Homotšwa ke Matla a Jehofa

“Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.”​—PSALME 94:19.

 KA MOKA bao ba hlologetšwego khomotšo, Beibele e na le mantšu a khomotšo. Ka gona, ga go makatše gore The World Book Encyclopedia e re “batho bao ba sa balegego ba retologetše Beibeleng bakeng sa khomotšo, kholofelo le tlhahlo dinakong tša mathata le tša ge ba sa kgonthišege ka dilo.” Ka baka la’ng?

Ka gobane Beibele e buduletšwe ke Mmopi wa rena yo lerato, “Modimo wa khomotšô yohle,” Yoo “a re homotšaxo mahlokong a rena ohle.” (2 Ba-Korinthe 1:3, 4) Ke ‘Modimo yoo a neago khomotšo.’ (Ba-Roma 15:5) Jehofa o beile mohlala ka go dira gore go be le mokgwa wa go re imolla ka moka ga rena. O ile a romela Morwa wa gagwe yo a tswetšwego a nnoši, Kriste Jesu lefaseng gore a tle a re nee kholofelo le kgothatšo. Jesu o rutile gore: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Beibele e hlalosa Jehofa e le yo a re “[rwalago] ka mehla, Yêna Modimo Mo-re-hlakodiši.” (Psalme 68:19) Batho bao ba boifago Modimo ba ka bolela ka kgodišego gore: “Ke dula kè itebanya le Morêna, o hleng xa-ka, nka se kê ka šutha.”​—Psalme 16:8.

Ditemana tše bjalo tša Beibele di bontšha lerato le le tseneletšego leo Jehofa Modimo a nago le lona bakeng sa rena batho. Go ba molaleng gore o na le kganyogo e tšwago pelong​—gotee le bokgoni​—ya go re nea khomotšo e ntši le go hwefola bohloko bja rena dinakong tša tlalelo. “Ba ba lapilexo ó ba nea matla, ba ba fôkôlaxo ó ba kxoniša tše ntši.” (Jesaya 40:29) Ka gona, re ka homotšega bjang matleng a Jehofa?

Tutuetšo e Thobago ya Tlhokomelo ya Jehofa

Mopsalme o ngwadile gore: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.” (Psalme 55:22) Ee, Jehofa Modimo o bontšha kgahlego lapeng la batho. Moapostola Petro o ile a kgonthišetša Bakriste ba lekgolong la pele la nywaga gore: “Ké Yêna [Modimo] a Le belaêlêlaxo.” (1 Petro 5:7) Jesu Kriste o ile a gatelela bohlokwa bjoo Modimo a bo beago bathong ge a re: “A dithaxa tše thlano xa di rekwe ka peni tše pedi? Le xe xo le byalo xa xo le e tee ya tšôna e lebalwaxo ke Modimo. Hleng le meriri ya dihlôxô tša lena e badilwe yohle! Ké xôna se boifeng; Le feta dithaxa tše ntši.” (Luka 12:6, 7) Re bohlokwa kudu go Modimo moo a hlokomelago gaešita le dilo tše dinyenyane kudu ka rena. O tseba dilo tšeo rena ka noši re sa di tsebego ka gobane o na le kgahlego e tseneletšego go yo mongwe le yo mongwe wa rena.

Go lemoga kgahlego ye ya motho ka noši ya Jehofa go ile gwa itlhatsela e le mo go homotšago go Svetlana, mogweba-ka-mmele yo mofsa yo go boletšwego ka yena sehlogong se se fetilego. O be a le kgaufsi le go ipolaya ge a gahlana le Dihlatse tša Jehofa. Ka gona o ile a amogela thuto ya Beibele, yeo e ilego ya mo thuša go tlwaelana le Jehofa e le motho wa kgonthe yo a kgahlegelago bophelo bja gagwe bjo bobotse. Se se ile sa mo kgoma pelong, sa mo tutueletša go fetoša tsela ya gagwe ya bophelo le go ineela go Modimo. Gape se ile sa nea Svetlana tekanyo e swanetšego ya boitlhompho yeo a bego a e nyaka bakeng sa gore a kgotlelele go sa šetšwe mathata a gagwe le go ba le pono e nepagetšego bophelong bja gagwe. Ga bjale o re: “Ke kgodišegile gore le ka mohla Jehofa a ka se ke a ntlogela. Ke ile ka hwetša gore seo se ngwadilwego go 1 Petro 5:7 ke therešo. E re: ‘Dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.’”

Kholofelo Yeo e Theilwego Beibeleng e a Homotša

Tsela e kgethegilego yeo ka yona Modimo a neago khomotšo ke ka Lentšu la gagwe leo le ngwadilwego leo le huperego kholofelo e kgahlišago bakeng sa bokamoso. Moapostola Paulo o ngwadile gore: “Xobane tše di ngwadilwexo kxalê, di ngwaletšwe xo ruta rena, xore re hwetšê kholofêlô ka xo tiišwa le ka xo homotšwa ka ôna mangwalô.” (Ba-Roma 15:4) Paulo o ile a dira gore go bonagale gabotse kgokagano magareng ga kholofelo ya kgonthe le khomotšo ge a be a ngwala gore: “Xomme . . . Modimo Tata wešo e a re ratilexo, e a re filexo khomotšô ya neng le neng, a re fa kholofêlô e botse ka kxauxêlô, a a homotšê dipelo tša lena, a Le kxonišê xo dira tše botse le xo bolêla tše botse fêla.” (2 Ba-Thesalonika 2:16, 17) “Kholofêlô e botse” e akaretša tebelelo ya bophelo bjo bo sa felego bjo bo phethagetšego le bjo bo thabišago lefaseng la paradeise.​—2 Petro 3:13.

Kholofelo e bjalo ya kgonthe le yeo e kgahlišago e ile ya kgothatša Laimonis, molemaledi  wa bjala yo a golofetšego yo go boletšwego ka yena sehlogong se se fetilego. Ka go bala dipuku tšeo di theilwego Beibeleng tša Dihlatse tša Jehofa, o ile a thabela go ithuta ka lefase le lefsa ka tlase ga Mmušo wa Modimo, moo bophelo bja gagwe bo tla bego bo tsošološitšwe ka mo go feletšego. Ka Beibeleng, o ile a bala ka kholofelo ye e kgahlišago ya go fodišwa ga mohlolo yeo e rego: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:5, 6) E le gore a swanelege bakeng sa bophelo Paradeiseng yeo, Laimonis o ile a dira diphetogo tše dikgolo. O ile a tlogela go nwa, gomme phetogo ya gagwe e ile ya lemogwa ke baagišani ba gagwe le batho bao a tlwaelanego le bona. Ga bjale o swara dithuto tše mmalwa tša Beibele, o abelana le ba bangwe khomotšo yeo kholofelo e theilwego Beibeleng e e neago.

Karolo ya Thapelo

Ge e ba dipelo tša rena di kwešitšwe bohloko ka lebaka le itšego, re ka hwetša khomotšo ka go rapela Jehofa. Seo se ka re rola morwalo. Nakong ya ge re dira ditopo, re ka homotšwa ka go gopola dilo tšeo di boletšwego ka Lentšung la Modimo. Psalme e telele-telele ka Beibeleng e swana le thapelo e botse. Mohlami wa yona o opetše ka gore: “Morêna, ke êlêlwa kahlolô tša xaxo tša kxalê, ya ba xo ikhomotša.” (Psalme 119:52) Maemong a thata kudu, kudu-kudu ao a akaretšago mathata a hlobaetšago a tša maphelo, gantši ga go ke go e-ba le karabo le ka e tee e akaretšago. Ka matla a rena, re ka no se tsebe gore ke kae gabotse-botse moo re ka retologelago gona. Ba bantši ba ile ba hwetša gore ge dilo tšohle tšeo di ka kgonago go dirwa ka matla a motho di dirilwe, go retologela go Modimo ka thapelo go ile gwa tliša khomotšo e kgolo, gomme ka dinako tše dingwe gwa tliša le ditharollo tšeo di sa letelwago.​—1 Ba-Korinthe 10:13.

Pat yo a ilego a kitimišetšwa ka phapošing ya balwetši ba tšhoganyetšo bookelong, o ile a bona mafelelo a a homotšago a thapelo. Ka morago ga ge a fodile o ile a bolela gore: “Ke ile ka rapela Jehofa gomme ka ithuta e le ka kgonthe gore ke swanetše go tlogelela bophelo bja-ka diatleng tša gagwe, ke mmote gore o tla dira selo le ge e le sefe seo e lego thato ya gagwe. Nakong ye ka moka, ke ile ka ikwa ke iketlile; ke be ke ikwa ke le khutšong ya Modimo yeo go bolelwago ka yona go Ba-Filipi 4:6, 7.” Ditemana tše e ka ba tšeo di kgothatšago gakaakang go rena ka moka! Moo Paulo o re lemoša gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”

Moya o Mokgethwa e le Mohomotši

Bošegong bja pele ga lehu la gagwe, Jesu o ile a hlalosetša baapostola ba gagwe ka mo go kwagalago gore kgaufsinyane o be a tla ba tlogela. Se se ile sa ba tshwenya le go ba nyamiša. (Johane 13:33, 36; 14:27-31) Ka go lemoga go nyakega ga gore ba tšwele pele ba homotšwa, Jesu o ile a holofetša gore: “’Me Nna ke tlo kxopêla Tate, a tlo Le nea Molwedi [goba mohomotši] e mongwê, xore a tlê a dulê le lena xo iša xo sa felexo.” (Johane 14:16) Jesu mo o be a bolela ka moya o mokgethwa wa Modimo. Gare ga dilo tše dingwe, moya wa Modimo o ile wa homotša baapostola nakong ya diteko tša bona le go ba matlafaletša go tšwela pele ba dira thato ya Modimo.​—Ditiro 4:31.

Angie, yoo monna wa gagwe a nyakilego a e-hwa kotsing e šoro, o ile a kgona go lebeletšana ka katlego le tlalelo le bohloko bja boemo bja gagwe. Ke eng seo se ilego sa mo thuša? O re: “Ka ntle le thekgo ya moya o mokgethwa wa Jehofa, re be re ka se kgone go lebeletšana le seo se ilego sa re wela gomme ra dula re tiile. Ka kgonthe matla a Jehofa a ile a bonagatšwa ka mafokodi a rena, gomme o ile a itlhatsela e le sebo nakong ya rena ya tlalelo.”

Borwarre bjo bo Homotšago

Boemo le ge e ka ba bofe bophelong bja motho, go sa šetšwe maemo le ge e le afe a bohloko ao a ka bago gona, o swanetše go kgona go hwetša khomotšo borwarreng bjo bo lego gona ka phuthegong ya Jehofa. Borwarre bjo bo nea thekgo ya moya le thušo go bao ba kopanelago go bjona. Go bjona, motho a ka hwetša sehlopha  sa bagwera ba lerato, bao ba nago le taba le bao ba homotšago, bao ba ikemišeditšego le go rata go thuša le go homotša ba bangwe dinakong tša kgateletšego.​—2 Ba-Korinthe 7:5-7.

Ditho tša phuthego ya Bokriste di rutwa gore di ‘dire botse; di bo direle batho bohle, gagolo di bo direle batho babo tšona ba tumelo.’ (Ba-Galatia 6:10) Thuto yeo e theilwego Beibeleng yeo di e amogelago e di tutueletša go bontšhana lerato la borwarre le maikwelo a borutho. (Ba-Roma 12:10; 1 Petro 3:8) Banababo rena le dikgaetšedi ba moya ka phuthegong ba tutueletšega go ba ba botho, ba homotšago le bao ba nago le kwelobohloko e lerato.​—Ba-Efeso 4:32.

Joe le Rebecca, bao ba ilego ba lahlegelwa ke morwa wa bona lehung gabohloko, ba ile ba hwetša thekgo e bjalo e homotšago go tšwa go ditho tša phuthego ya Bokriste. Ba re: “Jehofa le phuthego ya gagwe e lerato ba re thušitše nakong ya rena e thata. Re ile ra amogela dikarata tše makgolo, mangwalo le megala. Se se re dira gore re lemoge kamoo borwarre bja rena bo lego bohlokwa ka gona. Ge re be re sa le kgakanegong ka kotsi ye, diphuthego tše dintši tša lefelong leo di ile tša re thuša, tša re fa dijo le go re hlwekišetša ntlo.”

Homotšega!

Ge diphefo tše fokago tša bonaba di thoma go tšubutla, pula e sa kgaotšego le sefako sa ditlalelo se tšwela pele se rothotha ka matla, Modimo o ikemišeditše go go nea tšhireletšo e homotšago. Ye ke tsela yeo ka yona e nngwe ya dipsalme e mo hlalosago e le yo a neago tšhireletšo e homotšago ge e re: “O Xo šireletša ka ’phêxô tša xaxwe; O khuta ka ’phofa tša xaxwe.” (Psalme 91:4) Seswantšho mo e ka ba sa lenong. Ke seswantšho sa nonyana yeo e kgonago go dupelela kotsi ke moka e phurolle diphego tša yona bakeng sa go šireletša bana ba yona. Ka kgopolo e fetago ye, Jehofa o ba Mošireletši wa kgonthe bakeng sa bohle bao ba tšhabelago go yena.​—Psalme 7:1.

Ge e ba o kganyoga go ithuta ka mo go oketšegilego ka Modimo, semelo sa gagwe, merero ya gagwe le bokgoni bja gagwe bja go nea khomotšo, o laletšwa gore o ithute Lentšu la gagwe. Dihlatse tša Jehofa di tla thabela go go thuša go direng bjalo. Ee, le wena ka mo go swanago o ka homotšega matleng a Jehofa!

[Diswantšho go letlakala 7]

Kholofelo e theilwego Beibeleng bakeng sa bokamoso e ka re homotša