Phihlelo

Go Gatela Pele Tseleng ya Jehofa go re Nea Matla le Lethabo

KA GE GO ANEGA LUIGGI D. VALENTINO

Jehofa o eletša ka gore: “Tsela šé! Tšeang ka yôna!” (Jesaya 30:​21) Go latela keletšo ye e be e dutše e le pakane ya-ka ga e sa le go tloga ge ke kolobetšwa nywageng e 60 e fetilego. Pakane ye e hlomilwe pejana ke mohlala wa batswadi ba-ka, bafaladi ba tšwago Italy, bao ba ilego ba dula Cleveland, Ohio, U.S.A., ka 1921. Moo ba ile ba godiša bana ba bararo​—⁠nna, mogolo’a-ke Mike le kgaetšedi ya-ka yo monyenyane Lydia.

BATSWADI ba-ka ba ile ba hlahloba madumedi a fapa-fapanego eupša mafelelong ba bea fase ka go nyama. Ke moka ka letšatši le lengwe ka 1932, tate o be a theeditše lenaneo la radio ka Setaliana. E be e le kgašo ya Dihlatse tša Jehofa gomme tate o ile a rata seo a se kwelego. O ile a ngwala bakeng sa go kgopela tsebišo e oketšegilego, gomme Hlatse ya Motaliana yeo e tšwago ntlong-kgolo ya Dihlatse tša Jehofa kua Brooklyn, New York, e ile ya re etela. Ka morago ga poledišano e phelago yeo e ilego ya fela ka masa, batswadi ba-ka ba be ba kgodišegile gore ba hweditše bodumedi bja therešo.

Tate le mma ba ile ba thoma go ba gona dibokeng tša Bokriste gomme ba amogela balebeledi ba basepedi legaeng la bona. Gaešita le ge ke be ke sa le mošemanyana, banna ba ba ile ba sepela le nna modirong wa boboledi gomme ba dira gore ke nagane ka go hlankela Jehofa ka nako e tletšego. Yo mongwe wa baeng bao e be e le Carey W. Barber,  yo ga bjale e lego setho sa Sehlopha se Bušago sa Dihlatse tša Jehofa. Go se go ye kae, ka February 1941, ke ile ka kolobetšwa ke e-⁠na le nywaga e 14, gomme ka 1944 ke ile ka thoma go hlankela ke le mmulamadibogo kua Cleveland. Mike le Lydia le bona ba ile ba thoma go latela tsela ya therešo ya Beibele. Mike o hlanketše Jehofa go fihla lehung la gagwe, gomme Lydia o ile a sepela le monna wa gagwe, Harold Weidner ka nywaga e 28 bodireding bja bosepedi. Lehono, ba hlankela e le badiredi ba nako e tletšego ba kgethegilego.

Kgolego e Matlafatša Phetho Ya-ka ya go Gatela Pele

Mathomong a 1945 ke ile ka feleletša ke le Kgolegong ya Ohio, ya Mmušo ya Chillicothe ka gobane letswalo la-ka leo le tlwaeditšwego ka Beibele le ile la ntutueletša go dira ka go dumelelana le Jesaya 2:⁠4, yeo e bolelago ka go rula ditšhoša megoma. Ka nako e nngwe, bahlankedi ba kgolego ba ile ba dumelela bagolegwa ba Dihlatse go ba le palo e nyenyane feela ya dipuku tša Beibele tšeo di gatišitšwego ke Dihlatse tša Jehofa. Lega go le bjalo, Dihlatse tša phuthegong ya kgaufsi di ile tša thuša. Ka dinako tše dingwe, di be di lahlela dipuku tše sego kae mašemong a lego kgaufsi le kgolego. Mesong e latelago, ge bagolegwa ba išwa mafelong a bona a mošomo, ba be ba tsoma dipuku tšeo gomme ba kgona go tsena le tšona ka kgolegong. Nakong ya ge ke be ke fihla kgolegong, re be re dumeletšwe go ba le dipuku tše dintši. Lega go le bjalo, ke ile ka ithuta kudu bohlokwa bja dijo tša moya tšeo Jehofa a di neago​—⁠thuto yeo ke sa dutšego ke e gopola nako e nngwe le e nngwe ge ke amogela tokollo e mpsha ya Morokami goba ya Phafoga!

Gaešita le ge re be re dumeletšwe go swara diboka tša phuthego ka kgolegong, bao e bego e se Dihlatse ba be ba sa dumelelwa go ba gona. Lega go le bjalo, bahlankedi ba bangwe ba kgolego le bao re bego re golegilwe le bona ba ile ba ba gona ka go iphihla, gomme ba sego kae ba ile ba ba ba amogela therešo. (Ditiro 16:​30-34) Diketelo tša Ngwanabo rena A. H. Macmillan e be e le mothopo o mogolo kudu wa khomotšo. O be a dula a re kgonthišetša gore nako yeo re e feditšego re le kgolegong e be e se ya lefeela ka gobane e ile ya re tlwaeletša dikabelo tša nakong e tlago. Ngwanabo rena yoo yo a rategago yo a godilego o ile a kgoma pelo ya-ka gomme a matlafatša phetho ya-ka ya go sepela tseleng ya Jehofa.

Ke Hwetša Mogwera

Ntwa ya II ya Lefase e ile ya fela, dikgoro tša kgolego tša bulwa gomme ka thomološa go bula madibogo, e lego bodiredi bja nako e tletšego. Eupša ka 1947, tate o ile a hwa. Bakeng sa go hlokomela lapa, ke ile ka šoma mošomo wa boiphedišo gomme ka ba ka swanelegela go šidulla batho ka tsela ya tša kalafo​—⁠bokgoni bjo bo bego bo tla nthuša nakong e thata yeo nna le mosadi wa-ka re ilego ra lebeletšana le yona nywaga e 30 ka morago ga moo. Eupša ke iketa pele. Anke ke thome ka go le botša ka mosadi wa-ka.

Thapameng e nngwe ka 1949 ge ke be ke le ka Holong ya Mmušo, mogala o ile wa lla. Ke ile ka o topa gomme ka kwa lentšu le lebosana le re: “Leina la-ka ke Christine Genchur. Ke yo mongwe wa Dihlatse tša Jehofa. Ke hudugetše Cleveland bakeng sa go tlo hwetša mošomo, gomme ke nyaka go kopanela le phuthego.” Holo ya rena ya Mmušo e be e le kgole le tikologo yeo a bego a dula go yona, eupša ke be ke ratile lentšu la gagwe, ka gona ke ile ka mo nea ditaetšo tša go tla holong ya rena gomme ka mo kgothaletša gore a tle ka Sontaga seo​—⁠letšatšing leo ke bego ke tlo nea polelo ya phatlalatša. Ka Sontaga, ke bile wa mathomo Holong ya Mmušo, eupša ga se ka bona sefahlego sa kgaetšedi yo ke sa mo tsebego. Ge polelo e tšwela pele, ke ile ka dulela go gaša mahlo mojako eupša ga go na yo a ilego a tla. Letšatšing le le latelago ke ile ka mo leletša mogala, gomme a bolela gore o be a se a tšwa a tlwaelana le mokgwa wo dipese di sepelago ka wona. Ka gona ke ile ka ithapela go kopana le yena gore ke mo hlalosetše dilo gakaone.

Ke ile ka kwa gore batswadi ba gagwe bao e lego bafaladi ba ba tšwago Czechoslovakia, ba ile ba thoma go kopanela le Barutwana ba Beibele ka morago ga go bala pukwana ya Where Are the Dead? Batswadi ba gagwe ba kolobeditšwe ka 1935. Ka 1938, tatago Christine o ile a ba mohlanka wa phuthego (yoo lehono a tsebjago e le molebeledi yo a okamelago) wa phuthego ya Dihlatse tša Jehofa kua Clymer, Pennsylvania, U.S.A., gomme ka 1947, Christine o ile a kolobetšwa a e-⁠na le nywaga e 16. Ga se gwa ka gwa ntšea nako e telele gore ke ratane le kgaetšedi yo yo mobotsana yo a sekametšego dilong tša moya. Re ile ra nyalana ka June 24, 1950, gomme ga e sa le go tloga ka nako yeo Christine e bile mogwera wa-ka yo a botegago, yo ka mehla a ratago go etiša dikgahlego tša  Mmušo wa Modimo pele. Ke leboga Jehofa gore mogwera yo wa sethakga o ile a dumela go tlatšana le nna bophelong.​—⁠Diema 31:⁠10.

Semaka se Segolo

Ka November 1, 1951, re ile ra thoma go bula madibogo gotee. Nywaga e mebedi ka morago, kopanong kua Toledo, Ohio, Banababo rena Hugo Riemer le Albert Schroeder ba ile ba boledišana le sehlopha sa babulamadibogo bao ba kgahlegelago tirelo ya boromiwa. Re be re le gare ga bona. Re ile ra kgothaletšwa go tšwela pele re bula madibogo Cleveland, eupša kgwedi e latelago re ile ra hwetša semaka se segolo​—⁠taletšo ya go ba gona sehlopheng sa bo-23 sa Sekolo sa Beibele sa Watchtower sa Gilead, go thoma ka February 1954!

Ge re be re le tseleng re e-⁠ya Sekolong sa Gilead, seo ka nako yeo se bego se le South Lansing, New York, Christine o be a tšhogile kudu moo e lego gore o be a duletše go mpotša gore, “Otlela ganyenyane!” Ke ile ka re: “Christine, ge e ba ke otlela ganyenyane go feta mo, go tla swana le gore re eme.” Lega go le bjalo, ka morago ga go fihla lefelong la sekolo, go se go ye kae ke ge re ikwa re phuthologile. Ngwanabo rena Nathan Knorr o ile a amogela sehlopha sa barutwana gomme a re bontšha lefelo. O ile a ba a re hlalosetša tsela yeo re bego re ka seketša meetse le mohlagase, a gatelela gore tsheketšo ke selo sa bohlokwa ge re hlokomela dikgahlego tša Mmušo. Keletšo yeo e ile ya re šalela menaganong. Re sa dutše re phela ka yona.

Go Fofela Rio

Kapejana re ile ra aloga gomme ka December 10, 1954, re ile ra namela sefofane kua New York City e tonyago, re thabišitšwe ke tebelelo ya go fofela kabelong ya rena e mpsha Rio de Janeiro, Brazil e fišago. Peter le Billie Carrbello, baromiwa-gotee le rena ba ile ba sepela le rena. Sefofane se be se swanetše go tšea diiri tše 24, se tšama se ema Puerto Rico, Venezuela le Belém ka leboa la Brazil. Lega go le bjalo, ka baka la mathata a entšine, go tšere diiri tše 36 pele re bona Rio de Janeiro ka tlase ga rena. Eupša e be e le pono e kgahlišago gakaakang! Mabone a motse a be a phadima bjalo ka ditaamane tša mmala wa mollo mmeteng o moso, gomme seetša sa ngwedi se be se phadima meetseng a Koung ya Guanabara.

Ditho tše mmalwa tša lapa la Bethele di be di re letile boema-fofaneng. Ka morago ga go re amogela ka borutho, ba ile ba re iša ofising ya lekala, gomme re ile ra robala mo e ka bago ka iri ya boraro mesong. Diiri tše mmalwa ka morago, tshipi ya go tsoša batho e ile ya re gopotša gore letšatši la rena la mathomo re le baromiwa le thomile!

Thuto ya Mathomong

Go se go ye kae re ile ra ithuta thuto e bohlokwa. Re be re robetše legaeng la lapa la Dihlatse. Ge re be re nyaka go sepela ka maoto re boela lekaleng, moamogedi wa rena o ile a gana ka gore, “Aowa, le ka se tloge; pula e a na,” gomme o ile a leka go re gapeletša gore re robale gape. Ke ile ka bolela ke fetiša mantšu a gagwe ka lesego gore: “Mo re tšwago gona, le gona pula e a na.” Gomme re ile ra tloga.

Ka baka la dithaba tše di dikologilego Rio, meetse a pula a kokotlela ka lebelo gomme a theogela motseng, gantši a baka mafula. Kapejana ke ge re šetše re sepela ka meetseng a go fihla matolong. Kgaufsi le lekala, ditarata di be di fetogile dinoka tše matla moo meetse a bego a re tla ka dikgara. Re be re kolobile o šoro ge re fihla Bethele. Letšatšing le le latelago, Christine o ile a ikwa a šulafaletšwe gomme a swarwa ke bolwetši bja teng-kgolo, yeo e ilego ya mo fokodiša ka lebaka le letelele. Lega go le bjalo, bjalo ka baromiwa ba bafsa, ga go pelaelo gore re be re swanetše go ba re ile ra kwa keletšo ya Dihlatse tša lefelong leo tšeo di nago le phihlelo.

Megato ya Mathomo Modirong wa Boromiwa le wa Bosepedi

Ka morago ga mathomo a a sa thabišego, re ile ra thoma bodiredi bja rena bja tšhemo ka phišego. Re be re balela yo mongwe le yo mongwe yo re gahlanago le yena thero ka Sepotokisi, gomme go be go bonagala re dira tšwelopele e lekanago. Mong wa ntlo yo mongwe o be a tla re go Christine, “Ke kwešiša wena, eupša yo ga ke mo kwešiše,” a šupa nna. Mong wa ntlo yo mongwe o be a  tla re go nna, “Wena ke a go kwešiša, eupša yena ga ke mo kwešiše.” Lega go le bjalo, re be re thabišitšwe ke go hwetša dipeeletšo tše ka godimo ga tše 100 tša Morokami dibekeng tšeo tše mmalwa tša mathomo. Ge e le gabotse, barutwana ba rena ba Beibele ba mmalwa ba ile ba kolobetšwa ngwageng wa rena wa mathomo re le Brazil, ba re dira gore re latswe kamoo kabelo ya rena ya boromiwa e tla bago e nago le dienywa ka gona.

Bogareng bja bo-1950 diphuthego tše dintši Brazil di be di sa etelwe ka mehla ke balebeledi ba tikologo ka baka la go hlokega ga banababo rena ba swanelegago. Ka gona, gaešita le ge ke be ke sa ithuta leleme gomme ke se ka ka ka nea polelo ya phatlalatša ka Sepotokisi, ke ile ka abelwa modiro wa tikologo nageng ya São Paulo ka 1956.

Ka ge phuthego ya mathomo yeo re ilego ra e etela e be e se ya ka ya etelwa ke molebeledi wa tikologo ka nywaga e mebedi, yo mongwe le yo mongwe o be a letetše mo gontši polelong ya phatlalatša. Bakeng sa go lokišetša polelo yeo, ke ile ka sega dirapa ka dihlogong tša Morokami ka Sepotokisi gomme ka di kgomaretša matlakaleng. Sontaga seo, Holo ya Mmušo e be e tletše kudu. Batho ba be ba bile ba dutše sethaleng, ka moka ba letetše tiragalo e kgolo. Polelo, goba nka re go bala go ile gwa thoma. Gatee ka morago ga nako ke ile ka emiša hlogo ke lebelela batho, gomme ke be ke makaditšwe ke gore go be go se na yo a šišinyegago, gaešita le bana. Ka moka ba be ba nkgomoletše mahlo. Ke ile ka nagana gore: ‘Owe, Valentino, Sepotokisi sa gago se kaonefetše gakaakang! Batho ba ba theeditše ka kelohloko.’ Nywaga ka morago, ge ke be ke etetše phuthego yeo gape, ngwanabo rena yo a bego a le gona ketelong yeo ya mathomo o itše: “Na o gopola polelo yela ya phatlalatša ye o kilego wa e nea? Ga se ra ka ra kwešiša selo go yona.” Le nna ke ile ka ipolela gore polelo yeo bogolo bja yona ke be ke se ka ka ka e kwešiša.

Ngwageng woo wa mathomo modirong wa tikologo, ke be ke fela ke bala Sakaria 4:⁠6. Mantšu a rego, ‘E sego ka dira eupša ka moya wa-ka,’ a be a nkgopotša gore moya wa Jehofa e be e le lebaka le nnoši leo le dirago gore modiro wa Mmušo o tšwele pele. Le gona, o ile wa tšwela pele go sa šetšwe mafokodi a rena ao a bonagalago.

Mathata le Ditšhegofatšo ge Nako e Dutše e E-⁠ya

Modiro wa tikologo o be o bolela go sepela go phatša naga re rwele motšhene wa go tlanya, mapokisi a dipuku, disutukheisi le mekotla ya dipuku. Christine ka bohlale o ile a swaya merwalo ya rena ka dinomoro e le gore re se ke ra timetša morwalo ge re e-⁠tšwa ka peseng e nngwe re tsena ka go e nngwe. E be e se mo go sa tlwaelegago go sepela ka pese diiri tše 15 ditseleng tša lekgwara go fihla lefelong le le latelago leo re yago go lona. Ka dinako tše dingwe go be go tšhoša, kudu-kudu ge dipese tše pedi tše di yago mahlakoreng a sa swanego di tshela leporogong le lesesane ka nako e swanago, di fetana kgaufsi kudu moo di bego di nyaka di sa šielane le sekgoba magareng ga tšona. Re ile ra ba ra sepela ka setimela, sekepe le go namela dipere.

Ka 1961 re ile ra thoma go hlankela modirong wa selete, re sepela go tloga tikologong e nngwe go ya go e nngwe go e na le go tloga phuthegong e nngwe go ya go e nngwe. Mantšiboeng a mmalwa ka beke, re be re bontšha difilimi tše di tšweleditšwego ke mokgatlo wa Jehofa​—⁠nako e nngwe le e nngwe e e-⁠ba lefelong le le fapanego. Gantši re be re swanelwa ke go gata mogato o swanetšego ka lebelo bakeng sa go gakiša baruti ba lefelong leo, bao ba bego ba leka go thibela dipontšho tše. Toropong e nngwe, moruti o ile a phegelela mong wa holo ka kgapeletšo ya bonkgwete gore a phumole tumelelano ye a bego a e dirile le rena. Ka morago ga go fetša matšatši re tsoma lefelo, re ile ra hwetša le lengwe, eupša ga se ra ka ra botša motho gomme ra tšwela pele ka go laleletša yo mongwe le yo mongwe lefelong la mathomong. Pele ga ge lenaneo le ka thoma, Christine o ile a ya holong gomme ka setu a lebiša bao ba bego ba nyaka go bona filimi lefelong le lefsa. Bošegong bjoo, batho ba 150 ba ile ba bona filimi, yeo e bego e e-⁠na le sehlogo se se swanetšego se se rego The New World Society in Action.

Gaešita le ge modiro wa bosepedi mafelong a lego lekatana ka dinako tše dingwe e be e le o boima, banababo rena ba ikokobeditšego bao ba dulago moo ba be ba bontšha go thabela diketelo tša rena e bile e le bao ba amogelago baeng ka go dudišana le rena magaeng a bona a maemo a itekanetšego moo re bego re dula re leboga Jehofa gore re ka ba le bona. Go dira bogwera le bona go ile gwa feleletša ka ditšhegofatšo tšeo di re thabišago pelo. (Diema 19:​17; Hagai 2:⁠7) Ka gona, re ile ra nyama gakaakang gore ka morago ga ge re be re hlanketše ka nywaga ya ka godimo ga e 21 Brazil, matšatši a rena a boromiwa a ile a fela!

 Jehofa o Ile a re Hlahla Nakong ya Mathata

Ka 1975, Christine o ile a buiwa. Re ile ra thomološa modiro wa bosepedi, eupša boemo bja tša maphelo bja Christine bo ile bja mpefalela pele. Go ile gwa bonagala go le kaone go boela United States bakeng sa gore a hwetše tlhokomelo ya tša kalafo. Ka April 1976, re ile ra goroga Long Beach, California, gomme ra dula le mma. Ka morago ga go tšea nywaga-some e mebedi re dula moše, re be re gakanegile gore re ka swaragana bjang le boemo bjo. Ke ile ka thoma go šidulla batho, gomme tšhelete yeo ke bego ke e hwetša mošomong woo e ile ya re phediša. Mmušo wa California o ile wa nea Christine bodulo sepetlele, eupša ge a be a le moo o be a ikwa a fokola kudu letšatši le letšatši ka gobane dingaka di be di gana go mo alafa ka ntle le go mo tšhela madi. Re be re le tlalelong, gomme re ile ra kgopela tlhahlo go Jehofa.

Thapameng e nngwe ge ke be ke le tirelong ya tšhemo, ke ile ka bona ofisi ya ngaka, gomme ka ntle le go senya nako ke ile ka rera go tsena go yona. Gaešita le ge ngaka e be e le kgaufsi le go ya gae, e ile ya ntsenya ka ofising ya yona gomme re ile ra boledišana lebaka la diiri tše pedi. Ke moka e ile ya re: “Ke thabela modiro wa lena bjalo ka baromiwa, e bile ke tla alafa mosadi wa gago ka ntle le tefo le tšhelo ya madi.” Ga se ka ka ka kgolwa seo ke ilego ka se kwa.

Ngaka ye e botho, yeo e ipontšhitšego e le setsebi se se hlomphegago, e ile ya romela Christine sepetleleng seo e bego e šoma go sona, gomme ka tlase ga tlhokomelo ya gagwe ya bokgoni, go se go ye kae boemo bja gagwe bo ile bja kaonefala. Re ile ra leboga Jehofa gakaakang ka gore o ile a re hlahla nakong yeo e thata!

Dikabelo tše Difsa

Ka ge Christine a ile a boelwa ke matla, re ile ra hlankela re le babulamadibogo gomme ra thabela go thuša batho ba mmalwa kua Long Beach go ba barapedi ba Jehofa. Ka 1982 re ile ra kgopelwa gore re dire modiro wa tikologo kua United States. Re be re leboga Jehofa letšatši le lengwe le le lengwe ka go re diriša gape modirong wa bosepedi​—⁠mohuta wa bodiredi woo re bego re o rata. Re ile ra hlankela California ke moka ra ya New England, moo tikologo e bego e akaretša diphuthego tše di bolelago Sepotokisi. Ka morago e ile ya akaretša gape le Bermuda.

Ka morago ga nywaga e mene e lapološago, re ile ra amogela kabelo e nngwe. Re ile ra laleletšwa go šoma bjalo ka babulamadibogo ba kgethegilego le ge e le kae moo re bego re nyaka go ya gona. Gaešita le ge re be re nyamišitšwe ke go tlogela modiro wa bosepedi, re be re ikemišeditše go gatela pele ka kabelo ya rena e mpsha. Eupša kae? Ge re le modirong wa bosepedi, ke ile ka lemoga gore phuthego ya Sepotokisi kua New Bedford, Massachusetts, e be e nyaka thušo​—⁠ka gona re ile ra ya New Bedford.

Ge re fihla, phuthego e ile ya re direla moletlo o mogolo wa go re amogela. Seo se ile sa re dira gore re ikwe re nyakega gakaakang! Se ile sa re lliša. Banyalani ba bafsa ba ba nago le bana ba babedi ba ile ba re dudiša legaeng la bona go fihlela re hwetša bodulo bja rena ka noši. Jehofa ka kgonthe o ile a šegofatša kabelo ye ya bobulamadibogo bjo bo kgethegilego go feta kamoo re bego re letetše ka gona. Ga e sa le go tloga ka 1986 re thušitše batho ba sa swanego ba 40 toropong ye gore e be Dihlatse. Ke lapa la rena la moya. Go oketša moo, ke thabetše go bona banababo rena ba bahlano ba lefelong leo ba gola go fihla ba e-⁠ba badiši ba šetšago ba mohlape. Go ile gwa swana le go hlankela kabelong e enywago ya boromiwa.

Ge re lebelela morago, re thabela gore re hlanketše Jehofa go tloga bofseng go ya pele gomme ra dira therešo tsela ya rena ya bophelo. Ke therešo gore ga bjale re tshwenywa ke bogolo le mafokodi, eupša go gatela pele tseleng ya Jehofa go sa dutše go re nea matla le lethabo.

[Seswantšho go letlakala 26]

Re sa tšwa go fihla Rio de Janeiro

[Seswantšho go letlakala 28]

Lapa la rena la moya kua New Bedford, Massachusetts