Ditšhegofatšo tša Mmušo e ka ba tša Gago

MOAPOSTOLA wa Mokriste Paulo o be a e-⁠na le bokgoni bja go bolela maleme a itšego a magolo a mehleng ya gagwe. O ile a hwetša seo se lekanago le thuto ya yunibesithing lehono. O ile a thabela dibaka ka moka le ditshwanelo tša go ba modudi wa Roma. (Ditiro 21:​37-40; 22:​3, 28) Ditshwanelego tše di ka be di mo dirile gore a kgone go huma le go tuma. Lega go le bjalo, o boletše gore: “Fêla, tše ke bexo ke re ké leruô, ke di bone xe e le thsenyêxêlô xe ke di bapetša le se Kriste a lexo sôna . . . ka re: Ké maudi fêla, xore ke tlê ke humê ka Kriste.” (Ba-Filipi 3:​7, 8) Ke ka baka la’ng Paulo a ile a bolela bjalo?

A be a tsebja pele e le Saulo wa Tareso le motlaiši wa bao “e lexo ba thutô yé,” Paulo o ile a ba modumedi ka morago ga go newa pono ya Jesu yo a tsošitšwego le yo a tagafaditšwego. (Ditiro 9:​1-19) Go Paulo, phihlelo ye ya tseleng ya go ya Damaseko e ile ya hlatsela ka mo go feletšego gore Jesu ke Mesia yo a holofeditšwego goba Kriste, mmuši wa ka moso wa Mmušo o holofeditšwego. Gape e ile ya tliša phetogo e kgolo tseleng ya Paulo ya bophelo, bjalo ka ge go bontšhitšwe ke mantšu a gagwe a matla ao a ngwadilwego ka mo godimo. Ka mantšu a mangwe, ka go ba yo a ikemišeditšego le go ba le pelo e botegago, Paulo o ile a itshola.​—⁠Ba-Galatia 1:​13-⁠16.

Ka Beibeleng, lediri go “itshola,” gantši le fetolelwa go  tšwa lentšung la Segerika leo ka go lebanya le bolelago “go tseba ka morago” ka go fapana le “go tseba e sa le pele.” Ka gona, go itshola go akaretša go fetoša ga motho monagano, boemo bja kgopolo goba morero, go lahla ga motho ditsela tša pele tše sa kgotsofatšego. (Ditiro 3:​19; Kutollo 2:⁠5) Tabeng ya Paulo, ga se a dumelela tiragalo yeo e bohlokwa ya tseleng ya go ya Damaseko go fo ba selo sa maikwelo goba gaešita seo se bitšwago phihlelo ya moya. Go yena e be e mo phafošetša therešo ya gore tsela ya gagwe ya pele ya bophelo ya go hloka tsebo ka Kriste, e be e le ya lefeela. O ile a ba a lemoga gore, e le gore a holwe ke tsebo ya gagwe yeo e bego e sa tšwa go hwetšwa ka Kriste, o swanetše go dira se sengwe gore a phošolle tsela ya gagwe ya bophelo.​—⁠Ba-Roma 2:⁠4; Ba-Efeso 4:⁠24.

Phetogo Yeo e Tlišitšego Ditšhegofatšo

Nakong e fetilego, tsebo ya Paulo ka Modimo e be e e-⁠tšwa kudu sehlopheng sa Bafarisei seo a bego a le setho sa sona. Ditumelo tša bona di be di akaretša bontši bja filosofi ya motho le metlwae. Ka baka la kgethollo ya bodumedi, phišego ya Paulo le maiteko di ile tša fapošwa. Gaešita le ge a be a nagana gore o be a hlankela Modimo, ge e le gabotse o be a e-⁠lwa le yena.​—⁠Ba-Filipi 3:​5, 6.

Ka morago ga go hwetša tsebo e nepagetšego ka Kriste le karolo ya gagwe morerong wa Modimo, Paulo o ile a bona gore o be a lebane le kgetho: Na o be a swanetše go dula e le Mofarisei le go tšwela pele a thabela maemo le go hlompšha, goba na o be a swanetše go fetoša tsela ya gagwe ya bophelo gomme a thome go dira se sengwe le se sengwe seo se nyakegago gore a amogelwe ke Modimo? Ka mo go thabišago, Paulo o ile a dira kgetho e bohlale ka gobane o itše: “Xobane xa ke na masêmê [“dihlong,” NW] ka Ebangedi ya Kriste, hleng è le matla a Modimo a xo phološa mang le mang e a dumêlaxo, xo thôma ka Ba-Juda, xo iša pele ka Ba-Gerika.” (Ba-Roma 1:​16) Paulo o ile a ba mmoledi yo mafolofolo wa ditaba tše dibotse tša mabapi le Kriste le Mmušo.

Nywaga e mentši ka morago, Paulo o ile a botša Bakriste-gotee le yena gore: “Nna xa ke ithseme xore ke šetše ke thopile. Se se lexo xôna sé-sé: Ke lebala tša kwa nthaxo; ke ôbêlêla tša kwa pele; ke kxanyêlêla boyô, mo xo lexo mphapahlôxô wa ba xo biletšwa kwa lexodimong ke Modimo ka Jesu Kriste.” (Ba-Filipi 3:​13, 14) Paulo o ile a holwa ke ditaba tše dibotse ka gobane o ile a tlogela ka go rata seo se bego se mo arogantše le Modimo, gomme a phegelela ka pelo ka moka dipakane tšeo di bego di le mabapi le morero wa Modimo.

O be o tla Dira’ng?

Mohlomongwe o sa tšwa go kwa ditaba tše dibotse tša Mmušo. Na kholofelo ya go phela ka mo go sa felego paradeiseng e phethagetšego e a ipiletša go wena? Go swanetše go ba go le bjalo, ka gobane ka moka ga rena re na le kganyogo yeo re belegwego le yona ya go phela le go thabela bophelo ka khutšo le polokego. Beibele e bolela gore Modimo o beile “bosafelego” ka dipelong tša rena. (Mmoledi 3:​11, PK) Ka gona, ke ga tlhago gore re holofele nako yeo ka yona batho ba kago phela ka mo go sa felego ka khutšo le lethabo. Gomme seo ke se ditaba tše dibotse tša Mmušo di se neago.

Lega go le bjalo, bakeng sa go dira gore kholofelo yeo e be ya kgonthe, o swanetše go nyakišiša gomme o hwetše seo ditaba tše dibotse di lego sona. Moapostola Paulo o lemošitše ka gore: “[O] hlaoloxanyê se e lexo thatô ya Modimo, e lexo se botse le se se kxahlišaxo, se e lexo sa botlalô.” (Ba-Roma 12:⁠2) Ka gona, ka go swana le Paulo, ka morago ga go hwetša tsebo le kwešišo, o swanetše go dira kgetho.

Ka lehlakoreng le lengwe, o ka ba o šetše o na le ditumelo tše itšego mabapi le bokamoso bja gago. Gopola gore Saulo o be a e-⁠na le dikgopolo tša gagwe mabapi le thato ya Modimo pele a e-⁠ba moapostola Paulo. Eupša go e-⁠na le go letela kutollo ya mohlolo go tšwa go Modimo, ke ka baka la’ng o sa lebeledišiše taba ka tsela ya kgonthe? Ipotšiše: ‘Na ke tseba e le ka kgonthe seo thato ya Modimo e lego sona ka batho le lefase? Ke bohlatse bofe bjo nka bo neago bakeng sa go hlatsela ditumelo tša-ka? Na bohlatse bja-ka bo ka dula e le bjo bo kwagalago ge bo hlahlobja seetšeng sa Lentšu la Modimo, Beibele?’ O ka se senyegelwe ke selo ka go hlahloba ditumelo tša gago tša bodumedi ka tsela ye. Ge e le gabotse o swanetše go rata go dira bjalo ka gobane Beibele  e re kgothatša ka gore: “Lekang tšohle, Le šalê Lè swere tše boló.” (1 Ba-Thesalonika 5:​21) Go ba gona, na ga se go amogelwa ke Modimo mo go lego bohlokwa?​—⁠Johane 17:⁠3; 1 Timotheo 2:​3, 4.

Baetapele ba bodumedi ba ka re holofetša bokamoso bja ka mo go sa felego. Eupša, ka ntle le ge kholofetšo yeo e theilwe dithutong tša Beibele, e ka se re thuše go hwetša ditšhegofatšo tša Mmušo wa Modimo. Thutong ya gagwe e tumilego ya Thabeng, Jesu o ile a lemoša ka matla gore: “Mmušong wa maxodimo xo ka se kê xwa tsêna bao bohle, ba e rexo xe ba ra Nna, ba re: Morêna! Morêna! Xo tlo tsêna ba ba diraxo thatô ya Tate wa maxodimong.”​—⁠Mateo 7:⁠21.

Hlokomela go gatelela ga Jesu go dira thato ya Tatagwe e le tekanyetšo ya ge e ba motho o tla hwetša ditšhegofatšo tša Mmušo wa Modimo. Ka mantšu a mangwe, selo seo se ka bago le ponagalo ya borapedi ga se gore se amogelwa ke Modimo. Ge e le gabotse, Jesu o tšwetše pele ka gore: “Ké ba bantši, ka mohla woo bà tl’o xo nthêra ba re: Morêna! Morêna! A xa ra ka ra porofeta ka leina la xaxo? A xa ra ka ra lêlêka meôya e mebe ka leina xaxo? A xa ra ka ra dira matete ka leina la xaxo? Ké mo Nna ke tl’o xo fetola ka la-ka ka re: Xa ke ešo ka ba ka Le tseba; ntloxeleng lena ba-dira-bokxôpô!” (Mateo 7:​22, 23) Go molaleng gore selo se bohlokwa ke gore re kgonthišetše gore re kwešiša ka mo go nepagetšego seo ditaba tše dibotse tša Mmušo ge e le gabotse e lego sona gomme re dire ka go dumelelana le sona.​—⁠Mateo 7:​24, 25.

Thušo e a Hwetšagala

Mo e ka bago nywaga e fetago e 100, Dihlatse tša Jehofa di be di bolela ditaba tše dibotse tša Mmušo wa Modimo. Ka dikgatišo le ka go bolela ka molomo, di thuša batho go dikologa lefase go hwetša tsebo e nepagetšego ya seo Mmušo o lego sona, ditšhegofatšo tšeo o tlago go di tliša le seo motho a swanetšego go se dira gore a hwetše ditšhegofatšo tšeo.

Re go kgothaletša go arabela molaetšeng wo o bolelwago ke Dihlatse tša Jehofa. Ka go amogela le go dira ka go dumelelana le ditaba tše dibotse, o ka hwetša ditšhegofatšo tše dikgolo e sego feela mo nakong ye, eupša le nakong e tlago ge Mmušo wa Modimo o buša lefase ka moka.​—⁠1 Timotheo 4:⁠8.

Gata mogato gona bjale ka gobane ditšhegofatšo tša Mmušo wa Modimo di kgaufsi!

[Diswantšho go letlakala 7]

Ka dikgatišo le ka go bolela ka molomo, Dihlatse tša Jehofa di bolela ditaba tše dibotse tša Mmušo wa Modimo