Na Bodumedi bo tla Tliša Khutšo ya Lefase?

GO TLOGA ka August 28 go ya go August 31, 2000, baemedi ba fetago 500 go tšwa dinageng tše 73 ba ile ba bokana kua New York City. Ba ile ba kopana gotee go Ditšhaba tše Kopanego bakeng sa “Seboka sa Khutšo ya Lefase ya Ngwaga-kete sa Baetapele ba Bodumedi le ba Moya.” Baetapele​—⁠ba bantši ba be ba apere mebese, dipurapura tša mmala o mosehla, dikefa tšeo di nago le mafofa goba dikobo tše ditelele tše diso​—ba emetše ditumelo tše dintši. Gare ga ditumelo tše go be go e-na le Bobaha’i, Bobuddha, Bohindu, Bojain, Bojuda, Bomoseleme, Boshinto, Bosikh, Botao, Bozoroaster le madumedi a Bojakane.

Baemedi ba ile ba kopana go Ditšhaba tše Kopanego bakeng sa matšatši a mabedi a mathomo a seboka sa matšatši a mane. Lega go le bjalo, seboka se be se sa rulaganywa goba go thekgwa ka tša ditšhelete ke Ditšhaba tše Kopanego, eupša se be se thekgwa ke mekgatlo e fapa-fapanego. Go sa šetšwe seo, bobedi UN le baetapele ba bodumedi ba ile ba bolela ka bohlokwa bja go šoma gotee bakeng sa go fediša bodiidi, kgethollo ya merafo, mathata a tša tikologo, ntwa le dibetša tša tshenyo e kgolo.

Baemedi ba ile ba saena lengwalo leo le bego le e-na le sehlogo se se rego “Setlamo sa Khutšo ya Lefase ka Moka.” Le ge lengwalo le dumela gore bosenyi le ntwa “ka dinako tše dingwe di dirwa ka leina la bodumedi,” le ile la bolela gore basaeni ba tla “swarišana le Ditšhaba tše Kopanego . . . go phegeleleng khutšo.” Lega go le bjalo, go be go se na ditlamo tše kgethegilego tšeo di bontšhago kamoo se mohlomongwe se ka dirwago ka gona.

Letšatšing la bobedi, Bawa Jain, mongwaledi-pharephare wa seboka, o ile a phetha mantšu a gagwe a go bula ka go hlalosa gore nywageng ya pejana ga moo, o ile a bona seswantšho se sengwe moagong wa Ditšhaba tše Kopanego. Seswantšho se be se swantšhitše monna yo motelele yo a fetago moago wa Ofisi ya Mongwaledi wa Ditšhaba tše Kopanego. O be a kokota moagong bjalo ka ge eka o kokota lebating. Ka tlase ga seswantšho go be go na le mongwalo o hlalosago o rego: “Kgošana ya Khutšo.” Mna. Jain o itše: “[Seswantšho] se ile sa nkgoma ka mo go tseneletšego nakong ya ge ke se bona. Ke ile ka botšiša batho ba fapa-fapanego mabapi le seo [se] se bolelago. Ke nagana gore lehono ke na le karabo. Go bokana ga lena ka moka mo, baetapele ba moya le ba bodumedi ba lefase, go mpontšha gore [se] ke kgošana ya khutšo e kokota lebating la Ditšhaba tše Kopanego.”

Beibele e nea pono e fapanego. E bontšha gore Kgošana ya Khutšo ke Jesu Kriste. O tla tliša khutšo ya lefase ka moka, e sego ka maiteko a baetapele ba lefase le ba dipolitiki le ba bodumedi, eupša ka Mmušo wa Modimo. Ke Mmušo wo​—mmušo wa Modimo wa legodimong​—woo o tlago go kopanya ka katlego batho ba kwago le go dira gore thato ya Modimo e dirwe mono lefaseng.​—Jesaya 9:5; Mateo 6:​9, 10.