Bagoeledi ba Mmušo ba a Bega

Go Tseba Modimo yo Lerato

GE A e-na le nywaga e 16, mo-Brazil yo a bitšwago Antônio o be a šetše a lahlegetšwe ke kholofelo ka bophelo. Maikwelo a go ikwa a se na mohola a ile a mo dira gore a retologele go dirišeng dihlare-tagi gampe le bokgobeng bja dino tše di tagago. O be a fela a nagana gantši ka go ipolaya. E bile dinakong tše moo a ilego a nagana seo mmagwe a ilego a mmotša sona gore: “Modimo ké Yêna leratô.” (1 Johane 4:8) Eupša Modimo yo yo lerato o be a le kae?

Maitekong a gagwe a go leka go tlogela go diriša dihlare-tagi gampe, Antônio o ile a nyaka thušo go moruti wa kereke ya lefelong leo. Gaešita le ge Antônio a ile a ba mafolofolo kudu ka Kerekeng ya Katholika, o be a sa dutše a e-na le dipotšišo tše dintši. Ka mohlala, o ile a makatšwa ke mantšu a Jesu a rego: “La tlo tseba therešô, ’me therešô ya tlo Le lokolla.” (Johane 8:32) Ke tokologo ya mohuta mang yeo Jesu a ilego a e holofetša? Kereke ga se ya ka ya kgona go nea dikarabo le ge e le dife tšeo di kgotsofatšago dipotšišong tša gagwe. Mafelelong, Antônio o ile a aroga gomme a boela mekgweng ya gagwe ya kgale. Ge e le gabotse, ditemalelo tša gagwe di ile tša befela pele.

Mo e ka bago ka nako ye, mosadi wa Antônio, Maria o ile a thoma go ithuta Beibele le Dihlatse tša Jehofa. Le ge a be a sa ganetše thuto ya gagwe, Antônio o be a tšea Dihlatse e le “bodumedi bja Amerika bjo bo hlankelago dikgahlego tša mmušo wa ma-Amerika.”

Ka go se langwe, Maria o be a tlogela dikopi tša dimakasine tša Morokami le Phafoga! tšeo di nago le dihlogo tšeo a bego a nagana gore di tla kgahliša Antônio ka ntlong. Ka ge Antônio a be a thabela go bala, ka dinako tše dingwe o be a fela a bala makasine ganyenyane ge mosadi wa gagwe a be a se gona. Ka lekga la pele bophelong bja gagwe, o ile a hwetša dikarabo dipotšišong tša gagwe tša Beibele. O gopola gore: “Ke ile ka ba ka thoma go lemoga lerato le botho tšeo mosadi wa-ka le Dihlatse ba bego ba mpontšha tšona.”

Bogareng bja ngwaga wa 1992, Antônio o ile a phetha gore le yena o rata go ithuta Beibele le Dihlatse tša Jehofa. Lega go le bjalo, o ile a tšwela pele a diriša dihlare-tagi gampe gomme a e-nwa kudu. Letšatšing le lengwe e le bošego ge yena le mogwera wa gagwe ba be ba boela gae go tšwa motseng wa mekutwana, maphodisa a ile a ba emiša. Ge maphodisa a be a hwetša Antônio a swere cocaine, a ile a thoma go mmetha. Lephodisa le lengwe le ile la mo lahlela ka lerageng gomme la mo šupela kgaufsi ka molomo wa sethunya sefahlegong sa gagwe. Lephodisa le lengwe le ile la goeletša ka gore: “Mo feleletše!”

Ge Antônio a dutše a robetše moo lerageng o ile a gopola bophelo bja gagwe. Dilo di nnoši tše dibotse tšeo a ilego a kgona go di gopola e bile lapa la gagwe le Jehofa. O ile a rapela ka boripana, a kgopela thušo ya Jehofa. Ka lebaka leo le sa tsebjego, lephodisa le ile la mo tlogela. O ile a ya gae, a kgodišegile gore Jehofa o mo šireleditše.

Antônio o ile a thoma go ithuta Beibele ka mafolofolo a tsošološitšwego. Ganyenyane-ganyenyane o ile a dira diphetogo bakeng sa gore a kgahliše Jehofa. (Ba-Efeso 4:22-24) Ka go hlagolela boitshwaro, o ile a thoma go swaragana le mathata a gagwe a dihlare-tagi. Lega go le bjalo, o be a nyaka thušo ya tša kalafo. Dikgwedi tše pedi a le kliniking ya go kgopamolla mekgwa di ile tša mo nea sebaka sa go bala dikgatišo tše mmalwa tša Beibele go akaretša le puku ya Tsebo e Išago Bophelong bjo bo sa Felego. Ka nako yeo Antônio o ile a abelana seo a ithutilego sona go tšwa dipukung tše le balwetši ba bangwe.

Ka morago ga ge Antônio a tlogile kliniking, o ile a tšwela pele ka thuto ya gagwe ya Beibele le Dihlatse. Lehono, Antônio, Maria, barwedi ba bona ba babedi le mmago Antônio ba hlankela Jehofa ba le gotee e le lapa le le thabilego le leo le kopanego. Antônio o re: “Ga bjale ke kwešiša seo se bolelwago e le ka kgonthe ke mantšu a rego ‘Modimo ké Yêna leratô.’”

[Seswantšho go letlakala 8]

Go dira boboledi kua Rio de Janeiro