Go Hlangwa ka mo go Feletšego re le Barutiši ba Lentšu la Modimo

“Modimo . . . ka kgonthe o re dirile gore re swanelege ka mo go lekanego go ba badiredi.”—2 BA-KORINTHE 3:​5, 6, NW.

1, 2. Ke maiteko afe ao ka dinako tše dingwe a dirwago boboleding, eupša ke ka baka la’ng gantši a palelwa?

O BE o tla ikwa bjang ge e ba o be o ka newa modiro wo o sa swanelegego go ka o dira? Nagana: Ditlabakelo tše o di nyakago di pele ga gago, gomme didirišwa di a hwetšagala. Eupša ga o na kgopolo le ge e le efe ya kamoo o ka tšwelago pele ka modiro. Seo se dirago gore dilo di mpefale kudu le go feta ke gore modiro wo o akgofile. Batho ba ithekgile ka wena. Ke mo go ferekanyago gakaakang!

² Boemo bjo bo bjalo bjo bo gakantšhago ga se bjo e lego bja boikgopolelo ka mo go feletšego. Tšea ka mohlala. Ka dinako tše dingwe, e nngwe ya dikereke tša Bojakane e ile ya leka go rulaganya le go phetha bodiredi bja ntlo le ntlo. Gantši maiteko a bjalo a ile a palelwa, a fela ka dibeke goba dikgwedi tše mmalwa. Ka baka la’ng? Bojakane ga se bja thuša bakgomaredi ba bjona gore ba swanelegele modiro. Gaešita le baruti ga ba swanelegele modiro woo wa boboledi, go sa šetšwe nywaga ya thuto dikolong le diseminaring tša lefase. Ke ka baka la’ng re ka bolela seo?

3. Go 2 Ba-Korinthe 3:​5, 6, ke polelwana efe yeo e dirišitšwego ka makga a mararo, gomme e bolela’ng?

³ Lentšu la Modimo le hlalosa seo se dirago gore motho a swanelege go ba mmoledi wa ditaba tše dibotse tša Bokriste. Moapostola Paulo o ile a budulelwa go ngwala gore: “Ga se gore re swanelega ka mo go lekanego go lekanya gore selo le ge e le sefe se tšwa go rena, eupša go swanelega ga rena ka mo go lekanego go tšwa go Modimo, yoo ka kgonthe a re dirilego gore re swanelege ka mo go lekanego go ba badiredi.” (2 Ba-Korinthe 3:​5, 6, NW) Ela hloko polelwana ye e dirišitšwego ka makga a mararo mo“go swanelega ka mo go lekanego.” E bolela’ng? Vine’s Expository Dictionary of Biblical Words e re: “Ge le bolela ka dilo [lentšu la mathomong la Segerika] le bontšha ‘go lekana’ . . . ; ge le lebišitšwe bathong le bolela ‘go kgona,’ ‘go swanelega.’” Ka gona, motho yo a “swanelegago ka mo go lekanego” o a kgona gomme o swanelegela go dira modiro wo a o neilwego. Ee, badiredi ba therešo ba ditaba tše dibotse ba swanelegela go dira modiro wo. Ba a kgona goba ba swanelegela go bolela.

4. (a) Mohlala wa Paulo o bontšha bjang gore go swanelegela bodiredi bja Bokriste ga se ga ba sego kae bao ba kgethilwego? (b) Ke ditsela dife tše tharo tšeo Jehofa a dirago gore re swanelege ka tšona re le badiredi?

⁴ Lega go le bjalo, bokgoni bjoo bo tšwa kae? Na bo tšwa ditalenteng tša motho ka noši? Na bo tšwa bohlaleng bjo bo phagamego? Na bo tšwa thutong e kgethegilego ya dikolo tše hlomphegago? Go molaleng gore moapostola Paulo o be a šetše a e-na le dilo tšeo ka moka. (Ditiro 22:3; Ba-Filipi 3:​4, 5) Lega go le bjalo, o dumetše ka boikokobetšo gore ditshwanelego tša gagwe tša go ba modiredi ga di tšwe dikolong goba thutong e phagamego, eupša di tšwa go Jehofa Modimo. Na ditshwanelego  tše bjalo ke tša ba sego kae bao ba kgethilwego? Paulo o ile a ngwalela phuthego ya Korinthe mabapi le ‘go ba ga rena bao ba swanelegago ka mo go lekanego.’ Seo ka ntle le pelaelo se šišinya gore Jehofa o kgonthišetša gore bahlanka ba gagwe ka moka bao ba botegago ba a swanelega, ba kgona go dira modiro wo a ba abetšego gore ba o dire. Jehofa o dira bjang gore Bakriste lehono ba swanelege? Anke re ahla-ahleng mekgwa e meraro yeo a e dirišago: (1) Lentšu la gagwe, (2) moya wa gagwe o mokgethwa le (3) mokgatlo wa gagwe wa lefaseng.

Lentšu la Modimo le re Dira Gore re Swanelege

5, 6. Ke mafelelo afe ao Mangwalo a Makgethwa a nago le ona go Bakriste ba therešo?

⁵ Sa pele, Lentšu la Modimo le re dira gore re swanelege bjang re le badiredi? Paulo o ngwadile gore: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong, Xore motho wa Modimo e bê yo [“a swanelegago ka mo go feletšego,” NW] boló-ka-tlalô, a [“hlametšwego ka mo go feletšego,” NW] kxonišwê xo dira medirô e botse ka moka.” (2 Timotheo 3:​16, 17) Ka gona, Mangwalo a Makgethwa a thuša go re dira gore re ‘swanelege ka mo go feletšego, re hlamelwe ka mo go feletšego’ go dira “medirô e botse” ya go ruta batho ka Lentšu la Modimo. Lega go le bjalo, go thwe’ng ka bakgomaredi bao bohle ba dikereke tša Bojakane? Ba na le Beibele. Ke bjang yona puku yeo e ka thušago batho ba bangwe gore e be badiredi ba kgonago gomme ya se thuše ba bangwe? Karabo e hwetšwa mokgweng woo re lebelelago Beibele ka wona.

⁶ Ka manyami, ba bantši bao ba tsenago kereke ga ba amogele molaetša wa Beibele ‘e le therešo, bjalo ka lentšu la Modimo.’ (1 Ba-Thesalonika 2:​13) Bojakane bo ikgobokeleditše pego e lešago dihlong tabeng ye. Ka morago ga go fetša nywaga e mmalwa ba ithuta dikolong tša thutatumelo, na baruti ba hlametšwe go ba barutiši ba Lentšu la Modimo? Le gatee. Ke ka baka leo barutwana ba bangwe ba thoma dithuto tša bona seminaring ba dumela Beibele eupša ba aloga e le babelaedi! Ka morago ga moo, go e na le go ruta lentšu la Modimoleo bontši bja bona ba se sa hlwago ba le dumelaba lebiša bodiredi bja bona dibopegong tše dingwe tšeo ba di ratago, ba tšea karolo dingangišanong tša dipolitiki, ba tšwetša pele seo se bitšwago ebangedi ya tša leago goba go phagamiša difilosofi tša lefase ditherong tša bona. (2 Timotheo 4:3) Ka mo go fapanego, Bakriste ba kgonthe ba latela mohlala wa Jesu Kriste.

7, 8. Boemo bja kgopolo bja Jesu mabapi le Lentšu la Modimo bo ile bja fapana bjang le bja baetapele ba bodumedi ba mehleng ya gagwe?

⁷ Jesu ga se a ka a dumelela baetapele ba bodumedi ba mehleng ya gagwe ba tutuetša kgopolo ya gagwe. Go sa šetšwe gore o be a ruta sehlopha se senyenyane, go swana le baapostola ba gagwe  goba lešaba le legolo, Jesu o be a diriša mangwalo a makgethwa gabotse. (Mateo 13:​10-​17; 15:​1-​11) Mokgwa wo o ile wa mo hlaola gare ga baetapele ba bodumedi ba mehleng ya gagwe. Ba be ba iletša ka go tia batho ba tlwaelegilego go nyakišiša ka madibeng a tseneletšego a dilo tša Modimo. Ge e le gabotse, e be e le mokgwa bakeng sa morutiši wa mehleng yeo go dumela gore dikarolo tše dingwe tša Beibele ke tše tseneletšego gore di ka hlalosetšwa motho le ge e le ofe ge e se morutwana wa gagwe wa mmamoratwagaešita le ka nako yeo seo se be se dirwa ka lentšu la tlase ba ikhurumeditše dihlogo. Baetapele bao ba bodumedi e nyakile e le bao ba nago le ditumela-khwele mabapi le go bolela ka dikarolo tše itšego tša Beibele go etša ge ba dirile ka go bitša leina la Modimo!

⁸ Kriste o be a se bjalo. O be a dumela gore ga se feela ba sego kae bao ba kgethilwego, eupša batho ka kakaretšo ba be ba swanetše go ela hloko “mantšu ohle a a tšwaxo molomong wa Modimo.” (Mongwalo o sekamego ke wa rena.) Jesu o be a sa kgahlegele feela go hlalosetša sehlopha sa dirutegi tša Mangwalo tsebo ya motheo. O boditše barutiwa ba gagwe gore: “Se ke Le botšaxo sôna lefsifsing, se boleleng seetšeng; se Le se kwaxo Lè sêbêlwa tsebeng Le se xoêlêlê Lè le seokamong.” (Mateo 4:4; 10:​27) Jesu o be a fišegela go abelana le batho ba bantši ka mo go ka kgonegago tsebo ya go tseba Modimo.

9. Bakriste ba therešo ba diriša Beibele bakeng sa eng?

⁹ Lentšu la Modimo le swanetše go ba motheo wa kgonthe wa thuto ya rena. Ka mohlala, ge re nea polelo ka Holong ya Mmušo ya Dihlatse tša Jehofa, ga se ka mehla e lego mo go lekanego go bala ditemana tše di kgethilwego ka Beibeleng. Re ka swanelwa ke go hlalosa, re bontšhe le go diriša lengwalo leo le lego tabeng e dikologilego. Pakane ya rena ke go phagamiša molaetša wa Beibele wo o ngwadilwego gomme re o gatelele ka dipelong tša batheetši ba rena. (Nehemia 8:​8, 12) Le gona, Beibele e swanetše go dirišwa ge e ba e le mo go swanetšego go nea keletšo goba go nea tayo e phošollago. Gaešita le ge batho ba Jehofa ba bolela maleme a sa swanego gomme ba e-tšwa ditlogong tše di fapa-fapanego, ka moka ga bona ba hlompha Puku ya dipukuBeibele.

10. Molaetša o buduletšwego wa Beibele o ka ba le mafelelo afe go rena?

¹⁰ Ge o dirišwa ka tlhompho e bjalo, molaetša wa Beibele o na le matla. (Ba-Hebere 4:​12) Le tutuetša batho go dira diphetogo maphelong a bona, tše bjalo ka go furalela mekgwa yeo e sego ya mangwalo ya bootswa, bohlotlolo, go direla medimo ya diswantšho, botagwa le bohodu. Le thušitše ba bantši kudu go apola motho wa kgale gomme ba apara yo mofsa. (Ba-Efeso 4:​20-24) Ee, ge e ba re e hlompha go feta kgopolo le ge e le efe ya motho goba metlwae gomme re e diriša ka potego, Beibele ka kgonthe e ka re dira gore re kgone, re hlangwe ka mo go feletšego re le barutiši ba Lentšu la Modimo.

Moya wa Jehofa o re Dira Gore re be ba Swanelegago

11. Ke ka baka la’ng moya o mokgethwa wa Jehofa o bitšwa ka mo go swanetšego gore ke “mothuši”?

¹¹ Sa bobedi, anke re ahla-ahleng karolo ya moya o mokgethwa wa Jehofa goba matla a dirago, tabeng ya go re dira ba hlamilwego ka mo go feletšego. Le ka mohla ga se ra swanela go lebala gore moya wa Jehofa ke matla a magolo ao a lego gona. Jehofa o ile a nea Morwa wa gagwe yo a rategago matla a go fetišetša matla ao a magolo legatong la Bakriste ba therešo. Jesu o ile a šupa moya o mokgethwa ka mo go swanetšego gore ke “mothuši.” (Johane 16:7, NW) O ile a kgothaletša balatedi ba gagwe gore ba kgopele Jehofa moya woo, a ba kgonthišetša gore Jehofa o tla ba nea ona ka seatla se se bulegilego.—Luka 11:​10-13; Jakobo 1:17.

12, 13. (a) Ke ka baka la’ng go le bohlokwa gore re rapelele moya o mokgethwa gore o re thuše bodireding bja rena? (b) Bafarisei ba bontšhitše bjang gore moya o mokgethwa o be o sa šome go bona?

¹² Re swanetše go rapelela moya o mokgethwa letšatši le letšatši, kudu-kudu bakeng sa gore o re thuše bodireding bja rena. Ke mafelelo afe ao matla a a šomago a nago le ona go rena? A ka tutuetša monagano wa rena le pelo, a re thuša go fetoga, go gola moyeng le go apola motho wa kgale gomme ra apara yo mofsa. (Ba-Kolose 3:​9, 10) A ka re thuša go hlagolela dika tše dibotse tša go swana le tša Kriste. Ba bantši ba rena re ka kgona go bolela Ba-Galatia 5:​22, 23 ka hlogo. Ditemana tšeo di lokeletša dienywa tša moya wa Modimo. Sa mathomo ke lerato. Seenywa seo se bohlokwa bodireding bja rena. Ka baka la’ng?

¹³ Lerato ke sehlohleletši se segolo. Lerato la go rata Jehofa le magagabo rena le tutueletša Bakriste ba therešo go aba ditaba tše dibotse. (Mareka 12:​ 28-​31) Ka ntle le lerato le bjalo, re ka se ke ra swanelega e le ka kgonthe go ba barutiši ba Lentšu la Modimo. Ela hloko phapano magareng ga Jesu le Bafarisei. Mateo 9:​36 e bolela ka Jesu gore: “Xe a bôna mašaba a batho a ba šôkêlwa; ka xobane ba be ba lapile, bà lahlexile wa dinku tše di se naxo modiši.” Bafarisei ba be ba ikwa bjang ka batho feela? Ba itše: “Ké sethšaba sé sa xo se tsebe Molaô; sôna ké dihlôbôxwa.” (Johane 7:​49, mongwalo o sekamego ke wa rena.) Bafarisei bao ba be ba se na lerato la go rata batho eupša ba tletše ka lehloyo. Ka kgonthe, moya wa Jehofa o be o sa šome go bona.

14. Mohlala wa Jesu wa go bontšha lerato bodireding o swanetše go re tutuetša bjang?

¹⁴ Jesu o be a kwela batho bohloko. O be a lemogile go tlaišega ga bona. O be a tseba gore ba be ba swerwe gampe, ba hlobotšwe, gomme ba lahlilwe bjalo ka dinku tšeo di se nago modiši. Johane 2:​25 e re botša gore Jesu o be “à hlatha se se lexo mothong.” Ka ge e be e le Mošomedi yo a nago le Bokgoni wa Jehofa nakong ya tlholo, Jesu o be a e-na le kwešišo ya kgonthe ka tlhago ya batho. (Diema 8:​30, 31) Kwešišo yeo e dirile gore lerato la gagwe e be le tseneletšego. Eka lerato le bjalo ka mehla e ka ba matla a tutuetšago modiro wa rena wa boboledi! Ge e ba re nagana gore re ka kaonefatša ntlheng ye, anke re rapeleleng moya o mokgethwa wa Jehofa gomme re šome ka go dumelelana le dithapelo tša rena. Jehofa o tla re araba. O tla romela matla a a sa thibelegego go re thuša gore re be bjalo ka Kriste ka mo go oketšegilego, yo a bego a swanelega ka mo go phagamego go bolela ditaba tše dibotse.

15. Ke bjang mantšu a Jesaya 61:​1-3 e ilego ya ba ao a šomago go Jesu gomme ka nako e swanago a pepentšha bamangwalo le Bafarisei?

¹⁵ Ditshwanelego tša Jesu di be di e-tšwa kae? O itše: “Môya wa Morêna o na le nna.” (Luka 4:​17-​21) Ee, Jehofa ka boyena o ile a kgetha Jesu ka moya wa gagwe o mokgethwa. Jesu ga se a ka a nyaka ditshwanelego tše dingwe. Na baetapele ba bodumedi ba mehleng ya gagwe ba be ba kgethilwe ka moya o mokgethwa? Aowa. Le gona ba be ba se ba hlamelwa go phethagatša Jesaya 61:​1-3, yeo Jesu a ilego a e balela godimo gomme a e diriša go yena. Hle bala ditemana tšeo, gomme o iponele kamoo baikaketši ba mangwalo le Bafarisei ba sa kago ba ba le ditshwanelego. Ba be ba se na ditaba tše dibotse tšeo ba ka di tsebatšago go badiidi. Le gona, ba be ba ka goelela bjang tokologo go bao ba lego kgolegong le go fodiša difofu? Ka kgopolo ya moya, bona ka noši ba be ba foufetše e bile ba le bokgobeng bja meetlo e hlamilwego ke batho! Ka go se swane le banna bao, na re swanelegela go ruta batho?

16. Ke kholofelo efe yeo batho ba Jehofa lehono ba ka e kwago ge e le mabapi le go swanelega ga bona e le badiredi?

¹⁶ Ke therešo gore ga se ra ithuta dikolong tša Bojakane tša dithuto tše phagamego. Ga se ra kgethwa ke barutiši ba diseminari tša bo-rathutatumelo. Ka gona, na re hlaelela ditshwanelego? Aowa! Go kgethwa ga rena re le Dihlatse tša gagwe go tšwa go Jehofa. (Jesaya 43:​10-12) Ge e ba re rapelela moya wa gagwe gomme re šoma ka go dumelelana le thapelo ya rena, re na le ditshwanelego tše phagamego. Go ba gona ga se ra phethagala gomme re hlaelelwa go fihlelela mohlala wo o beilwego ke Morutiši yo Mogolo Jesu. Lega go le bjalo, na ga re leboge gore Jehofa o diriša moya wa gagwe bakeng sa go re dira gore re swanelege le go hlangwa re le barutiši ba Lentšu la gagwe?

Mokgatlo wa Jehofa o re Dira Gore re Swanelege

17-19. Diboka tša rena tša beke le beke tše hlano tšeo di newago ke mokgatlo wa Jehofa di re thuša bjang go swanelega re le badiredi?

¹⁷ Ga bjale anke re ahla-ahleng mokgwa wa boraro woo ka ona Jehofa a re dirago bao ba hlamilwego ka mo go feletšego re le barutiši ba Lentšu la gagwephuthego ya gagwe ya lefaseng goba mokgatlo, wo o re tlwaetšago go ba badiredi. Bjang? E-fo nagana ka lenaneo la thuto leo re le thabelago! Dibekeng tše tlwaelegilego, re ba gona dibokeng tše hlano tša Bokriste. (Ba-Hebere 10:​24, 25) Re kopana ka dihlopha tše nyenyane Thutong ya Puku ya Phuthego bakeng sa go thabela thuto e tseneletšego ya Beibele ka puku ya go ithuta yeo e dirilwego gore e hwetšagale ka mokgatlo wa Jehofa. Ka go theetša le go nea ditlhaloso, re ithuta go tšona le go kgothatšana. Gape re hwetša tlhahlo ya motho ka noši le tlhokomelo go tšwa go moswari wa thuto ya puku. Sebokeng sa Phatlalatša le Thutong ya Morokami, re monya motlalo wa dijo tše di humilego tša moya.

¹⁸ Sekolo sa rena sa Bodiredi sa Pušo ya Modimo se reretšwe go re nea tlhahlo ya kamoo re ka  rutago ka gona. Ka go lokišetša dipolelo tša morutwana, re ithuta kamoo re ka dirišago Lentšu la Modimo ka gona bakeng sa go ruta ditaba ka tekanyo e kgolo. (1 Petro 3:​15) Na o šetše o kile wa abelwa go nea polelo ka sehlogo se se bonalago e le se se tlwaelegilego kudu gomme wa ikhwetša o ithuta selo se sengwe se sefsa go sona? Yeo ke phihlelo e tlwaelegilego. Ga go seo se ka loutšago tsebo ya rena ka taba go feta go e ruta ba bangwe. Gaešita le ge re se ra abelwa polelo rena ka noši, re sa dutše re ka ithuta go ba barutiši ba babotse. Re lemoga dika tše dibotse go morutwana yo mongwe le yo mongwe, gomme re nagana kamoo re ka ekišago dika tšeo.

¹⁹ Seboka sa Tirelo le sona se lokišeleditšwe go re hlama re le barutiši ba Lentšu la Modimo. Beke ka beke re thabela dipolelo tše di phelago, dipoledišano le dipontšho tšeo di sekametšego ka lehlakoreng la bodiredi bja rena. Ke thero efe yeo re tlago go e diriša? Re ka lebeletšana bjang le ditlhohlo tše kgethegilego tšhemong ya rena? Ke dibopego dife tša boboledi tšeo di re bulegetšego tšeo go ka nyakegago gore re di hlahlobišiše ka mo go tšwelago pele? Ke eng seo se tlago go re dira barutiši ba atlegago kudu ge re dira maeto a go boela le go swara dithuto tša Beibele? (1 Ba-Korinthe 9:​19-22) Dipotšišo tše bjalo di hlaloswa le go ahla-ahlwa ka botlalo Sebokeng sa Tirelo. Dikarolo tše dintši tša seboka di theilwe dihlogong tše di lego go Tirelo ya Rena ya Mmušo, e lego sedirišwa se sengwe seo se neilwego go re hlamela modiro wa rena o bohlokwa.

20. Re ka holega bjang ka botlalo go tšwa dibokeng le dikopanong?

²⁰ Ka go lokišetša diboka le go ba gona go tšona ke moka ra diriša seo re ithutilego sona modirong wa rena bjalo ka barutiši, re hwetša tlwaetšo e nabilego bakeng sa go re hlama. Eupša go sa na le go gontši. Gape re na le diboka tše dikgolodikopano tše nyenyane le tše dikgolotšeo di hlametšwego go re dira ba swanelegago re le barutiši ba Lentšu la Modimo. Le gona re lebelela pele gakaakang go theetšeng ka kelohloko le go diriša keletšo e bjalo!—Luka 8:18.

21. Ke bohlatse bofe bjo bo bontšhago gore tlwaetšo ya rena e bile e šomago, gomme tumišo e išwa go mang?

²¹ Na tlwaetšo yeo Jehofa a e neago e a šoma? Anke dipego di ipolelele. Ngwaga o mongwe le o mongwe, batho ba dikete tše makgolo ba thušwa go ithuta dithuto tša motheo tša Beibele le go phela ka go dumelelana le seo Modimo a se nyakago go bona. Palo ya rena e a oketšega, eupša ga go le o tee wa rena yo a swanetšego go tumišwa bakeng sa seo. Re swanetše go lebelela ditaba ka tsela ya kgonthe go swana le ge Jesu a dirile. O itše: “Xa xo motho e a kxonaxo xo tla xo Nna, xe a sa xôxwe ke Tate e a nthomilexo.” Go swana le baapostola ba kgale, ga se ra rutega ka tsela e kgolo e bile re batho ba tlwaelegilego. (Johane 6:​44; Ditiro 4:​13) Katlego ya rena e ithekgile ka Jehofa yo a gogelago batho ba dipelo tše di botegago therešong. Paulo o beile taba gabotse ka gore: “Nna ke byetše. Apôllô ó nošeditše xomme Modimo ke Yêna a medišitšexo.”—1 Ba-Korinthe 3:6.

22. Ke ka baka la’ng re sa swanela go nyama ka mo go feteletšego mabapi le go tšea karolo ka mo go tletšego bodireding bja Bokriste?

²² Ee, Jehofa Modimo o akaretšwa ka go lebanya modirong wa rena re le barutiši ba Lentšu la gagwe. Ga se ka mehla re ka ikwago re swanelega bjalo ka barutiši. Eupša gopola, ke Jehofa yo a gogelago batho go yena le go Morwa wa gagwe. Ke Jehofa yo a dirago gore re swanelege go hlankela bao ba bafsa ka Lentšu la gagwe, moya wa gagwe o mokgethwa le ka mokgatlo wa gagwe wa lefaseng. Anke re arabeleng tlwaetšong ya Jehofa ka go diriša dilo tše dibotse tšeo gona bjale a di neago bakeng sa go re dira gore re be bao ba hlamilwego ka mo go feletšego re le barutiši ba Lentšu la Modimo!

O tla Araba Bjang?

• Beibele e re hlama bjang bakeng sa modiro wa boboledi?

• Ke karolo efe yeo moya o mokgethwa o e kgathago gore re swanelege re le badiredi?

• Ke ka ditsela dife mokgatlo wa Jehofa wa lefaseng o go thušitšego go swanelega o le mmoledi wa ditaba tše dibotse?

• Ke ka baka la’ng re swanetše go ba le kholofelo ge re tšea karolo bodireding?

[Dipotšišo tša Thuto]

[Seswantšho go letlakala 25]

E le morutiši wa Lentšu la Modimo, Jesu o ile a bontšha lerato la go rata batho