“Kotsi e Utegilego ya tša Maphelo Setšhabeng”

NYAKIŠIŠO ya morago bjale ka dikopano tša botona le botshadi tša kgokaganong ya tshepedišo ya Internet e utolotše gore tekanyo e makatšago ya tee-tharong ya batho ba bagolo bao ba dirišago Internet kua United States e etetše mohuta o itšego wa mokero wa tša dikopano tša botona le botshadi tshepedišong yeo. Dipalo tše dikgolo tša batho ga bjale di kgotsofatša dikganyogo tša tšona tše matla tša dikopano tša botona le botshadi ka Internet. Dr. Al Cooper yo e lego setsebi sa tša monagano yo a dirilego nyakišišo ye o re: “Ye ke kotsi e utegilego ya tša maphelo setšhabeng yeo e golago ka lebelo kudu, ka tekanyo e itšego ka gobane ke ba sego kae feela bao ba e lemogago e le bjalo goba ba e lebelelago e le e gobatšago.”

Ke bomang bao ka mo go kgethegilego ba ka tutuetšwago gabonolo ke kopano ya botona le botshadi e bjalo e laolwago ka computer? Dr. Cooper o re: “Ke badiriši bao kgahlego ya bona ya tša botona le botshadi e bego e dutše e gateletšwe e bile e lekanyeditšwe maphelong a bona ka moka” eupša e le bao “gatee-tee ba hwetšago kabo yeo e sa felego ya dibaka tša tša kopano ya botona le botshadi” ka go Internet.

Lega go le bjalo, bontši bja bao ba etelago leboelela mekero ya tša dikopano tša botona le botshadi yeo e lego ka go Internet, ba lebelela mokgwa wo e le o se nago kotsi. Na go bjalo? Go fo etša ge motho yo a lemaletšego dihlare-tagi a e-⁠ba le bokgoni bja go emeletšana le sehlare-tagi seo a se lemaletšego, ba bantši bao ba lemaletšego kopano ya botona le botshadi yeo e laolwago ka computer ba nyaka “kabo” e oketšegilego ya tša kopano ya botona le botshadi ka go Internet bakeng sa go kgotsofatša dikganyogo tša bona. Ka baka leo, ba ka ba ba tsena kotsing ya go lahlegelwa ke mešomo ya bona le tswalano ya bona le balekane ba bona!

Lega go le bjalo, bao ba nyakago go thabiša Modimo ba na le lebaka le le oketšegilego la go phema go etela mananeo a tša dikopano tša botona le botshadi ka go Internet. Lentšu la Modimo le eletša ka gore: “Bolayang-xê tše dithong tša lena e lexo tša lefase, e lexo bootswa, le dithšila, le tumô, le kxanyoxô e mpe, le mexabaru e lexo xo dirêla modimo o šele; ké tšôna tše boxale bya Modimo bo tlêlaxo ba xo se dumêle ka tšôna.” (Ba-Kolose 3:​5, 6) Bakeng sa go ‘bolaya ditho tša mmele wa gagwe’ mabapi le dikganyogo tše di sa hlwekago tša botona le botshadi, motho o swanetše go hlagolela lerato le matla la go rata Jehofa Modimo. (Psalme 97:​10) Ge e ba a ikhwetša a gogelwa kotsing ya tša maphelo ya phatlalatša ya kopano ya botona le botshadi ye e laolwago ka computer, o swanetše go matlafatša lerato la gagwe la go rata Jehofa ka go ithuta Lentšu la Modimo, Beibele. Go kopanela bogwereng bjo bo agago le Dihlatse tša Jehofa Holong ya Mmušo ya tikologong go ka kgatha tema e kgolo kudu go thušeng motho go matlafatša boikemišetšo bja gagwe bja go kgahliša Modimo.