Borapedi bja Therešo bo Kopanya Batho

GAEŠITA le ge bodumedi ka kakaretšo bo ikarabela ka go aroganya batho, borapedi bja Modimo a nnoši wa therešo bo na le matla a go kopanya batho. Ge Isiraele e be e sa le setšhaba se se kgethilwego sa Modimo, batho ba bantši ba ba-Ntle ba botegago ba be ba gogelwa borapeding bja therešo. Ka mohlala, Ruthe o ile a lahla medimo ya naga ya gabo ya Moaba gomme a re go Naomi: “Sethšaba sa xeno ke tlo re ké sa xešo; Modimo wa xaxo e tlo ba Modimo wa-ka.” (Ruthe 1:​16) Lekgolong la pele la nywaga C.E., palo e kgolo ya ba-Ntle e ile ya fetoga barapedi ba Modimo wa therešo. (Ditiro 13:​48; 17:4) Moragonyana ge baapostola ba Jesu ba thoma go ya mafelong a kgole ka ditaba tše dibotse, batho ba bangwe ba botegago ba be ba kopanywa borapeding bja Modimo wa therešo. Moapostola Paulo o ngwadile gore: ‘Le sokologetše go Modimo, la lahla medimo ya diswantšho, la ba bahlanka ba Modimo-dimo yo a phelago.’ (1 Ba-Thesalonika 1:9) Na borapedi bja Modimo wa therešo bo na le matla a bjalo ao a kopanyago lehono?

Babelaedi ba phegelela gore ke phošo go bolela ka “barapedi ba kgonthe” goba “Modimo wa therešo.” Ba ka ikwa ka tsela e bjalo ka gobane ga se ba ela hloko mothopo le ge e le ofe wo therešo e ka ithutwago go wona. Eupša ba ba nyakago therešo bao ba tšwago ditlogong tše dintši ba lemogile gore borapedi ga se taba ya mmapelo o ja serati. Motho o tee feela yo a swanelwago ke gore re mo rapele ke Mmopi wa dilo tšohle​—Jehofa Modimo. (Kutollo 4:​11) Ke Modimo wa therešo, gomme o na le tshwanelo ya go dira phetho ya kamoo a swanetšego go rapelwa ka gona.

Go re thuša go kwešiša ditekanyetšo tša gagwe, Jehofa o boledišane le rena ka Lentšu la gagwe, Beibele. Mo e nyakilego e le batho ka moka lefaseng lehono ba na le Beibele e feletšego goba dikarolo tša yona. Go oketša moo, Morwa wa Modimo o itše: “Ge le dula lentšung la-ka, . . . le tlo tseba therešo.” (Johane 8:​31, 32, PK) Ka gona, therešo e ka tsebja. Le gona batho ba dipelo tše botegago ba dimilione go tšwa ditlogong tše di sa swanego tša bodumedi ba amogela therešo ye ka sebete gomme ba kopanywa borapeding bja therešo.​—Mateo 28:​19, 20; Kutollo 7:​9, 10.

Botee bja Lefase ka Bophara Mehleng ya Rena!

Boporofeta bjo bo kgahlišago ka pukung ya Beibele ya Tsefanya bo bolela ka go kopana gotee ga batho ba ditlogo tše di fapanego kudu. Bo bolela gore: “Mohlang woo ke [Jehofa Modimo] tlo nea baditšhaba melomo e sekilego, gore ka moka ga bona ba bitše leina la Jehofa, ba mo direle gammogo ka pelo e tee.” (Tsefanya 3:​9, PK) Se ke seswantšho se sebotse gakaakang sa batho ba fetošitšwego bao ba hlankelago Modimo ka botee!

Se se be se tla direga neng? Tsefanya 3:8 e re: “Dulang Lè ntebeletše,​—ó r’yalo Morêna [“Jehofa,” PK],​—xo bê xo tlê ’tšatši le ke tl’o xo tsoxa ka lôna kè le hlatše; ka xobane ké wôna moahlolêlô wa-ka: Ke phutha dithšaba, ke botha mebušô, ka e thšêla ka kxalefô ya-ka, ka tuka boxale sa ruri, è le mollô wa sehutla wa xo thšuma ’fase lohle.” Ee, nakong ya ge Jehofa a phutha ditšhaba eupša pele ga ge a tšhela kgalefo ya gagwe e tukago godimo ga bona, o nea babotlana ba lefase go fetogela lelemeng le le sekilego. Nako yeo ke gona bjale, ka gobane go kgobokeletšwa ga ditšhaba ka moka ntweng ya letšatši le legolo la Modimo Ra-matla-ohle ya Haramagedone go šetše go thomile.​—Kutollo 16:​14, 16.

Gore a kopanye batho ba gagwe, Jehofa o ba nea leleme le le sekilego. Leleme le le lefsa le akaretša kwešišo e nepagetšego ya therešo ya Beibele mabapi le Modimo le merero ya gagwe. Go bolela leleme le le sekilego go akaretša go dumela therešo, go e ruta ba bangwe le go phela ka go dumelelana le melao le melao ya metheo ya Modimo. Go bolela go phema dipolitiki tše aroganyago le go tumola ka medu boemo bja kgopolo bja boithati ka pelong, bjalo ka dika tša kgethollo  ya morafo le botšhaba bjo bo aroganyago tša lefase le. (Johane 17:​14; Ditiro 10:​34, 35) Batho ka moka ba dipelo tše botegago bao ba nago le lerato la go rata therešo ba ka ithuta leleme le. Ela hloko kamoo batho ba bahlano bao go boletšwego ka bona sehlogong se se fetilego​—bao pele ba bego ba fapane kudu ka bodumedi​—ga bjale ke ba kopanego borapeding bja Modimo a nnoši wa therešo, Jehofa.

Ke ba Kopanego Borapeding bja Therešo

Ge Fedelia, yo e bego e le mo-Roma Katholika yo a ineetšego, a be a rekela morwedi wa gagwe Beibele bakeng sa mošomo wa sekolo, o ile a kgopela moruti wa gagwe gore a mo hlalosetše go tšwa go yona seo se diragaletšego bana ba gagwe ba bahlano ba hwilego. O re: “A go nyamišwa mo go kaakang!” Ka gona ge Dihlatse tša Jehofa di mo etela, o ile a di botšiša potšišo e swanago. Ka morago ga go ipalela ka Beibeleng ya gagwe ka noši ka boemo bja bahu, o ile a lemoga kamoo kereke e mo forilego ka gona. O ile a ithuta gore bahu ga ba kwe selo gomme ka go rialo ga ba tlaišege Limbo goba lefelong le ge e ka ba lefe. (Psalme 146:4; Mmoledi 9:5) Fedelia o ile a lahla diswantšho tša gagwe ka moka tša bodumedi, a tlogela kereke, gomme a thoma go ithuta Beibele. (1 Johane 5:​21) Ka nywaga e lesome e fetilego, o thabetše go ruta ba bangwe therešo ya Mangwalo.

Tara yo a tšwago Kathmandu o ile a hudugela nageng yeo go bego go na le ditempele tše sego kae tša ma-Hindu. Ka gona o ile a etela kereke ya Methodist ka kholofelo ya gore o tla kgotsofatša dinyakwa tša gagwe tša moya. Eupša ga se a ka a hwetša karabo ya potšišo ya gagwe mabapi le go tlaišega ga batho. Ka morago Dihlatse tša Jehofa di ile tša ikopanya le yena gomme tša ithapela go ithuta Beibele le yena. Tara o re: “Ke ile ka thoma go lemoga gore Modimo yo lerato a ka se ikarabele ka ditlaišego ka moka mo lefaseng . . . Ke ile ka thabišwa ke tebelelo ya lefase le lefsa la khutšo le kwano.” (Kutollo 21:​3, 4) Tara o ile a lahla diswantšho tša gagwe ka moka tša Bohindu, a kgaotša go latela metlwae ya bodumedi ya naga ya gabo ya setlogo, gomme a hwetša lethabo la kgonthe go thušeng go kgotsofatša dinyakwa tša ba bangwe tša moya e le Hlatse ya Jehofa.

Panya, yo e bego e le mo-Buddha, e be e le sedupe ge Dihlatse tša Jehofa di be di e-tla go yena ka lekga la pele kua Bangkok, ka gona diporofeto tše di lego ka Beibeleng di ile tša mo kgahla. Panya o anega ka gore: “Ge ke be ke lemoga lebaka leo ka lona maemo a lehono a fapanego le seo Mmopi a bego a se rerile mathomong le kamoo a rulagantšego ka gona go dirolla tshenyo yeo e bakilwego ke bao ba mo ganago le go gana bogoši bja gagwe, go bile bjalo ka ge eka seširo se be se tlošwa mo mahlong a-ka. Se sengwe le se sengwe mabapi le molaetša wa Beibele se be se dumelelana kudu. Ke ile ka thoma go rata Jehofa e le motho; se se ile sa mpha mafolofolo a go dira seo ke bego ke tseba gore se nepagetše. Ke be ke fagahlela go thuša ba bangwe go bona phapano magareng ga bohlale bja motho le bohlale bja Modimo. Bohlale bja kgonthe bo fetošitše bophelo bja-ka e le ka kgonthe.”

Ge nako e dutše e e-ya, Virgil o ile a thoma go ba le dipelaelo tše tiilego ka ditumelo tša gagwe tša bodumedi. Go e na le go rapela Modimo bakeng sa tsela ya go thuša batho ba baso le seo a bego a se lebelela e le mokgatlo wa kgethollo ya morafo wo o bego o bonala o hlohleletša lehloyo go batho ba bašweu, o ile a rapelela therešo, go sa šetšwe seo e bego e le sona, e bile go sa šetšwe mo e lego gona. Virgil o gopola gore: “Ge ke be ke tsoga letšatšing le le latelago ka morago ga gore ke rapele Modimo go tšwa pelong, ke ile ka hwetša makasine wa Morokami ka ngwakong. . . . O swanetše go ba o ile wa tsenywa ka tlase ga lemati.” Go se go ye kae ke ge a ithuta Beibele ka mo go tseneletšego le Dihlatse tša Jehofa. O tšwela pele ka gore: “Ka lekga la pele bophelong bja-ka, ke ile ka ikwa ke kgotsofetše. . . . Seetša se sebotse sa kholofelo se ile sa thoma go mponegela.” Go se go ye kae Virgil o ile a kopanywa le bao ba  neago batho kholofelo e nnoši ya therešo bjalo ka ge e hlaloswa Lentšung la Modimo, e lego Beibele.

Charo yo a tšwago Latin America o ile a kgahlišwa ke ge Hlatse yeo e bitšwago Gladys e bona gore o goga ka kgara le bana ba gagwe ba banyenyane gomme a thoma go mo thuša ka go mo tšea a ya le yena mmarakeng. Ge nako e dutše e e-ya, Charo o ile a amogela seo Gladys a bego a ithapela go se nea​—e lego thuto e sa lefelelwego ya legae ya Beibele. Ge Charo a be a ithuta go tšwa ka Beibeleng ya gagwe gore ga se batho ka moka ba lokilego ba yago legodimong eupša gore Jehofa gape o tla šegofatša batho mo lefaseng ka bophelo bjo bo sa felego, o ile a makala. (Psalme 37:​11, 29) Charo o tšwetše pele a abelana le ba bangwe kholofelo ye lebakeng la nywaga e 15 e fetilego.

Akanya lefase ka moka le tletše ka batho ba botegago e le batee borapeding bja Jehofa, Modimo a nnoši wa therešo! Se ga se boikgopolelo. Ke seo Jehofa a se holofeditšego. Modimo o boletše ka moporofeta wa gagwe Tsefanya gore: ‘Mo go wena ke tlo ba ke šadišitše batho ba go ipoetša, babotlana, ba go bota leina la Jehofa. . . . Ba ka se hlwe ba dira bobe; ba ka se hlwe ba bolela maaka, mo ganong ga bona go tlo hlokwa leleme la go fora; . . . go se se se ba tšhošago.’ (Tsefanya 3:​12, 13, bapiša le PK.) Ge e ba kholofetšo ye e le e ipiletšago go wena, ela hloko kgothatšo ya Beibele e rego: “Nyakang Morêna, lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.”​—Tsefanya 2:3.