele ga ditho ka moka tša kereke. Letšatšing leo ke ile ka lemoga gore ye e be e se tsela yeo Modimo a nyakago go rapelwa ka yona, ka gona ke ile ka tlogela kereke. Go sa dutše go le bjalo ke ile ka tšwela pele ke phegeletše thapelong bakeng sa go hwetša therešo.

“Mafelelong, ke ile ka rapa sebete gomme ka ikopanya le wa leloko yo e lego yo mongwe wa Dihlatse tša Jehofa. O ile a nnea pampišana, gomme ka morago ga go e bala ke ile ka lemoga kapejana gore Modimo o be a araba dithapelo tša-ka. Ge nako e dutše e e-ya, monna yo ke bego ke dula le yena o ile a thoma go lemoga ditherešo tša Beibele gomme re ile ra ngwadiša lenyalo la rena ka molao. Lega go le bjalo, ka morago monna wa-ka o ile a babja kudu. Eupša o ile a nkgothatša go fihla lehung la gagwe gore ke kgotlelele tseleng ya therešo e le gore re tle re kopane gape Paradeiseng.

“Ke leboga Jehofa ka mo go sa kgaotšego bakeng sa go araba dithapelo tša-ka le go mpontšha tsela e nepagetšego ya go mo rapela. Dithapelo tša-ka gape di arabegile ka gore ke bone bana ba-ka ka moka ba seswai ba e-ba bahlanka ba ineetšego ba Jehofa.”