Bagoeledi Ba Mmušo Ba A Bega

Bahwela-tumelo ba Mehleng Yeno ba Nea Bohlatse Kua Sweden

LENTŠU la Segerika bakeng sa “hlatse” ke mohwela-tumelo, e lego le le tšwago lentšung la Seisemane “martyr,” leo le bolelago “yo a neelago bohlatse ka lehu la gagwe.” Bakriste ba bantši ba lekgolong la pele la nywaga ba ile ba nea bohlatse ka Jehofa ka go hwela tumelo ya bona.

Ka mo go swanago, lekgolong la bo-20 la nywaga, Dihlatse tše dikete di ile tša hwela ka diatleng tša bathekgi ba botegago ba Hitler ka baka la go kgomarela boema-gare bja tšona ditabeng tša bopolitiki le botšhaba. Bahwela-tumelo ba ba mehleng yeno le bona ba neela gape ka bohlatse bjo matla. Se ke seo se diregilego kua Sweden morago bjale.

Mabapi le go binwa ga monyanya wa bo-50 wa go fela ga Ntwa ya II ya Lefase, mmušo wa Sweden o ile wa hloma lesolo la thuto ya setšhaba ka moka mabapi le Polao e Sehlogo. Modiro wo o ile wa bitšwa Histori e Phelago. Dihlatse tša Jehofa di ile tša laletšwa go tšea karolo le go aba diphihlelo tša tšona.

Dihlatse di ile tša arabela ka go tšweletša pontšho e nago le sehlogo se se rego, Bahlaselwa Bao ba Lebetšwego ba Polao e Sehlogo. E ile ya thoma go bontšhwa Holong ya Kopano ya Dihlatse tša Jehofa kua Strängnäs. Baphologi ba bonego ka mahlo Polao e Sehlogo ba be ba le gona go tla go abelana diphihlelo tša bona le baeng ba fetago 8 400 bao ba ilego ba tla letšatšing la pele! Mafelelong a 1999, pontšho e be e šetše e tšweletše dimusiamong tše fetago 100 le makgoba-pukung a batho bohle go dikologa Sweden, gomme batho ba fetago 150 000 ba be ba e bone. Baeng ba be ba akaretša baemedi ba mmalwa ba mmušo, bao ba ilego ba bolela gabotse ka seo ba se bonego.

Ga go na tiragalo e nngwe ye e kgomago mediro ya Dihlatse tša Jehofa tša Sweden ye e kilego ya bogwa phatlalatšwa le go amogelwa ka tsela e botse ke batho bohle go swana le ye. Baeng ba bantši ba botšišitše gore: “Ke ka baka la’ng le sa ka la re botša ka diphihlelo tša lena tša Polao e Sehlogo peleng?”

Ka morago ga gore pontšho e bontšhwe tikologong ya bona, phuthego e nngwe e ile ya bega koketšego ya 30 lekgolong ya dithuto tša magae tša Beibele! Hlatse e nngwe e ile ya laletša mošomi-gotee le yena go bona pontšho. Mošomi-gotee o ile a amogela taletšo ka lethabo gomme a tla le mogwera. Ka morago, mogwera o ile a bolela gore o hweditše go le thata go kwešiša gore ke bjang batho ba ka bago le tumelo e bjalo e tiilego mo e lego gore ba ka bolawa go e-na le go saena lengwalo leo le bego le ba dira gore ba lahle tumelo ya bona. Se se ile sa lebiša poledišanong e oketšegilego, gomme go ile gwa thongwa thuto ya Beibele le yena.

Go swana le badirišani-gotee le bona ba lekgolong la pele la nywaga, bahwela-tumelo ba ba botegago ba lekgolo la bo-20 la nywaga ba neile bohlatse bja gore Jehofa ke Modimo a nnoši wa therešo, yo a swanetšwego ke tumelo ya rena e sa šišinyegego le potego e sa kwanantšhego.Kutollo 4:11.

[Mothopo wa Seswantšho go letlakala 13]

Camp prisoner: Państwowe Muzeum Oświęcim-Brzezinka, courtesy of the USHMM Photo Archives