Jesu o a Phološa​—Bjang?

“Jesu o a Phološa!” “Jesu ke Mophološi wa rena!” Dinageng tše dintši go dikologa lefase, melaetša e bjalo e pharilwe mabotong a meago le mafelong a mangwe a batho bohle. Batho ba dimilione ba dumela e le ka kgonthe gore Jesu ke Mophološi wa bona. Ge e ba o be o ka botšiša gore, “Jesu o re phološa bjang?” mohlomongwe ba be ba tla araba ka gore, “Jesu o re hwetše” goba “Jesu o hwetše dibe tša rena.” Ee, lehu la Jesu le dira gore go kgonege go rena gore re phološwe. Eupša lehu la motho o tee le ka lefela bjang dibe tša ba bantši? Ge e ba o ka botšišwa gore, “Lehu la Jesu le re phološa bjang?” o be o ka re’ng?

KARABO yeo Beibele e e neago potšišong ye ke e bonolo kudu eupša e kwagalago le go ba e bohlokwa kudu. Lega go le bjalo, gore re kwešiše bohlokwa bja yona, sa pele re swanetše go bona bophelo bja Jesu le lehu la gagwe e le tharollo bothateng bjo bogolo kudu. Ke ka morago ga moo feela mo re ka kwešišago gabotse bohlokwa bjo bogolo bja lehu la Jesu.

Ge a dira gore Jesu a neele bophelo bja gagwe, Modimo o be a swaragana le boemo bjo bo ilego bja rotoga ge Adama a be a dira sebe. Sebe seo e bile manyami a magolo gakaakang! Monna yena yoo wa pele le mosadi wa gagwe, Efa, ba be ba phethagetše. Legae la bona e be e le tšhemo e botse ya Edene. Modimo o be a ba neile modiro o nago le morero wa gore ba hlokomele legae la bona  la tšhemo. Diphedi tše dingwe mo lefaseng di be di tla ba ka tlase ga tlhokomelo ya bona e lerato. Le gona ge batho ba ata gomme ba tlatša lefase ka batho ba dimilione ba swanago le bona, ba be ba tla katološa paradeise go fihla magomong a lefase. (Genesi 1:​28) A modiro o kgahlišago le o thabišago gakaakang wo ba bego ba o neilwe! Go feta moo, ba be ba e-na le bogwera bjo borutho magareng ga bona. (Genesi 2:​18) Ba be ba sa hloke selo. Bophelo bjo bo sa felego bja lethabo bo be bo le ka pele ga bona.

Go thata go nagana kamoo Adama goba Efa ba bego ba ka dira sebe ka gona. Eupša batho ba pele ba babedi ba ile ba rabela malebana le yo a ba bopilego​—Jehofa Modimo. A diriša noga, sebopiwa sa moya e lego Sathane Diabolo o ile a fora Efa gore a se kwe Jehofa, gomme Adama o ile a mo latela.​—Genesi 3:​1-6.

Go be go se na pelaelo ka seo Mmopi a bego a tla se dira ka Adama le Efa. O be a šetše a boletše ditla-morago tša go se kwe, a re: “Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.” (Genesi 2:​16, 17) Kgang ya bohlokwa bjo bogolo kudu ga bjale e be e nyaka karabo.

Batho ba Lebeletšana le Bothata bjo Bogolo

Sebe sa mathomo se hloletše batho bothata bjo bogolo kudu. Adama o thomile bophelo e le motho yo a phethagetšego. Ka go rialo, bana ba gagwe ba be ba tla ba ba thabetše bophelo bjo bo sa felego bjo bo phethagetšego. Lega go le bjalo, Adama o dirile sebe pele a ka ba le bana. Morafo ka moka wa batho o be o sa le mathekeng a gagwe ge a be a hwetša kotlo e rego: “Boxôbê O tlo bo ja ka dikudumêla tša sefahloxô sa xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:​19) Ka gona ge Adama a dirile sebe gomme a thoma go hwa go etša ge Modimo a boletše gore go tla ba bjalo, batho bohle ba be ba ahloletšwe lehu gotee le yena.

Ka mo go swanetšego, moapostola Paulo ka morago o ngwadile gore: “Sebe sè tsene lefaseng ka motho o tee [Adama], ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:​12) Ee, ka baka la sebe sa mathomo, bana bao ba bego ba swanetše go ba ba belegwe ba phethagetše ba e-na le bophelo bjo bo sa felego pele ga bona ba ile ba gola tebelelo ya bona e le go babja, go tšofala le go hwa.

Yo mongwe a ka re: “Seo ga se toka. Ga se ra ka ra ikgethela go se kwe Modimo​—ke Adama a dirilego seo. Ke ka baka la’ng re swanetše go lahlegelwa ke tebelelo ya rena ya bophelo bjo bo sa felego le lethabo?” Re a tseba gore ge e ba kgoro ya tsheko ya molao e ka tswalelela morwa kgolegong ka gobane tatagwe a utswitše koloi, morwa o be a ka ipelaetša ka mo go swanetšego ka gore: “Seo ga se toka! Ga se ke dire selo le ge e le sefe se se fošagetšego.”​—Doiteronomio 24:16.

Ka go hlohleletša monna wa pele le mosadi gore ba dire sebe, Sathane a ka ba a ile a phetha ka gore o be a tla bea Modimo boemong bjo bo sa rarollegego. Diabolo o ile a hlasela di sa tloga historing ya batho​—pele ga ge ngwana le ge e le ofe a ka belegwa. Ka yona nako yeo ge Adama a dirile sebe, potšišo e bohlokwa e bile gore, Ke eng seo Jehofa a tlago go se dira ka bana bao Adama le Efa ba bego ba tla ba le bona?

Jehofa Modimo o dirile seo se bego se lokile. Monna wa go loka Elihu o boletše gore: “Modimo ó kxolê le bokxôpô; Yo-matla-ohle ó kxolê le xo foša.” (Jobo 34:​10) Moporofeta Moše o ngwadile mabapi le Jehofa gore: “Ké Yêna Lentswê, yo tirô-phethexi, ka xe ’tsela tša’xwe tšohle di lokile, Yêna Modimo wa therešô, Mo-ila-bokxôpô, Moloki, Yêna Mosiami.” (Doiteronomio 32:4) Tharollo yeo Modimo wa therešo a e neilego bothateng bjo bo bakilwego ke sebe sa Adama ga e re tšeele sebaka sa bophelo bjo bo sa felego lefaseng la paradeise.

 Modimo o Lokišeletša Tharollo e Phethagetšego

Nagana ka tharollo yeo Modimo a ilego a e rulaganyetša kahlolong yeo e boditšwego Sathane Diabolo. Jehofa o boditše Sathane gore: “Ke bea lehlôyô xare xa xaxo le mosadi [mokgatlo wa Modimo wa legodimong], le xare xa peu ya xaxo [lefase ka tlase ga taolo ya Sathane] le peu ya xaxwe [Jesu Kriste]. Yôna e tlo Xo [Sathane] phšatla hlôxô; ’me wêna O tlo e loma serêthê [lehu la Jesu].” (Genesi 3:​15) Boporofeteng bjo bja mathomo bja Beibele, Jehofa o be a šupa morerong wa gagwe wa gore Morwa wa gagwe wa moya wa legodimong a tle lefaseng go tlo phela e le Jesu motho yo a phethagetšego gomme ka morago a hwe​—a longwe serethe​—boemong bjo bja go se be le sebe.

Ke ka baka la’ng Modimo a ile a nyaka lehu la motho yo a phethagetšego? Go ba gona, kotlo ya Jehofa Modimo go Adama e bile efe ge a be a dira sebe? Na e be e se lehu? (Genesi 2:​16, 17) Moapostola Paulo o ngwadile gore: “Moputsô wa sebe ké lehu.” (Ba-Roma 6:​23) Adama o lefeletše sebe sa gagwe ka lehu la gagwe ka noši. O be a neilwe bophelo, gomme a kgetha go dira sebe, gomme o ile a hwa e le kotlo ya sebe sa gagwe. (Genesi 3:​19) Go thwe’ng ka kahlolo yeo batho ka moka ba ilego ba swanelwa ke go e kgotlelela ka baka la sebe seo? Go be go nyakega lehu go lefelela dibe tša bona. Eupša ke lehu la mang leo le bego le ka khupetša ka go loka melato ya batho ka moka?

Molao wa Modimo go setšhaba sa bogologolo sa Isiraele o be o nyaka gore “bophelô bo lefyê ka bophelô.” (Ekisodo 21:​23) Go ya ka tekanyetšo ye ya molao, lehu leo le bego le ka khupetša melato ya batho le be le tla swanelwa ke go ba la tekanyo e lekanago le seo se ilego sa lahlegela Adama. Ke feela lehu la motho yo mongwe yo a phethagetšego leo le bego le ka lefa meputso ya sebe. Jesu e be e le motho yo bjalo. Ka kgonthe, Jesu e be e le “topollo e lekanago” bakeng sa go phološa batho ka moka bao ba ka lopollwago ba ba tšwilego go Adama.​—1 Timotheo 2:6, NW; Ba-Roma 5:​16, 17.

Lehu la Jesu le na le Mohola o Mogolo

Lehu la Adama le be le se na mohola; o ile a swanelwa ke go hwela sebe sa gagwe. Lega go le bjalo, lehu la Jesu le be le e-na le mohola o mogolo ka gobane o hwile a le boemong bja go se be le sebe. Jehofa Modimo o be a ka amogela mohola wa bophelo bjo bo phethagetšego bja Jesu e le topollo bakeng sa bana ba kwago ba Adama wa modiradibe. Le gona mohola wa sehlabelo sa Jesu ga o šome feela go lefelela dibe tša rena tša nakong e fetilego. Ge nkabe go le bjalo, nkabe re se na bokamoso. Ka ge re imilwe sebeng, re a kgolwa gore re tla dira sebe gape. (Psalme 51:5) Re ka leboga gakaakang ka ge lehu la Jesu le re fa sebaka sa go hwetša phethego yeo mathomong Jehofa a bego a e reretše bana ba Adama le Efa!

Adama a ka swantšhwa le tate yo a hwilego gomme a re tlogetše ka gare ga sekoloto se segolo sa ditšhelete (sebe) seo go se nago tsela e kgonegago go rena go ka tšwa go sona. Ka lehlakoreng le lengwe, Jesu o swana le tate yo a lokilego yo a hwilego gomme a re tlogeletše bohwa bjo bo humilego bjo bo sa re lokollego feela sekolotong se segolo seo Adama a re imeditšego ka sona eupša gape bo re thekga ka mo go lekanego gore re tle re phele ka mo go sa felego. Lehu la Jesu ga e fo ba go phumolwa ga dibe tša nakong e fetilego; eupša gape ke tokišetšo e kgahlišago bakeng sa bokamoso bja rena.

Jesu o a phološa ka gobane o re hwetše. Le gona lehu la gagwe ke tokišetšo e bohlokwa gakaakang! Ge e ba re le lebelela e le karolo ya tharollo ya Modimo bakeng sa bothata bjo bo raraganego bja sebe sa Adama, tumelo ya rena go Jehofa le tseleng ya gagwe ya go dira dilo e a matlafatšwa. Ee, lehu la Jesu ke tsela ya go phološa “mang le mang yo a bontšhago tumelo” go yena sebeng, bolwetšing, botšofading le lehung ka bolona. (Johane 3:​16, NW) Na o leboga Modimo ka ge a dirile thulaganyo ye e lerato bakeng sa phološo ya rena?

[Seswantšho go letlakala 5]

Adama o tlišitše sebe le lehu godimo ga batho

[Seswantšho go letlakala 6]

Jehofa o neile tharollo e phethagetšego