“Ruri, Morêna ó Tsoxile”!

Nagana kamoo barutiwa ba Jesu ba bego ba nyamile ka gona ge Morena wa bona a be a bolawa. Kholofelo ya bona e ile ya bonala e hwile go swana le mmele wo Josefa wa Arimathea a o robaditšego ka lebitleng. Le ditebelelo le ge e le dife tša gore Jesu o be a tla lokolla ba-Juda jokong ya ba-Roma le tšona di be di hwile.

GE NKABE seo e bile mafelelo a ditaba, gona barutiwa ba Jesu mohlomongwe nkabe ba ile ba hwelela go swana le balatedi ba ba bantši bao ba bego ba ipolela gore ke bo-Mesia. Eupša Jesu o be a phela! Go ya ka Mangwalo, o ile a bonala go balatedi ba gagwe mabakeng a mmalwa kapejana ka morago ga lehu la gagwe. Ka baka leo, ba bangwe ba bona ba ile ba tutueletšega go goeletša ka gore: “Ruri, Morêna ó tsoxile”!​—⁠Luka 24:⁠34.

Barutiwa ba ile ba swanelwa ke go šireletša tumelo ya bona ya go dumela go Jesu e le Mesia. Ge ba be ba dira bjalo, ba ile ba bolela kudu-kudu ka go tsoga ga gagwe bahung e le bohlatse bjo bo tiilego bja go ba ga gagwe Mesia. Ka kgonthe, “baapostola bôná ba bea bohlatse ka matla a maxolo bya xo re Morêna Jesu ó tsoxile bahung.”​—⁠Ditiro 4:⁠33.

Ge nkabe go ile gwa ba le motho yo a kgonthišetšago gore tsogo ye ke boradia​—⁠mohlomongwe ka go dira gore yo mongwe wa barutiwa a amogele gore e be e le boradia, goba ka go bontšha gore mmele wa Jesu o ile wa dula o le ka lebitleng⁠—​gona nkabe Bokriste bo ile bja folotša di sa tloga  fase. Eupša ga se bja palelwa. Ka go tseba gore Kriste o a phela, balatedi ba Jesu ba ile ba ya kae le kae ba goeletša tsogo ya gagwe, gomme mašaba a thoma go dumela go Kriste yo a tsošitšwego.

Ke ka baka la’ng le wena o ka dumela tsogong ya Jesu? Ke bohlatse bofe bjo bo lego gona bja gore se e be e le tiragalo ya kgonthe?

Ke ka Baka La’ng re Hlahloba Bohlatse?

Dipego ka moka tša Diebangedi tše nne di bega ka tsogo ya Jesu. (Mateo 28:​1-10; Mareka 16:​1-⁠8; Luka 24:​1-12; Johane 20:​1-29) * Dikarolo tše dingwe tša Mangwalo a Bakriste a Segerika di bolela ka kgodišego mabapi le go tsošwa ga Kriste bahung.

Ga go makatše ge tsogo ya Jesu e ile ya tsebatšwa ke balatedi ba gagwe! Ge e ba ka kgonthe a ile a tsošetšwa bophelong ke Modimo, tšeo ke ditaba tše di makatšago kudu tšeo lefase le kilego la di kwa. Di bolela gore Modimo o gona. Go feta moo, di bolela gore Jesu o a phela mo nakong ye.

Seo se re kgoma bjang? Ee, Jesu o rapetše gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:⁠3) Ee, re ka hwetša tsebo e neago bophelo mabapi le Jesu le Tatagwe. Ka go diriša tsebo e bjalo, gaešita le ge re ka hwa, rena ka noši re ka tsošwa ka baka la gore Jesu o tsošitšwe. (Johane 5:​28, 29) Re ka ba le kholofelo ya bophelo bjo bo sa felego lefaseng la paradeise ka tlase ga Mmušo wa Modimo wa legodimong ka diatleng tša Morwa wa gagwe yo a tagafaditšwego Jesu Kriste, Kgoši ya dikgoši.​—⁠Jesaya 9:​5, 6; Luka 23:​43; Kutollo 17:⁠14.

Ka gona-ge, taba ya ge e ba Jesu a tsošitšwe e le ka kgonthe bahung e bohlokwa. E kgoma bophelo bja rena mo nakong ye gotee le ditebelelo tša rena tša bokamoso. Ke ka baka leo re go laletšago go hlahloba mabaka a mane a bohlatse bja gore Jesu o ile a hwa gomme a tsošwa.

Jesu ka Kgonthe o Hwetše Koteng

Babelaedi ba bangwe ba bolela gore gaešita le ge a ile a kokotelwa koteng, Jesu ge e le gabotse ga se a hwela koteng. Ba bolela gore ke feela gore o be a šetše a le kgaufsi le go hwa le gore o ile a phafošwa ke go tonya ga lebitla. Lega go le bjalo, mothopo o mongwe le o mongwe wa tsebišo wo o hwetšagalago o hlatsela gore e be e le mmele wo o bego o sa phele wa Jesu wo o ilego wa tsenywa ka lebitleng.

Ka ge Jesu a ile a bolawa phatlalatša, go be go e-⁠na le dihlatse tše di hlatsetšego therešo ya gore ka kgonthe o hwetše koteng. Lehu la gagwe le ile la kgonthišetšwa ke tona ya madira ye e bego e ikarabela ka polao. Molaodi yoo wa madira e be e le mošomi yo a nago le bokgoni yoo mošomo wa gagwe o bego o akaretša go kgonthišetša gore motho o hwile. Go feta moo, ke feela ka morago ga go tiišetša gore Jesu o hwile moo Mmušiši wa Roma Pontio Pilato a ilego a gafela mmele wa Jesu go Josefa wa Arimathea bakeng sa go bolokwa.​—⁠Mareka 15:​39-⁠46.

Lebitla le Hweditšwe le se na Selo

Lebitla leo le se nago selo le ile la nea barutiwa bohlatse bja pele bja go tsoga ga Jesu, gomme bohlatse bjo ke bjo bo sa ganetšwego. Jesu o ile a bolokwa ka lebitleng le lefsa leo le bego le sa ka la šomišwa. Le be le le kgaufsi le lefelo leo a kokotetšwego koteng go lona gomme nakong yeo ya morago le be le hwetšwa gabonolo ka ntle le bothata le ge e le bofe. (Johane 19:​41, 42) Dipego ka moka tša Diebangedi di dumelelana ka gore ge bagwera ba Jesu ba fihla lebitleng mesong ya letšatši la bobedi ka morago ga lehu la gagwe, mmele wa gagwe o be o se gona.​—⁠Mateo 28:⁠1-⁠7; Mareka 16:​1-⁠7; Luka 24:​1-⁠3; Johane 20:​1-⁠10.

Lebitla leo le se nago selo le ile la tlaba manaba a Jesu go fo etša ge le ile la tlaba bagwera ba gagwe. Manaba a gagwe e be e le kgale a katanela go mmona a hwile e bile a bolokilwe. Ge ba fihleletše pakane ya bona, ba ile ba dira boitapišo bja go romela moleti gore a lete lebitla. Lega go le bjalo,  mesong ya letšatši la mathomo la beke, le be le se na selo.

Na bagwera ba Jesu ba be ba ntšhitše mmele wa gagwe ka lebitleng? Ga go bonale go le bjalo, ka ge Diebangedi di bontšha gore ba ile ba nyama kudu ka morago ga go bolawa ga gagwe. Go feta moo, barutiwa ba gagwe ba be ba ka se tšwele pele ba tlaišetšwa le go hwela selo seo ba bego ba tseba gore ke sa boradia.

Ke mang yo a dirilego gore lebitla le šale le se na selo? Manaba a Jesu ke ona ao bonyenyane mohlomongwe a ka bego a tšere mmele. Gaešita le ge a ka ba a o tšere, ka kgonthe a be a tla o tšweletša ka morago e le gore a ganetše dipolelo tša barutiwa tša gore Jesu o tsogile le gore o a phela. Eupša ga go na selo sa mohuta wo seo se ilego sa direga le ka mohla ka gobane e be e le Modimo yo a bego a gatile mogato.

Dibeke ka morago, manaba a Jesu ga se a ka a arabela ka kganetšo e matla kudu ge Petro a be a hlatsela gore: “Lena banna ba Isiraele, kwang ditaba tšé: Tša Jesu wa Natsaretha, monna eo Modimo a mo tsebaditšexo mo xo lena ka ditirô tše matla le ka mehlôlô le ka diká tša xo mo hlatsêla, tše Modimo a di dirilexo ka Yêna xare xa lena, lena beng Le a di tseba. Yêna-eo Le mo tšere ka matsôxô a ba-ntlê-xa-molaô, la [mo kokotela koteng, NW], la mmolaya; xwa ba byalo xore xo phêthêxê le Modimo a le tlemilexo à tseba xore ó tlo xafiwa. Yena-eo Modimo ó mo tsošitše, à mo hunolotše mahloko a lehu; xobane xo be xo sa kxônexe xe lehu le ka dula lé mo swere. Hleng Dafida ó mmoletše a re: Ke dula kè itebanya le Morêna . . . ’Me mmele wa-ka o rôbala ò iketlile. Xobane môya wa-ka O ka se kê wa o tloxêla ò le kwa bo-dula-bahu. O ka se kê wa lesa Mokxêthwa wa xaxo à bôna xo bôla.”​—⁠Ditiro 2:​22-⁠27.

Ba Bantši ba Bone Jesu yo a Tsošitšwego

Ka pukung ya Ditiro, mongwadi wa Ebangedi Luka o boletše gore: “Ké [baapostola] ba [Jesu] a iponaditšexo xo bôná mola à sa tš’o tlaišwa, ba ba dihlatse tša xaxwe xe a phela, ka xe ba mmone xa-ntši ka matšatši ao a masome a manê, à ba botša tša mmušo wa Modimo.” (Ditiro 1:​2, 3) Barutiwa ba bantši ba bone Jesu yo a tsošitšwego mabakeng a fapa-fapanego​—⁠ka serapeng, tseleng, nakong ya dijo le Lewatleng la Tiberia.​—⁠Mateo 28:​8-10; Luka 24:​13-43; Johane 21:​1-⁠23.

Baseka-seki ba belaela go ba ga kgonthe ga go iponagatša mo. Ba bolela gore bangwadi ba itlhametše dipego goba ba tsopola ditaba tšeo di bonagalago di ikganetša go tšona. Ge e le gabotse, diphapano tše nyenyane dipegong tša Diebangedi di hlatsela gore go be go se na tumelelano e itšego ya ka sephiring yeo e bego e dirilwe. Tsebo ya rena ka Jesu e a gola ge mongwadi yo mongwe a nea ditaba ka botlalo tše di tlatšago dipego tše dingwe tša ditiragalo tše itšego bophelong bja Kriste bja lefaseng.

Na go bonagala ga Jesu ka morago ga tsogo ke dipono tša bofora? Kganetšo le ge e le efe malebana le taba yeo e ka se ke ya dumelwa, ka ge a bonwe ke batho ba bantši kudu gakaakaa. Gare ga bona go be go e-⁠na le barei ba dihlapi, basadi, mohlankedi wa setšhaba gaešita le moapostola yo a bego a belaela e lego Tomase yo a ilego a kgodišwa ke feela ge a bone bohlatse bjo bo sa ganetšwego bja gore Jesu o be a tsošitšwe bahung. (Johane 20:​24-29) Mabakeng a mmalwa, barutiwa ba Jesu ga se ba lemoga di sa tloga fase Morena wa bona yo a tsošitšwego. Lebakeng le lengwe, o ile a bonwa ke batho ba fetago 500, bao ba bantši ba bona ba bego ba sa phela ge moapostola Paulo a be a diriša tiragalo yeo e le bohlatse ge a be a lwela taba ya tsogo.​—⁠1 Ba-Korinthe 15:⁠6.

 Jesu yo a Phelago o na le Tutuetšo go Batho

Tsogo ya Jesu ga se feela taba ya go fagahlela go tseba goba yeo go ngangišanwago ka yona. Therešo ya gore o a phela e kgomile batho kae le kae ka tsela e botse. Ga e sa le go tloga lekgolong la pele la nywaga, batho ba bantši kudu ba ile ba fetoga go tloga boemong bja go se thabele goba go tloga go ganetšeng Bokristeng ka mo go feletšego go ya boemong bja go kgodišega ka mo go feletšego gore Bokriste ke bodumedi bja kgonthe. Ke eng seo se ba fetotšego? Go ithuta Mangwalo go ile gwa ba bontšha gore Modimo o tsošeditše Jesu bophelong e le sebopiwa sa letago sa moya legodimong. (Ba-Filipi 2:​8-11) Ba ile ba bontšha tumelo go Jesu le tokišetšong ya Jehofa Modimo bakeng sa phološo ka sehlabelo sa topollo sa Kriste. (Ba-Roma 5:⁠8) Batho ba bjalo ba hweditše lethabo la kgonthe ka go dira thato ya Modimo le go phela ka go dumelelana le dithuto tša Jesu.

Ela hloko seo se bego se bolelwa ke go ba Mokriste lekgolong la pele la nywaga. Go be go se na go boelwa ke botumo, matla le lehumo. Ka mo go fapanego kudu, Bakriste ba bantši ba pele ‘ba ile ba kgotlelela ba thabile ge ba be ba hlakolwa dilo tša bona’ ka baka la tumelo ya bona. (Ba-Hebere 10:​34) Bokriste bo be bo nyaka bophelo bja boikgafo le bja go tlaišwa bjoo mabakeng a mantši bo bego bo feleletša ka go bolaelwa tumelo.

Pele ba e-⁠ba balatedi ba Kriste, ba bangwe ba be ba e-⁠na le ditebelelo tše dibotse ge e le mabapi le botumo le lehumo. Saulo wa Tareso o ile a ithuta ka tlase ga tlhahlo ya morutiši yo a tumilego wa Molao Gamaliele gomme o be a šetše a thoma go tšwelela e le yo a lemogegago mahlong a ba-Juda. (Ditiro 9:​1, 2; 22:⁠3; Ba-Galatia 1:​14) Lega go le bjalo, Saulo o ile a ba moapostola Paulo. Yena gotee le ba bangwe ba bantši ba ile ba furalela botumo le matla tšeo lefase le le bego le ba nea tšona. Ka baka la’ng? E le gore ba phatlalatše molaetša wa kholofelo ya kgonthe wo o theilwego dikholofetšong tša Modimo le therešong ya gore Jesu Kriste o tsošitšwe bahung. (Ba-Kolose 1:​28) Ba be ba ikemišeditše go tlaišetšwa tsela yeo ba bego ba tseba gore e theilwe therešong.

Go bjalo le ka ba dimilione lehono. O ka ba hwetša ka diphuthegong tša Dihlatse tša Jehofa lefaseng ka bophara. Dihlatse di go laleletša ka borutho monyanyeng wa ngwaga le ngwaga wa lehu la Kriste wo o tla swarwago ka morago ga ge letšatši le sobetše ka Sontaga, April 8, 2001. Di tla thabela go ba le wena tiragalong yeo le dibokeng ka moka tša tšona tša thuto ya Beibele tšeo di swarwago Diholong tša tšona tša Mmušo.

Ke ka baka la’ng o sa ithute ka mo go oketšegilego e sego feela ka lehu le tsogo tša Jesu eupša gape le ka bophelo bja gagwe le dithuto tša gagwe? O re laletša gore re tle go yena. (Mateo 11:​28-30) Gata mogato gona bjale bakeng sa go hwetša tsebo e nepagetšego ka Jehofa Modimo le Jesu Kriste. Go dira bjalo go ka bolela bophelo bjo bo sa felego ka tlase ga Mmušo wa Modimo ka diatleng tša Morwa wa gagwe yo a rategago.

[Mengwalo ya ka tlase]

[Diswantšho go letlakala 7]

Ba dimilione ba hwetša lethabo la kgonthe e le balatedi ba Jesu Kriste

[Mothopo wa Seswantšho go letlakala 6]

From the Self-Pronouncing Edition of the Holy Bible, containing the King James and the Revised versions