Re Kile ra ba Diphiri​—Ga Bjale re Dinku!

Ge nna le Sakina re be re sa le basetsana ba banyenyane, re be re le baagišani. Sakina e be e le yo mogolo e bile e le senatla, mola nna ke be ke le yo monyenyane e bile ke le yo mosesane. Re be re tsošetšana moferefere gantši, eupša ka letšatši le lengwe re ile ra phathankgana. Go tloga letšatšing leo go ya pele, re ile ra se sa boledišana goba gaešita le go dumedišana. Mafelelong, bobedi bja rena re ile ra huduga gomme ra timelelana.

Ka 1994, ke ile ka thoma go ithuta Beibele le Dihlatse tša Jehofa, gomme semelo sa-ka se ile sa fetoga ganyenyane-ganyenyane. Nywaga e mene ka morago ge re be re le kopanong ya letšatši le le kgethegilego kua Bujumbura, Burundi, ke ile ka makala ge ke welana le Sakina. Ke ile ka thaba ge a le gona, eupša go dumedišana ga rena e be e se ga bogwera. Moragonyana letšatšing leo, ke ile ka nyaka ke sa kgolwe mahlo a-ka ge ke be ke mmona gare ga ba ba bego ba e-ya kolobetšong! Le yena o be a tloga a fetogile kudu. E be e se sa le motho yola wa go rata dintwa yo ke bego ke e-lwa le yena ka mehla. Go be go kgahliša gakaakang go mmona a nea pontšho ya phatlalatša ya boineelo bja gagwe go Modimo ka go itliša gore a kolobetšwe meetseng!

Ge a e-tšwa ka meetseng, ke ile ka kitima gore ke mo atle gomme ka mo sebela ka tsebeng ka re: “Na o gopola kamoo re bego re e-lwa ka gona?” O itše: “Ee, ke a gopola, eupša tšeo ke tša kgale. Ga bjale ke motho yo mofsa.”

Bobedi bja rena re thabile ge re hweditše therešo ya Beibele yeo e kopanyago le ge re fetošitše dimelo tša rena tša go swana le tša diphiri go ba tša dinku tšeo e lego tša Modiši yo Mogolo, Jehofa Modimo. Ruri, therešo ya Beibele e fetoša maphelo.