Phihlelo

Re Ile ra Leka Jehofa

KA GE GO ANEGA PAUL SCRIBNER

“Dumela Mdi. Stackhouse. Mesong ya lehono ke rekiša dikuku tša Easter, gomme ke nagana gore o tla thabela go reka e nngwe bakeng sa lapa la gago.” E be e le mathomong a seruthwane sa 1938, gomme ke be ke le Atco, New Jersey, U.S.A., ke boledišana le yo mongwe wa bareki ba bakaone kgwebong ya-ka ya General Baking Company. Ke ile ka makala ge Mdi. Stackhouse a gana go reka.

O ITŠE: “Ga ke nagane gore ke tla e thabela. Ga re bine Easter.”

Ka nako yeo ke be ke sa tsebe gore ke re’ng. Ga ba bine Easter? Go ba gona, molao wa mathomo wa kgwebo ke gore moreki ka mehla o nepile. Bjale, ke swanetše go dira’ng? Ke ile ka leka ka gore: “Go ba gona, ke kuku e bose kudu gomme ke a tseba gore o rata ditšweletšwa tša rena. Na ga o nagane gore lapa la gago le tla e thabela gaešita le ge, eh, le sa bine Easter?”

O ile a bušeletša ka gore: “Ga ke nagane bjalo, eupša ke be ke ikemišeditše go boledišana le wena ka selo se itšego Mna. Scribner gomme se e ka ba sebaka se sebotse bakeng sa go dira bjalo.” Poledišano yeo e ile ya fetoša bophelo bja-ka ka mo go feletšego! Mdi. Stackhouse e lego setho sa Phuthego ya Dihlatse tša Jehofa kua Berlin, New Jersey, o ile a ntlhalosetša setlogo sa go bina Easter gomme a mpha dipukwana tše tharo. Maina a tšona e be e le Safety, Uncovered le Protection. Ke ile ka ya gae le dipukwana, ke fagahletše go tseba eupša ke belaela ganyenyane. Go be go e-na le selo se sengwe seo Mdi. Stackhouse a se boletšego seo ke bego ke se tseba, selo seo ke se tsebilego go tloga bjaneng bja-ka.

Go Kopana la Mathomo le Barutwana ba Beibele

Ke belegwe ka January 31, 1907, gomme ka 1915 ge ke be ke e-na le nywaga e seswai, tate o ile a bolawa ke kankere. Ka baka la se, nna le mma re ile ra  ya go dula le batswadi ba mma ntlong e kgolo kua Malden, Massachusetts. Benjamin Ransom e lego malome gotee le mosadi wa gagwe ba be ba dula gona moo lebatong la boraro. Malome Ben o be a dutše a kopanela le Barutwana ba Beibele ba Ditšhaba-tšhaba ka ge Dihlatse tša Jehofa di be di tsebja bjalo ka nako yeo, ga e sa le go tloga pele ga ge ngwaga-kgolo o fela. Ke be ke rata malome Ben kudu, eupša lapa la bo-mma ka moka leo e bego e le ma-Methodist le be le nagana gore o be a sa tlwaelega. Nywaga ka morago, pele ga ge mosadi wa gagwe a ka mo hlala, o ile a atlega ka go mo iša ka lebakanyana lefelong la malwetši a tša monagano ka baka la ditumelo tša gagwe tša bodumedi! Ka ge dingaka sepetlele di ile tša hwetša kapejana gore go be go se na bothata ka monagano wa malome Ben, di ile tša mo lokolla gomme tša kgopela tshwarelo.

Malome Ben o ile a sepela le nna go ya dibokeng tša Barutwana ba Beibele ba Ditšhaba-tšhaba kua Boston, kudu-kudu ge go be go e-na le seboledi sa moeng goba ditiragalo tše kgethegilego. Lebakeng le lengwe seboledi sa moeng e be e le Charles Taze Russell yo a tsebjago, yoo a bego a eteletše pele modiro wa boboledi mehleng yeo. Lebakeng le lengwe, tiragalo e kgethegilego e be e le go bontšhwa ga “Photo-Drama of Creation.” Gaešita le ge e be e le morago kua ka bo-1915, go ba go fihla le lehono ke sa gopola gabotse seswantšho sa Aborahama a iša Isaka thabeng bakeng sa go yo mo dira sehlabelo. (Genesi, kgaolo 22) Ke sa dutše ke kgona go bona Aborahama le Isaka ba hlatloga morotoga woo ka ngata ya dikgong, ka ge Aborahama a be a botile Jehofa ka mo go feletšego. Ka ge ke be ke se na tate, seo se ile sa nkgoma kudu.

Ke moka, malome Ben le mosadi wa gagwe ba ile ba hudugela Maine, gomme mma a nyalwa gape gomme a re hudušetša New Jersey. Ka gona ke be ke se sa hlwa ke bona malome Ben gantši ka lebaka le letelele. Nywageng ya-ka ya bofseng kua New Jersey ke ile ka kopana le Marion Neff, yo mongwe wa bana ba seswai lapeng la ma-Presbyterian leo ke bego ke thabela go le etela. Ke be ke fetša mantšiboa a di-Sontaga tše dintši kudu ke e-na le lapa leo le sehlopha sa bafsa sa kereke ya bona moo mafelelong ke ilego ka ba mo-Presbyterian. Lega go le bjalo, tše dingwe tša dilo tšeo ke bego ke ithutile tšona dibokeng tša Barutwana ba Beibele ga se ka ka ka di lebala. Nna le Marion re ile ra nyalana ka 1928, gomme barwedi ba rena Doris le Louise ba ile ba belegwa ka 1935 le ka 1938. Re e-na le segotlane le lesea ka lapeng, bobedi bja rena re ile ra kwa go nyakega ga tlhahlo ya moya bakeng sa go godiša lapa la rena.

Go Hwetša Therešo ka Dipukwaneng Tšeo

Nna le Marion re be re nyaka kereke yeo re ka e tsenago gomme ra loga leano. Re be re šiedišana Sontaga se sengwe le se sengwe yo mongwe a šala ka gae le bana mola yo mongwe a e-ya kerekeng e itšego. Ka Sontaga se sengwe e be e le sebaka sa Marion sa go šala gae, eupša ke ile ka ithapa go hlokomela bana e le gore nka bala pukwana ya Safety e lego ya mathomo ya tše tharo tšeo ke bego ke di neilwe ke Mdi. Stackhouse. Ka morago ga ge ke thomile, ga se ka ka ka e bea fase! Ke ile ka kgodišega kudu gore ke hweditše selo seo go se nago kereke yeo e ka se neago. Bekeng e latelago selo se swanago se ile sa direga, ke ile ka rata go hlokomela bana mola ke bala pukwana ya bobedi, Uncovered. Seo ke bego ke se bala se ile sa kwagala ka tsela e itšego e le seo ke se tsebago. Na se ke seo malome Ben a bego a se dumela? Lapa lešo le be le nagana gore bodumedi bja gagwe bo be bo gafiša. Marion o tla nagana’ng? Ke be ke sa swanela go ba ke ile ka  tshwenyega. Ge ke boa gae go tšwa mošomong matšatšing a mmalwa ka morago ga go bala Uncovered, Marion o ile a mmakatša ka gore, “Ke badile dipukwana tšela o tlilego le tšona. Di tloga di kgahliša e le ka kgonthe.” Seo se ile sa nkimolla!

Ka letlakaleng la ka morago la dipukwana go be go e-na le tsebišo ka pukwana ye e sa tšwago go lokollwa ya Enemies, go pepentšhwa mo gogolo ga bodumedi bja maaka. Re ile ra ikemišetša gore re be le yona. Lega go le bjalo, pele re ka tsenya kgopelo ya rena posong, Hlatse e ile ya kokota mojakong wa rena gomme ya re abela yona puku yeo. E ile ya re thuša go dira phetho ya rena! Re ile ra kgaotša go ya dikerekeng gomme ra thoma go ya dibokeng tša Phuthego ya Dihlatse tša Jehofa kua Camden, New Jersey. Dikgwedi tše sego kae feela ka morago, ka Sontaga July 31, 1938, sehlopha sa ba ka bago 50 ba rena se ile sa kopana mohlweng wa Kgaetšedi Stackhouse​—ntlong yeo ke ilego ka leka go rekiša dikuku tša Easter go yona​—gomme ra theetša polelo e gatišitšwego ya kolobetšo ka Moahlodi Rutherford. Ka gona re ile ra apara diaparo tše dingwe ka ntlong gomme ba 19 ba rena ba ile ba kolobetšwa molatswaneng o lego kgaufsi.

Go Ikemišetša go ba Mmulamadibogo

Kapejana ka morago ga go kolobetšwa ga-ka, yo mongwe wa dikgaetšedi sehlopheng o ile a mpotša ka batho bao ba bitšwago babulamadibogo, bao ba  dirilego boboledi bja phatlalatša modiro wa bona o mogolo. Kapejana ke ile ka fagahlela go tseba gomme go se go ye kae ka tseba lapa ka moka la babulamadibogo. Ngwanabo rena Konig yo a gotšego, mosadi wa gagwe le morwedi wa gagwe yo a gotšego ka moka e be e le babulamadibogo phuthegong e lego kgaufsi. Ka ge ke be ke le tate wa lapa le lefsa, ke ile ka kgahlišwa ke lethabo le le tseneletšego leo lapa la ga-Konig le bego le e-na le lona bodireding. Gantši ke be ke ema legaeng la bona, ke emiša lori ya-ka ya marotho gomme ke fetša nako le bona bodireding bja ntlo le ntlo. Kapejana ke ile ka nyaka go ba mmulamadibogo. Eupša bjang? Nna le Marion re be re e-na le bana ba babedi ba banyenyane, gomme mošomo wa-ka o be o nnyaka mo gontši. Ge e le gabotse, ge Ntwa ya II ya Lefase e be e thoma kua Yuropa gomme bafsa ba bantši ba tsenela bohlabani kua United States, go be go e-na le palo e oketšegilego ya modiro bakeng sa ba bangwe ba rena bao ba šetšego medirong ya baagi. Ke ile ka kgothaletšwa go rekiša mafelong a oketšegilego gomme ke ile ka tseba gore nka se tsoge ke bile mmulamadibogo ka lenaneo leo.

Ge ke be ke boledišana le Ngwanabo rena Konig mabapi le kganyogo ya-ka ya go bula madibogo, o itše: “E-fo tšwela pele o šoma ka thata tirelong ya Jehofa, gomme o mmotše pakane ya gago ka thapelo. O tla go thuša go e fihlelela.” Ke ile ka tšwela pele ke dira seo ka lebaka le le fetago ngwaga. Gantši ke be ke fela ke naganišiša ka mangwalo a bjalo ka Mateo 6:8, ao a re kgonthišetšago gore Jehofa o tseba dinyakwa tša rena pele ga ge re ka mo kgopela. Gomme ka tšwela pele ke leka go latela keletšo ya Mateo 6:​33, go tšwela pele re tsoma Mmušo wa Modimo pele le go loka ga gagwe. Gape ke ile ka kgothatšwa ke Ngwanabo rena Melvin Winchester, mohlanka wa mafelo (ga bjale o bitšwa molebeledi wa tikologo).

Ke ile ka boledišana le Marion mabapi le dipakane tša-ka. Re ile ra boledišana ka mantšu a Maleaki 3:​10, yeo e re kgothaletšago go leka Jehofa gomme re bone ge e ba a ka se re tšhollele ditšhegofatšo. Ke ile ka kgothatšwa ke karabelo ya gagwe e rego: “Ge e ba o nyaka go bula madibogo, o se ke wa dika-dika ka baka la-ka. Nka hlokomela basetsana ge o dutše o bula madibogo. Go ba gona ga re nyake dilo tše dintši tše di bonagalago.” Ka morago ga nywaga e 12 re nyalane ke be ke šetše ke tseba gore Marion e be e le mosadi wa lapa yo a seketšago le yo a nago le tlhokomelo kudu. Nywageng ka moka o be a dutše e le modirišani yo botse wa mmulamadibogo, gomme se sengwe sa sephiri sa katlego nywageng e ka bago 60 ya tirelo ya nako e tletšego e bile bokgoni bja gagwe bja go kgotsofatšwa ke dilo tše di bonagalago tše nyenyane gomme a dira gore di bonagale eka ke tše ntši.

Selemong sa 1941, ka morago ga dikgwedi tše dintši tša go rulaganya ka thapelo, nna le Marion re be re bolokile tšhelete gomme ra reka kharabane ya dimithara tše 5,5 yeo lapa la rena le ka dulago ka go yona. Ke ile ka tlogela mošomo wa-ka gomme ka thoma go ba mmulamadibogo wa ka mehla ka July 1941, gomme ke bile tirelong ya nako e tletšego ga e sa le go tloga ka nako yeo. Kabelo ya-ka ya mathomo e be e le maema-peseng a lesome go Route 50 magareng ga New Jersey le St. Louis, Missouri moo kopano ya rena e bego e tlo swarelwa gona mathomong a August. Ke ile ka romelwa maina le diaterese tša banababo rena ke sa le tseleng, gomme ka ba ngwalela e sa le pele gore ke ba botše gore ke tla fihla neng. Ge re fihla kopanong, ke be ke swanetše go nyaka lefapha la babulamadibogo gomme ke hwetše kabelo e nngwe.

“Ke tla Leka Jehofa”

Re ile ra nametša dipuku ka koloyaneng ya rena e nyenyane gomme ra ya dibokeng tša rena tša mafelelo Camden bakeng sa go laela banababo rena. Re e-na le basetsana ba babedi ba banyenyane bao re swanetšego go ba hlokomela gomme re sa tsebe mo re tlago go ya gona ka morago ga kopano, dithulaganyo tša rena di swanetše go ba di ile tša bonagala e se tša kgonthe go ba bangwe ba banababo rena, gomme ba mmalwa ba bona ba itše: “Go se go ye kae le tla boa.” Ke gopola ke re: “Go ba gona ga ke re, nka se boe. Jehofa o itše o tla ntlhokomela, gomme ke tla leka Jehofa.”

Ka morago ga nywaga-some e tshela ya bobulamadibogo ditoropong tše 20 go tloga Massachusetts go ya Mississippi, re ka re Jehofa o bolokile kholofetšo ya gagwe go feta lentšu leo. Ditšhegofatšo tšeo a di tšholletšego nna, Marion le barwedi ba rena ba babedi di feta selo le ge e le sefe seo nkabego ke ile ka se holofela morago kua ka 1941. Di akaretša gore barwedi ba rena ba hlankele e le babulamadibogo ba botegago diphuthegong tša kgaufsi, gomme (ge go be go balwa la mafelelo) le go ba le barwa le barwedi ba moya ba ka bago lekgolo ba phatlaletšego Lebopong la ka Bohlabela la United States. Ke ithutile le batho ba 52 bao ba neetšego  maphelo a bona go Jehofa Modimo gomme Marion o ithutile le ba 48.

Ka August 1941, re ile ra ya St. Louis, gomme moo ke ile ka kopana le Ngwanabo rena T. J. Sullivan yo a tšwago Bethele. O be a swere lengwalo la-ka la go kgethwa leo ke bego ke le nyaka ka baka la ntwa yeo e bego e e-tla le go kgethwa ga madira. Ke ile ka botša Ngwanabo rena Sullivan gore mosadi wa-ka o be a fetša nako e ntši bodireding, bjalo ka ge ke be ke dira le gore o tla rata go bula madibogo le nna. Gaešita le ge lefapha la babulamadibogo kopanong le be le se la hlwa le hlongwa, Ngwanabo rena Sullivan kapejana o ile a saenela Marion e le mmulamadibogo gomme a re botšiša gore: “Le ya go bula madibogo kae ka morago ga kopano?” Re be re sa tsebe. O itše: “Le se ke la tshwenyega, le tla kopana le motho yo mongwe kopanong yo a tšwago tikologong ye e nyakago babulamadibogo, gomme bothata bja lena bo tla rarologa. Re ngwaleleng gomme le re botše gore le mo kae gomme re tla le romela lengwalo la kabelo.” Se ke seo se ilego sa direga. Go ile gwa direga gore Ngwanabo rena Jack DeWitt, yo e bego e le mohlanka wa mafelo o be a tseba batho ba bangwe kua New Market, Virginia bao ba bego ba e-na le legae la babulamadibogo leo le bego le nyaka babulamadibogo ba oketšegilego. Ka gona, ka morago ga kopano re ile ra leba New Market.

Kua New Market re ile ra swarwa ka mo go kgethegilego. Ke mang a swanetšego go tla Philadelphia go re tlatša modirong wa bobulamadibogo ge e se Benjamin Ransom! Ee, malome Ben. E be e le mo go thabišago gakaakang go šoma le yena bodireding bja ntlo le ntlo nywageng ya ka godimo ga e 25 ka morago ga ge a bjetše dipeu tšeo tša therešo ka pelong ya-ka morago kua Boston! Go sa šetšwe go lebeletšana le nywaga ya go hlokomologwa, go kwerwa gaešita le go tlaišwa ke lapa, malome Ben ga se a ka a lahla lerato la gagwe la go rata Jehofa le bodiredi.

Re ile ra thabela go dula dikgwedi tše seswai legaeng la babulamadibogo New Market. Nakong yeo, gare ga dilo tše dingwe re ile ra ithuta kamoo re ka ananyago dikgogo le mae ka dipuku. Ke moka malome Ben, nna le Marion gotee le ba bangwe ba bararo, re ile ra abelwa go šoma bjalo ka babulamadibogo ba kgethegilego kua Hanover, Pennsylvania​—e lego ya pele ya dikabelo tše tshela tšeo re bego re tla ba le tšona Pennsylvania go tloga ka 1942 go ya go 1945.

Babulamadibogo ba ba Kgethegilego Nakong ya Ntwa ya II ya Lefase

Go be go e-na le dinako tše dingwe nakong ya Ntwa ya II ya Lefase moo re ilego ra swanelwa ke go lebeletšana le bonaba ka baka la boemo bja rena bja boema-gare, eupša Jehofa ga se a ka a palelwa ke go re thekga. Nakong e nngwe kua Provincetown, Massachusetts, koloi ya rena ya kgale ya Buick e ile ya senyega, gomme ka swanelwa ke go sepela dikhilomithara tše mmalwa lefelong le lešoro kudu la Makatholika gore ke ye go dira leeto la go boela. Ke ile ka feta sehlopha sa dikebekwa tša bafsa bao ba ilego ba ntseba gomme ba thoma go goeletša. Ke ile ka sepediša mola mafsika a fofa kgaufsi le ditsebe tša-ka, ke holofela gore bafsa bao ba be ba sa nkitimiše. Ke ile ka fihla ka katlego legaeng la motho yo a thabelago ka ntle le go gobatšwa. Eupša mong wa ntlo e lego setho se se hlomphegago sa Madira a Amerika o ile a kgopela tshwarelo ka gore: “Nka se dule le wena bošegong bja lehono ka gobane ke be ke lebetše gore re ya bogareng bja toropo go ya go bogela paesekopo.” Ke ile ka kwa ke boifa ge ke gopola gore sehlopha sa babetši ba mafsika kua sekhutlong se nkemetše gore ke boe. Lega go le bjalo, ke ile ka lokologa ge monna a oketša ka gore: “Ke ka baka la’ng o sa fo sepela le rena? Re ka tšama re bolela tseleng.” Ke ile ka kgona go mo nea bohlatse gomme ka feta lefelong la kotsi ka tšhireletšego.

Go Leka-lekanya Lapa le Bodiredi

Ka morago ga ntwa re bile le dikabelo tše mmalwa kua Virginia, go akaretša go dula nywaga e seswai re le babulamadibogo ba kgethegilego le ba ka mehla kua Charlottesville. Ka 1956 basetsana ba be ba gotše gomme ba nyetšwe, gomme nna le Marion re ile ra tšwela pele gape re hlankela re le babulamadibogo kua Harrisonburg, Virginia, gomme bjalo ka babulamadibogo ba kgethegilego kua Lincolnton, North Carolina.

Ka 1966, ke ile ka abelwa modirong wa tikologo, ke sepela go tloga phuthegong e nngwe go ya go e nngwe gomme ke kgothatša banababo rena, bjalo ka ge Ngwanabo rena Winchester a ile a nkgothatša nakong e fetilego kua New Jersey ka bo-1930. Ke ile ka hlankela tikologo ya diphuthego tša kua Tennessee ka nywaga e mebedi. Ke moka nna le Marion ra kgopelwa go boela go seo re bego re se rata kudu e lego bobulamadibogo bjo bo kgethegilego. Go tloga ka 1968 go ya go 1977 re ile ra hlankela re le babulamadibogo  ba kgethegilego kua Deep South, go fetela Georgia le Mississippi.

Kua Eastman, Georgia, ke ile ka abelwa go ba molebeledi wa phuthego (yo ga bjale a bitšwago molebeledi yo a okamelago) bakeng sa go tšea legato la Powell Kirkland, ngwanabo rena yo a rategago le yo a gotšego yo a ilego a hlankela ka nywaga e mentši e le molebeledi wa tikologo eupša yo a bego a fokola mmeleng. O be a tloga a e-na le tebogo le thekgo e kgolo. Thekgo ya gagwe e be e le bohlokwa ka gobane go be go e-na le diphapano ka phuthegong gomme ba mmalwa bao ba tsebegago ba be ba akaretšwa. Taba e ile ya ngangana kudu gomme ka fetša nako e ntši ke rapela Jehofa. Ke ile ka gopola Mangwalo a bjalo ka Diema 3:​5, 6: “Bô΄ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela.” Ka go šoma ka thata bakeng sa go boloka ditsela tša poledišano di bulegile, re ile ra kgona go kopanya phuthego ka mafelelo a mabotse go bohle.

Ka 1977 re be re šetše re thomile go kwa dika tša botšofadi ganyenyane, gomme re ile ra abelwa tikologong ya Charlottesville, moo barwedi ba rena ba babedi ba bego ba dula le malapa a bona. Re thabetše go šoma tikologong ye ka nywaga e 23 e fetilego, ra thuša go thoma phuthego ya Ruckersville, Virginia le go bona bana le ditlogolo tša barutwana ba rena ba Beibele ba pele ba gotše e le bagolo ba phuthego, babulamadibogo le ditho tša Bethele. Nna le Marion re sa dutše re kgona go boloka lenaneo le lebotse la tirelo ya tšhemo, gomme ke na le  tokelo ya go hlankela ka mafolofolo ke le mogolo Phuthegong ya East ya Charlottesville le go swara thuto ya phuthego le go nea dipolelo tša phatlalatša.

Go theoša le nywaga, re bile le mathata bjalo ka motho yo mongwe le yo mongwe. Ka mohlala, go sa šetšwe maiteko a rena, Doris o ile a fokola moyeng ka lebaka le letelele nywageng ya gagwe ya mafelelong ya bofsa gomme a nyalwa ke monna yo e bego e se Hlatse. Eupša ga se a ka a lahla lerato la gagwe la go rata Jehofa ka mo go feletšego, gomme morwa wa gagwe Bill o hlanketše ka nywaga e 15 Bethele ya Wallkill, New York. Bobedi Doris le Louise ke bahlologadi ga bjale, eupša ba hlankela ka lethabo kgaufsi e le babulamadibogo ba ka mehla.

Dithuto tše re Ithutilego Tšona go Theoša le Nywaga

Ke ile ka ithuta go diriša ditekanyetšo tše sego kae tše bonolo bakeng sa go atlega tirelong ya Jehofa: Boloka bophelo bja gago bo le bonolo. E-ba mohlala dilong tšohle go akaretša le bophelong bja gago bja ka thopeng. Diriša tlhahlo ya “molaki e a bôtêxaxo yo bohlale” dilong ka moka.​—Mateo 24:45.

Marion o ile a tšweletša lelokelelo le le šomago eupša le lekopana la ditšhišinyo bakeng sa go bula madibogo ka katlego ge o dutše o godiša bana: Dira le go boloka lenaneo leo le šomago. Dira bodiredi bja gago bja bobulamadibogo mošomo wa kgonthe. E-ja dijo tša phepo. Khutša ka mo go lekanego. O se ke wa itapološa kudu. Dira therešo go akaretša le dibopego ka moka tša bodiredi phihlelo e thabišago maphelong a bana ba gago. Dira bodiredi phihlelo e kgahlišago go bona ka dinako tšohle.

Ga bjale re nywageng ya rena ya bo-90. Go šetše go fetile nywaga e 62 mola re kwago polelo ya rena ya kolobetšo mohlweng wa ntlong ya ga Stackhouse, gomme re feditše nywaga e 60 re le tirelong ya nako e tletšego. Nna le Marion re ka bolela ka potego gore re kgotsofetše ka mo go tletšego le ka mo go tseneletšego ka boemo bja rena bophelong. Ke leboga kudu kgothatšo yeo ke ilego ka e hwetša ke sa le tate yo mofsa bakeng sa go etiša dipakane tša moya pele le go šoma bakeng sa go di fihlelela, gomme ke leboga mosadi wa-ka yo a rategago kudu Marion, le basetsana ba babedi bakeng sa thekgo ya bona nywageng ka moka. Le ge re se na mahumo a dilo tše di bonagalago, gantši ke diriša Mmoledi 2:​25 (NW) yeo e rego: “Ke mang a jago le go nwa kaone go mpheta?”

Ka kgonthe, tabeng ya rena Jehofa o ile a phethagatša ka mo go tletšego kudu kholofetšo ya gagwe e hwetšwago go Maleaki 3:​10. Ka kgonthe, o ‘re tšholletše ditšhegofatšo go fihlela go se na seo re se nyakago’!

DIKGOPOTŠO TŠA NYWAGENG YA NTWA

Mo e ka bago nywaga e 60 ka morago ga ntwa, lapa ka moka le na le dikgopotšo tše di sa tlogego tša nywaga yeo.

Doris o gopola gore: “Pennsylvania go be go tonya. Bošegong bjo bongwe e be e le 35 Celsius ka tlase ga tekanyo ya go kgahla.” Louise o oketša ka gore, “Nna le Doris re be re gatana maoto ka setulong sa ka morago sa koloi ya gešo ya kgale ya Buick bakeng sa go tšhaba phefo.”

Doris o re: “Eupša le ka mohla ga se ra ka ra ikwa re diila goba re na le se re se hlokago. Re be re tseba gore re be re fetoša madulo go feta batho ba bantši, eupša ka mehla re be re e-ja gabotse gomme re e-na le diaparo tše botse tšeo re bego re di fiwa e sa le tše difsa ke bagwera ba bangwe ba kua Ohio, bao ba bego ba e-na le basetsana ba bagolwanyane go rena.”

Louise o re: “Ka mehla mma le tate ba be ba dira gore re ikwe re ratwa le go lebogwa gomme re ile ra fetša nako e ntši le bona bodireding. Go ile gwa re dira gore re ikwe re kgethegile e bile re le kgaufsi kudu le bona.”

Paul o gopola gore: “Ke be ke e-na le koloi ya Buick Special ya 1936, gomme dikoloi tšeo di be di tumile ka go kgaoga dikarolo tša tšona. Ke nagana gore entšine e be e le matla kudu bakeng sa koloi ka moka. Go ile gwa bonagala gore e robega ka mehla bošego bjo bo tonyago kudu bja kgwedi, gomme ke be ke e-ya lefelong la dikoloi tše di senyegilego bakeng sa go tsoma karolo e nngwe. Ke ile ka ba setsebi kudu bakeng sa go di tsenya.”

Marion o re: “O se ke wa lebala dikarata tša go hwetša kabelo ya dijo. Selo se sengwe le se sengwe se be se elwa​—nama, peterole, dithaere tša koloi le selo se sengwe le se sengwe. Nako e nngwe le e nngwe ge re fihla kabelong e mpsha re be re swanetše go ya lekgotleng la mmušo la lefelong leo bakeng sa go hwetša karata ya kabelo ya dijo. Go be go ka tšea dikgwedi go e hwetša, gomme go be go bonala eka nako e nngwe le e nngwe ge mafelelong re hweditše karata ya rena, re be re romelwa kabelong e latelago gomme re be re swanelwa ke go thoma fase. Eupša ka mehla Jehofa o ile a re hlokomela.”

[Seswantšho]

Nna le Marion re e-na le Doris (ka go le letona) le Louise, 2000

[Seswantšho go letlakala 25]

Ke e-na le mma ka 1918, ge ke be ke e-na le nywaga e 11

[Seswantšho go letlakala 26]

Ke e-na le Louise, Marion le Doris ka 1948 ge basetsana ba be ba kolobetšwa

[Seswantšho go letlakala 26]

Seswantšho sa rena sa lenyalo, October 1928

[Seswantšho go letlakala 26]

Barwedi ba-ka (ka morago-rago ka go le letshadi le ka go le letona) le nna re le Yankee Stadium, 1955