‘Iphološe Gomme o Phološe le Bao ba go Kwago’

“Itôtê O lôtê le thutô. Xe O dira byalo O tlo iphološa, wa phološa le bao ba Xo kwaxo.”​—1 TIMOTHEO 4:16.

1, 2. Ke eng seo se tutueletšago Bakriste ba therešo gore ba tšwele pele modirong wa bona wa go phološa bophelo?

MOTSANENG wo o lego lekatana wa ka leboa la Thailand, banyalani bao e lego Dihlatse tša Jehofa ba leka go diriša bokgoni bjo ba sa tšwago go ithuta bjona bja go diriša leleme dithong tša morafo wa mmotong. E le gore ba abelane ditaba tše dibotse tša Mmušo wa Modimo le badudi ba motsaneng, banyalani ba sa tšwa go ithuta leleme la se-Lahu.

² Monna o hlalosa gore: “Go thata go hlalosa lethabo le kgotsofalo tšeo re nago le tšona ka go šoma gare ga batho ba ba kgahlišago. Re tloga re ikwa re swaregile ka phethagatšo ya Kutollo 14:6, 7, re bolela ditaba tše di thabišago ‘go ditšhaba tšohle, meloko yohle le maleme ohle.’ Go šetše mašemo a mmalwa feela moo ditaba tše dibotse di sa hlwago di tsenelela go wona, gomme a ruri ke a mangwe a ona. Re na le dithuto tša Beibele tšeo e nyakilego e le tše dintši go feta tšeo re ka kgonago go swaragana le tšona.” Go molaleng gore banyalani ba ba holofetše go se phološe bona feela, eupša le bao ba ba kwago. Ka ge re le Bakriste, na ga re holofele go dira se se swanago ka moka ga rena?

“Itôtê”

3. E le gore re tle re phološe ba bangwe, re swanetše go thoma ka go dira’ng?

³ Moapostola Paulo o eleditše Timotheo ka gore, “Itôtê O lôtê le thutô,” gomme se se šoma go Bakriste ka moka. (1 Timotheo 4:16) Ka kgonthe, e le gore re thuše ba bangwe go hwetša phološo, gona re swanetše go thoma ka go itota. Re ka dira se bjang? Gare ga tše dingwe, re swanetše go  dula re phafogetše mehla yeo re phelago go yona. Jesu o ile a nea pontšho e bopaganego e le gore balatedi ba gagwe ba tle ba tsebe ge “bofelo bja tshepedišo ya dilo” bo fihlile. Le gona, Jesu gape o ile a bolela gore re be re ka se tsebe ka go lebanya nako yeo bofelo bo bego bo tla tla ka yona. (Mateo 24:3, 36, bapiša le NW.) Re swanetše go arabela bjang ntlheng yeo?

4. (a) Ke boemo bofe bja kgopolo bjo re swanetšego go ba le bjona mabapi le nako yeo e šetšego tshepedišong ye? (b) Ke boemo bofe bja kgopolo bjo re swanetšego go bo phema?

⁴ Yo mongwe le yo mongwe wa rena a ka botšiša gore, ‘Na ke diriša nako le ge e le efe e šaletšego tshepedišo ye go iphološa le go phološa bao ba nkwago? Goba na ke nagana gore, “Ka ge re sa tsebe ka go lebanya nako yeo bofelo bo tlago go tla ka yona, nka se ke ka itshwenya ka yona”?’ Boemo bja kgopolo bjo bo boletšwego mafelelong bo kotsi. Bo tloga bo fapane le keletšo ya Jesu e rego: “Dulang Lè itokišitše, xobane Morwa-motho ó tlo tla ka nakô ye Le sa e xopolexo.” (Mateo 24:44) Ruri ye ga se nako ya go nyefiša go fišegela ga rena tirelo ya Jehofa goba go lebelela lefaseng bakeng sa polokego goba kgotsofalo.​—Luka 21:34-36.

5. Dihlatse tša Jehofa tša mehla ya pele ga Bokriste di beile mehlala efe?

⁵ Tsela e nngwe yeo ka yona re ka bontšhago gore re a itota ke ka go kgotlelela ka potego re le Bakriste. Bahlanka ba Modimo nakong e fetilego ba ile ba tšwela pele ba kgotleletše, go sa šetšwe gore ba be ba letetše topollo ya kapejana goba go  se bjalo. Ka morago ga go bontšha mehlala ya dihlatse tša mehla ya pele ga Bokriste tše bjalo ka Abele, Henoge, Noage, Aborahama le Sara, Paulo o itše: “Ba hwile . . . bà sešo ba amoxêla tše ba di holofedišitšwexo. Ba di bone dì le kxolê ba di thabêla, ba ipolêla ba re: Re baeng le ba ba diiletšexo lefaseng.” Ga se ba ka ba ineela dikganyogong le ge e le dife tša bophelo bja go iketla, e bile ga se ba ka ba ineela dikgateletšong le ge e le dife tše di gobogilego tšeo di bego di ba dikologile, eupša ba ile ba lebelela pele ka phišego “phethagatšo ya dikholofetšo.”​—Ba-Hebere 11:13, bapiša le NW; 12:1.

6. Pono ya Bakriste ba lekgolong la pele la nywaga ka phološo e ile ya kgoma bjang tsela ya bona ya go phela?

⁶ Bakriste ba lekgolong la pele la nywaga le bona ba be ba itšea e le “bafaladi” lefaseng le. (1 Petro 2:11) Gaešita le ka morago ga go phološwa tshenyegong ya Jerusalema ka 70 C.E., Bakriste ba therešo ga se ba ka ba tlogela go dira boboledi goba ba boela morago tseleng ya lefase ya bophelo. Ba be ba tseba gore phološo e kgolo e be e letetše bao ba bego ba dula ba botega. Ge e le gabotse, morago kua ka 98 C.E., moapostola Johane o ile a ngwala gore: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”​—1 Johane 2:17, 28.

7. Dihlatse tša Jehofa di bontšhitše bjang kgotlelelo mehleng yeno?

⁷ Mehleng yeno Dihlatse tša Jehofa le tšona di ile tša kgotlelela modirong wa Bokriste, gaešita le ge di ile tša lebana le tlaišo e šoro. Na kgotlelelo ya tšona e bile ya lefeela? Ruri ga go bjalo, ka gobane Jesu o re kgonthišeditše ka gore: “E a tl’o xo tiišetša xo fihla bofelong, ké yêna a tl’o xo phološwa,” go sa šetšwe gore seo ke bofelo bja tshepedišo ya kgale goba bofelo bja bophelo bja motho bja gona bjale. Tsogong, Jehofa o tla gopola le go putsa bahlanka ba gagwe bohle ba botegago bao ba hwilego.​—Mateo 24:13; Ba-Hebere 6:10.

8. Re ka bontšha bjang gore re leboga kgotlelelo ya Bakriste ba nakong e fetilego?

⁸ Go oketša moo, re thabela gore Bakriste ba botegago ba nakong e fetilego ba be ba sa tshwenyega feela ka phološo ya bona ba nnoši. Ruri, rena bao re ithutilego ka Mmušo wa Modimo ka maiteko a bona re leboga gore ba ile ba kgotlelela go phethagatšeng thomo ya Jesu e rego: “Ké xôna yang Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna.” (Mateo 28:19, 20) Ge feela sebaka se sa re bulegetše, re ka bontšha tebogo ya rena ka go bolela le ba bangwe bao ba sa hlwago ba e-kwa ditaba tše dibotse. Lega go le bjalo, go bolela e fo ba mogato wa pele o lebišago go direng barutiwa.

“O Lôtê le Thutô”

9. Boemo bjo bo nepagetšego bja kgopolo bo ka re thuša bjang go thoma dithuto tša Beibele?

⁹ Kabelo ya rena ga e akaretše feela go bolela eupša e akaretša le go ruta. Jesu o re laetše gore re rute batho go boloka dilo tšohle tšeo a di laetšego. Ke therešo gore mašemong a mangwe, ke ba sego nene bao ba bonalago ba nyaka go ithuta ka Jehofa. Eupša go ba le boemo bjo bo fošagetšego bja kgopolo ka mašemo go ka šitiša maiteko a rena a go thoma dithuto tša Beibele. Yvette yo e lego mmulamadibogo tšhemong yeo ba bangwe ba bego ba re ke yeo e sa enywego dienywa, o ile a lemoga gore baeng bao ba etelago lefelong leo bao ba bego ba se na boemo bjoo bjo bo fošagetšego bja kgopolo, ba be ba thoma dithuto tša legae tša Beibele. Ka morago ga ge a ithutile go ba le pono e nepagetšego ka mo go oketšegilego, Yvette le yena o ile a hwetša batho bao ba bego ba nyaka go ithuta Beibele.

10. Karolo ya motheo yeo re e bapalago bjalo ka barutiši ba Beibele ke efe?

¹⁰ Bakriste ba bangwe ba ka dika-dika go ithapela go thoma thuto ya Beibele le batho ba thabelago ka gobane bona ba nagana gore ba ka se kgone go swara thuto. Ke therešo gore ga re swane go ya ka maemo a rena a bokgoni. Eupša ga go nyakege gore re be le bokgoni bjo bo phagamego kudu gore re atlege go ba barutiši ba Lentšu la Modimo. Molaetša o sekilego wa Beibele ke o matla, gomme Jesu o boletše gore batho ba swanago le dinku ba tseba lentšu la Modiši wa kgonthe ge ba le kwa. Ka gona, modiro wa rena e fo ba go fetišetša molaetša wa Modiši yo Botse, Jesu, ka tsela e kwalago ka mo re ka kgonago ka gona.​—Johane 10:4, 14.

11. O ka ba bjang yo a atlegago kudu go thušeng morutwana wa Beibele?

¹¹ O ka fetišetša molaetša wa Jesu bjang ka tsela e atlegago kudu? Sa mathomo, itlwaelanye le seo Beibele e se bolelago mabapi le taba yeo go bolelwago ka yona. O swanetše go kwešiša taba ka bowena  pele o ka e ruta ba bangwe. Le gona, leka go kgomarela boemo bjo bo nago le seriti eupša e le bja bogwera nakong ya thuto. Barutwana, go akaretša le ba banyenyane kudu, ba ithuta gakaone ge ba phuthologile gomme morutiši a ba bontšha tlhompho le botho.​—Diema 16:21.

12. O ka kgonthišetša bjang gore morutwana o kwešiša seo o mo ago sona?

¹² Bjalo ka morutiši, ga go nyakege gore o fo tšweletša dintlha tšeo morutwana a swanetšego go di swara ka hlogo. Mo thuše gore a kwešiše seo a ithutago sona. Thuto ya morutwana, phihlelo le go tlwaelana le Beibele di tla kgoma kwešišo ya gagwe ka seo wena o se bolelago. Ka gona, mo gongwe o ka ipotšiša gore, ‘Na o kwešiša seo se bolelwago ke mangwalo ao a bontšhitšwego tabeng yeo e ithutwago?’ O ka mo dira gore a bolele ka dipotšišo tšeo di ka se kego tša arabja feela ka ee goba aowa e bonolo eupša e be tšeo di nyakago tlhaloso. (Luka 9:18-20) Ka lehlakoreng le lengwe, barutwana ba bangwe ba dika-dika go botšiša morutiši dipotšišo. Ka gona, ba ka fihla kgole ba sa kwešiše ka botlalo seo ba se rutwago. Kgothaletša morutwana gore a go botšiše dipotšišo le gore a go botše ge a sa kwešiše ntlha e itšego ka botlalo.​—Mareka 4:10; 9:32, 33.

13. O ka thuša bjang morutwana gore e be morutiši?

¹³ Morero wa bohlokwa wa go swara thuto ya Beibele ke go thuša morutwana gore e be morutiši. (Ba-Galatia 6:6) Gore o phethe seo, e le poeletšo ya thuto ya lena, mo gongwe o ka mo kgopela gore a go hlalosetše ntlha e itšego ka tsela e bonolo, bjalo ka ge eka o be a e hlalosetša motho yo mongwe yo a thomago go e kwa. Ka morago, ge a thoma go swanelegela go tšea karolo bodireding, o ka mo laletša gore a ye tšhemong le wena. Go bonala a tla ikwa a phuthologile go ka šoma le wena, gomme phihlelo e tla mo thuša gore a godiše kgodišego ya gagwe go fihlela ge a šetše a loketše go ka ya bodireding a kgona go ikemela.

Thuša Morutwana Gore e be Mogwera wa Jehofa

14. Pakane ya gago e kgolo bjalo ka morutiši ke efe, gomme ke eng seo se tlago go tlaleletša katlegong ya go e fihlelela?

¹⁴ Pakane e kgolo ya morutiši yo mongwe le yo mongwe wa Mokriste ke go thuša morutwana gore e be mogwera wa Jehofa. O tla fihlelela se e sego feela ka mantšu a gago, eupša le ka mohlala wa gago. Go ruta ka mohlala go kgoma dipelo tša barutwana kudu. Mediro ge e le gabotse e kgona go bolela kudu go feta mantšu, kudu-kudu ge go tliwa tabeng ya go nweletša dika tša boitshwaro le go tutueletša morutwana go ba le phišego. Ge e ba a bona gore mantšu a gago le ditiro tša gago di tšwa tswalanong e botse le Jehofa, a ka tutueletšega kudu go hlagolela tswalano e bjalo ka boyena.

15. (a) Ke ka baka la’ng e le gabohlokwa gore morutwana a hlagolele boikemišetšo bjo bo nepagetšego bja go hlankela Jehofa? (b) O ka thuša morutwana bjang gore a tšwele pele a dira tšwelopele ya moya?

¹⁵ O nyaka gore morutwana a hlankele Jehofa e sego feela ka baka la gore a sa nyake go fedišwa ka Haramagedone, eupša ka baka la gore a mo rata. Ka go mo thuša gore a hlagolele boikemišetšo bjo bo bjalo bjo bo sekilego, o tla be o aga ka dikago tše di palelago mollo tšeo di tlago go phologa diteko tša tumelo ya gagwe. (1 Ba-Korinthe 3:10-15) Boikemišetšo bjo bo fošagetšego, bjo bo bjalo ka go duma go ekiša wena mo go sa swanelago goba motho le ge e le ofe yo mongwe, bo ka se mo nee matla a go ganetša ditutuetšo tšeo e sego tša Bokriste goba sebete bakeng sa go dira se se nepagetšego. Gopola gore o ka se be morutiši wa gagwe sa ruri. Ge o sa dutše o sa na le sebaka, o ka mo kgothaletša gore a batamele kgaufsi kudu le Jehofa ka go bala Lentšu la Modimo letšatši le lengwe le le lengwe le ka go nagana ka lona. Ka tsela ye o tla tšwela pele a monya “mantšu ao a se naxo senyalô” Beibeleng le dikgatišong tšeo di theilwego Beibeleng lebaka le letelele ka morago ga ge thuto ya gago le yena e fedile.​—2 Timotheo 1:13.

16. O ka ruta morutwana bjang go rapela go tšwa pelong?

¹⁶ Gape o ka thuša morutwana go batamela kgaufsi le Jehofa ka go mo ruta go rapela go tšwa pelong. O ka dira se bjang? Mo gongwe o ka mo laetša thapelo ya Jesu ya mohlala, gotee le dithapelo tše dingwe tše dintši tše di tšwago pelong tšeo di begilwego ka Beibeleng, tše di swanago le tše di lego go dipsalme. (Dipsalme 17, 86, 143; Mateo 6:9, 10) Go oketša moo, ge morutwana wa gago a go kwa o bula le go tswalela thuto ka thapelo, o tla lemoga tsela yeo o ikwago ka yona ka Jehofa. Ka gona, dithapelo tša gago ka mehla di swanetše go bonagatša potego le go lokologa gotee le teka-tekano ya moya le ya maikwelo.

Go Katanela go Phološa Bana ba Gago

17. Batswadi ba ka thuša bana ba bona bjang go dula tseleng e išago phološong?

¹⁷ Ee, gare ga bao re ratago go ba phološa go na le ditho tša lapa la rena. Palo e kgolo ya bana ba batswadi ba Bakriste ba a botega e bile ba “tiile tumelong.” Lega go le bjalo, ba bangwe ba ka no ba ba sa mediša therešo ka mo go tseneletšego dipelong tša bona. (1 Petro 5:9; Ba-Efeso 3:17; Ba-Kolose 2:7) Bontši bja bafsa ba ba tlogela tsela ya Bokriste ge ba batamela goba ba tsena bogolong. Ge e ba o le motswadi, o ka dira eng gore go se be le kgonagalo ya mafelelo a bjalo? Sa pele, o ka katanela go ageng boemo bjo bo thabišago ka lapeng. Bophelo bjo bobotse bja lapa bo thea motheo bakeng sa go ba le pono e nepagetšego ka matla a taolo, go ba le tebogo ka ditekanyetšo tše di nepagetšego le go ba le ditswalano tše dibotse le ba bangwe. (Ba-Hebere 12:9) Ka gona, tlemo e tiilego ka lapeng e ka ba motheo woo go wona bogwera bja ngwana le Jehofa bo ka golago. (Psalme 22:10) Malapa a tiilego a dira dilo gotee a kopane​—gaešita le ge batswadi ba swanetše go gafa nako yeo e ka bago e dirišetšwa bakeng sa dilo tše di holago bona ka noši. Ka tsela ye o ka ruta bana ba gago ka mohlala go dira diphetho tše di nepagetšego bophelong. Batswadi, seo bana ba lena ba tlogago ba se nyaka e le ka kgonthe go lena ga se mehola ya dilo tše di bonagalago, eupša ke lena​—nako ya lena, matla a lena le lerato la lena. Na le nea bana ba lena dilo tše?

18. Ke dipotšišo tša mohuta mang tšeo batswadi ba swanetšego go thuša bana ba bona go di araba?

¹⁸ Batswadi ba Bakriste le ka mohla ga se ba swanela  go nagana gore bana ba bona le bona go tla itiragalela feela gore e be Bakriste. Daniel yo e lego mogolo le tate wa bana ba bahlano, o re: “Batswadi ba swanetše go ipha nako ya go thuša go ntšha dipelaelo tšeo bana ba bona ka go se lemoge ba di topago sekolong le mafelong a mangwe. Ba swanetše go thuša bana ba bona ka go se fele pelo go hwetša dikarabo tša dipotšišo tše bjalo ka tše rego: ‘Na re phela mehleng ya bofelo e le ka kgonthe? Na ka kgonthe go na le bodumedi bjo tee feela bja therešo? Ke ka baka la’ng motho yo ke tsenago le yena sekolo yo a bonagalago a lokile e se mogwera yo botse? Na ka mehla go fošagetše go ba le kopano ya botona le botshadi pele ga lenyalo?’” Batswadi, le ka lebelela go Jehofa gore a šegofatše maiteko a lena, ka gobane le yena o kgahlegela go bona bana ba lena ba atlega.

19. Ke ka baka la’ng go le kaone gore batswadi ka bobona ba ithute le bana ba bona?

¹⁹ Batswadi ba bangwe ba ka ikwa ba sa swanelege ge go tliwa tabeng ya go ithuta le bana ba bona ka noši. Lega go le bjalo, ga se wa swanela go ikwa ka tsela ye, ka gobane ga go na yo mongwe yo a lego boemong bjo bobotse bja go ruta bana ba gago go go phala. (Ba-Efeso 6:4) Go ithuta le bana ba gago go tla go nea sebaka sa go itsebela ka noši seo se lego dipelong tša bona le menaganong ya bona. Na dipolelo tša bona di tšwa pelong goba ke tša go ithola kgwara? Na ba dumela e le ka kgonthe seo ba ithutago sona? Na Jehofa ke wa kgonthe go bona? O ka hwetša dikarabo tša dipotšišo tše le tše dingwe tše bohlokwa ge feela wena ka noši o ithuta le bana ba gago.​—2 Timotheo 1:5.

20. Batswadi ba ka dira bjang gore thuto ya lapa e be e thabišago le yeo e holago?

²⁰ O ka dira bjang gore lenaneo la lena la thuto ya lapa le tšwele pele ka morago ga ge le thomilwe? Joseph yo e lego mogolo e bile e le tatago morwa le morwedi ba banyenyane o re: “Go swana le dithuto ka moka tša Beibele, thuto ya lapa ya Beibele e swanetše go ba e thabišago, selo seo yo mongwe le yo mongwe a se fagahlelago. Bakeng sa go fihlelela seo lapeng la rena, ga re kgone go tiiša kudu tabeng ya nako. Thuto ya rena e ka tšea lebaka la iri, eupša le ge ka dinako tše dingwe re ka ba re e-na le metsotso e lesome feela, re sa dutše re ithuta. Selo seo se dirago gore thuto ya rena e be tiragalo e kgahlišago mo bekeng go bana ke gore re diragatša dikarolo tše di tšwago go Puku Ya-ka ya Ditaba tša Beibele. * Go kgomega ka mo go tseneletšego le kwešišo tšeo seo di se tlišago di bohlokwa kudu go feta tekanyo ya dirapa tšeo re di akaretšago.”

21. Batswadi ba ka ruta bana ba bona neng?

²¹ Ee, go ruta bana ba gago ga go a lekanyetšwa feela dinakong tšeo di rulagantšwego tša thuto. (Doiteronomio 6:5-7) Hlatse ya Thailand yeo go boletšwego ka yona mathomong e re: “Ke sa gopola gabotse kamoo tate a bego a fela a sepela le nna modirong wa boboledi, re nametše dipaesekele tša rena re e-ya mafelong a kgole a tšhemo ya phuthego ya rena. Ka kgonthe, mohlala o mobotse wa batswadi ba rena le go re ruta ga bona ka tlase ga maemo ohle ke tšona di re thušitšego gore re dire phetho ya go tsenela bodiredi bja nako e tletšego. Le gona dithuto di swanetše go ba di ile tša šoma kudu. Ke sa šoma mafelong a kgole a tšhemo!”

22. ‘Go itota ga gago le go lota thuto ya gago’ go tla feleletša ka eng?

²² Ka letšatši le lengwe go se go ye kae, Jesu o tla tla ka nako e nepagetšego go tlo phetha kahlolo ya Modimo godimo ga tshepedišo ye. Ke moka tiragalo yeo e kgolo e tla fetela historing ya legohle, eupša bahlanka ba botegago ba Jehofa ba tla tšwela pele ba mo hlankela ba lebeletše phološo ya ka mo go sa felego. Na o holofela go tlo ba gare ga bona, o e-na le bana ba gago le barutwana ba gago ba Beibele? Gona gopola se: “Itôtê O lôtê le thutô. Xe O dira byalo O tlo iphološa, wa phološa le bao ba Xo kwaxo.”​—1 Timotheo 4:16.

[Mongwalo wa ka tlase]

Na o ka Hlalosa?

• Ka ge re sa tsebe nako e lebanyago ya kahlolo ya Modimo, re swanetše go ba le boemo bofe bja kgopolo?

• Re ka ‘lota thuto ya rena’ ka tsela efe?

• O ka thuša morutwana bjang gore e be mogwera wa Jehofa?

• Ke ka baka la’ng e le gabohlokwa gore batswadi ba iphe nako ya go ruta bana ba bona?

[Dipotšišo tša Thuto]

[Seswantšho go letlakala 15]

Go ithuta go kaonefatšwa ke boemo bjo bo nago le seriti eupša e le bja bogwera

 [Seswantšho go letlakala 18]

Go diragatša dikanegelo tša Beibele, tše bjalo ka ya ge Salomo a be a ahlola diotswa tše pedi, go dira gore dithuto tša lapa tša Beibele e be tše di thabišago