Kamoo Jehofa a re Hlahlago ka Gona

“O nthlahlê mmileng wa xo loka.”​—PSALME 27:11.

1, 2. (a) Jehofa o hlahla batho ba gagwe bjang lehono? (b) Ke eng seo se akaretšwago tabeng ya go ikhola ka mo go feletšego ka diboka?

JEHOFA ke Mothopo wa seetša le therešo, bjalo ka ge re ithutile sehlogong se se fetilego. Lentšu la gagwe le edišetša tsela ya rena ge re dutše re sepela mmileng wa go loka. Jehofa o re hlahla ka go re ruta ditsela tša gagwe. (Psalme 119:105) Ka go swana le mopsalme wa bogologolo, re arabela ka tebogo tlhahlong ya Modimo gomme re rapela ka gore: “Morêna, nthutê tsela ya xaxo, O nthlahlê mmileng wa xo loka.”​—Psalme 27:11.

² Tsela e nngwe yeo Jehofa a neago tlhahlo ka yona lehono ke ka diboka tša Bokriste. Na re ikhola ka mo go feletšego ka tokišetšo ye e lerato ka (1) go kopanela ka mehla, (2) go theetša lenaneo ka kelohloko le (3) go tšea karolo ka mafolofolo dikarolong tšeo di akaretšago batheetši? Go feta moo, na re arabela ka tebogo ge re amogela ditšhišinyo tšeo di tla re thušago go dula “mmileng wa xo loka”?

O Kopanela Bjang Dibokeng?

3. Modiredi yo mongwe wa nako e tletšego o ile a hlagolela bjang mokgwa o mobotse wa go kopanela dibokeng ka mehla?

³ Bagoeledi ba bangwe ba Mmušo ga e sa le ba dutše ba kopanela dibokeng ka mehla go tloga bjaneng. Modiredi yo mongwe wa nako e tletšego wa Dihlatse tša Jehofa o gopola gore: “Ge nna le bana bešo re be re gola nywageng ya bo-1930, go be go sa nyakege gore re botšiše batswadi ba rena gore re be re ya dibokeng. Re be re tseba gore re a ya ka ntle le ge re be re babja. Lapa lešo le be le sa fošwe ke diboka feela.” Ka go swana le moporofeta wa mosadi Anna, kgaetšedi yo ga a “tloxe” lefelong la Jehofa la borapedi.​—Luka 2:36, 37.

4-6. (a) Ke ka baka la’ng bagoeledi ba bangwe ba Mmušo ba fošwa ke diboka? (b) Ke ka baka la’ng e le gabohlokwa gore re be gona dibokeng?

⁴ Na o gare ga bao ba kopanelago dibokeng tša Bokriste ka mehla, goba na o a rothela karolong ye? Bakriste ba bangwe bao ba bego ba nagana gore ba dira gabotse ba ile ba dira phetho ya go kgonthišetša seo. Ka dibeke tše mmalwa, ba ile ba ngwala fase seboka se sengwe le se sengwe se ba bego ba bile go sona. Ge ba hlahloba pego bofelong bja nako e beilwego, ba ile ba makatšwa ke go bona palo ya diboka tšeo ba ilego ba di foša.

⁵ Yo mongwe a ka re, ‘Ga go makatše. Batho ba gateletšegile kudu lehono mo e lego gore ga go bonolo go bona go ba gona ka mehla dibokeng.’ E tloga e le therešo gore re phela mehleng e gateletšago. Se segolo le go feta, ga go na pelaelo gore kgateletšo e tla oketšega. (2 Timotheo 3:13) Eupša na seo ga se dire gore go kopanela ka mehla dibokeng e be gabohlokwa kudu? Ka ntle le dijo tša ka mehla tše di agago tša moya bakeng sa go re boloka re phela, re ka se ke ra holofela gore re tla emeletšana le kgateletšo yeo e bakwago ke tshepedišo ye. Ka gona, ka ntle le go kopanela ka mehla re ka lekega gore re tloge “mmileng wa xo loka” ka mo go feletšego! (Diema 4:18) Ke therešo gore ge re fihla gae ka morago ga letšatši le boima, ga se ka mehla re ka ikwago re rata go ya dibokeng. Lega go le bjalo, ge re e-ya go tšona go sa šetšwe go lapa, re a ikhola e bile re kgothatša le Bakriste-gotee le rena Holong ya Mmušo.

⁶ Ba-Hebere 10:25 e bontšha lebaka le lengwe le bohlokwa leo le swanetšego go dira gore re kopanele ka mehla dibokeng. Moo moapostola Paulo o eletša Bakriste-gotee gore ba bokane gotee ‘gagolo ka ge ba bona letšatši le le kgaufsi.’ Ee, ga se ra swanela go lahlegelwa ke pono ya therešo ya gore ‘letšatši la Jehofa’ le a batamela. (2 Petro 3:12, bapiša le NW.) Ge re be re ka phetha ka  gore bofelo bja tshepedišo ye bo sa le kgole kudu, mo gongwe re ka thoma go dumelela dilo tšeo di phegelelwago ke batho di šitiša mediro e nyakegago ya moya, e bjalo ka go ba gona dibokeng. Ka gona, bjalo ka ge Jesu a lemošitše, ‘letšatši leo le ka re wela sehlogo.’​—Luka 21:34.

E-ba Motheetši yo Botse

7. Ke ka baka la’ng e le gabohlokwa gore bana ba theetše ka kelohloko ge ba le dibokeng?

⁷ Go ba gona feela dibokeng ga se gwa lekana. Re swanetše go theetša ka kelohloko gomme re šetše seo se bolelwago moo. (Diema 7:24) Se se akaretša bana ba rena. Ge ngwana a tsena sekolo, o lebeletšwe gore a theetše morutiši, gaešita le ge go e-na le thuto yeo a sa e ratego goba ye e mo thatafalelago. Morutiši o a tseba gore ge ngwana a leka go theetša ka kelohloko, o tla holega ka tekanyo e itšego thutong yeo. Ka gona, na ga se mo go kwalago gore bana bao ba lego nywageng ya go tsena sekolo ba lebiše tlhokomelo thutong yeo e newago dibokeng tša phuthego go e na le gore ba dumelelwe gore ba robale gatee-tee ge diboka di thoma? Ke therešo gore gare ga ditherešo tša bohlokwa tše di hwetšwago ka Mangwalong go na le “tše thata xo kwêxa.” (2 Petro 3:16) Eupša ga se ra swanela go nyatša bokgoni bja ngwana bja go ithuta. Modimo ga a bo nyatše. Mehleng ya Beibele, o ile a laela bahlanka ba gagwe bao e sa lego bafsa gore ‘ba kwe, ba ithute, gomme ba boife Jehofa, ba hlokomele se se bolelwago ke molao wo, ba dire ka wona,’ woo ka ntle le pelaelo karolo e nngwe ya wona e bego e le thata bakeng sa gore bana ba ka e kwešiša. (Doiteronomio 31:12; bapiša le Lefitiko 18:1-30.) Na Jehofa o letetše se se lego ka tlase ga seo go bana lehono?

8. Ke megato efe yeo e gatwago ke batswadi ba bangwe bakeng sa go thuša bana ba bona gore ba hlwaye tsebe ge ba le dibokeng?

⁸ Batswadi ba Bakriste ba lemoga gore dinyakwa tša bana ba bona tša moya di kgotsofatšwa ka tekanyo e itšego ka seo ba ithutago sona dibokeng. Ka gona, batswadi ba bangwe ba lokišeletša gore bana ba bona ba robale pele ga diboka e le gore ba fihle Holong ya Mmušo ba lapologile e bile ba loketše go ka ithuta. Batswadi ba bangwe ba ka laola ka thata goba go fediša ka bohlale go bogela ga bana ba bona thelebišene mantšiboeng a diboka. (Ba-Efeso 5:15, 16) Le gona batswadi ba bjalo ba dira gore ditšhitišo e be tše di fokoditšwego, ba kgothaletša bana ba bona go theetša le go ithuta ka go ya ka bogolo bja bona le bokgoni bja bona.​—Diema 8:32.

9. Ke eng se mo gongwe se ka re thušago go godiša bokgoni bja rena bja go theetša?

⁹ Jesu o be a bolela le batho ba bagolo ge a be a re: “Lebelelang ka mo le kwago ka gona.” (Luka 8:18, PK) Mehleng ye, go bonolo go bolela seo go e na le go se dira. Ka mo go amogelegago, go theetša ka mafolofolo ke modiro o mogolo, eupša bokgoni bja go theetša bo ka hlagolelwa. Ge o theeditše polelo ya Beibele goba karolo ya seboka, leka go kgetha dintlha tše dikgolo. Naganela pele seo seboledi se tlago go se bolela. Tsoma dintlha tšeo o ka di dirišago bodireding bja gago goba wa di diriša bophelong bja gago. Boeletša dintlha monaganong ge di dutše di ahla-ahlwa. Ngwala dintlha tše kopana.

10, 11. Batswadi ba bangwe ba ile ba thuša bjang bana ba bona gore e be batheetši ba babotse, gomme ke mekgwa efe yeo o hweditšego e le e thušago?

¹⁰ Mekgwa e mebotse ya go theetša e ithutwa gabotse motho e sa le yo monyenyane. Gaešita le pele ga ge ba ka ithuta go bala le go ngwala, bana ba bangwe bao ba sa hlwago ba tsena sekolo ba kgothaletšwa ke batswadi ba bona go ngwala “dintlha” nakong ya diboka. Ba ngwala leswao pampišaneng ge go dirišwa mantšu a tlwaelegilego a bjalo ka “Jehofa,” “Jesu” goba “Mmušo.” Ka tsela ye, bana ba ka ithuta go theetša ka kelohloko seo se bolelwago go tšwa sethaleng.

¹¹ Gaešita le bana ba bagolwanyane ka dinako tše dingwe ba nyaka gore ba kgothaletšwe go hlwaya tsebe. Hlogo e nngwe ya lapa ge e lemoga gore morwa wa yona wa nywaga e 11 o be a lelera ka monagano kopanong e kgolo ya Bokriste, e ile ya nea mošemane Beibele gomme ya mo kgopela gore a lebelele mangwalo ge a be a bolelwa ke diboledi. Tate yo a bego a ngwala dintlha, o ile a diša morwa ge a le gare a swere Beibele. Ka morago ga moo, mošemane o ile a latela lenaneo la kopano ka mafolofolo a magolo.

Dira Gore Lentšu la Gago le Kwewe

12, 13. Ke ka baka la’ng e le gabohlokwa gore re kopanele le phuthego go opeleng?

¹² Kgoši Dafida o opetše ka gore: “Ke ipea go aletare ya gago [Jehofa], gore ke kwatše lentšu la tumišo.” (Psalme 26:6, 7, PK) Diboka tša Dihlatse tša Jehofa di re nea dibaka tše dibotse kudu gore re bolele tumelo ya rena ka go hlaboša. Tsela yeo re ka dirago se ka yona ke ka go kopanela le phuthego ge e opela. Ye ke karolo e bohlokwa ya borapedi bja rena, eupša e ka hlokomologwa gabonolo.

¹³ Bana ba bangwe bao ba sa hlwago ba kgona go bala ba swara ka hlogo mantšu a dikopelo tša Mmušo tšeo di tlago go opelwa dibokeng bekeng e nngwe le e nngwe. Ba thabišwa ke ge ba kgona go opela gotee le ba bagolo. Lega go le bjalo, ge bana ba le gare ba gola, ba ka no se be le tshekamelo ya go rata go kopanela go opeleng dikopelo tša Mmušo. Batho ba bangwe ba bagolo le bona ba na le dihlong tša go opela dibokeng. Lega go le bjalo, go opela ke karolo ya borapedi bja rena, go fo etša ge bodiredi  bja tšhemo e le karolo ya borapedi bja rena. (Ba-Efeso 5:19) Re dira sohle seo re ka se kgonago go tumiša Jehofa bodireding bja tšhemo. Na re ka se ke ra mo tumiša gape le ka go phagamiša mantšu a rena​—go sa šetšwe gore ke a mabosana goba go se bjalo​—ka dikopelo tše di tšwago pelong tša tumišo?​—Ba-Hebere 13:15.

14. Ke ka baka la’ng taba yeo re ithutago yona dibokeng e swanetše go lokišeletšwa ka kelohloko e sa le pele?

¹⁴ Gape re tlišetša Modimo tumišo ge re nea ditlhaloso tše di agago nakong ya ge go newa dikarolo tšeo di nyakago gore batheetši ba tšee karolo go tšona dibokeng tša rena. Se se nyaka go di lokišeletša. Go nyakega nako bakeng sa go naganišiša ka dikarolo tše di tseneletšego tša Lentšu la Modimo. Moapostola Paulo, morutwana yo mafolofolo wa Mangwalo, o ile a lemoga se. O ngwadile gore: “A! Bodiba bya lehumô la Modimo, le bya bohlale bya xaxwe, bya tsebô ya xaxwe!” (Ba-Roma 11:33) Dihlogo tša malapa, ke gabohlokwa gore le thuše setho se sengwe le se sengwe sa lapa la lena go fata bohlaleng bja Modimo, bjalo ka ge bo utollwa ka Mangwalong. Beela nako ka thoko nakong ya thuto ya lapa ya Beibele bakeng sa go hlalosa dintlha tše thata le go thuša lapa la gago go lokišeletša diboka.

15. Ke ditšhišinyo dife tšeo di ka thušago motho gore a nee ditlhaloso dibokeng?

¹⁵ Ge e ba o rata gore o nee ditlhaloso leboelela dibokeng, ke ka baka la’ng o sa lokišetše e sa le pele selo seo o nyakago go se bolela? Ga go nyakege taba e tseneletšego. Temana ya Beibele yeo e balwago ka kgodišego goba mantšu a sego kae ao a kgethilwego gabotse ao a bolelwago go tšwa pelong a tla lebogwa. Bagoeledi ba bangwe ba kgopela moswari wa thuto gore a ba beele gore ba nee tlhaloso ya mathomo serapeng se itšego, e le gore ba tle ba se ke ba lahlegelwa ke sebaka sa go bolela tumelo ya bona.

Yo a se Nago Phihlelo o a Hlalefa

16, 17. Ke keletšo efe yeo mogolo yo mongwe a ilego a e nea mohlanka wa bodiredi, gomme ke ka baka la’ng e ile ya šoma?

¹⁶ Dibokeng tša Dihlatse tša Jehofa, re gopotšwa ka mehla gore re bale Lentšu la Modimo letšatši le letšatši. Go dira bjalo go a lapološa. Go bile go re thuša gore re dire diphetho tše bohlale, re lokiše diphošo tša semelo sa rena, re gane diteko le go boela teka-tekanong ya rena ya moya ge e ba re ile ra gata lebatha.​—Psalme 19:7.

¹⁷ Bagolo ba phuthego bao ba nago le phihlelo ba dula ba loketše go nea keletšo ya Mangwalo yeo e dumelelanago le dinyakwa tša rena. Sohle seo re swanetšego go se dira ke go e ‘ga’ ka go tsoma keletšo ya bona yeo e theilwego Beibeleng. (Diema 20:5) Ka letšatši le lengwe mohlanka wa modiredi wa mofsa yo a fišegago o ile a kgopela ditšhišinyo go mogolo mabapi le kamoo a bego a ka dirišwa kutšwanyana ka gona ka phuthegong. Mogolo, yo a bego a tseba lesogana gabotse, o ile a phetla Beibele ya gagwe go 1 Timotheo 3:3 (NW) yeo e bolelago gore banna bao ba kgethilwego ba swanetše “go ba ba leka-lekanego.” O ile a hlalosa ka botho ditsela tšeo ka tšona lesogana le bego le ka bontšha go leka-lekana ditswalanong tša lona le ba bangwe. Na ngwanabo rena wa mofsa o ile a kgopišwa ke keletšo e lebanyago yeo a ilego a e amogela? Le gatee! O hlalositše ka gore: “Mogolo o ile a diriša Beibele, ka gona ke ile ka lemoga gore keletšo e be e e-tšwa go Jehofa.” Mohlanka wa bodiredi o ile a diriša ka tebogo keletšo yeo gomme o dira tšwelopele e botse.

18. (a) Ke eng seo se ilego sa thuša Mokriste yo mongwe wa mofsa go ganetša teko sekolong? (b) Ke ditemana dife tša Beibele tše o di gopolago ge o lebeletšane le teko?

¹⁸ Lentšu la Modimo gape le ka thuša bafsa go “thšaba dikxanyoxô tša bosoxana [“bofsa,” NW].” (2 Timotheo 2:22) Hlatse ya Jehofa ya mofsa yeo e sa tšwago go aloga sekolong se se phagamego e ile ya kgona go gana teko nywageng ka moka ya go tsena ga yona sekolo ka go naganišiša le go diriša ditemana tše itšego tša Beibele. O be a fela a nagana ka keletšo yeo e ngwadilwego go Diema 13:20 e rego: “Šika le bahlale O hlalefê.” Ka go dumelelana le seo, o be a ela hloko go hlagolela segwera le bao ba hlomphago ka mo go tseneletšego melao ya motheo ya Mangwalo feela. O hlalositše ka gore: “Ga ke phale motho le ge e le mang. Ge ke šika le sehlopha se sa lokago, ke tla rata go kgahliša bagwera ba-ka, gomme se se ka lebiša bothateng.” Keletšo ya Paulo yeo e ngwadilwego go 2 Timotheo 1:8 (PK) le yona e ile ya mo thuša. O ngwadile gore: “O se ke wa hlabja ke dihlong ka baka la bohlatse bja Morena wa rena, . . .  eupša o kopane le Ebangedi tlhokofalong.” Ka go dumelelana le keletšo yeo, o ile a abelana ka sebete le bao a tsenago le bona ka klaseng ditumelo tša gagwe tše di theilwego Beibeleng lebakeng le lengwe le le lengwe le le swanetšego. Nako le nako ge a be a filwe kabelo ya go nea klase pego ya molomo, o be a kgetha taba yeo e bego e mo dumelela go nea bohlatse ka bohlale mabapi le Mmušo wa Modimo.

19. Ke ka baka la’ng lesogana le lengwe le ile la palelwa ke go emeletšana le dikgateletšo tša lefase le, eupša ke eng seo se ilego sa le nea matla moyeng?

¹⁹ Ge e ba go ka direga gore re aroge “mmileng wa go loka,” Lentšu la Modimo le ka re thuša go lokiša megato ya rena. (Diema 4:18) Lesogana le le dulago Afrika le ile la iponela se. Ge yo mongwe wa Dihlatse tša Jehofa a le etetše, le ile la amogela thuto ya Beibele. Le ile la thabela seo le bego le ithuta sona eupša go se go ye kae la thoma go šika le bagwera ba babe sekolong. Ge nako e dutše e e-ya, le ile la wela mokgweng wa go phela o gobogilego. Le dumela ka gore: “Letswalo la-ka le ile la ntlhomara, gomme ke ile ka swanelwa ke gore ke kgaotše go ya dibokeng.” Ka morago le ile la thoma go kopanela dibokeng gape. Lesogana le boletše tlhaloso ye e ntšhago sa mafahleng: “Ke ile ka utolla gore lebaka le legolo la se ka moka e bile gore ke be ke swerwe ke tlala ya moya. Ke be ke se na thuto ya motho ka noši. Ke ka baka leo ke ilego ka se ke ka kgona go emeletšana le teko. Ka morago ke ile ka thoma go bala Morokami le Phafoga! Ganyenyane-ganyenyane, ke ile ka tielela moyeng gomme ka hlwekiša bophelo bja-ka. Se e bile bohlatse bjo bobotse go bao ba ilego ba lemoga diphetogo tšeo ke di dirilego. Ke ile ka kolobetšwa, gomme ga bjale ke thabile.” Ke eng seo se ilego sa nea lesogana le matla a go fenya bofokodi bja lona bja nama? Le ile la tsošološa matla a lona a moya ka thuto ya ka mehla ya motho ka noši ya Beibele.

20. Mofsa a ka ganetša bjang ditlhaselo tša Sathane?

²⁰ Bafsa ba Bakriste, le hlasetšwe lehono! Gore le tle le ganetše ditlhaselo tša Sathane, le swanetše go iphepa ka mehla ka dijo tša moya. Mopsalme, yo go bonagalago e be e le lesogana ka boyena, o be a kwešiša se. O ile a leboga Jehofa ka ge a mo neile Lentšu la gagwe, e le gore ‘lesogana le ka thakga mosepelo wa lona.’​—Psalme 119:9.

Gohle Moo Modimo a re Išago Gona, re tla Latela

21, 22. Ke ka baka la’ng re sa swanela go phetha ka gore tsela ya therešo e thata kudu?

²¹ Jehofa o ile a hlahla setšhaba sa Isiraele a se ntšha Egipita a se tsenya Nageng ya Kholofetšo. Go ka direga gore tsela yeo a ilego a e kgetha e be e bonagala e le thata ka mo go sa nyakegego go ya ka pono ya batho. Go e na le go tšea yeo e bego e bonagala e le bonolo, e lego tsela e lego thwii e bapilego le Lewatle la Mediterranean, Jehofa o ile a hlahla batho ba gagwe tseleng e thata ya leganateng. Lega go le bjalo, se ge e le gabotse e be e le botho bjo Modimo a bego a bo bontšha. Le ge tsela ya lewatleng e be e kgaoletša, fela e be e tla fetiša ba-Isiraele nageng ba-Filisita ba manaba. Ka go kgetha tsela e nngwe, Jehofa o ile a šireletša batho ba gagwe gore ba se ke ba lebana le ba-Filisita e sa le ka pela.

²² Ka mo go swanago, tsela yeo Jehofa a re hlahlago go yona lehono e ka bonagala e le thata ka dinako tše dingwe. Bekeng e nngwe le e nngwe, re na le thulaganyo e tletšego ya mediro ya Bokriste, go akaretša le diboka tša phuthego, thuto ya motho ka noši le tirelo ya tšhemo. Ditsela tše dingwe di ka bonala di le bonolo. Eupša ke feela ge re latela tlhahlo ya Modimo moo re tlago go goroga moo re yago gona moo re katanago ka thata kudu gore re fihle gona. Ka gona, anke re tšweleng pele go amogela thuto e bohlokwa e tšwago go Jehofa gomme re dule re le “mmileng wa xo loka” ka mo go sa felego!​—Psalme 27:11.

Na o ka Hlalosa?

• Ke ka baka la’ng go nyakega gore re be gona ka mehla dibokeng tša Bokriste ka mo go kgethegilego?

• Batswadi ba ka dira’ng bakeng sa go thuša bana ba bona go hlwaya tsebe dibokeng?

• Go ba motheetši yo botse go akaretša’ng?

• Ke eng seo se ka re thušago go nea ditlhaloso dibokeng?

[Dipotšišo tša Thuto]

[Seswantšho go letlakala 16, 17]

Go kopanela dibokeng tša Bokriste go re thuša gore re dule re gopola ka letšatši la Jehofa

 [Diswantšho go letlakala 18]

Go na le ditsela tše di fapa-fapanego tša go tumiša Jehofa dibokeng tša Bokriste