Dira Gore Pelo ya Gago e Boife Jehofa

“A dipelo tša bôná e ka bê e le tše byalo ka mehla, ba mpoifa, ba hlôkômêla ditaêlô tša-ka ka moka.”​—DOITERONOMIO 5:29.

1. Re ka kgonthišega bjang gore ka letšatši le lengwe batho ba tla thabela go lokologa poifong?

POIFO e tshwentše batho ka nywaga-kgolo e mentši. Go boifa tlala, bolwetši, bokebekwa goba ntwa go dira gore batho ba dimilione ba dule ba le tlalelong. Ke ka lebaka leo matseno a Boipolelo bja Kakaretšo bja Ditshwanelo tša Batho a bontšhago kganyogo ya go tliša lefase leo go lona batho ka moka ba tlago go thabela go lokologa poifong. * Ka mo go thabišago, Modimo ka noši o re kgonthišetša gore lefase le bjalo le tla tla​—gaešita le ge e se ka maiteko a batho. Ka moporofeta wa gagwe Mika, Jehofa o re holofetša gore lefaseng la gagwe le lefsa la go loka, ‘ga go na yo a tla tšhošago batho ba gagwe.’​—Mika 4:4.

2. (a) Mangwalo a re kgothaletša bjang go boifa Modimo? (b) Ke dipotšišo dife tšeo di ka rotogago ge re nagana ka tlamo ya rena ya go boifa Modimo?

² Ka lehlakoreng le lengwe, poifo e ka ba tutuetšo e holago. Ka Mangwalong, bahlanka ba Modimo ba kgothaletšwa leboelela go boifa Jehofa. Moše o boditše ba-Isiraele gore: “O boifê Morêna Modimo wa xaxo, O dirêlê Yêna.” (Doiteronomio 6:​13) Nywaga-kgolo ka morago, Salomo o ngwadile gore: “Boifa Modimo, O lôtê taêlô tša xaxwe. Ké se se swanetšexo batho bohle.” (Mmoledi 12:​13) Ka modiro wa rena wa go nea bohlatse, wo o dirwago ka tlase ga tlhokomelo ya barongwa, le rena ka mo go swanago re kgothaletša batho bohle gore “boifang Modimo Le rêtê Yêna.” (Kutollo 14:​6, 7) Go tlaleletša go boifeng Jehofa, Bakriste ba swanetše go mo rata ka dipelo tša bona ka moka. (Mateo 22:​37, 38) Re ka rata bjang Modimo gomme ka nako e swanago ra ba ra mmoifa? Ke ka baka la’ng go le bohlokwa go boifa Modimo yo lerato? Re hwetša mehola efe ka go hlagolela poifo ya go boifa Modimo? Bakeng sa go araba dipotšišo tše, sa pele re swanetše go kwešiša seo go boifa Modimo go se bolelago le gore ke bjang mohuta wo wa poifo o bopago karolo e bohlokwa ya tswalano ya rena le Jehofa.

Tlhompho, Kgodišo le Poifo

3. Poifo ya go boifa Modimo e bolela’ng?

³ Poifo ya go boifa Modimo ke maikwelo ao Bakriste ba swanetšego go ba le ona ka Modiri wa bona. Tlhaloso e nngwe ya poifo ye ke “tlhompho le kgodišo ya kgonthe ya go godiša Mmopi gotee le poifo e nepagetšego ya go boifa go se mo kgahliše.” Ka gona, poifo ya go boifa Modimo e tutuetša dibopego tše pedi tše bohlokwa tša maphelo a rena: boemo bja rena bja kgopolo ka Modimo le boemo bja rena bja kgopolo ka boitshwaro bjoo a bo hloilego. Go molaleng gore dibopego tše ka bobedi di bohlokwa gomme di swanelwa ke go elwa hloko. Bjalo ka ge Vine’s Expository Dictionary of New Testament Words e bontšha, go Bakriste poifo ye ya kgodišo ke ‘tutuetšo e laolago ya bophelo, bobedi ditabeng tša moya le tša boitshwaro.’

4. Re ka hlagolela bjang maikwelo a tlhompho le kgodišo bakeng sa Mmopi wa rena?

⁴ Re ka hlagolela bjang maikwelo a tlhompho le kgodišo bakeng sa Mmopi wa rena? Re dula re boifa ge re bona boalo bjo bobotse bja naga, diphororo tše di kgahlišago kudu tša meetse goba go sobela ga letšatši mo go kgahlišago. Maikwelo a a gola ge re lemoga ka mahlo a tumelo, letsogo la Modimo leo le dirilego mediro e bjalo ya tlholo.  Go oketša moo, go etša Kgoši Dafida, re lemoga go hlaelelwa ga rena ge re ipapiša le tlholo ya Jehofa e boifišago. “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé, O di beilexo, Ke re motho ké eng, xe O bile O sa mo lebale?” (Psalme 8:​3, 4) Tlhompho ye e tseneletšego, e lebiša kgodišong yeo e re tutueletšago go leboga le go tumiša Jehofa bakeng sa sohle seo a re direlago sona. Dafida gape o ngwadile gore: “Ke a Xo leboxa x’O mpopile wa matete-tete; medirô y’axo ké mehlôlô; le môya wa-ka o hlatha tše kxolo.”​—Psalme 139:14.

5. Ke ka baka la’ng re swanetše go boifa Jehofa, gomme ke mohlala ofe woo re nago le wona tabeng ye?

⁵ Maikwelo a tlhompho le kgodišo a tšweletša poifo e agago le e hlomphegago ka matla a Modimo e le Mmopi le bolaodi bja gagwe e le Mmuši yo a swanetšego wa legohle. Ponong yeo moapostola Johane a e bonego, “xo be xo eme bao ba fentšexo Sebata le seswanthšô sa sôna”​—balatedi ba tloditšwego ba Kriste maemong a bona a legodimong​—ba goeletša ka gore: “Ké e mexolo, ké e tlabaxo, medirô ya xaxo Morêna Modimo Ra-matla-ohle. ’Tsela tša xaxo ké tša xo loka, tša xo rereša, Wene Kxoši ya dithšaba. Wa xo se šiê Wene Morêna e ka ba mang?” (Kutollo 15:​2-4) Poifo ya go boifa Modimo e tšwago kgodišong e tseneletšego ya go godiša bogolo bja gagwe, e tutueletša babuši-gotee le Kriste Mmušong wa legodimo go hlompha Modimo bjalo ka mmuši yo a phagamego. Ge re ela hloko tšohle tše Jehofa a di fihleletšego le tsela ya go loka yeo ka yona a bušago legohle, na ga re na lebaka leo le kwagalago la go mmoifa?​—Psalme 2:​11; Jeremia 10:7.

6. Ke ka baka la’ng re swanetše go ba le poifo e agago ya go boifa go se kgahliše Jehofa?

⁶ Lega go le bjalo, go tlaletša go hlompheng le kgodišong, poifo ya go boifa Modimo e swanetše go akaretša poifo e agago ya go boifa go se mo kgahliše goba go se mo kwe. Ka baka la’ng? Ke ka gobane le ge Jehofa e le “wa xo se fêlê pelo, wa botho byo boxolo,” re swanetše go gopola gore “a [ka] se kê a lesa xo ôtla mosenyi.” (Ekisodo 34:​6, 7) Gaešita le ge e le yo lerato le wa kgaugelo, Jehofa ga a kgotlelele go se loke le go dira dibe ka boomo. (Psalme 5:​4, 5; Habakuku 1:​13) Bao ka boomo le ka go se itshole ba dirago bobe mahlong a Jehofa le bao ba  ipeago maemong a go mo ganetša, ba ka se dire bjalo gomme ba hlokišwa kotlo. Go etša ge moapostola Paulo a boletše, “xo wêla diatleng tša Modimo e a phelaxo xo a šiiša.” Go ba le poifo e agago ya go boifa go wela boemong bjo bjalo, go dira e le tšhireletšo go rena mafelelong.​—Ba-Hebere 10:31.

“Le mo Xomarêlê”

7. Re na le mabaka afe a go bota matla a Jehofa a go phološa?

⁷ Poifo ya borapedi ya go boifa Modimo le go lemoga ka mo go nepagetšego matla a gagwe a magolo, ke dikokwane tša go bota le go holofela Jehofa. Go fo swana le ge ngwana yo monyenyane a ikwa a šireletšegile ge tatagwe a le kgaufsi, ka mo go swanago re ikwa re šireletšegile e bile re na le kholofelo ka tlase ga letsogo la Jehofa leo le hlahlago. Ela hloko kamoo ba-Isiraele ba ilego ba arabela ka gona ka morago ga ge Jehofa a ba ntšhitše Egipita: “Ké mo Ba-Isiraele ba bonexo tše seatla se sexolo sa Modimo se di dirilexo Ba-Egipita; xomme sethšaba sa boifa Morêna, sa dumêla Morêna le Mošê mohlanka wa xaxwe.” (Ekisodo 14:​31) Phihlelo ya Eliša le yona e nea bohlatse bja therešo ya gore “morongwa wa Morêna ó xoraxorêla ba ba mmoifaxo; ó a ba namolêla.” (Psalme 34:7; 2 Dikxoši 6:​15-17) Histori ya mehleng yeno ya batho ba Jehofa mohlomongwe le diphihlelo tša rena ka noši, di tiišetša gore Modimo o bontšha matla a gagwe bakeng sa bao ba mo hlankelago. (2 Koronika 16:9) Ka gona re thoma go lemoga gore “x’o šia Morêna O tlo iketla ruri.”​—Diema 14:26.

8. (a) Ke ka baka la’ng poifo ya go boifa Modimo e re tutueletša go sepela ditseleng tša gagwe? (b) Hlalosa kamoo re swanetšego go ‘kgomarela’ Jehofa ka gona.

⁸ Poifo e agago ya go boifa Modimo ga se feela gore e re hlohleletša go mmota le go bea kholofelo go yena, eupša gape e re tutueletša go sepela ditseleng tša gagwe. Ge Salomo a be a kgakola tempele, o ile a rapela Jehofa ka gore: “Ba [Isiraele] Xo boifê, ba swarê ka tsela tša xaxo ka mehla yohle bà sa phela mo naxeng ye O e neetšexo bô-rrawešo.” (2 Koronika 6:​31) Pejana, Moše o be a ile a kgothaletša ba-Isiraele gore: “Le latêlê Morêna Modimo wa lena, Le boifê Yêna, Le hlôkômêlê ditaêlô tša xaxwe, Le kwê se a se bolêlaxo, Le mo dirêlê, Le mo xomarêlê.” (Doiteronomio 13:4) Bjalo ka ge ditemana tše di bontšha gabotse, kganyogo ya go sepela ditseleng tša Jehofa le go mo ‘kgomarela’ e tšwa go boteng le go holofeleng Modimo. Ee, poifo ya go boifa Modimo e re lebiša go kweng Jehofa, go mo hlankela le go mo kgomarela, bjalo ka ge ngwana yo monyenyane a kgomarela e le ka kgonthe go tatagwe yo a mmotago le go mo holofela ka mo go tletšego.​—Psalme 63:8; Jesaya 41:13.

Go Rata Modimo ke go Mmoifa

9. Tswalano ke efe magareng ga go rata Modimo le go boifa Modimo?

⁹ Go ya ka pono ya Mangwalo, go boifa Modimo ga go fediše go mo rata ka tsela le ge e le efe. Ka mo go fapanego, ba-Isiraele ba ile ba laelwa gore ‘ba boife Jehofa, ba sepele ditseleng tša gagwe mo go fela gomme ba mo rate.’ (Doiteronomio 10:​12) Ka gona, poifo ya go boifa Modimo le lerato la go mo rata di tswalana kgaufsi. Poifo ya go boifa Modimo e re tutueletša go sepela ditseleng tša gagwe, gomme se ka morago se nea bohlatse bja lerato la rena la go mo rata. (1 Johane 5:3) Se ke se se kwagalago ka gobane ge re rata motho yo mongwe, re boifa ka mo go swanetšego go mo kweša bohloko. Ba-Isiraele ba ile ba kweša Jehofa bohloko ka tsela ya bona ya borabele lešokeng. Ka ntle le pelaelo re ka se nyake go dira selo le ge e le sefe bakeng sa go tliša manyami a bjalo go Tatago rena wa legodimong. (Psalme 78:​40, 41) Ka lehlakoreng le lengwe, ka ge ‘Jehofa a kgahlwa ke bao ba mmoifago,’ go kwa ga rena le go botega ga rena go thabiša pelo ya gagwe. (Psalme 147:​11; Diema 27:​11) Lerato la go rata Modimo le re tutueletša go mo thabiša gomme poifo ya go boifa Modimo e re thibela go mo kweša bohloko. Ke dika tšeo di tlatšanago e sego tšeo di ganetšanago.

10. Jesu o ile a bontšha bjang gore o thabišwa ke go boifa Jehofa?

¹⁰ Tsela ya bophelo ya Jesu Kriste e bontšha gabotse kamoo re ka ratago le go boifa Modimo ka gona ka tsela e swanago. Moporofeta Jesaya o ngwadile ka Jesu gore: “Môya wa Morêna ó tlo dula mo xo yêna, e lexo môya wa bohlale, le wa thlaloxanyô, môya wa keletšo le wa matla, môya wa tsebô le wa xo šia Morêna. Xo šia Morêna  xo tlo mo kxahla.” (Jesaya 11:​2, 3) Go ya ka boporofeta bjo, moya wa Modimo o tutueditše Jesu go boifa Tatagwe wa legodimong. Go oketša moo, re lemoga gore poifo ye, yeo e lego kgole le go ba morwalo, e be e le mothopo wa kgotsofalo. Jesu o ile a thabela go dira thato ya Modimo le go mo thabiša, gaešita le maemong a thata kudu. Ge a be a lebeletšane le go bolawa mo go tlago koteng ya tlhokofatšo, o ile a botša Jehofa gore: “E se bê ka mo xo rataxo Nna, e bê ka mo xo rataxo Wene.” (Mateo 26:​39) Ka baka la poifo ye ya go boifa Modimo, Jehofa o ile a theetša dikgopelo tša Morwa wa gagwe ka go di amogela, a mo matlafatša gomme a mo phološa lehung.​—Ba-Hebere 5:7.

Go Ithuta go Boifa Jehofa

11, 12. (a) Ke ka baka la’ng re swanetše go ithuta go boifa Modimo? (b) Jesu o re ruta bjang go boifa Jehofa?

¹¹ Ka go se swane le poifo ya tlhago yeo re bago le yona ge re bona matla le bogolo bja tlhago, poifo ya go boifa Modimo ga e fo itlela. Ke ka baka leo Dafida yo Mogolo, Jesu Kriste a fetišetšago taletšo ye go rena ka mokgwa wa boporofeta: “Tlang lena Bana Le nkweng, ke Le rutê xo boifa Morêna.” (Psalme 34:​11) Re ka ithuta bjang go boifa Jehofa go Jesu?

¹² Jesu o re ruta go boifa Jehofa ka go re thuša go kwešiša semelo se sebotse kudu sa Tatago rena wa legodimong. (Johane 1:​18) Mohlala wa Jesu ka noši o utolla kamoo Modimo a naganago ka gona le kamoo a dirišanago le ba bangwe ka gona, ka gobane Jesu o bontšha semelo sa Tatagwe ka mo go phethagetšego. (Johane 14:​9, 10) Go oketša moo, ka sehlabelo sa Jesu, re kgona go ya go Jehofa ge re rapelela go lebalelwa dibe tša rena. Pontšho ye e kgolo kudu ya kgaugelo ya Modimo ka noši ke tutuetšo e matla ya go mmoifa. Mopsalme o ngwadile gore: “Xobane tebalêlô e xo Wêna, xore O tlê O boifyê.”​—Psalme 130:4.

13. Ke megato efe yeo e lokeleditšwego pukung ya Diema yeo e re thušago go boifa Jehofa?

¹³ Puku ya Diema e nea lelokelelo la megato yeo e dirago gore re kgone go hlagolela poifo ya go boifa Modimo. “Ngwan’a-ka! Xe O ka dumêla dikeletšô tša-ka, ’me wa hlôkômêla ditaelô tša-ka, Xe bohlale O bo sêkêxêla tsêbê wa lebiša pelo y’axo mo xo lexo thlaloxanyô, Xe O ka bitša temoxô wa hlabošetša thlaloxanyô ’ntšu la xaxo, . . . Ké mo O tl’o xo tseba xo boifa Morêna, wa fihlêla xo tseba Modimo.” (Diema 2:​1-5) Ka gona, gore re boife Modimo, re swanetše go ithuta Lentšu la gagwe, re katane e le ka kgonthe go kwešiša taelo ya lona ke moka re ele hloko keletšo ya lona.

14. Re ka latela bjang keletšo yeo e bego e neilwe dikgoši tša Isiraele?

¹⁴ Kgoši e nngwe le e nngwe ya Isiraele ya bogologolo e be e laetšwe go dira kopi ya Molao gomme ‘a e bale ka mehla ka moka ya bophelo bja gagwe, gore a ithute go boifa Jehofa Modimo wa gagwe, a hlokomele tše di bolelwago ke molao woo le ditaelo tšeo.’ (Doiteronomio 17:​18, 19) Go bala Beibele le go ithuta go bohlokwa bakeng sa rena ge e ba re tla ithuta go boifa Jehofa. Ge re dutše re diriša melao ya motheo ya Beibele maphelong a rena, ganyenyane-ganyenyane re hwetša bohlale bja Modimo le tsebo. Re thoma go ‘tseba go boifa Jehofa’ ka gobane re bona mafelelo a mabotse ao e  a tšweletšago maphelong a rena, gomme re tšeela godimo tswalano ya rena le Modimo. Go feta moo, ka go bokana ka mehla le badumedi-gotee le rena, ba banyenyane le ba bagolo ka moka ba ka theetša thuto ya Modimo, ba ithuta go boifa Modimo le go sepela ditseleng tša gagwe.​—Doiteronomio 31:​12.

Go Thaba yo Mongwe le yo Mongwe yo a Boifago Jehofa

15. Ke ka ditsela dife go boifa Modimo go tswalanago le borapedi bja rena go yena?

¹⁵ Di tloga fase feela, re ka bona gore go boifa Modimo ke boemo bja kgopolo bjo bobotse bjo ka moka ga rena re swanetšego go bo hlagolela, ka ge e le karolo e bohlokwa ya borapedi bja rena go Jehofa. E re lebiša go mmoteng ka mo go feletšego, go sepela ditseleng tša gagwe le go mo kgomarela. Bjalo ka ge e bile sa therešo ka Jesu Kriste, go boifa Modimo go ka ba gwa re tutueletša go phethagatša keno ya rena ya boineelo gona bjale le ka mo go sa felego.

16. Ke ka baka la’ng Jehofa a re kgothaletša go mmoifa?

¹⁶ Go boifa Modimo le ka mohla ga se mo go nyamišago goba mo go thibelago ka mo go sa swanelago. Beibele e re kgonthišetša gore: “Wa lehlôxônôlô ké e a boifaxo Morêna, mang le mang a sepelaxo ditseleng tša xaxwe.” (Psalme 128:1) Jehofa o re kgothaletša go mmoifa ka gobane o a tseba gore seka se se tla re šireletša. Re lemoga go tshwenyega ga gagwe ka lerato mantšung a gagwe go Moše: “A dipelo tša bôná [ba-Isiraele] e ka bê e le tše byalo ka mehla, ba mpoifa, ba hlôkômêla ditaêlô tša-ka ka moka; ké mo ba ka bexo ba dula bà thabile, bôná le bana ba bôná neng le neng!”​—Doiteronomio 5:29.

17. (a) Re hwetša mehola efe ka go boifa Modimo? (b) Ke dibopego dife tša poifo ya go boifa Modimo tšeo di tlago go ahla-ahlwa sehlogong se se latelago?

¹⁷ Ka mo go swanago, ge e ba re dira gore dipelo tša rena di boife Modimo, dilo di tla re sepelela gabotse. Ka ditsela dife? Sa pele, boemo bjo bjalo bja kgopolo bo tla thabiša Modimo gomme bo tla re gogela kgaufsi le yena. Dafida o tsebile go tšwa phihlelong ya gagwe ya motho ka noši gore “ó tlo dira tše di tl’o xo kxahla ba ba mmoifaxo; ó kwa dillô tša bôná, ’me ó a ba phološa.” (Psalme 145:​19) Sa bobedi, poifo ya go boifa Modimo e tla re hola ka gobane e tla kgoma boemo bja rena bja kgopolo malebana le seo se fošagetšego. (Diema 3:7) Sehlogo se se latelago se tla ahla-ahla kamoo poifo ye e re šireletšago ka gona kotsing ya moya, gomme se tla seka-seka mehlala ya Mangwalo ya banna bao ba ilego ba boifa Modimo gomme ba furalela bobe.

[Mengwalo ya ka tlase]

Na o ka Araba tše di Latelago?

• Go boifa Modimo go bolela’ng, gomme go re kgoma bjang?

• Go boifa Modimo le go sepela le Modimo go tswalana bjang?

• Mohlala wa Jesu o bontšha bjang gore go boifa Modimo go tswalana le go rata Modimo?

• Ke ka ditsela dife re ka dirago gore dipelo tša rena di boife Jehofa?

[Dipotšišo tša Thuto]

[Seswantšho go letlakala 17]

Dikgoši tša ba-Isiraele di be di laetšwe go itirela kopi ya motho ka noši ya Molao le go e bala letšatši le letšatši

[Seswantšho go letlakala 18]

Go boifa Jehofa go re lebiša go mmoteng go etša ge morwa a bota tatagwe

[Mothopo wa Seswantšho go letlakala 15]

Stars: Photo by Malin, © IAC/RGO 1991