Lerato la Gago le Nabile Gakaaka’ng?
Lerato la Gago le Nabile Gakaaka’ng?
“Wa xeno O mo ratê ka mokxwa wo O ithataxo ka wôna.”—MATEO 22:39.
1. Ge e ba re rata Jehofa, ke ka baka la’ng re swanetše go rata le moagišani wa rena?
GE Jesu a be a botšišwa gore taelo e kgolo kudu ke efe, o arabile ka gore: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” Ke moka a tsopola taelo ya bobedi yeo e swanago le ya pele: “Wa xeno O mo ratê ka mokxwa wo O ithataxo ka wôna.” (Mateo 22:37, 39) Ee, go rata moagišani ke leswao la Mokriste. Ka kgonthe, ge e ba re rata Jehofa re swanetše go rata le moagišani wa rena. Ka baka la’ng? Ka gobane re bontšha lerato la rena la go rata Modimo ka go kwa Lentšu la Gagwe, gomme Lentšu la gagwe le re laela gore re rate moagišani wa rena. Ka gona, ge e ba re sa rate banababo rena le dikgaetšedi, lerato la rena la go rata Modimo e ka se be la kgonthe.—Ba-Roma 13:8; 1 Johane 2:5; 4:20, 21.
2. Re swanetše go rata baagišani ba rena ka lerato la mohuta ofe?
2 Ge Jesu a be a re re swanetše go rata moagišani wa rena, o be a bolela ka se se fetago bogwera. Gape o be a šupa leratong leo le fapanego le leo le lego gona ka tlhago ka malapeng goba magareng ga monna le mosadi. O be a bolela ka mohuta wa lerato woo Jehofa a nago le wona go bahlanka ba gagwe ba ineetšego le lerato leo ba nago le lona ka yena. (Johane 17:26; 1 Johane 4:11, 19) Yo mongwe wa ba-mangwalo wa mo-Juda—yoo go etša ge Jesu a lemogile, a bego a bolela ka tsela e nago le tlhaologanyo—o ile a dumelelana le Jesu gore lerato la go rata Modimo e swanetše go ba la “xo Mo rata ka pelo ka moka, le ka thlaoloxanyô ka moka, le ka môya ka moka, le ka matla ka moka.” (Mareka 12:28-34) O be a nepile. Lerato leo Mokriste a le hlagolelago la go rata Modimo gotee le moagišani le akaretša maikwelo a rena le tlhaologanyo ya rena. Le kwewa pelong gomme le hlahlwa ke monagano.
3. (a) Jesu o ile a ruta bjang “e mongwê wa babata-melaô” gore o swanetše go ba le pono e nabilego ka gore moagišani wa gagwe ke mang? (b) Seswantšho sa Jesu se šoma bjang go Bakriste lehono?
3 Bjalo ka ge Luka a begile, ge Jesu a be a re re swanetše go rata moagišani wa rena, “e mongwê wa babata-melaô” o ile a botšiša gore: “Xomme wa xešo ké mang?” Jesu o ile a araba ka seswantšho. Monna yo mongwe o be a bethilwe, a hlakotšwe e bile a tlogetšwe a idibetše ka thoko ga tsela. Pele go ile gwa feta moperisita gomme ka morago gwa feta mo-Lefi. Bobedi bja bona ba ile ba mo hlokomologa. Mafelelong, go ile gwa tla mo-Samaria, a bona monna yo a gobetšego, gomme a mo dira ka botho bjo bogolo. Ke mang go ba bararo ba yo e bilego moagišani wa monna yo a gobetšego? Karabo e be e le molaleng. (Luka 10:25-37) Monna yo a tsebago Molao kudu a ka ba a ile a makatšwa ke go kwa Jesu a re mo-Samaria e ka ba moagišani yo kaone go feta moperisita le mo-Lefi. Ka mo go lego molaleng, Jesu o be a thuša monna yoo go rata moagišani wa gagwe ka tsela e nabilego kudu. Bakriste le bona ba rata ka yona tsela yeo. Nagana ka bohle bao lerato la bona le ba akaretšago.
Lerato ka Lapeng
4. Mokriste o bontšha lerato kae pele?
4 Bakriste ba rata ditho tša malapa a bona—basadi ba rata banna ba bona, banna ba rata basadi ba bona, batswadi ba rata bana. (Mmoledi 9:9; Ba-Efeso 5:33; Tito 2:4) Ke therešo gore ditlamo tša lerato la tlhago di gona malapeng a mantši. Lega go le bjalo, dipego tša go phumega ga manyalo, go swarwa gampe ga balekane le bana bao ba hlokomologilwego goba bao ba tlaišwago di bontšha gore lapa le kgateletšegong lehono, gomme maikwelo a tlhago a lapa e ka no se be a lekanego go le swaraganya. (2 Timotheo 3:1-3) Gore ba atlege e le ka kgonthe maphelong a bona a lapa, Bakriste ba swanetše go bontšha mohuta wa lerato wo Jehofa le Jesu ba nago le wona.—Ba-Efeso 5:21-27.
5. Batswadi ba nyaka thušo ya go godiša bana ba bona go mang, gomme mafelelo e bile afe go ba bantši?
5 Batswadi ba Bakriste ba lebelela bana ba bona e le lefa le tšwago go Jehofa, gomme ba nyaka thušo ya go ba godiša go yena. (Psalme 127:3-5; Diema 22:6) Ka tsela ye ba hlagolela lerato la Bokriste, leo le ba thušago go šireletša bana ba bona ditutuetšong tše gobošago tšeo di ka tanyago bafsa. Ka baka la se, batswadi ba bantši ba Bakriste ba bile le lethabo le swanago le la mma yo mongwe wa Netherlands. Ka morago ga go bogela kolobetšo ya morwa wa gagwe—e lego yo mongwe wa batho ba 575 bao ba kolobeditšwego Netherlands ngwagola—o ngwadile se se latelago: “Ga bjale, boitapišo bja-ka bja nywaga e 20 e fetilego bo a putswa. Nako ka moka le matla—gotee le go kwa bohloko, maiteko le manyami—ga bjale di lebetšwe.” O thabile gakaakang ge morwa wa gagwe, ka boikgethelo bja gagwe, a ikgethetše go hlankela Jehofa. Tlhora ya bagoeledi ba 31 089 bao ba begilego Netherlands ngwagola e akaretša ba bantši bao ba ithutilego go rata Jehofa go batswadi ba bona.
6. Lerato la Bokriste le ka thuša bjang go matlafatša tlemo ya lenyalo?
6 Paulo o biditše lerato “tlêmô ya botlalô,” gomme le ka boloka botee bja lenyalo gaešita le nakong ya madimo. (Ba-Kolose 3:14, 18, 19; 1 Petro 3:1-7) Ge monna wa kua Rurutu, e lego sehlakahlaka se senyenyane seo se lego bokgole bja dikhilomithara tše 700 go tloga Tahiti, a thoma go ithuta Beibele le Dihlatse tša Jehofa, mosadi wa gagwe o be a ganetša kudu. Mafelelong, mosadi o ile a tšea bana, a tlogela monna gomme a ya go dula Tahiti. Go sa dutše go le bjalo, monna o ile a bontšha lerato la gagwe ka go mo romela tšhelete ka mehla le go mo leletša mogala go botšiša ge e ba go be go e-na le selo se sengwe seo yena goba bana ba bego ba se nyaka. Ka gona o ile a dira ka mo a ka kgonago ka gona go phethagatša boikarabelo bja gagwe bja Bokriste. (1 Timotheo 5:8) O ile a rapela leboelela gore lapa la gagwe le boelane, gomme mafelelong mosadi wa gagwe o ile a boa. Ge a boile, monna o ile a mo swara ka “leratô, le kxôtlêlêlô, le bonôlô.” (1 Timotheo 6:11) Ka 1998 monna o ile a kolobetšwa, gomme a thaba kudu ka morago ge mosadi wa gagwe a dumela go ithuta Beibele. Thuto yeo ke e nngwe ya tše 1 351 tšeo di ilego tša swarwa tšhemong ya ka tlase ga lekala la Tahiti ngwagola.
7. Go ya ka monna yo mongwe wa Jeremane, ke’ng seo se tiišitšego lenyalo la gagwe?
7 Kua Jeremane monna o ile a ganetša go kgahlegela ga mosadi wa gagwe therešo ya Beibele gomme o be a kgodišegile gore Dihlatse tša Jehofa di be di nyaka go mo aroša. Lega go le bjalo, ka morago o ile a ngwalela Hlatse yeo e ilego ya kopana le mosadi wa gagwe la mathomo gore: “Ke leboga ge o ile wa kopanya mosadi wa-ka le Dihlatse tša Jehofa. Mathomong, ke be ke tshwenyegile ka gobane ke be ke kwele dilo tše dintši tše mpe ka tšona. Eupša ga bjale, ka ge ke bile gona dibokeng le mosadi wa-ka, ke lemoga kamoo ke bego ke fošitše ka gona. Ke a tseba gore se ke se kwago ke therešo, gomme e tiišitše lenyalo la rena kudu.” Dihlatse tša Jehofa tše 162 932 tše di lego Jeremane—le tše 1 773 dihlakahlakeng tše di lego ka tlase ga lekala la Tahiti—di akaretša malapa a mantši a kopantšwego leratong la Modimo.
Lerato la go Rata Banababo Rena ba Bakriste
8, 9. (a) Ke mang yo a re rutago go rata banababo rena, gomme lerato le re tutueletša go dira’ng? (b) Nea mohlala wa kamoo lerato le ka thušago banababo rena go thekgana.
8 Paulo o ile a botša Bakriste ba ba-Thesalonika gore: “Xobane leratanong Le barutwa ba Modimo.” (1 Ba-Thesalonika 4:9) Ee, bao ba ‘rutwago ke Jehofa’ ba a ratana. (Jesaya 54:13) Lerato la bona le bontšhwa ka mediro, bjalo ka ge Paulo a bontšhitše ge a be a re: “Sa lena a e bê xo dirêlana ka leratô.” (Ba-Galatia 5:13; 1 Johane 3:18) Ka mohlala, se ba se dira ge ba etela banababo bona le dikgaetšedi bao ba babjago, ba kgothatša bao ba gateletšegilego, gomme ba thekga bao ba fokolago. (1 Ba-Thesalonika 5:14) Lerato la rena la kgonthe la Bokriste le tlaleletša kgolong ya paradeise ya rena ya moya.
9 Phuthegong ya Ancón—e nngwe ya diphuthego tše 544 tša Ecuador—banababo rena ba bontšhitše lerato la bona ka tsela e šomago. Mathata a tša ditšhelete a ile a ba tlogela ba se na mošomo le ditseno, ka gona bagoeledi ba ile ba dira phetho ya go hwetša tšhelete ka go rekišetša barei ba dihlapi ba lefelong leo dijo ge ba ba be ba e-tla gae ka morago ga go rea dihlapi bošego. Yo mongwe le yo mongwe wa bona o ile a ba le tirišano, go akaretša le bana. Ba ile ba swanelwa ke go thoma ka 1:00 a.m. e le gore dijo di be di lokile ka 4:00 a.m. ge barei ba dihlapi ba boa. Tšhelete yeo e ilego ya kgoboketšwa ke banababo rena e ile ya arolelwana magareng ga bona go ya ka dinyakwa tša bona. Go thušana mo go bjalo go bontšhitše lerato la kgonthe la Bokriste.
10, 11. Re ka bontšha bjang lerato la go rata banababo rena bao re sa ba tsebego?
10 Lega go le bjalo, lerato la rena ga le bontšhwe feela Bakriste bao re ba tsebago ka noši. Moapostola Petro o itše: ‘Ratang mokgatlo ka moka wa barwarre.’ (1 Petro 2:17, NW) Re rata banababo rena ka moka le dikgaetšedi ka gobane ka moka ga bona ke barapedi-gotee le rena ba Jehofa Modimo. Dinako tša mathata di ka tšweletša sebaka sa go bontšha lerato le. Ka mohlala, ngwageng wa tirelo wa 2000, mafula a šoro a ile a hlasela Mozambique, gomme ntwa ya selegae e tšwelago pele Angola e tlogetše ba bantši ba diila. Palo e kgolo ya banababo rena ba 31 725 ba Mozambique le ba 41 222 Angola ba kgomilwe ke ditiragalo tše. Lega go le bjalo, Dihlatse tša Afrika Borwa yeo e agišanego le tšona di rometše ditlabakelo tše dintši kudu tša dithušo bakeng sa go hlakodiša kgateletšego ya banababo bona dinageng tšeo. Go rata ga bona go nea banababo bona ba hlokago “mohora” wa bona go bontšhitše lerato la bona.—2 Ba-Korinthe 8:8, 13-15, 24.
11 Lerato le bonwa gape ge banababo rena dinageng tše dintši ba neela bakeng sa go agwa ga Diholo tša Mmušo le Diholo tša Kopano dinageng tšeo di ithwešago ka letolo. Mohlala ke wa Dihlakahlakeng tša Solomon. Go sa šetšwe dikgaruru tše dintši, Dihlakahlaka tša Solomon di bile le koketšego ya 6 lekgolong go bagoeledi ngwagola, ka tlhora ya 1 697. Ba ile ba rulaganyetša go aga Holo ya Kopano. Gaešita le ge bontši bja badudi ba dihlakahlakeng tše ba be ba tšhaba nageng, baithapi ba ile ba tla ba e-tšwa Australia go tla go thuša go aga. Mafelelong, baithapi ba ile ba swanela ke go tloga, eupša e sego pele ga ge ba ka tlwaetša banababo rena ba lefelong leo go phetha motheo. Ditšhipi tše di hlametšwego sa ruri tša go aga holo di ile tša romelwa ka sekepe go tšwa Australia, gomme go phethwa ga moago wo o mobotse wa borapedi—ka nako ya ge ditsha tše dintši tša meago di be di tlogetšwe di hlokomologilwe—e be e tla ba bohlatse bjo bobotse leineng la Jehofa le leratong la banababo rena.
Bjalo ka Modimo, re Rata Lefase
12. Re ekiša bjang Jehofa boemong bja rena bja kgopolo ka bao e sego ba tumelo ya rena?
12 Na lerato la rena le lekanyeditšwe go malapa a rena le go borwarre bja rena? Aowa, e sego ge e ba re le “baetši ba Modimo.” Jesu o itše: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Ba-Efeso 5:1; Johane 3:16, mongwalo o sekamego ke wa rena.) Bjalo ka Jehofa Modimo, re swara bohle ka lerato—go akaretša le bao e sego ba tumelo ya rena. (Luka 6:35, 36; Ba-Galatia 6:10) Mabapi le taba ye ka mo go kgethegilego, re bolela ditaba tše dibotse tša Mmušo le go botša ba bangwe ka tiro e kgolo e lerato ya Modimo bakeng sa bona. Se se ka feleletša ka phologo go motho le ge e le mang yo a theetšago.—Mareka 13:10; 1 Timotheo 4:16.
13, 14. Tše dingwe tša diphihlelo tša banababo rena bao ba bontšhitšego lerato go bao e sego Dihlatse ke dife, gaešita le ge maemo a motho ka noši a be a sa dumele?
13 Ela hloko badiredi ba babulamadibogo ba kgethegilego ba bane ba Nepal. Ba ba be ba abetšwe motseng wa ka borwa bodikela bja naga, gomme nywageng e mehlano e fetilego, ba bontšhitše lerato la bona ka go nea bohlatse motseng le metsaneng e lego kgaufsi ka go se fele pelo. E le gore ba akaretše tšhemo ya bona, gantši ba sepela diiri tše dintši ka dipaesekele dithempheretšheng tša ka godimo ga digrata tše 40 tša Celcius. Lerato la bona le ‘kgotlelelo ya go dira tše botse’ di tšweleditše mafelelo a mabotse ge go be go bopša sehlopha sa thuto ya puku ya phuthego go o mongwe wa metsana. (Ba-Roma 2:7) Ka March 2000, batho ba 32 ba ile ba tla go theetša polelo ya phatlalatša ka molebeledi wa tikologo yo a bego a etetše. Nepal e bile le tlhora ya bagoeledi ba 430 ngwagola—koketšego ya 9 lekgolong. Go molaleng gore Jehofa o šegofatša phišego le lerato tša banababo rena nageng yeo.
14 Kua Colombia babulamadibogo ba kgethegilego ba nakwana ba ile ba ya go bolela gare ga ma-India a ma-Wayuu. Gore ba dire se, ba ile ba swanelwa ke go ithuta leleme le lefsa, eupša kgahlego ya bona e lerato e ile ya putswa ge ba 27 ba bile gona polelong ya phatlalatša go sa šetšwe pula yeo e bego e tšhologa. Phišego e lerato ya go swana le yeo e bontšhitšwego ke babulamadibogo ba e tlaleleditše koketšegong ya 5 lekgolong kua Colombia le tlhoreng ya bagoeledi ba 107 613. Kua Denmark kgaetšedi yo a godilego o be a nyaka go abelana ditaba tše dibotse le ba bangwe, eupša o be a golofetše. A sa nolega moko, o ile a ikopanya le batho bao ba thabelago ka go ba ngwalela mangwalo. Ga bjale, o ngwalelana le batho ba 42 gomme o swara dithuto tša Beibele tše 11. Ke yo mongwe wa tlhora ya bagoeledi ba 14 885 bao ba begilego Denmark ngwagola.
Rata Manaba a Gago
15, 16. (a) Jesu o itše lerato la rena e swanetše go ba le le nabilego gakaaka’ng? (b) Banababo rena bao ba ikarabelago ba ile ba dirišana bjang ka tsela e lerato le motho yo a bego a latofaditše Dihlatse tša Jehofa ka maaka?
15 Jesu o boditše monna yo a bego a tseba Molao gore mo-Samaria a ka lebelelwa e le moagišani. Thutong ya gagwe ya Thabeng, Jesu o ile a tšwela pele ka mo go oketšegilego ge a re: “Le kwele xe xo thwe: Rata wa xeno, O hlôyê lenaba la xaxo. Xe e le Nna ke botša lena ke re Ratang manaba a lena; ba ba Le roxaxo Le ba šexofatšê; ba ba Le hlôyaxo Le ba setšê; ba ba Le pharaxo le ba Le hlômaraxo Le ba rapêlêlê. Ké xôna xe Le tlo ba bana ba Tata-weno wa maxodimong.” (Mateo 5:43-45) Gaešita le ge motho yo mongwe a re ganetša, re leka go ‘fenya bobe ka bolo.’ (Ba-Roma 12:19-21) Ge e ba go kgonega, re abelana le yena leruo la rena le bohlokwa kudu, e lego therešo.
16 Kua Ukraine sehlogo se se lego ka kuranteng ya Kremenchuk Herald se boletše ka Dihlatse tša Jehofa e le sehlotswana sa bohlanogi se kotsi. Se e be e se papadi ka gobane kua Yuropa ba bangwe ba bolela ka Dihlatse tša Jehofa ka mokgwa wo e le gore ba kgodiše batho gore mediro ya Dihlatse e swanetše go beelwa mellwane goba go thibelwa. Lega go le bjalo, go ile gwa boledišanwa le morulaganyi gomme a kgopelwa go phatlalatša sehlogo kuranteng seo se phošollago sehlogo seo. O ile a dumela, eupša ge se lokollwa a gatiša polelo ya gore sehlogo sa mathomong se be se theilwe therešong. Ka gona banababo rena ba ikarabelago ba ile ba ya go yena gape ka tsebišo e oketšegilego. Mafelelong morulaganyi o ile a lemoga gore sehlogo sa mathomong se be se fošagetše, gomme a gatiša taba ye e bontšhago go hlanogela seo a bego a se boletše. Go dirišana le yena ka go lebantšha taba le ka botho e be e le tsela e lerato ya go swaragana le boemo bjo, gomme e bile le mafelelo a mabotse.
Re ka Hlagolela Bjang Lerato?
17. Ke’ng seo se bontšhago gore ga se ka mehla go ka bago bonolo go swara ba bangwe ka lerato?
17 Ge ngwana a belegwe, batswadi ba gagwe kapejana ba a mo rata. Go dirišana ka lerato le batho ba bagolo ga se ka mehla go itlelago ka tlhago. Mohlomongwe ke ka baka leo Beibele e re botšago leboelela gore re ratane—ke selo seo re swanetšego go se hlagolela. (1 Petro 1:22; 4:8; 1 Johane 3:11) Jesu o tsebile gore lerato la rena le be le tla lekwa ge a be a re re swanetše go lebalela banababo rena ga “masome a šupaxo xe a balwa xa-šupa.” (Mateo 18:21, 22) Paulo le yena o re opeleditše gore re ‘tšwele pele re kgotlelelana.’ (Ba-Kolose 3:12, 13, NW) Ga go makatše ge re botšwa gore: “Phêxêlêlang leratô”! (1 Ba-Korinthe 14:1) Re ka dira se bjang?
18. Ke’ng seo se tla re thušago go hlagolela go rata ba bangwe?
18 Sa pele, ka mehla re ka nagana ka lerato leo re nago le lona ka Jehofa Modimo. Lerato le ke tutuetšo e matla bakeng sa go rata moagišani wa rena. Ka baka la’ng? Ka gobane ge re dira bjalo, se se emela Tatago rena wa legodimong gabotse gomme se tliša letago le tumišo go yena. (Johane 15:8-10; Ba-Filipi 1:9-11) Sa bobedi, re ka leka go bona dilo ka mokgwa wo Jehofa a di bonago ka wona. Nako e nngwe le e nngwe ge re dira sebe, re direla Jehofa sebe; eupša nako le nako o a re lebalela gomme o tšwela pele a re rata. (Psalme 86:5; 103:2, 3; 1 Johane 1:9; 4:18) Ge e ba re hlagolela pono ya Jehofa, re tla ba le tshekamelo ya go rata ba bangwe le go ba lebalela ditšhito tša bona go rena. (Mateo 6:12) Sa boraro, re ka dirišana le ba bangwe ka mokgwa wo re nyakago ba dirišana le rena ka wona. (Mateo 7:12) Bjalo ka ge re sa phethagala, gantši re nyaka tebalelo. Ka mohlala, ge re bolela dilo tšeo di kwešago ba bangwe bohloko, re holofela gore ba tla gopola gore yo mongwe le yo mongwe o foša ka leleme nako le nako. (Jakobo 3:2) Ge e ba re nyaka gore ba bangwe ba dirišane le rena ka lerato, re swanetše go dirišana le bona ka lerato.
19. Re ka kgopela bjang thušo ya moya o mokgethwa go hlagoleleng lerato?
19 Sa bone, re ka kgopela thušo ya moya o mokgethwa ka gobane lerato ke karolo ya dienywa tša moya. (Ba-Galatia 5:22, 23) Bogwera, tswalano e borutho ya lapa le lerato la go kgahlegelana gantši ke tša tlhago. Eupša re nyaka thušo ya moya wa Jehofa go hlagolela lerato leo Jehofa a nago le lona, lerato leo e lego tlemo e phethagetšego ya botee. Re ka kgopela thušo ya moya o mokgethwa ka go bala Beibele e buduletšwego. Ka mohlala, ge e ba re ithuta bophelo bja Jesu, re tla bona kamoo a ilego a dirišana le batho ka gona, gomme re ka ithuta go mo ekiša. (Johane 13:34, 35; 15:12) Go oketša moo, re ka kgopela moya o mokgethwa go Jehofa, kudu-kudu maemong ao a dirago gore go be thata go rena go dira dilo ka tsela e lerato. (Luka 11:13) Mafelelong, re ka phegelela lerato ka go dula re le kgaufsi le phuthego ya Bokriste. Go ba le banababo rena le dikgaetšedi ba lerato go re thuša go hlagolela lerato.—Diema 13:20.
20, 21. Ke pontšho efe e bonagalago ya lerato yeo Dihlatse tša Jehofa di e bontšhitšego ngwageng wa tirelo wa 2000?
20 Ngwagola go bile le tlhora ya bagoeledi ba 6 035 564 ba ditaba tše dibotse lefaseng ka moka. Dihlatse tša Jehofa di dirišitše palomoka ya diiri tše 1 171 270 425 di tsoma batho bao di tla ba botšago ka ditaba tše dibotse. Ke lerato leo le di dirilego gore di kgotlelele phišo, pula le go tonya ge di dutše di tšwela pele ka modiro wo. Ke lerato leo le ilego la di tutueletša go bolela le bao di tsenago sekolo le bona le bao di šomago le bona le go ya go bao di sa ba tsebego ka mo go feletšego ditarateng le mafelong a mangwe. Ba bantši bao Dihlatse di ilego tša ba etela ba be ba sa thabele, ba mmalwa ba ganetša. Lega go le bjalo, ba bangwe ba bontšhitše kgahlego, moo go ilego gwa dirwa maeto a go boela a 433 454 049 gomme gwa swarwa dithuto tša Beibele tše 4 766 631. *
21 Se e bile pontšho e kgolo gakaakang ya lerato leo Dihlatse tša Jehofa di nago le lona ka Modimo wa tšona le ka baagišani ba tšona! Lerato leo le ka se tape le ka mohla. Re kgodišegile gore ngwageng wa tirelo wa 2001 batho ba tla newa bohlatse ka tekanyo e kgolo kudu le go feta. Eka ditšhegofatšo tša Jehofa di ka tšwela pele di le go barapedi ba gagwe ba botegago ka go se kwanantšhe le ba fišegago ge ba ‘dira gore tšohle tša bona di dirwe ka lerato’!—1 Ba-Korinthe 16:14.
[Mengwalo ya ka tlase]
^ ser. 20 Bakeng sa ditaba ka botlalo tše feletšego tša Pego ya Ngwaga wa Tirelo wa 2000, bona tšhate e lego go matlakala 18-21.
Na o ka Hlalosa?
• Re ekiša mang ge re rata moagišani wa rena?
• Lerato la rena le swanetše go naba gakaaka’ng?
• Tše dingwe tša diphihlelo tšeo di bontšhago lerato la Bokriste ke dife?
• Re ka hlagolela bjang lerato la Bokriste?
[Dipotšišo tša Thuto]
[Tšhate go letlakala 18-21]
PEGO YA NGWAGA WA TIRELO WA 2000 YA DIHLATSE TŠA JEHOFA LEFASENG KA BOPHARA
(Bona bolumo)
[Diswantšho go letlakala 15]
Lerato la Bokriste le ka swaraganya lapa gotee
[Diswantšho go letlakala 17]
Lerato le re tutueletša go abelana le ba bangwe kholofelo ya rena