Ke ka Baka La’ng re Swanetše go Hlagolela Bokwala?

MONNA wa Mojapane wa nywaga ya magareng yo a bitšwago Kunihito o sa tšwa go hudugela United States morago bjale. * Lebakeng la dibeke ka morago ga ge a fihlile moo, o ile a lebeletšana le boemo bjoo bo ka bego bo ile bja senya mošomo wa gagwe wa bophelo ka moka. Kunihito o a laodiša: “Ge mookamedi wa-ka a be a mpotšiša mabapi le ge e ba nka kgona go rwala boikarabelo bjo itšego, ke ile ka ikwa ke ikholofela kudu gore nka bo amogela. Lega go le bjalo, ka ge go godišweng ga-ka ke ile ka rutwa gore ke lebelele boipoetšo e le bokwala, ke ile ka araba ka gore: ‘Ga ke kgonthišege ge e ba nka kgona go bo rwala, eupša ke tla iteka go fihla moo nka kgonago.’ Se se ile sa kwagala eka ke be ke se na bokgoni e bile ke inyatša go mookamedi wa-ka wa mo-Amerika. Ge ke be ke e-⁠kwa ka seo, ke ile ka lemoga gore go be go nyakega gore ke dire dipeakanyo tše itšego.”

Maria yo a dulago New York City, e be e le morutwana yo a nago le bokgoni gomme ka mehla a thabela go thuša barutwana-gotee le yena. Juan e be e le morutwana-gotee le yena yo a bego a fela a hwetša thušo ya Maria. Eupša gape o be a bontšha Maria kgahlego ya lerato e bile a leka go mo tutuetša maikwelong. Go sa šetšwe kganyogo ya gagwe ya go kganyoga go dula a hlwekile boitshwarong, Maria o ile a ineela ditšhišinyong tša Juan gomme a kopanela boitshwarong bjo bo gobogilego bja botona le botshadi.

Go bontšha bokwala lefaseng la mehleng yeno leo ka tlwaelo le arogilego e bile le gobogile boitshwarong e tloga e le tlhohlo. Ka gona ke ka baka la’ng re swanetše go hlagolela bokwala? Ka baka la gore boitshwaro bja bokwala bo thabiša Modimo, gomme ga go na pelaelo gore bontši bja rena re nyaka go amogelwa ke yena.

Lentšu la Modimo, Beibele, le kgothaletša babadi ba lona gore ba hlagolele bokwala. Ka mohlala, moapostola Paulo o ngwala gore: “Tše e lexo bokwala, . . . tša tumô e botse, . . . e bê tšôna Le di naxanaxo.” (Ba-Filipi 4:⁠8) Le gona moapostola Petro o re kgothaletša gore re ‘phegelele ruri gore tumelo ya rena e tšweletše bokwala.’ (2 Petro 1:⁠5) Eupša bokwala ke eng? Na bo ka rutwa ka klaseng? Re ka bo hlagolela bjang?

[Mengwalo ya ka tlase]