Bota Jehofa—Modimo wa Kgonthe

Na o kile wa lebelela leratadimeng bošegong bjo bo se nago maru gomme wa bona dinaledi tše makgolo? Na o ka hlalosa bjang go ba gona ga tšona?

BOŠEGONG bjo bo homotšego, dinaledi di ile tša bonagala eka di bolela le Kgoši Dafida wa Isiraeleng ya bogologolo, di mo hlohleletša gore a ngwale gore: “Maxodimo a re anexêla boxolo bya Modimo; medirô ya ’atla tša xaxwe e rêtwa ke leratadima.” (Psalme 19:1) Ee, ke Mmopi go e-na le dibopiwa eo a swanetšwego “ke letaxô le thêtô le matla.”—Kutollo 4:​11; Ba-Roma 1:25.

Beibele e re: “Mo-axa-tšohle ké Modimo.” (Ba-Hebere 3:4) Ka kgonthe, Modimo wa therešo, ‘e a bitšwago Jehofa, yo godimo-dimo, godimo ga lefase ka moka.’ (Psalme 83:​19, PK) Gomme ga se boikgopolelobofora. Jesu Kriste o ile a bolela mabapi le Tatagwe wa legodimong, Jehofa, gore: “E a nthomilego ke wa kgonthe.”—Johane 7:​28, NW.

JehofaMophethi wa Merero ya Gagwe

Leina la Modimo la moswananoši, e lego Jehofa, le tšwelela ka makga a ka bago a 7 000 ka Mangwalong a Sehebere a nnoši. Leina ka bolona le šupa ntlheng ya gore ke wa kgonthe. Leina la Modimo ka go lebanya le bolela gore “Yo a Bakago go ba Gona.” Ka gona Jehofa Modimo o itlhalosa e le Mophethi wa merero ya gagwe. Ge Moše a be a botšiša Modimo leina la gagwe, Jehofa o ile a hlalosa ka botlalo tlhaloso ya lona ka tsela ye: “Ke tla ipontšha ke le seo ke tla ipontšhago ke le sona.” (Ekisodo 3:​14, NW) Phetolelo ya Rotherham e bolela ka go lebanya gore: “Ke Tla Ba se sengwe le se sengwe seo ke kgahlwago ke go ba sona.” Jehofa o itlhatsela e le, goba o kgetha go ba, selo le ge e le sefe seo se nyakegago go dira gore merero le dikholofetšo tša gagwe tša go loka e be tša kgonthe. Ka gona, o na le direto tše dintši tše di kgahlišago tše bjalo ka Mmopi, Tate, Morena wa Legohle, Modiši, Jehofa wa madira, Mokwi wa thapelo, Moahlodi, Mohlahli yo Mogolo le Molopolodi.—Baahlodi 11:​27; Psalme 23:1; 65:2; 73:​28; 89:​26; Jesaya 8:​13, NW; 30:​20, NW; 40:​28; 41:14.

Ke Modimo wa therešo feela yo a ka bago le leina la Jehofa ka mo go swanetšego, ka gobane batho ba ka se tsoge ba kgonthišegile gore maano a bona a tla atlega. (Jakobo 4:​13, 14) Ke Jehofa a nnoši a ka bolelago gore: “Bo-ka pula le leswêla dì e-tšwa lexodimong, ’me di se hlwê di boêla xôna, ya ba tša xo nošetša lefase xore le hloxišê dibyalo, di melê, di fê mobyadi peu, le moji boxôbê,le Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”—Jesaya 55:​10, 11.

Jehofa o phetha morero wa gagwe ka kgodišego mo e lego gore seo se ka bonalago e se sa kgonthe go batho ke sa kgonthe go ya ka pono ya gagwe. Nako e telele ka morago ga ge Aborahama, Isaka le Jakobo ba hwile, Jesu o ile a bolela ka bona gomme a re: “Xomme Modimo [Jehofa] xa se Modimo wa bahu, ké Modimo wa ba ba  phelaxo; xobane ba mo phelêla bohle.” (Luka 20:​37, 38) Bapatriareka ba botegago ba bararo ba be ba hwile, eupša morero wa Modimo wa go ba tsoša o be o kgonthišeditšwe gore o tlo phethagatšwa mo e lego gore go yena go be go le bjalo ka ge eka ba a phela. Go bušetša bahlanka ba ba botegago ba kgale bophelong ga e sa le selo se thata kudu go Jehofa go feta ge go be go le bjalo ge a be a bopa motho wa mathomo go tšwa leroleng la lefase.Genesi 2:7.

Moapostola Paulo o neelana ka mohlala o mongwe o bontšhago gore Modimo o baka seo a rerilego gore se phethwe. Ka Mangwalong, Aborahama o bitšwa “tata xo bontši bya dithšaba.” (Ba-Roma 4:​16, 17) Ge Aborama a be a sešo a ba le bana, Jehofa o ile a fetošetša leina la gagwe go ba Aborahama, yeo e bolelago gore “Tatago Lešaba.” Jehofa o ile a dira gore tlhaloso ya leina leo e fetoge ya kgonthe ka go tsošološa ka mohlolo matla a go belega a Aborahama yo a tšofetšego le mosadi wa gagwe yo a tšofetšego, Sara.—Ba-Hebere 11:​11, 12.

Ka ge a neilwe matla a mantši le bolaodi, Jesu Kriste o boletše ka dilo tša kgonthe go tšwa mothopong wa godimo go feta yeo ya batho. Le ge mogwera wa gagwe wa kgaufsi Latsaro a be a hwile, Jesu o ile a botša barutiwa ba gagwe gore: “Latsaro moxwêra-rena ó robetše; xomme ke ya xo mo tsoša borokong.” (Johane 11:​11) Ke ka baka la’ng Jesu a ile a bolela ka motho yo a hwilego gore o fo ba a ithobaletše?

Ge Jesu a be a fihla motseng wa bo Latsaro wa Bethania, o ile a ya lebitleng gomme a laela gore lefsika leo le bego le tswaletše mojako le tlošwe. Ka morago ga go rapelela godimo, o ile a laela gore: “Latsaro! Tšwaa O tlê mó!” Gomme ge mahlo a babogedi a tsepeletše lebitleng, “mohu a tšwa à tatetšwe matsôxô le maoto ka mašela, sefahloxong à tatetšwe ka lešelana.” Gomme Jesu a re: “Mo tlemolleng Le mo lesê a ikêlê.” (Johane 11:​43, 44) Jesu o ile a tsoša Latsaroa bušetša bophelo go monna yo a bego a hwile ka matšatši a mane! Kriste o be a sa emele therešo gampe ge a be a re mogwera wa gagwe o be a robetše. Go ya ka kgopolo ya Jehofa le Jesu, Latsaro yo a hwilego o be a fo ba a robetše. Ee, Jesu le Tatagwe wa legodimong ba itshwenya ka dilo tšeo e lego tša kgonthe.

Jehofa a ka Fetošetša Dikholofelo tša Rena Gore e be tša Kgonthe

A phapano e kaakang e lego gona magareng ga medimo e forago ya diswantšho le Modimo wa kgonthe! Barapedi ba medimo ya diswantšho ba hlaola ka mo go fošagetšego matla a ka godimo ga a motho go dilo tšeo ba di hlomphago. Lega go le bjalo, tiro ye ya tlhompho, ga e kgone go nea medimo ye ya diswantšho bokgoni bja mohlolo. Ka lehlakoreng le lengwe, Jehofa Modimo a ka šupa ka mo go swanetšego go bahlanka ba gagwe bao e lego kgale ba hwile bjalo ka ge eka ba a phela, ka gobane o kgona go ba nea bophelo gape. “Jehofa ke Modimo wa go rereša” gomme ga a ke a fora batho ba gagwe.—Jeremia 10:​10, PK.

Ke mo go homotšago gakaakang go tseba gore ka nako ya Jehofa e beilwego, bahu bao ba lego ka kgopolong ya gagwe ba tla tsošwaba bušetšwa bophelong! (Ditiro 24:​15) Ee, tsogo e akaretša go tsošwa lefsa ga tsela ya bophelo ya motho. Go gopola tsela ya bophelo ya bao ba hwilego le go ba tsoša ga se bothata go Mmopi, yo a nago le bohlale le matla tšeo di se nago tekanyo. (Jobo 12:​13; Jesaya 40:​26) Ka ge Jehofa a e-na le lerato le legolo, o tla diriša kgopolo ya  gagwe e phethagetšego go bušetša bahu bophelong lefaseng la paradeise ka semelo seo ba bego ba e-na le sona pele ba e-hwa.—1 Johane 4:8.

Ge bofelo bja lefase la Sathane bo dutše bo batamela, ka ntle le pelaelo bokamoso ke bjo bo phadimago go bao ba botilego Modimo wa therešo. (Diema 2:​21, 22; Daniele 2:​44; 1 Johane 5:​19) Mopsalme o a re kgonthišetša: “Xo se xokae e mobe ó tlo ba a ile . . . ba bolêta e tlo ba bôná beng ba naxa; ba tlo thaba ka botlalô bya moláô.” (Psalme 37:​10, 11) Bosenyi le bošoro e tla ba e le dilo tša nakong e fetilego. Toka e tla aparela, gomme mathata a tša boiphedišo a tla ba a ile. (Psalme 37:6; 72:​12, 13; Jesaya 65:​21-23) Mehlala ka moka ya kgethollo ya tša leago, se-morafe, setšhaba le ya bodumedi e tla ba e phumotšwe. (Ditiro 10:​34, 35) Dintwa le dibetša tša ntwa di tla ba di se sa le gona. (Psalme 46:9) Ka nako yeo “mo xo ba ba axilexo fá xo ka se bê le e a rexo: Ke a babya!” (Jesaya 33:​24) Yo mongwe le yo mongwe o tla thabela bophelo bjo bo phethagetšego le bjo bobotse. (Kutollo 21:​3, 4) Go se go ye kae paradeise ya mo lefaseng e tla fetoga selo sa kgonthe. Jehofa o e rerile!

Ee, dikholofelo ka moka tšeo di theilwego Beibeleng di tla phethagatšwa kgaufsinyana. Ke ka baka la’ng re swanetše go itumelela go forwa ke dilo tšeo di dirilwego medingwana ya diswantšho lefaseng le mola re ka bea kholofelo ya rena e feletšego go Jehofa? Ke thato ya gagwe gore “batho bohle ba phološwê ba fihlêlê tsebô ya therešô.” (1 Timotheo 2:​3, 4) Go e na le go senya nako le dilo tša rena go boikgopolelo, goba boforeng bja tshepedišo ye ya dilo le medimo ya bjona, a re goleng tsebong ya Modimo yo e lego wa kgonthe le go mmota ka dipelo tša rena ka moka.—Diema 3:​1-6; Johane 17:3.

[Seswantšho go letlakala 6]

Go ya ka kgopolo ya Jehofa le Jesu, Latsaro o be a fo ba a ithobaletše

[Diswantšho go letlakala 7]

Kgaufsinyana paradeise ya mo lefaseng e tla fetoga selo sa kgonthe