Re Mohuta Wo O Nago Le Tumelo

Go Bolela ka Mmušo Altiplano Kua Peru

MAGARENG ga melokeloke ya ka bohlabela le ka bodikela ya Dithaba tša Andes​—moo go kopanago Bolivia le Peru​—go na le Altiplano. Leina la yona le bolela gore “molala o phagamego” goba “nagadimo.” Bogolo bja yona bo ka Bolivia.

Altiplano e bophara bja dikhilomithara tše 100 le botelele bja dikhilomithara tše di fetago tše 1 000, gomme bophagamo bja yona bja kakaretšo ke dimithara tše ka bago 3 700 ka godimo ga tekanyo ya lewatle. Ge o nametše sefofane se se yago moo se e-tšwa motse-mošate wa lebopong wa Peru, e lego Lima, o feta El Misti yeo e apešitšwego ke lehlwa, e lego thabamollo yeo e phuleletšago ka marung go fihla bophagamong bja dimithara tše 5 822. Dintlha tša Nevado Ampato le Nevado Coropuna tšeo di lego kgole e bile di apešitšwe ke lehlwa di rotogela bogodimong bja go feta dimithara tše 6 000. Gatee-tee go bonagala nagadimo e kgolo​—Altiplano ya borwa bja Peru.

Mošate wa Altiplano ya Peru ke Puno, wo o agilwego mafelelong a leboa-bodikela bja Letsha la Titicaca, e lego letsha la lefase leo le sepelwago kudu ka dikepe. Ka ge tikologo e le botelele bja dikhilomithara tša ka godimo ga tše tharo, go tšea nako bakeng sa gore baeng ba tlwaelane le moya o phagamego kudu. Bao ba dulago ka Letsheng la Titicaca ke ma-India a Quechua le a Aymara. Ba apere mebala e tagilego ya bohubedu, botala goba diaparo tše tala-lerata, ba ka bonwa ba sepela go di-chacras tša bona goba dipolasa tše nyenyane. Gaešita le ge Sepaniši e le leleme le legolo la Peru, se-Quechua le se-Aymara di a bolelwa gape Altiplano.

Go Etelela Pele Modiro wa Boboledi

Bontši bja batho ba ikokobeditšego bao ba šomago ka thata bao ba bolelago se-Quechua le se-Aymara morago bjale ba fihleletše tsebo e nepagetšego ya therešo ya Beibele. Se se bjalo kudu ka baka la tšhegofatšo ya Jehofa e humilego maitekong a phišego a baboledi ba Mmušo ba nako e tletšego bao ba hlankelago e le babulamadibogo ba kgethegilego.

Ka mohlala, babulamadibogo ba kgethegilego José le Silvia ba ile ba abelwa toropong ya Putina, mo e ka bago dikhilomithara tše 50 go tloga Letsheng la Titicaca. Ka dikgwedi tše pedi, Silvia o be a swara dithuto tša magae tša Beibele tše 16 gomme José tše 14. Ka dikgwedi tše tshelelago feela, palo ya bagoeledi ba phuthego e ile ya oketšega go tloga go 23 go ya go 41. Go sa dutše go le bjalo, palo ya bao ba bago gona dibokeng e ile ya oketšega go tloga go 48 go ya tlhoreng ya 132.

José o re: “Ge re be re thoma diboka tša phuthego ditšhabeng tše tšeo di lego lekatana, re ile ra hwetša e le mo go šomago go thoma ka Seboka sa Phatlalatša le Thuto ya Puku ya Phuthego. Se se dira gore go be bonolo bakeng sa bao ba sa tšwago go thoma go thabela go thoma go ba gona dibokeng.”

Bana ba motho ba babedi​—yo mongwe e lego mmulamadibogo​—ba ile ba tliša ditaba tše dibotse la mathomo setšhabeng se se lego lekatana sa Muñani, mo e ka bago dikhilomithara tše 20 go tloga Putina. Gona moo ba ile ba thoma thuto ya Beibele le monna wa sefofu yo a bitšwago Lucio. * O ile a laletša moratho wa gagwe Miguel, e lego modumedi wa moromiwa wa Katholika le moetapele wa setšhaba go tšwa tikologong ya kgaufsi. Ge mogwera a be a botšiša Miguel gore ke ka baka la’ng a be a e-ya Muñani beke e nngwe le e nngwe, o ile a re e be e le bakeng sa go ithuta ka Jehofa le Lentšu la gagwe. Ke moka go ile gwa rotoga potšišo ya gore: “Ke ka baka la’ng re sa ithute Beibele mo?” Ka lebaka la kgahlego yeo e bontšhitšwego ke batho ba setšhabeng sa Miguel, Dihlatse kapejana di ile tša lokišetša go swara diboka moo.

Miguel o ile a thoma go abelana le ba bangwe seo a bego a ithuta sona. Eupša go thwe’ng ka maemo a gagwe bjalo ka modumedi wa moromiwa wa Katholika le motlatša-mmušiši? Lekgotleng holong ya setšhaba, o ile a tsebiša go tlogela ga gagwe bjalo ka moromiwa wa Katholika. Na motho yo mongwe o be a tla kgethwa? Yo mongwe go batheetši o itše: “Ke ka baka la’ng re nyaka moromiwa yo mongwe mola re ithuta therešo?” Ee, se e be e le tšhupo ya dilo tšeo di bego di rutwa ke Dihlatse tša Jehofa. Motho yo mongwe o  ile a tlaleletša ka gore: “Ga re dumelelane le gore o tlogele o nnoši. Ke ka baka la’ng re sa tlogele ka moka?” Ka moka bao ba bego ba le gona ba ile ba goeletša ka botee ba re: “Ka moka re a tlogela!”

Go ile gwa bolelwa ka medimo ya diswantšho le diswantšho tša Jesu a le sefapanong lekgotleng la setšhaba kapejana ka morago ga moo. Monna yo mongwe o ile a kgopela gore ka moka bao ba lego gona ba bale Doiteronomio 7:25, yeo e rego: “Diswanthšô tša medimo ya bôná O di fišê ka mollô. O se kê wa kxanyoxa disilifêra le dixauta tše di lexo mo xo tšôna, xore O se tanyêxê ka tšôna; ka xobane dilô tšeo Morêna Modimo wa xaxo ó a di hlaswa.”

Ka gona monna o ile a kgopela bohle bao ba bego ba kganyoga go fiša medimo ka moka ya diswantšho go emiša matsogo. Kapejana matsogo ka moka a ile a ema. (Ditiro 19:19, 20) Ga bjale malapa a 23 go a 25 setšhabeng a ithuta Lentšu la Modimo. Batho ba babedi ba hlankela bjalo ka bagoeledi bao ba sa kolobetšwago, gomme dihlopha tše hlano tša batho bao ba dulago gotee di rulaganya go ngwadiša manyalo a tšona ka molao e le gore di be le boemo bjo bo hlwekilego ka pele ga Jehofa.​—Tito 3:1; Ba-Hebere 13:4.

Go Ruta ka Dikgatišo tša Dikhasete

Ka ge ba bantši ba se ba rutega Altiplano, dibidio le dikgatišo tša dikhasete tša Watch Tower ka maleme a lefelong leo ke thušo e kgolo​—gaešita le bakeng sa go swara dithuto tša magae tša Beibele. Ka thušo ya khasete, mmulamadibogo yo a kgethegilego yo a bitšwago Dora o swara dithuto ka poroutšha ya Ke Eng Seo Modimo a se Nyakago go Rena? A bapala serapa se tee ka nako, o botšiša morutwana wa Beibele dipotšišo ka taba yeo a sa tšwago go e-kwa.

Seteišene sa radio sa lefelong leo ka mehla se gaša dikarolo tša poroutšha ya Seo Modimo a se Nyakago ka leleme la se-Quechua. Se dira ka mo go swanago le ka dikarolo tša makasine wa Phafoga! ka Sepaniši. Lega go le bjalo, batho ba bantši ba lemoga molaetša wa Mmušo gomme ba nyaka go ithuta ka mo go oketšegilego ge Dihlatse tša Jehofa di etela magaeng a bona.

Altiplano e kgole kudu go ka lemogwa ke lefase ka kakaretšo eupša e sego ponong ya Modimo. Ka baka la lerato la Jehofa bakeng sa batho, batho ba bantši bao ba dulago godimo Altiplano ya Andes ba fetoga karolo ya bontši bjo bo tumišago ngwako wa gagwe o mogolo wa borapedi bja therešo.​—Hagai 2:7.

[Mengwalo ya ka tlase]