Bagoeledi Ba Mmušo Ba A Bega

India​—“Botee Gare ga Batho ba Mehuta-huta”

“BOTEE Gare ga Batho ba Mehuta-huta” ke moano o tumilego wo o dirišwago go hlalosa go tswaka-tswakana ga ditšhaba kua India. Go fihlelela botee nageng ye e kgolo ya go se swane mo gogolo ga setšo, leleme, bodumedi, ditlogo, moaparo le dijo, ga se modiro o monyenyane. Lega go le bjalo, botee bjo bo bjalo bo bonwa ofising ya tša taolo ya Dihlatse tša Jehofa kua India, gaešita le ge baithapi bao ba dulago le go šoma moo ba e-⁠tšwa dinageng tše dintši le mafelong ao a kopantšwego ka tlase ga taolo e swanago gomme ba bolela maleme a mmalwa a fapa-fapanego.

• Anke re boleleng ka Rajrani​—⁠mosadi yo mofsa go tšwa Punjab, ka leboa-bodikela la kgole la India. Ge Rajrani a be a le sekolong, yo mongwe wa bao a bego a tsena sekolo le bona o ile a thoma go ithuta Beibele le Dihlatse tša Jehofa. Ngwanenyana yo o mofsa o ile a leka go dira gore Rajrani a kgahlegele Beibele. Ka ge Seisemane sa mogwera wa gagwe wa sekolong se be se lekanyeditšwe gomme Morokami o be o sa hwetšagale ka se-Punjabi ka nako yeo, o ile a kgopela thušo ya Rajrani gore a mo fetolelele dikagare tša makasine. Seo Rajrani a se badilego ka go Morokami se ile sa thoma go mo tutuetša ka mo go tseneletšego moo e lego gore go sa šetšwe kganetšo ya batswadi ba gagwe, o ile a dira tšwelopele go fihla ntlheng ya go neela bophelo bja gagwe go Jehofa Modimo. A hlankela Bethele ya India lehono, o dira sona selo seo se butšego mahlo a gagwe bakeng sa therešo. O fetolela dipuku tša Bokriste lelemeng la se-Punjabi!

• Nagana gape ka Bijoe, yo a tšwago karolong e nngwe ya India​—⁠mmušong wa ka borwa-bodikela wa Kerala. Bijoe o ile a rakwa sekolong se se phagamego ka baka la go kgomarela boema-gare nakong ya ditirelo tša botšhaba. Ka morago ga molato wa kgoro ya tsheko wo o lelefaditšwego le wo o feleleditšego ka phenyo ya makgaola-kgang bakeng sa borapedi bjo bo hlwekilego, Bijoe o ile a boela sekolong. * O ile a ba a ya kholetšheng. Lega go le bjalo, tikologo yeo e gobogilego boitshwarong moo e ile ya tshwenya letswalo la gagwe, ka gona o ile a kgaotša kotareng ya gagwe ya mathomo. Mo nakong ye, ka morago ga nywaga e lesome a le Bethele, o ikwa gore o holegile kudu ka go ba setho sa lapa leo le sa swanego eupša e le leo le kopanego la Bethele go feta kamoo a bego a tla ikwa ka gona ka go phegelela dithuto tša godimo.

• Bobedi Norma le Lily ba na le nywaga e fetago 70 gomme e bile bahlologadi ka nywaga e mentši. Yo mongwe le yo mongwe wa bona o feditše nywaga e fetago 40 tirelong ya nako e tletšego. Lily o ile a šoma lekaleng nywaga e ka bago 20 e le mofetoledi wa leleme la se-Tamil. Norma o tlile Bethele nywaga e 13 e fetilego ka morago ga go hwelwa ke monna wa gagwe. Ka ntle le go ba mehlala e mebotse ya go ba bašomi ba mafolofolo le bao ba šetšago, e be e le tutuetšo e kopanyago go lapa ka moka la Bethele. Ba rata go thabiša baeng, gomme ba thabela segwera le ditho tše difsa tša lapa le go abelana lethabo la nywaga e mentši ya bophelo bja Bokriste. Le gona, ba bafsa ba be ba arabela ka go ba laletša diphapošing tša bona bakeng sa segwera le go nea thušo ge go nyakega. Ke mehlala e mebotse e le ka kgonthe!

Baithapi ba, ba fentše diphapano tše di bakago thulano le go se dumelelane mafelong a mantši, ba šoma gotee ka lethabo go hlankeleng ba bangwe e le ditho tša lapa leo le kopanego la Bethele kua India.​—⁠Psalme 133:⁠1.

[Mengwalo ya ka tlase]

[Mothopo wa Seswantšho go letlakala 8]

Background: Mountain High Maps® Copyright © 1997 Digital Wisdom, Inc.