Bagoeledi ba Mmušo ba a Bega

“Le Tseba mo Gontši Kudu ka Beibele”

GE Jesu wa nywaga e 12 a be a bolela ka sebete le baetapele ba bodumedi kua Jerusalema, “ba ba mo kwaxo bohle ba kxotsa thlaoloxanyô ya xaxwe le diphetolô tša xaxwe.” (Luka 2:47) Ka mo go swanago lehono, bahlanka ba bantši ba bafsa ba Jehofa ba rapa sebete sa go bolela go barutiši ba bona le go bao ba tsenago sekolo le bona ka Modimo le Beibele gomme ka mehla ba ba le mafelelo a kgahlišago.

Tiffany wa nywaga e 14, o be a le klaseng yeo go yona poledišano e nngwe e bego e lebišitšwe boporofeteng bja Beibele bja dibeke tše 70 tša nywaga, bjo bo hwetšwago go Daniele 9:24-27. Morutiši o ile a nea mabaka a mmalwa ka ditemana gomme ka pela-pela a hlalosa taba ka go fo e kga ka godimo.”

Mathomong Tiffany o be a diega go emiša letsogo. O re: “Eupša ka lebaka le itšego se se be se ntshwenya e le ruri ka ge ditemana di be di se tša hlaloswa ka mo go feletšego. Kapejana ke ile ka emiša letsogo.” Morutiši o be a maketše gore motho yo mongwe ka kgonthe o na le selo seo a ka se bolelago ka taba ye, ka ge barutwana ba bantši ba be ba e-na le bothata bja go e kwešiša.

Ge a newa sebaka sa go hlalosa boporofeta, Tiffany o ile a ema gomme a bolela ka mo go bego go sa letelwa. Ge a fetša go bolela, ka klaseng go be go homotšwe go itše tuu. Tiffany o be a tšhogile ganyenyane. Klase e ile ya opa magofsi lebaka le letelele.

Morutiši o ile a bolela leboelela gore: “Se se kgahliša kudu, Tiffany se se kgahliša kudu.” O ile a dumela gore o be a tseba gore go swanetše go ba go e-na le go gontši ditemaneng tšeo, eupša Tiffany e bile motho wa pele-pele yo a ilego a mo hlalosetša tšona ka mo go kwagalago. Mafelelong a thuto o ile a botšiša Tiffany gore ke bjang a kgonago go tseba mo gontši gakaakaa ka Beibele.

O ile a araba ka gore: “Ke ka gobane ke yo mongwe wa Dihlatse tša Jehofa. Batswadi ba-ka ba ile ba swanelwa ke go ntlhalosetša boporofeta bjoo ka makga a mantši pele ke bo kwešiša.”

Bao a tsenago le bona ka klaseng le bona ba ile ba makatšwa ke tsebo ya gagwe ya Beibele. Morutwana yo mongwe o itše go Tiffany: “Bjale ke a tseba lebaka la leo ka lona lena Dihlatse tša Jehofa le sepelago ka ntlo le ntlo, ke ka gobane le tseba mo gontši kudu ka Beibele.” Ba bangwe ba ile ba holofetša gore le ka mohla ba ka se sa hlwa ba mo kwera ka ditumelo tša gagwe.

Ge Tiffany a botša batswadi ba gagwe ka phihlelo ya gagwe, ba ile ba šišinya gore a neele morutiši wa gagwe puku ya Tsebo e Išago Bophelong bjo bo sa Felego. Ge a dirile bjalo e bile a bontšhitše morutiši karolo yeo e hlalosago boporofeta bja Daniele, morutiši o ile a e amogela ka go rata le go mo leboga bakeng sa yona.

Ka kgonthe ge bafsa ba Bakriste ba bolela ka sebete ka seo batswadi ba bona ba ba rutilego sona ka Modimo le ka Beibele, ba tliša tumišo le tlhompho go Jehofa le ditšhegofatšo go bona ka noši.​—Mateo 21:15, 16.