Ditaba tše Dibotse tša Khutšo di Fihlelela Naga-dimo ya Chiapas

“Polaong e šoro yeo mang le mang a ka e gopolago motseng wa Chiapas, balemi ba 45 bao ba bego ba sa kgone go iphemela, go akaretša le masea a 13, ba ile ba bolawa ke sehlopha sa banna . . . bao ba itlhamilego.” Kuranta ya “El Universal” e begile bjalo mabapi le seo se diragetšego kua Acteal, Motseng wa Chiapas, ka December 22, 1997.

CHIAPAS ke motse wa ka borwa bja tlase bja Mexico, mollwaneng wa Guatemala. Sehlopha sa setlogo sa ma-India a Maya ao a nago le histori e telele ya bodiidi le bohloki se ile sa rulaganya diphetogelo tšeo go tšona se itlhamilego ka January 1994, se diriša leina la Ejército Zapatista de Liberación Nacional (EZLN, National Liberation Zapatista Army). Ditherišano tša tharollo ya khutšo di diegile. Go khukhunetša le ditlhaselo, tšeo di bego di dirwa ke bobedi marabele le madira a mmušo, di feleleditše ka tšhollo ya madi le lehu. Khuduego e ile ya bakela balemi ba bantši ba tikologo yeo go tšhabela moo ba ka šireletšegago.

Gare ga maemo ao a sa tsepamago, go na le sehlopha se tee sa barati ba khutšo seo ka mehla se sa tšeego lehlakore ge e le ka tša dintwa tša dipolitiki. Ka phišego se lebiša tlhokomelo go Mmušo wa Modimo e le kholofelo e nnoši ya go rarolla mathata ao batho ba lebeletšanego le ona, bobedi lefelong leo le lefaseng ka bophara. (Daniele 2:44) Ke bomang? Dihlatse tša Jehofa. Ka go kwa taelo ya Jesu, di katanela go iša ditaba tše dibotse tša Mmušo wa Modimo dikarolong tša ka thoko kudu tša naga-dimo ya Chiapas. (Mateo 24:14) Go bolela ka tlase ga maemo a bjalo go be go le bjang, gomme mafelelo e bile afe?

“Ke yo Mongwe wa Dihlatse tša Jehofa”

Adolfo, e lego lesogana leo le sa tšwago go ba mogoeledi wa Mmušo, ka letšatši le lengwe o be a šoma seteišeneng sa radio kua Ocosingo. Kapejana go ile gwa kokotwa mojako ka lešata. Sehlopha sa banna bao ba aperego dikefa tša go pipa hlogo le sefahlego se ile sa tsena ka gare gomme ba mo šupa hlogong ka dithunya. Ba ile ba kitimela phapošing ya kgašo, ba diriša didirišwa ka kgang gomme ba phatlalatša radiong gore ba tsebiša ntwa malebana le mmušo.

Banna bao ba itlhamilego ba ile ba retologela go Adolfo, gomme ba mo laela gore a tsenele mokgatlo wa bona. Adolfo o ile a araba ka gore, “Ke yo mongwe wa Dihlatse tša Jehofa,” gaešita le ge a be a se a hlwa a kolobetšwa. O ile a hlalosa gore kholofelo e nnoši ya khutšo e be e le Mmušo wa Modimo, gomme o ile a gana a tiišitše yunifomo le sethunya tšeo ba bego ba mo nea tšona. Ge ba bona go ema ga gagwe a tiile, ba ile ba mo tlogela. Adolfo ge a gopola tiragalo yeo o re: “Tiragalo yeo ka kgonthe e matlafaditše tumelo ya-ka.”

Mafelelong boemo bo ile bja okobala, eupša tikologo e be e sa le ka tlase ga taolo ya madira. Go sa šetšwe seo, Adolfo ka lethabo o ile a amogela taletšo ya bagolo ba phuthego ya moo ya go šoma le sehlopha se senyenyane sa Bakriste tikologong yeo. Mafelong a go phuruphutšwa ao a bego a swanetše go feta go ona, mašole a ile a mo hlompha ge a itlhalosa  e le yo mongwe wa Dihlatse tša Jehofa. Ka morago o ile a kolobetšwa gomme a thabela go thuša sehlopha seo se senyenyane gore e be phuthego ya Dihlatse tša Jehofa. Adolfo o itše: “Bjale ka ge ke kolobeditšwe, nka bolela ka kgodišego e tletšego gore ke yo mongwe wa Dihlatse tša Jehofa!”

“Jehofa o Ile a re Matlafatša”

Kapejana ka morago ga ge EZLN e phatlaladitše radiong ntwa malebana le mmušo, batho ba toropong ba ile ba tšhaba. Francisco, yo e lego modiredi wa nako e tletšego goba mmulamadibogo, o ile a hlalosa kamoo Jehofa a ilego a mo matlafatša le mosadi wa gagwe go seo ba bego ba swanetše go lebeletšana le sona.

“Re ile ra phetha ka gore re tšhabele tikologong yeo e lego bokgole bjo bo ka bago diiri tše tharo ge o sepela ka maoto. Go be go e-na le phuthego moo, ka gona re be re tla ba le banababo rena. Kapejana e be e le nako ya kopano ya rena ya tikologo yeo e bego e tla swarelwa kua Palenque. Nna le mosadi wa-ka re be re sa nyake go fošwa ke seboka se kgethegilego sa babulamadibogo, eupša re ile ra kwa gore tsela e yago kopanong e be e thibetšwe ke EZLN. Re ile ra phetha ka gore re tla sepela ka tsela ya sethokgwa, yeo e re tšerego diiri tše senyane. Re ile ra fihla ka nako go ka ba gona sebokeng sa babulamadibogo, seo re ilego ra se thabela kudu gotee le lenaneo ka moka la kopano.

 “Ge re boa, re ile ra hwetša gore ntlo ya rena e be e fišitšwe le diruiwa tša rena di utswitšwe. Selo feela seo se bego se šetše e be e le mokotlana wa diaparo. Re ile ra ikwa re nyamile ka baka la tahlegelo ya rena, eupša banababo rena ba Ocosingo ka botho ba ile ba re iša magaeng a bona. Ba ile ba ba ba re bontšha kamoo re ka šomago ka gona ka dilo tšeo rena bjalo ka balemi re sa kago ra di dira pele. Ngwanabo rena yo mongwe o ile a nthuta go tšea diswantšho, yo mongwe go lokiša dieta. Ke kamoo nna le mosadi wa-ka re kgonnego go iphediša go fihla ga bjale ka ntle le go kgaotša tirelo ya bobulamadibogo. Ge re lebelela seo se diragetšego, re ka bona gore gaešita le ge go be go se bonolo gore re kgotlelele, Jehofa o ile a re matlafatša.”

Dienywa tša Modiro wa Boboledi

Dihlatse tša kua Nageng ya Chiapas ga se tša dumelela mathata le dikotsi di di fetša matla go tšeeng karolo boitekong bjo kgethegilego bja go iša ditaba tše dibotse bathong ba tikologo yeo. Ka mohlala, morago kua ka April le May 1995, di ile tša tlatša Bakriste-gotee le tšona lefaseng ka bophara lesolong la go aba Kingdom News No. 34, yeo e nago le sehlogo se se swanetšego kudu se se rego, Ke ka Baka La’ng Bophelo bo Tletše Mathata Gakaakaa?

Nakong ya lesolo​—lefelong leo le bitšwago Pueblo Nuevo​—Ciro yo e lego mmulamadibogo wa ka mehla o ile a hwetša lapa leo le bontšhitšego kgahlego. Ge a boela ka morago ga matšatši a mararo, o ile a kgona go thoma thuto ya Beibele le bona. Eupša ge Ciro le mogwera wa gagwe ba boela go yo tšwetša pele thuto le lapa, mong wa lapa o be a se gona gae. Go e na le moo, sehlopha sa banna bao ba aperego dikefa tša go pipa hlogo le sefahlego se be se mo laletše gore se tlo mo gobatša. Ba ile ba botšiša Ciro le mogwera wa gagwe gore ba nyaka’ng gomme ba ba tšhošetša ka gore ba tla ba bolaya. Ka morago ga go rapela Jehofa ka setu, Bakriste ba babedi ka sebete ba ile ba hlalosa gore ba tlile go ruta lapa Beibele. Ka baka la seo banna bao ba ipipilego difahlego ka dikefa ba ile ba ba tlogela ba sepela. Ka lebaka le itšego, mong wa lapa ga se a tla gae letšatšing leo.

Letšatši le lengwe ka morago ga mo e nyakilego go ba nywaga e meraro, Ciro o ile a makatšwa ke go bona monna mojako wa gagwe. Ciro o be a thabile gakaakang go kwa gore lapa ka moka le be le kolobeditšwe gomme ga bjale le be le kopanela le phuthego ya Guatemala! Yo mongwe wa barwedi o be a bile a hlankela bjalo ka mmulamadibogo wa ka mehla.

Go Leboga Dijo tša Moya

Go sa šetšwe mathata ao a tšwelago pele kua Chiapas, molebeledi wa selete o bega gore Dihlatse tikologong yeo di lemoga e le ka kgonthe bohlokwa bja go kopana gotee. (Ba-Hebere 10:24, 25) O hlalosa seo se diragetšego kopanong ya morago bjale ya letšatši le le kgethegilego, yeo e bego e rulaganyeditšwe  gore e thome ka pela mesong e le gore bao ba lego gona ba ka boela gae ba bolokegile e sa le mosegare. Gaešita le ge bontši bja bona ba be ba swanetše go sepela diiri tše fetago tše tharo sethokgweng e le gore ba fihle lefelong la kopano, ka moka ba be ba dutše fase ka 7:00 a.m. Gare ga batheetši go be go na le ditho tše tshela tša sehlopha sa EZLN, ba theeditše e bile ba opa magofsi, go bonagala ba thabela lenaneo. Le bona ba ile ba sepela diiri tše tharo bakeng sa go ba gona kopanong. Ba masome-pedi le bona ba ile ba tla Segopotšong sa lehu la Kriste, seo se bego se swaretšwe Holong ya Mmušo ya lefelong leo.

Lesogana le lengwe leo e bego e le la mokgatlo wa batšhošetši le be le abetšwe ke balaodi ba lona gore le lete lefelo le itšego la sethokgweng. Ge le fihla motseng wo, le ile la hwetša gore badudi ka moka, bao bontši bja bona e bego e le Dihlatse tša Jehofa, ba be ba tšhabile. Ke moka le ile la tsena la dula go e nngwe ya dintlo tšeo di tlogetšwego. Ka ge le be le se na mo gontši mo le ka go dirago, le ile la tšea tše dingwe tša dipuku tšeo le di hweditšego ka ntlong gomme la thoma go bala. Tše e be e le dikgatišo tša Watch Tower tšeo di tlogetšwego ke Dihlatse. Ka ge le be le dutše le nnoši, lesogana le le be le na le nako ya go naganišiša ka seo le bego le se bala. Le ile la phetha ka gore le swanetše go fetola bophelo bja lona, gomme le bee marumo fase. Kapejana ka mo le ka kgonago, le ile la hwetša Dihlatse gomme la thoma go ithuta Beibele. Lebakeng la dikgwedi tše tshela le be le botša ba bangwe ditaba tše dibotse. Lona gotee le ditho tše dingwe tše tharo tša lapa la gabo lona bao ba kilego ya ba baema-nokeng ba mokgatlo wa batšhošetši ga bjale ke Bakriste ba kolobeditšwego.

Go Bona Lehlakore le Lebotse

Gaešita le ge se se be se bolela mathata a magolo, kgohlano ge e le gabotse e be e e-na le tutuetšo e botse boemong bja kgopolo bja batho modirong wa go dira boboledi. Mogolo wa motseng wona woo mathata a thomilego go wona o hlalosa gore: “Mo e ka bago matšatši a mahlano ka morago ga ge ntwa e thomile, re ile ra rulaganya modiro wa boboledi bobedi ka gare le ka ntle ga motse. Batho ba be ba fagahletše go re theetša. Re ile ra sepediša dipuku tše dintši tša Beibele gomme ra thoma dithuto tša Beibele tše mmalwa. Tikologong e nngwe, ba bantši ba be ba ganetša therešo, eupša ka baka la thulano, ga bjale ba a theetša, ba ithuta Beibele e bile ba ba gona dibokeng le dikopanong.”

Banababo rena ba thabišitšwe ke gore ba ile ba kgona go tšwetša pele mediro ya bona ya pušo ya Modimo go sa šetšwe maemo ao a sa tsepamago kudu. Bobedi mmušo le EZLN di tseba, ba tšwela pele ba swara dikopano tša bona tšeo di ba matlafatšago moyeng. Diketelo tša balebeledi ba basepedi gape di bile tutuetšo e matla bakeng sa go tšwela pele modirong wa boboledi. Ka mo go kgahlišago, kgothatšo e tšwa le go bao ba thekgago thulano, bao gantši ba kgothaletšago Dihlatse go tšwela pele ka modiro wa tšona wa boboledi.

Gaešita le ge diteko le mathata ao batho ba Chiapas ba swanetšego go a kgotlelela di ile tša theoga ge nako e dutše e e-ya, ga se tša fela. Go sa šetšwe seo, selo setee se kgonthišeditšwe​—Dihlatse tša Jehofa di ikemišeditše go tšwela pele ka ntle le go emiša maitekong a tšona a go tlišetša batho ditaba tše dibotse tša khutšo go tšwa Lentšung la Modimo, Beibele. (Ditiro 10:34-36; Ba-Efeso 6:15) Bjalo ka ge moporofeta Jeremia a boletše, di lemoga gore, “motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” (Jeremia 10:23) Ke feela Mmušo wa Modimo ka diatleng tša Morwa wa gagwe, Jesu Kriste, wo o ka tlišago tharollo ya go hloka toka le tlala tšeo di lego lefaseng.​—Mateo 6:10.

[Mmapa go letlakala 9]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Kgogometšane ya Mexico

CHIAPAS

GUATEMALA

Lewatle la Pacific

[Mothopo]

Mountain High Maps® Copyright © 1997 Digital Wisdom, Inc.

[Seswantšho go letlakala 9]

Dihlatse ge di e-ya bodireding karolong ya naga-dimo ya Chiapas