Go Tsoma ga Lebaka le Letelele go a Putswa

“JEHOFA? Jehofa ke mang?” Silvia wa nywaga e seswai o ile a bona leina leo ka Beibeleng ya se-Armenia, lehumo la lapa leo a ilego a le bontšhwa ke ngwanenyana yo mongwe yo monyenyane. O ile a botšiša gohle, eupša ga go le o tee kua Yerevan, Armenia moo a bego a dula gona yo a ilego a kgona go mmotša gore Jehofa ke mang​—batswadi ba gagwe, barutiši ba gagwe, gaešita le baruti ba kereke ya lefelong leo ga se ba ka ba kgona.

Silvia o ile a gola, a fetša sekolo gomme a hwetša mošomo, eupša o be a sa dutše a sa tsebe gore Jehofa ke mang. E le motho yo mofsa yo a godilego, o ile a swanelwa ke go tšhaba Armenia gomme ka morago ga nako e itšego o ile a ikhwetša a le Poland a dula ka phapošing e nyenyane le bafaladi ba bangwe. Yo mongwe wa bao a bego a dula le bona o be a hwetša baeng ka mehla. Silvia o ile a mmotšiša gore: “Baeng ba gago ke bomang?” O ile a araba ka gore: “Ke Dihlatse tša Jehofa, di tlela go nthuta Beibele.”

Pelo ya Silvia e ile ya thaba ge a e-kwa leina la Jehofa. Mafelelong, o ile a thoma go ithuta gore Jehofa ke mang le gore ke Modimo yo lerato gakaakang. Lega go le bjalo, go se go ye kae o ile a swanelwa ke go tloga Poland. O ile a tsoma botšhabelo kua Denmark, go phatša Lewatle la Baltic. O be a rwele dithoto tše sego kae, eupša gare ga tšona go be go e-na le dipuku tša Beibele tšeo di gatišitšwego ke Dihlatse tša Jehofa. Letlakaleng la ka morago la puku e nngwe, Silvia o ile a hwetša lelokelelo la diaterese tša diofisi tša makala a Mokgatlo wa Watch Tower. Ye e be e le e nngwe ya dithoto tša gagwe tše bohlokwa​—tsela ya gagwe e mo lebišago go Jehofa!

Kua Denmark, Silvia o ile a išwa kampeng ya bafaladi, gomme kapejana o ile a thoma go nyaka Dihlatse tša Jehofa. Go tšwa lelokelelong la gagwe la diaterese, o be a tseba gore ofisi ya lekala la Mokgatlo wa Watch Tower kua Denmark e be e le toropong ya Holbæk. Eupša e be e le kae moo? Silvia o ile a romelwa ka setimela kampeng e nngwe, gomme tseleng ya go ya moo, setimela se ile sa feta Holbæk! Gape, pelo ya gagwe e ile ya tlala lethabo.

Letšatšing leo le se nago maru kapejana ka morago ga moo, Silvia o ile a namela setimela a boela Holbæk gomme a sepela ka maoto go tloga seteišeneng go ya ofising ya lekala. O gopola gore: “Ge ke tsena serapaneng, ke ile ka dula fase pankeng gomme ka ipotša gore, ‘Ye ke paradeise!’” O ile a amogelwa ka borutho lekaleng gomme mafelelong a kgona go ba le thuto ya gagwe ka noši ya Beibele.

Eupša go ile gwa latela go hudušwa ga gagwe ka makga a mmalwa. Go tloga dikampeng tša bafaladi tšeo di latelanago, Silvia o ile a swanelwa ke go tsoma Dihlatse tša Jehofa gomme a thome thuto ya gagwe ya Beibele lefsa leboelela. Go dutše go le bjalo, ka morago ga nywaga e mebedi, o be a ithutile ka mo go lekanego go ka neela bophelo bja gagwe go Jehofa. O ile a kolobetšwa gomme kapejana ka morago ga moo a tsenela bodiredi bja nako e tletšego. Ka 1998, balaodi ba ma-Denmark ba ile ba mo nea botšhabelo.

Silvia ga bjale o na le nywaga e 26 gomme o hlankela lefelong leo le ilego la mo gopotša ka paradeise, ofisi ya lekala la Dihlatse tša Jehofa kua Denmark. Ga bjale o bolela gore: “Nka re’ng? Ke be ke dutše ke tsoma Jehofa go tloga ge ke sa le ngwanenyana yo monyenyane. Ga bjale ke mo hweditše. Ke be ke lora ka go fetša bophelo bja-ka tirelong ya gagwe, gomme ke mo ga bjale ke Bethele. Ke rapela gore le e tle e be legae la-ka nywageng e tlago!”