O ka Hwetša Kae Khutšo ya ka Gare?

Go na le diphapano tše dintši magareng ga nako ya rena le ya Thoreau, yo go boletšwego ka yena sehlogong se se fetilego. Phapano e nngwe e kgolo ke gore lehono ga go na tlhaelelo ya keletšo mabapi le kamoo motho a ka bago le khutšo ya monagano. Ditsebi tša tša monagano, bangwadi ba dipuku tša go ithuša​—gaešita le bangwadi ba dikuranta​—ba nea dikgopolo tša bona. Keletšo ya bona e ka ba ya thušo ya nakwana; eupša bakeng sa ditharollo tša lebaka le letelele, go nyakega selo se sengwe se se tseneletšego kudu. Se ke seo batho ba go boletšwego ka bona sehlogong se se fetilego ba ilego ba se lemoga.

ANTÔNIO, Marcos, Gerson, Vania le Marcelo ba tšwa ditlogong tše di sa swanego e bile ba na le mathata a sa swanego. Eupša ba na le bonyenyane dilo tše tharo tšeo ba swanago ka tšona. Sa pele, go bile le nako ya ge ba be ba ‘phela lefaseng ba se na kholofelo, ba se na Modimo.’ (Ba-Efeso 2:12) Sa bobedi, ba be ba hlologetše go ba le khutšo ya monagano. Sa boraro, ka moka ga bona ba ile ba hwetša khutšo ya ka gare yeo ba bego ba e nyaka ka morago ga ge ba amogetše go ba le thuto ya Beibele le Dihlatse tša Jehofa. Ge ba dutše ba dira tšwelopele ba ile ba thoma go lemoga gore Modimo o a ba kgahlegela. Ka kgonthe, bjalo ka ge Paulo a ile a botša ba-Athene ba mehleng ya gagwe, Modimo “xa a kxolê, ó kxaufsi  le e mongwê le e mongwê wa ba re lexo fá.” (Ditiro 17:27) Go kgonthišega e le ka kgonthe mabapi le se ke lebaka la bohlokwa kudu bakeng sa go hwetša khutšo ya ka gare.

Ke ka Baka La’ng go E-na le Khutšo e Nyenyane Gakaakaa?

Beibele e nea mabaka a mabedi a motheo bakeng sa go hlokega ga khutšo lefaseng​—e ka ba khutšo ya ka gare goba khutšo magareng ga batho. La pele le hlaloswa go Jeremia 10:23: “Motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” Motho ga a na bohlale goba ponelo-pele bakeng sa go ipuša ka ntle le thušo gomme thušo e nnoši yeo e nago le mohola wa kgonthe e tšwa go Modimo. Batho bao ba sa nyakego tlhahlo ya Modimo ba ka se ke ba hwetša khutšo ya ka mo go sa felego le ka mohla. Lebaka la bobedi leo le dirago gore go se be le khutšo le bonwa mantšung a moapostola Johane a rego: “Lefase ka moka le rapaletše matleng a yo mobe.” (1 Johane 5:19, NW) Ka ntle le tlhahlo ya Modimo, maiteko ao motho a a dirago bakeng sa go hwetša khutšo a tla dula a šitišwa ke mediro ya yo a sa bonagalego eupša e le wa kgonthe kudu​—le yo matla kudu—​“yo mobe,” Sathane.

Ka baka la mabaka a a mabedi​—gore batho ba bantši ga ba nyake tlhahlo ya Modimo le gore Sathane o šoma kudu lefaseng​—batho ka kakaretšo ba boemong bjo sa thabišego. Moapostola Paulo o ile a bo hlalosa gabotse ka gore: “Dibopya ka moka le tšôna di sa fêxêlwa, le tšôna di sa šôkwa.” (Ba-Roma 8:22) Ke mang yo a ka ganetšanago le tlhahlobišišo yeo? Ditšhabeng tšeo di humilego gotee le tšeo di diilago, mathata a lapa, bosenyi, go hloka toka, diphapano tša semelo, go se kgonthišege ga tša boiphedišo, lehloyo la morafo le la moloko, kgatelelo, bolwetši le tše dingwe tše dintši di amoga batho khutšo ya bona ya monagano.

Moo Khutšo ya ka Gare e Hwetšwago Gona

Ge Antônio, Marcos, Gerson, Vania le Marcelo ba be ba ithuta Lentšu la Modimo Beibele, ba ile ba ithuta dilo tšeo di ilego tša fetoša maphelo a bona. Gare ga tše dingwe, ba ithutile gore boemo bja lefase ka letšatši le lengwe e tla ba bjo bo fapanego. Se ga e fo ba feela kholofelo e sa kgonthišegego ya gore selo se sengwe le se sengwe se tla feleletša se diregile gabotse mafelelong. Ke kholofelo ya kgonthe le yeo e theilwego gabotse ya gore Modimo o na le morero bakeng sa batho le gore gaešita le gona bjale re ka holega morerong woo ge e ba re dira thato ya gagwe. Ba ile ba diriša seo ba ithutilego sona ka Beibeleng maphelong a bona, gomme dilo di ile tša kaonefala bakeng sa bona. Ba ile ba hwetša lethabo leo le oketšegilego gotee le khutšo go feta kamoo ba bego ba nagana gore go tla kgonega.

Antônio ga a sa akaretšwa megwantong ya boipelaetšo le dithulanong tša bašomi. O tseba gore diphetogo tšeo di tlišwago ka mokgwa woo di lekanyeditšwe e bile ke tša nakwana. Motho yo yo e kilego ya ba moetapele wa bašomi o ithutile ka Mmušo wa Modimo. Ke Mmušo woo ba dimilione ba o rapelelago ge ba boeletša Thapelo ya Morena (goba, Tatawešo) gomme ba botša Modimo gore: “Mmušô wa xaxo a o tlê.” (Mateo 6:10a) Antônio o ithutile gore Mmušo wa Modimo ke mmušo wa kgonthe wa legodimong wo o tla tlišago khutšo ya kgonthe bathong.

Marcos o ithutile go šomiša keletšo e bohlale ya Beibele tabeng ya lenyalo. Ka baka leo, yo yo e bego e le radipolitiki ga bjale o boelane le mosadi wa gagwe ka lethabo. Le yena ka mo go swanago o lebeletše pele nakong yeo e tla tlogago e e-tla, ge Mmušo wa Modimo o tla tšeela tshepedišo ye ya lefase la boithati le la megabaru sebaka ka e kaone. O na le kwešišo e tseneletšego kudu ka lefoko leo le lego Thapelong ya Morena leo le balegago ka gore: “Thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10b) Ge thato ya Modimo e dirwa mo lefaseng, batho ba tla thabela mohuta wa bophelo wo o sa kago wa bonwa.

Go thwe’ng ka Gerson? Ga e sa le motho wa go ralala yo e bilego e le lehodu. Bophelo bja yo yo e bego e le ngwana wa setarateng ga bjale bo na le  morero ka gobane o diriša matla a gagwe a thuša ba bangwe go hwetša khutšo ya ka gare. Bjalo ka ge diphihlelo tše di bontšha, go ithuta Beibele le go diriša seo e se bolelago go ka fetoša bophelo bja motho kudu gwa mo dira yo kaone kudu.

Khutšo ya ka Gare Lefaseng la Mathata

Motho yo bohlokwa wa histori ge go tliwa tabeng ya go dirwa ga thato ya Modimo ke Jesu Kriste, gomme ge batho ba ithuta Beibele le Dihlatse tša Jehofa ba ithuta mo gontši mabapi le yena. Bošegong bjo a belegwego ka bjona, barongwa ba ile ba opelela Modimo ditumišo ka gore: “Tumišô a e yê xo Modimo maxodimo-dimong; lefaseng xo bê le khutšo, kxahlišô bathong.” (Luka 2:14) Ge Jesu a be a gola, o be a tshwenyegile mabapi le go kaonefatša maphelo a batho. O be a kwešiša maikwelo a bona gomme a bontšha kwelobohloko e sa tlwaelegago bakeng sa bao ba tlaišegago gotee le balwetši. Le gona, ka go dumelelana le mantšu a barongwa, o ile a tliša tekanyo ya khutšo ya ka gare go bao ba ikokobeditšego. Mafelelong a bodiredi bja gagwe o ile a botša barutiwa ba gagwe gore: “Ke a le tlogelela khutšo, ke a le fa khutšo ya-ka; ga ke le fe ka mo lefase le fago ka gona. Dipelo tša lena di se huduege, gomme di se šie.”​—Johane 14:27, PK.

Jesu o be a le ka kua ga go ba yo botho. O ile a itshwantšha le modiši, gomme a swantšha balatedi ba gagwe bao ba lokilego le dinku ge a be a re: “Se Nna ke se tletšexo ké xore di bê le bophelô le mohora. Ké Nna modiši yo boló. Modiši yo bolo ó xafa bophelô bya xaxwe ka ’baka la dinku.” (Johane 10:10, 11) Ee, ka go fapana le baetapele ba bantši kudu lehono bao ba tshwenyegago kudu ka bona ka noši pele, Jesu o ile a neela bophelo bja gagwe bakeng sa dinku tša gagwe.

Re ka holega bjang go seo Jesu a se dirilego? Ba bantši ba tlwaelane le mantšu a rego: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Sa pele, go bontšha tumelo go Jesu go nyaka go ba le tsebo ka yena le ka Tatagwe, Jehofa. Tsebo ya go tseba Modimo le Jesu Kriste e ka lebiša go beng le tswalano ya kgaufsi le Jehofa Modimo yeo e tla re thušago go ba le khutšo ya monagano.

Jesu o itše: “Dinku tša-ka di kwa lentšu la-ka. Xomme Nna ke a di tseba ’me tšôna di a ntatêla. Ké Nna ke di neaxo bophelô byo bo sa felexo. Di ka se kê tša bá tša lahlêxa neng le neng. Xa xo e a kaxo di utla ’atleng tša-ka.” (Johane 10:27, 28) A mantšu a borutho le a homotšago gakaakang! Ke therešo gore Jesu o a boletše mo e ka bago nywaga e dikete tše pedi tše fetilego, eupša a sa na le matla kudu gona bjale go swana le ao a bego a e-na le wona morago kua. O se ke wa lebala gore Jesu Kriste o sa dutše a phela e bile a le mafolofolo, o buša mo nakong ye e le Kgoši e beilwego sedulong sa bogoši ya Mmušo wa Modimo wa legodimong. Bjalo ka ge a ile a sepela lefaseng nywageng yeo e mentši e fetilego, o sa dutše a kgomega ka baloki bao ba hlologetšego go ba le khutšo ya monagano. Go feta moo, e sa dutše e le Modiši wa dinku tša gagwe. Ge e ba re mo latela, o tla re thuša go rua khutšo ya ka gare, yeo e akaretšago tebelelo ya kgodišego ya go bona khutšo e feletšego nakong e tlago​—yeo e tla bolelago go se be gona ga bošoro, ntwa le bosenyi.

Mehola ya kgonthe e tlišwa ke go tseba le go dumela gore Jehofa ka Jesu o tla re thuša. Na o sa gopola Vania, yoo ge e sa le ngwanenyana yo monyenyane a ilego a tlogelwa le boikarabelo bjo boima gomme a nagana gore Modimo o mo lebetše? Ga bjale Vania o tseba gore Modimo ga se a mo lahla. O re: “Ke ithutile gore Modimo ke motho wa kgonthe yo a nago le dika tšeo di kgahlišago. Lerato la gagwe le ile la mo tutuetša gore a romele Morwa wa gagwe lefaseng bakeng sa go re nea bophelo. Ke gabohlokwa kudu go tseba se.”

Marcelo o hlatsela gore tswalano ya gagwe le Modimo ke ya kgonthe. Yo yo a bego a rata go ya meletlong ya maipshino o re: “Bafsa gantši ga ba tsebe seo ba ka se dirago, gomme ba feleletša ba ikgobaditše. Ba bangwe ba akaretšwa go dirišweng  gampe ga dihlare-tagi bjalo ka ge ke ile ka dira. Ke holofela gore ba bangwe ba bantši ba tla šegofatšwa ka go ithuta therešo ka Modimo le Morwa wa gagwe bjalo ka ge go bile bjalo ka nna.”

Ka go ithuta Beibele ka kelohloko, Vania le Marcelo ba ile ba ba le tumelo e tiilego go Modimo le go holofela go ikemišetša ga gagwe go ba thuša go swaragana le mathata a bona. Ge e ba re dira seo ba se dirilego​—re ithuta Beibele gomme re diriša seo e se bolelago​—re tla lemoga khutšo e kgolo ya ka gare, bjalo ka ge ba ile ba dira. Ka nako yeo kgothatšo ya moapostola Paulo ka kgonthe e tla šoma tabeng ya rena: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”​—Ba-Filipi 4:6, 7.

Go Hwetša Khutšo ya Kgonthe Lehono

Jesu Kriste o hlahla batho bao ba swerwego ke tlala ya therešo tseleng yeo e išago bophelong bjo bo sa felego paradeiseng ya mo lefaseng. Ge a dutše a ba hlahla go ba iša borapeding bjo bo sekilego bja Modimo, ba ba le khutšo e swanago le yeo e hlaloswago ka Beibeleng ka gore: “Sethšaba sa-ka se tlo dula maxaeng a moláô, nywakong e bôtêxaxo, madulong a xo iketla.” (Jesaya 32:18) Gomme seo ke feela go latswa e sa le pele khutšo yeo ba tla e thabelago nakong e tlago. Re bala gore: “Ba bolêta e tlo ba bôná beng ba naxa; ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.”​—Psalme 37:11, 29.

Ka gona na re ka ba le khutšo ya ka gare lehono? Ee. Go feta moo, re ka kgonthišega gore bokamosong bjo bo lego kgaufsi, Modimo o tla šegofatša batho bao ba kwago ka khutšo e sa kago ya bonwa. Ka gona, ke ka baka la’ng o sa mo kgopele ka thapelo gore a go nee khutšo ya gagwe? Ge e ba o e-na le mathata ao a go amogago khutšo, rapela ka mokgwa woo Kgoši Dafida a ilego a rapela ka gona: “Ditlalêlô di xoletše pelo ya-ka; nnamolêlê dipitlaxanong. O mpônê bobôtlana le bohlaki, O ntebalêlê dibe tša-ka tšohle.” (Psalme 25:17, 18) Kgonthišega gore Modimo o theetša dithapelo tše bjalo. O phurolla seatla sa gagwe gomme a nea khutšo go bohle bao ba e nyakago e le ka kgonthe go tšwa pelong. Re kgonthišetšwa ka lerato gore: “Morêna ó kxaufsi le bohle ba mmitšaxo, le bohle ba e rexo xe ba mmitša ba rereša. Ó tlo dira tše di tl’o xo kxahla ba ba mmoifaxo; ó kwa dillô tša bôná, ’me ó a ba phološa.”​—Psalme 145:18, 19.

[Ntlhakgolo go letlakala 5]

Motho ga a na bohlale goba ponelo-pele bakeng sa go ipuša ka ntle le thušo gomme, thušo e nnoši yeo e nago le mohola wa kgonthe e tšwa go Modimo

[Ntlhakgolo go letlakala 6]

Tsebo ya go tseba Modimo le Jesu Kriste e ka lebiša go beng le tswalano ya kgaufsi le Jehofa Modimo yeo e tla re thušago go ba le khutšo ya monagano

[Seswantšho go letlakala 7]

Go latela keletšo ya Beibele go tlaleletša bophelong bja lapa bja khutšo