Bagoeledi Ba Mmušo Ba A Bega

Jehofa o Nea Batho ba Gagwe Lefelo la go Khutša

LEFELO la go khutša leo le šireleditšwego karolong ya thaba ke pono e amogelegago ka lethabo kudu go mosepedi yo a lapilego. Kua Nepal, mafelo a bjalo a go khutša a bitšwa chautara. Chautara e tlwaelegilego e ka hlongwa kgaufsi le sehlare se se kgahlišago kudu sa banyan, lefelo la moriti bakeng sa go dula le go khutša. Go hloma chautara ke tiro ya botho, e bile bontši bja bao ba holwago ba dula ba sa tsebje.

Diphihlelo tša Nepal di bontšha kamoo Jehofa Modimo a bilego Mothopo wa lethabo le tapološo ya moya go “basepedi” ba bantši bao ba lapilego tshepedišong ye ya dilo.​—Psalme 23:2.

• Lil Kumari o dula motseng o mobotse wa Pokhara, wo o nago le pono e kgahlišago ya Dithaba tša Himalaya tšeo di khupeditšwego ke kapoko. Eupša Lil Kumari ka ge a be a tshwenyegile mabapi le ditšhelete tša lapa, o be a nagana gore go be go se na mo gontši mo go ka holofelwago. Ge yo mongwe wa Dihlatse tša Jehofa a mo etela, o ile a thabišwa ke kholofelo e phadimago ya Beibele gomme kapejana a kgopela thuto ya legae ya Beibele.

Gaešita le ge Lil Kumari a be a thabela thuto, go be go se bonolo go tšwela pele ka baka la kganetšo e matla ya lapa. Eupša ga se a ka a fela matla. O be a e-ba gona dibokeng tša Bokriste ka mehla gomme a diriša seo a bego a ithuta sona, kudu-kudu tabeng ya go ikokobetša ga mosadi. Ka baka leo, monna wa gagwe le mmagwe ba ile ba lemoga gore thuto ya Beibele ya Lil Kumari e be e hola lapa ka moka.

Monna wa gagwe le ba mmalwa ba leloko ga bjale ba ithuta Lentšu la Modimo. Kopanong ya morago bjale yeo e bego e swaretšwe Pokhara, Lil Kumari o thabetše lenaneo gotee le ba 15 ba leloko. O re: “Legae la-ka le fetogile lefelo la go khutša ka gore lapa la rena ga bjale le kopane borapeding bja therešo, e bile ke hweditše khutšo ya kgonthe ya monagano.”

• Gaešita le ge go kgetholla go ya ka maemo go se molaong kua Nepal, go sa dutše go hlohleletša tutuetšo e matla tseleng ya batho ya bophelo. Ka gona, ba bantši ba kgahlegela go tseba seo Beibele e se bolelago mabapi le go lekana le go beba sefahlego. Go ithuta gore “Modimo xa a bebe motho” go fetotše kudu bophelo bja Surya Maya le lapa la gagwe.​—Ditiro 10:34.

Surya Maya o be a gateletšegile ka baka la go hloka toka ga kgethollo ya go ya ka maemo gotee le morwalo wa meetlo le metlwae tšeo di tsemilego medu. Ka ge e be e le mosadi yo a ineetšego, Surya Maya o ile a kgopela thušo go medingwana ya gagwe ya diswantšho ka nywaga e mentši. Eupša dithapelo tša gagwe di ile tša tšwela pele di sa arabje. Ka letšatši le lengwe ge a dutše a llela thušo, setlogolo sa gagwe sa nywaga e tshela Babita se ile sa tla go yena gomme sa botšiša gore: “Ke ka baka la’ng o kgopela thušo go medingwana yeo e ka se go thušego ka selo?”

Go ile gwa bonala gore mmago Babita o be a ithuta Beibele le yo mongwe wa Dihlatse tša Jehofa. Babita ka phišego o ile a laleletša makgolo’agwe dibokeng tša Bokriste. Ge Surya Maya a be a le moo dibokeng, o ile a makatšwa ke go bona batho ba maemo a fapanego ba thabela go gwerana ka ntle le kgethollo le ge e le efe. Kapejana o ile a kgopela thuto ya legae ya Beibele. Gaešita le ge se se feleleditše ka gore a se amogelwe ke baagišani ba gagwe, o be a sa nyema moko; gaešita le bokgoni bja gagwe bjo bo lekanyeditšwego bja go bala le go ngwala ga se bja mo thibela go dira tšwelopele ya moya.

Go fetile nywaga e seswai, gomme ditho tše tshela tša lapa la gagwe, go akaretša le monna wa gagwe le bana ba bararo, ba bile Dihlatse tša Jehofa. Surya Maya ga bjale ke modiredi wa nako e tletšego, mmulamadibogo wa ka mehla, ka lethabo o thuša ba bangwe go ba imolla merwalo ya bona e imelago lefelong la kgonthe la go khutša leo e lego Jehofa feela a ka le neago.