Paulo o Rulaganya Meneelo ya Tlhakodišo Bakeng sa Bakgethwa

DIKGAHLEGO tša moya ke tša bohlokwa bjo bogolo go Bakriste ba therešo. Lega go le bjalo, go tshwenyega ka boiketlo bja dilong tša nama bja ba bangwe le gona ke gabohlokwa go bona. Gantši ba hlokomela bao ba wetšwego ke mathata. Lerato la borwarre le tutuetša Bakriste go thuša badumedi-gotee bao ba nyakago thušo.​—⁠Johane 13:​34, 35.

Lerato la go rata banababo ba moya le dikgaetšedi le ile la tutuetša moapostola Paulo go rulaganya go kgoboketšwa ga tšhelete diphuthegong kua Akaya, Galatia, Matsedonia le seleteng sa Asia. Ke eng seo se dirilego gore se se nyakege? Lenaneo la tlhakodišo le be le rulagantšwe bjang? Karabelo e bile efe? Le gona ke ka baka la’ng re swanetše go kgahlegela seo se ilego sa direga?

Boemo bja Phuthego ya Jerusalema

Ka morago ga Pentekoste ya 33 C.E., ba-Juda le basokologi ba ba tšwago mafelong a mangwe bao e bilego barutiwa ka Pentekoste, ba ile ba šala Jerusalema ka nako e itšego bakeng sa go ithuta ka mo go oketšegilego ka tumelo ya therešo. Moo go bego go nyakega, barapedi-gotee ba be ba thuša ka lethabo go rwaleng morwalo wa go dula mo go bjalo ka nako e okeditšwego. (Ditiro 2:​7-11, 41-44; 4:​32-37) Khuduego ya selegae e ka ba e feleleditše ka go nyakega mo gongwe ga thušo ge batho ba nago le botšhaba ba ba-Juda ba be ba hlohleletša borabele le bošoro bja sehlopha sa bahlola-mpherefere. Lega go le bjalo, e le gore go se be le molatedi le ge e le ofe wa Kriste yo a bolawago ke tlala, dikabelo tša letšatši le lengwe le le lengwe di ile tša direlwa bahlologadi bao ba hlokago. (Ditiro 6:​1-⁠6) Heroda o ile a ikemišetša go tlaiša phuthego gomme bogareng bja nywaga ya bo-40 C.E., tlala e ile ya hlasela Judea. Ge e le ka balatedi ba Jesu, se sohle se ka ba se ile sa feleletša ka seo Paulo a se biditšego “ditlaišêxô,” “dithlokofatšô” le ‘go hlakolwa dilo tša bona.’​—⁠Ba-Hebere 10:​32-34; Ditiro 11:​27–12:⁠1.

Mo e ka bago ka 49 C.E., boemo bo be bo sa dutše bo le thata. Ka gona, ka morago ga go dumelelana gore Paulo o tla lebiša tlhokomelo go ba-Ntle boboleding bja gagwe, Petro, Jakobo le Johane ba ile ba mo kgothaletša gore ‘a se lebale bahloki.’ Se ke seo Paulo a ilego a katanela go se dira.​—⁠Ba-Galatia 2:​7-⁠10.

Go Rulaganya Kgoboketšo ya Tšhelete

Paulo o ile a hlokomela sekhwama sa Bakriste bao ba hlokago kua Judea. Mo e ka bago ka 55 C.E., o ile a botša Ba-Korinthe gore: “Xe e le dineô tše di nthšetšwaxo ba bakxêthwa, le lena dirang ka mo ke laetšexo diphuthêxo tša kwa Galatia. Ka la xo hlatlama Sabatha e mongwê le e mongwê a nthšê sa xaxwe, a thšêlê ka mo a ruilexo ka xôna, xore e se re xe ke e-⁠tla, ya ba xôna xo thšêlwaxo. . . . [Ke moka] ke tlo hlaola ba Le ba botilexo, ka ba roma bà swere mangwalô,  ba tlo ya ba iša dimphô tša lena kwa Jerusalêma.” (1 Ba-Korinthe 16:​1-⁠3) Ka morago ga ngwaga, Paulo o ile a bolela gore Matsedonia le Akaya di tsentše letsogo. Le gona, ge kgoboketšo ya tšhelete e be e romelwa Jerusalema, go ba gona ga baemedi go tšwa seleteng sa Asia go bonala go ile gwa bontšha gore diphuthego seleteng seo le tšona di be di neetše.​—⁠Ditiro 20:⁠4; 2 Ba-Korinthe 8:​1-⁠4; 9:​1, 2.

Ga go yo a bego a gapeletšwa go neela go feta kamoo a bego a ka kgona. Go e na le moo, e be e le taba ya go lekantšha e le gore mašaledi a ka tswalela tlhaelelo gare ga bakgethwa kua Jerusalema le Judea. (2 Ba-Korinthe 8:​13-15) Paulo o itše: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.”​—⁠2 Ba-Korinthe 9:⁠7.

Moapostola o ile a nea ba-Korinthe lebaka le lebotse la go ba bao ba fago kudu. Jesu ‘o bile modiidi ka baka la bona, gore ba humišwe’ moyeng. (2 Ba-Korinthe 8:⁠9) Ka kgonthe, ba be ba tla nyaka go ekiša moya wa gagwe wa go fa. Go feta moo, ka ge Modimo a ba humišitše “ka tšohle,” e be e le mo go swanetšego gore ba thuše go nea dinyakwa tša bakgethwa.​—⁠2 Ba-Korinthe 9:​10-⁠12.

Boemo bja Kgopolo bja Batšea-karolo

Re ka ithuta go gontši mabapi le go nea ka boithatelo ka go ela hloko boemo bja kgopolo bja batšea-karolo lenaneong la tlhakodišo la lekgolong la pele la nywaga bakeng sa bakgethwa. Go kgoboketšwa ga tšhelete go bontšhitše se se fetago go tshwenyega bakeng sa barapedi-gotee ba Jehofa bao ba hlokago. E ile ya bontšha gore go be go e-⁠na le tlemo ya borwarre magareng ga Bakriste ba ba-Juda le ba ba-Ntle. Go nea le go amogela meneelo go ile gwa bontšha botee le segwera magareng ga ba-Ntle ba le ba-Juda. Ba be ba abelana dilo tše di bonagalago gotee le dilo tša moya.​—⁠Ba-Roma 15:​26, 27.

Paulo mathomong a ka ba a be a se a laletša Bakriste ba Matsedonia go tsenya letsogo​—⁠le bona ba be ba le bohloking bjo bogolo. Lega go le bjalo, ba ile ba ‘tšwela pele ba kgopela tokelo ya go nea.’ Ka baka leo, gaešita le ge ba be ba le “tlalêlong ya melekô e mentši,” ba ile ba nea ka lethabo “xo fetiša moo ba kxônaxo”! (2 Ba-Korinthe 8:​1-⁠4) Teko ya bona e kgolo go bonala e be e akaretša ditatofatšo tša gore ba be ba diriša bodumedi bjo bo bego bo se molaong go ya ka ba-Roma. Ka gona, ke mo go kwešišegago gore ba be ba ka ba le kwelobohloko bakeng sa banababo bona ba Judea, bao ba bego ba tlaišwa ke mathata a swanago.​—⁠Ditiro 16:​20, 21; 17:​5-⁠9; 1 Ba-Thesalonika 2:⁠14.

Gaešita le ge Paulo a dirišitše phišego ya mathomong ya ba-Korinthe bakeng sa kgoboketšo ya tšhelete e le gore a kgothatše ba-Matsedonia, phišego kua Korinthe e ile ya tapa. Mo nakong ye moapostola o tsopotše phišego ya ba-Matsedonia e le gore a tutuetše ba-Korinthe. O hweditše go le bohlokwa gore a ba gopotše gore ke nako ya go phetha seo ba se thomilego pejana ngwageng. Ke eng seo se ilego sa direga?​—⁠2 Ba-Korinthe 8:​10, 11; 9:​1-⁠5.

Tito o ile a thoma kgoboketšo ya tšhelete kua Korinthe, eupša go ile gwa tsoga mathata ao go bonalago a ile a thibela maiteko a gagwe. Ka morago ga go ikopanya le Paulo kua Matsedonia, Tito o ile a boa le ba bangwe ba babedi bakeng sa go thuša phuthego kua Korinthe go phetha kgoboketšo ya tšhelete. Ba bangwe ba ka ba ba ile ba bolela gore Paulo o be a leka go ikhola ka ba-Korinthe. Mohlomongwe le ke lebaka leo a ilego a romela banna ba bararo bakeng sa go feleletša go kgoboketšwa ga tšhelete le go fa yo mongwe le yo mongwe wa bona ditaelo. Paulo o boletše gore: “E tla ba xo phêma dithsêlê, xe motho a ka re tsôta à bone dineô tše re di lakaxo è le tše ntši. Xobane bothakxa xa re nyake bya  pele xa Modimo fêla; le bya pele xa batho re a bo nyaka.”​—⁠2 Ba-Korinthe 8:​6, 18-23; 12:⁠18.

Go Romela Meneelo

Seruthwaneng sa 56 C.E., tšhelete yeo e bego e neetšwe e be e šetše e loketše go ka išwa Jerusalema. Paulo o be a tla ya le baemedi bao ba kgethilwego ke baneedi. Ditiro 20:⁠4 e re: “A felexetšwa ke Sopatere wa Berea; ba Thesalonika e be e le Aristareko le Sekundo; le Gajo wa Derebe le Timotheo, ba Asiana e be e le Tixiko le Torofimo.” Go ya ka bohlatse bjo bo lego gona, gare ga bona go be go e-⁠na le Luka, yo a ka bego a be a emetše Bakriste ba kua Filipi. Ka gona, bonyenyane banna ba senyane ba ile ba ya thomong ye.

Seithuti Dieter Georgi se bolela gore: “Kakaretšo ya tšhelete yeo e bego e kgobokeditšwe e swanetše go ba e be e le e kgolo, ka gobane ge nkabe go be go se bjalo, maiteko a mafelelo ao a akaretšago Paulo le baemedi ba bantši gakaakaa e be e ka se be ao a swanelwago ke boitapišo bjo bo dirilwego le ditshenyagalelo tša gona.” Go ba gona ga sehlopha go be go sa thuše feela go kgonthišetša polokego, eupša go be go thuša gape le go šireletša Paulo tatofatšong le ge e le efe ya go se botege. Bao ba bego ba rometšwe ba be ba emetše diphuthego tša ba-Ntle pele ga bakgethwa kua Jerusalema.

Ba sesa go tloga Korinthe go ya Siria, baemedi ba be ba tla fihla Jerusalema ka Paseka. Lega go le bjalo, leano la go bolaya Paulo le ile la feleletša ka go fetoga ga merero. (Ditiro 20:⁠3) Mohlomongwe manaba a gagwe a be a ikemišeditše go mmolaela lewatleng.

Paulo o be a e-⁠na le dilo tše dingwe tšeo a tshwenyegilego ka tšona. Pele ga ge a tloga, o ile a ngwalela Bakriste kua Roma gore ba rapelele gore ‘a se wele diatleng tša ba ba sa dumelego ba kwa nageng ya Juda le gore thušo ye a e išago kua Jerusalema e tle e thabiše ba bakgethwa.’ (Ba-Roma 15:​30, 31) Gaešita le ge bakgethwa ka ntle le pelaelo ba be ba tla amogela meneelo ka tebogo e kgolo, Paulo a ka ba a be a tshwenyegile ka pherekano yeo go goroga ga gagwe go bego go ka e baka gare ga ba-Juda ka kakaretšo.

Moapostola ka kgonthe ga se a ka a lebala bahloki. Gaešita le ge Mangwalo a sa bolele gore meneelo e be e neelwa neng, go neelwa ga yona go be go godiša botee le go dira gore go kgonege go Bakriste ba ba-Ntle go bontšha tebogo go badumedi-gotee le bona ba Judea bakeng sa mahumo a moya ao a amogetšwego go tšwa go bona. Go ba gona ga Paulo tempeleng kapejana ka morago ga go goroga ga gagwe kua Jerusalema go ile gwa tsoša mpherefere gomme gwa feleletša ka go swarwa ga gagwe. Eupša se mafelelong, se ile sa mo nea dibaka tša go nea bohlatse go babušiši le dikgoši.​—⁠Ditiro 9:​15; 21:​17-36; 23:​11; 24:⁠1–26:⁠32.

Meneelo ya Rena Lehono

Ga e sa le go tloga lekgolong la pele la nywaga, dilo tše dintši di fetogile​—⁠eupša e sego melao ya motheo. Bakriste ba tsebišwa ka tshwanelo ka go nyakega ga thušo ya tša ditšhelete. Meneelo le ge e le efe yeo ba e dirago bakeng sa bao ba hlokago e swanetše go dirwa ka boithapo, e tutuetšwa ke lerato la go rata Modimo le magagabo bona.​—⁠Mareka 12:​28-⁠31.

Megato ya tlhakodišo yeo e bego e direlwa bakgethwa lekgolong la pele la nywaga e bontšha gore go laolwa ga meneelo e bjalo go swanetše go rulaganywa gabotse le go swarwa ka mokgwa wa tlhokomelo le go botega. Ee, Jehofa Modimo o tseba tšeo di nyakegago, gomme o dira tokišetšo bakeng sa bahlanka ba gagwe e le gore ba ka tšwela pele go abelana ditaba tše dibotse tša Mmušo le ba bangwe go sa šetšwe mathata. (Mateo 6:​25-34) Lega go le bjalo, ka moka ga rena re ka dira karolo ya rena go sa šetšwe gore maemo a rena a tša boiphedišo ke afe. Ka tsela yeo, ‘e a topilego tše ntši a ka se ke a fetiša tekanyo, le e a topilego di se nene a ka se ke a hlaetša.’​—⁠2 Ba-Korinthe 8:​15.