“Go Direga’ng Fora?”

“Tokologo, tokologo e rategago,” ke mantšu a tšwago košeng ya setšhaba ya Fora e lego “La Marseillaise.” Ka ntle le pelaelo, tokologo ke selo se se swanetšego go tšewa e le sa bohlokwa. Lega go le bjalo, ditiragalo tša morago bjale kua Fora di tsoša pelaelo ya gore ditokologo tša motheo di tšeelwa fase. Ke ka baka leo ka Labohlano, November 3, 2000, Dihlatse tša Jehofa tše masome a dikete di ilego tša aba palo-moka ya dikopi tše dimilione tše 12 tša pampišana e kgethegilego e nago le sehlogo se se rego “Go Direga’ng Fora? Na Tokologo e ka Boa Gape?”

KE KA nywaga e mmalwa ga bjale Dihlatse tša Jehofa tša Fora di hlaselwa ke bo-radipolitiki ba fapa-fapanego le dihlopha tše lwantšhanago le dihlotswana tša bodumedi. Se se ile sa lebiša go go gogeng ka kgara ga Dihlatse boemong bja motho ka o tee ka o tee, bja phuthego le bja setšhaba. Lega go le bjalo, ka June 23, 2000, kgoro e phagamego ya tsheko ya bolaodi ya Fora, e lego Conseil d’État, e ile ya dira phetho ya makgaola-kgang yeo e bego e hlatsela kgopolo e apareditšego ya dikgoro tše dinyenyane tša tsheko tše 31 melatong e fetago 1 100. Kgoro e phagamego ya tsheko e hlatsetše gore borapedi bjo Dihlatse tša Jehofa di bo dirišago bo dumelelana ka mo go tletšego le molao wa Fora le gore Diholo tša tšona tša Mmušo di loketše go lokologa metšhelong mo go swanago mo go neilwego madumedi a mangwe.

Lega go le bjalo, ka go hlokomologa ka mo go feletšego phetho ye, Lefapha la tša Taolo la tša Ditšhelete la Fora le tšwela pele le ganela Dihlatse tša Jehofa go lokologa metšhelong mo go neilwego ke molao bakeng sa mekgatlo ya bodumedi. Lefapha la tša Taolo le ile la lefiša motšhelo wa 60 lekgolong wa meneelo yeo e ntšhwago ke Dihlatse le bagwera bao ba kopanelago le tšona diphuthegong tše 1 500 tša Fora. Molato wo o sa dutše o sekwa le ga bjale.

Maikemišetšo a lesolo le le boletšwego ka mo godimo e be e le go pepentšha go ikganetša mo  le go bontšha dikotsi tše di akaretšwago go lefišweng mo go bjalo ga metšhelo ga go itlhamelwa le melaong e akantšwego e tlago go tšeela fase tokologo ya bodumedi bakeng sa bohle. *

Letšatši le Letelele

Ka iri ya bobedi mesong, Dihlatse diphuthegong tše dingwe di thoma kabo ka ntle ga diteišene tša ditimela le difeketoring gomme ka morago di ya maema-fofaneng. Ka iri ya botshelela, Paris e a phafoga. Baithapi ba ka bago 6 000 ba eme mafelong a lego boemong bjo bobotse gore ba gahlane le basepedi ba lego tseleng ya bona ya go ya mošomong. Mosadi yo mongwe yo e sa lego yo mofsa o hlalosa gore: “Seo le se dirago bakeng sa tokologo ya bodumedi ke se sebotse. Ga se Dihlatse tša Jehofa feela tšeo di akaretšwago.” Dihlatse tša ka godimo ga tše 350 kua Marseilles, di aba pampišana diteišeneng tša ditsela tša ka tlase ga mmu le mo setarateng. Ka iri feela, radio ya setšhaba ke ge e tsebiša ka lesolo, e botša batheetši ba yona gore ba se ke ba makala ge ba batamelwa ke Dihlatse tša Jehofa. Strausbourg, e lego ntlo-kgolo ya Kgoro ya Tsheko ya Ditshwanelo tša Batho ya Yuropa, basepedi seteišeneng sa bogareng ba eme ka methaladi ka go se fele pelo gore ba ikhweletše kopi ya bona. Ramolao yo mongwe o hlalosa gore, le ge ditumelo tša gagwe di sa swane le tša rena, o latelela molato wa rena ka kgahlego, ka ge seo re se katanelago e le sa bohlokwa e bile e le sa go loka.

Ka iri ya seswai, go sa šetšwe pula e kgolo, Dihlatse tše 507 motseng wa Alpine wa Grenoble ke ge di lekola ditarata goba di tsenya pampišana ka mapokising a poso. Baotledi ba dikoloi le ba ditimela, ge ba bona gore go na le selo se sengwe se se diregago, ba emiša dinamelwa tša bona gore ba ikgopelele pampišana. Motseng wa ka bodikela wa Poitiers, basepedi ba gorogago ka setimela ka iri ya senyane ba be ba šetše ba hweditše pampišana go tšwa mo ba tlogilego gona. Mulhouse, kgaufsi le mollwane wa Jeremane, go be go šetše go abilwe dikopi tše 40 000.

Ka iri ya lesome, diphuthego tše dintši di be di šetše di abile tekanyo ya ka godimo ga seripa sa palo ya dipampišana tša tšona. Ge letšatši le dutše le tšwela pele, ke batho ba sego kae feela bao ba ganago go amogela pampišana, gomme go feleleditše ka dipoledišano tše mmalwa tše di kgahlišago. Besançon, mo e ka bago dikhilomithara tša ka godimo ga tše 80 go tloga mollwaneng wa Switzerland, lesogana le lengwe le bontšha go kgahlegela Beibele gomme le botšiša lebaka leo ka lona Modimo a dumeletšego tlaišego. Hlatse e le kgothaletša go tšwetša poledišano pele Holong ya Mmušo ya kgaufsi, moo thuto ya Beibele e thongwago le semeetseng ka poroutšha ya Ke Eng Seo Modimo a se Nyakago go Rena?

Ka mosegare wa sekgalela Dihlatse tše dintši di dirišitše nako ya tšona ya matena bakeng sa go dira boboledi ka iri goba tše pedi. Thapama ka moka, go aba ke ge go tšwela pele, diphuthego tše mmalwa di feditše ka iri ya boraro goba ya bone thapameng yeo. Motseng o mogolo wa Reims, batho ba bangwe bao ba bego ba kile ba ithuta goba ba kopanela le Dihlatse tša Jehofa nakong e fetilego ba bontšhitše kganyogo ya bona ya go thomološa go kopanela le phuthego. Bordeaux, go thongwa dithuto tše tharo tša magae tša Beibele. Motseng wona woo, Hlatse e tsena ka lebenkeleng bakeng sa go reka kuranta gomme e bona mokgobo wa dipampišana godimo ga khaonthara. Ralebenkele, yo a kilego a ba Hlatse, o be a hweditše pampišana gomme ka go lemoga bohlokwa bja yona, o be a dirile dikopi tše di swantšhitšwego e le gore a di abe yena ka boyena.

 Kua Le Havre, Normandy yo e lego mosadi wa mo-Protestanta yo a kwelego mo radiong gore meneelo ya Dihlatse tša Jehofa e lefišwa lekgetho o tlabegile. O amogela pampišana ka go fagahla gomme a lebogiša Dihlatse ka go bolela ka sebete malebana le go hloka toka mo go bjalo. Ka 7:20 p.m., ditabeng tša TV tša selete kua Lyons di hlalosa mabapi le kabo gore: “Mesong ya lehono go be go le bonolo go phema marothodi a pula go e na le go phema dipampišana tša Dihlatse tša Jehofa.” Go boledišanwa le Dihlatse tše pedi gomme di hlalosa mabaka a lesolo leo.

Dihlatse tše di nyakago go ba le karolo ka morago ga modiro wa tšona wa boiphedišo di aba dipampišana go basepedi ba ba boelago gae gomme di tsenya tše dingwe ka mapokising a poso. Mo ditoropong tše swanago le Brest le Limoges​—tše di tumilego ka baka la go ba le letsopa la go dira dibjana—​batho ba tlogago paesekopong ka 11:00 p.m. ba gare ga ba mafelelo letšatšing leo ba hwetšago pampišana. Dipampišana tše di šetšego di a kgoboketšwa gomme di abja mesong e latelago.

Ditla-morago

Hlatse e nngwe e ngwadile gore: “Manaba a rena a nagana gore a re fetša matla. Ge e le gabotse, go direga se se fapanego.” Diphuthegong tše dintši, ba ka godimo ga 75 lekgolong ba Dihlatse ba bile le karolo letšatšing leo, ba bangwe ba fetša diiri tše 10, 12, goba tše 14 ba le modirong wo. Hem, yeo e lego ka leboa la Fora, Hlatse e nngwe ka morago ga go šoma bošego, e abile pampišana go tloga ka iri ya bohlano mesong go fihla ka iri ya boraro thapama. Denain ya kgaufsinyana, mo go bilego le phuthego ga e sa le go tloga ka 1906, Dihlatse tše 75 di feditše diiri tše 200 di aba pampišana ka Labohlano. Ba bangwe, go sa šetšwe botšofadi, malwetši le maemo a mabe a leratadima, le bona ba be ba ikemišeditše go ba le karolo. Ka mohlala, kua Le Mans, batho ba bararo ba lego nywageng ya bona ya bo-80 ba feditše diiri tše pedi ba tsenya dipampišana ka mapokising a poso, gomme Hlatse e dutšego setulong sa digole e abile pampišana e le pele ga seteišene sa ditimela. E bile mo go kgothatšago gakaakang go bona Dihlatse tše mmalwa tše di bego di tapile nakong e fetilego di tšea karolo modirong wo o kgethegilego!

Ga go na pelaelo gore kabo ye e feleleditše ka bohlatse bjo bogolo. Batho go tšwa maemong ka moka a bophelo, bao bontši bja bona ba hwetšagalago ka sewelo magaeng a bona, ba hweditše kopi ya pampišana. Batho ba bantši ba ile ba kwešiša gore tiro ye e phethile mo gontši kudu go feta go fo šireletša dikgahlego tša Dihlatse. Ba bantši ba be ba e lebelela e le go šireletšwa ga tokologo ya letswalo le borapedi bakeng sa Mafora ka moka. E le bohlatse bja se, ditho tša setšhaba di ile tša kgopela dikopi tše di oketšegilego tša pampišana gore di di fe bagwera, badirišani goba ba meloko.

Ee, Dihlatse tša Jehofa tša Fora di ikgantšha ka go tsebatša leina la Jehofa le go šireletša dikgahlego tša Mmušo. (1 Petro 3:​15) Ke kholofelo ya tšona ya kgonthe gore di ka kgona ‘go phela di wile dipelo di iketlile, e le tša borapedi ruri, e le batsebalegi’ le gore ba dikete tše oketšegilego ba tla di tlatša go reteng Tatago tšona wa legodimong, Jehofa.​—1 Timotheo 2:2.

[Mengwalo ya ka tlase]